ᔪᐊᓇᓯᐅᑉ ᐊᒡᓚᖏᑦ 10
10
ᐰᖅᓯᔨᐅᑉ ᐊᑦᔨᐅᑎᑕᐅᓂᖓ
1“ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᐃᑎᖅᑕᕐᕕᒃᑯᑦ ᐃᑎᖏᑦᑐᖅ ᓰᐱᒃᑯᕕᖕᒧᑦ ᐊᓯᐊᒍᓪᓕ ᐃᓯᖅᑕᕐᕕᐅᖏᑦᑐᒃᑯᑦ ᐊᕙᓗ ᒪᔪᕐᓗᒍ ᐃᓯᖅᑐᖅ ᑎᒡᓕᒃᑎᐅᓪᓗᓂ ᑎᒎᕅᔨᐅᕗᖅ ᐱᒋᓐᖏᑕᒥᓂᒃ. 2ᐃᑎᖅᑕᕐᕕᒃᑯᓪᓕ ᐃᑎᖅᑐᖅ ᑖᓐᓇ ᓰᐲᑦ ᐰᖅᓯᔨᒋᕚ. 3ᑖᓐᓇ ᐃᑎᖅᑕᕐᕕᐅᑉ ᑲᒪᔨᖓᑕ ᐅᒃᑯᐃᕈᑎᕚ; ᓰᐲᑦ ᓂᐱᖓ ᑐᓴᖅᐹᑦ ᓰᐱᖁᑎᒥᓂᒃ ᕾᖁᔨᓕᕐᖕᒪᑦ ᐊᑎᖏᑦ ᑍᓪᓗᒋᑦ ᑕᕝᕙᓐᖓᓪᓗ ᓯᕗᓕᕐᓗᓂ ᐊᓂᖃᑎᒋᕔᑦ. 4ᐊᓂᖃᑎᒋᔭᕇᕋᒥᒋᑦ ᓯᕗᓕᖅᐰᑦ, ᓯᐲᓪᓗ ᒪᓕᒃᐹᑦ, ᓂᐱᖓ ᐃᓕᑕᕆᐅᒪᒐᒥᑦᔪᒃ. 5ᖃᐅᔨᒪᓐᖏᑕᒥᖕᓂᒡᓕ ᒪᓕᖕᓂᐊᓐᖏᓚᑦ; ᕿᒫᖔᖅᐳᓪᓕ ᑖᑦᓱᒪᓐᖓᑦ, ᖃᐅᔨᒪᓐᖏᑕᒥ ᓂᐱᖓᓂᒃ ᐃᓕᑕᖅᓯᖏᓐᓇᒥᒃ.”
6ᐊᑦᔨᐅᔪᒥᒃ ᑕᒪᑐᒥᖓ ᔩᓱᓯᐅᑉ ᐅᖃᕐᕕᒋᕔᑦ, ᑐᑭᓯᓐᖏᓚᓪᓕ ᖃᓄᖅ ᑐᑭᓕᖕᒥᒃ ᐅᖃᐅᑦᔭᐅᖕᒪᖔᕐᖕᒥᒃ.
ᔩᓱᓯ ᐰᖅᓯᔨᑦᓯᐊᖑᕗᖅ
7ᑕᕝᕙ ᔩᓱᓯᐅᑉ ᐅᖃᕐᕕᒋᒃᑲᓐᓂᓕᖅᐰᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐅᕙᖓ ᓰᐲᑦ ᐃᑎᖅᑕᕐᕕᒋᕚᖓ. 8ᓯᕗᓂᓐᓂ ᑎᑭᓚᐅᖅᑐᑦ ᑎᒡᓕᒃᑎᐅᓪᓗᑎᒡᓗ ᑎᒎᕅᔨᐅᓚᐅᖅᐳᑦ; ᓰᐲᑦ ᓈᓚᓚᐅᓐᖏᓔᑦ. 9ᐃᑎᖅᑕᕐᕕᐅᕗᖓ; ᓇᓪᓕᐊᑦ ᐅᕙᒃᑯᑦ ᐃᑎᑐᖅ, ᑖᓐᓇ ᐱᐅᓕᔭᐅᓂᐊᖅᐳᖅ, ᐃᑎᕐᓗᓂ ᐊᓂᓗᓂᓗ ᓂᕿᒃᓴᓕᖕᒥᒃ ᓇᓂᓯᓂᐊᖅᐳᖅ. 10ᑎᒡᓕᒃᑎ ᕾᕙᒃᐳᖅ ᑎᒡᓕᒐᕆᐊᖅᑐᕈᒪᓪᓗᓂ ᑐᖁᕅᔪᒪᓪᓗᓂᓗ; ᐅᕙᖓᓕ ᑎᑭᑉᐳᖓ, ᐃᓅᓯᕐᖕᒥᒡᓗ ᐊᔪᖅᓴᕐᓇᖏᑦᑐᒥᒃ ᐱᖃᓕᖁᓪᓗᖏᑦ.
11“ᐅᕙᖓ ᐰᖅᓯᔨᑦᓯᐊᖑᕗᖓ. ᐰᖅᓯᔨᑦᓯᐊᖅ ᐃᓅᓯᕐᖕᒥᓂᒃ ᑐᓂᓯᕗᖅ ᓰᐲᑦ ᐱᓪᓗᒋᑦ. 12ᑎᓕᔭᐅᓯᒪᑐᐃᓐᓇᖅᑐᕐᓕ ᐰᖅᓯᔨᐅᖏᑦᑐᖅ, ᓇᖕᒥᓂᖃᖏᑦᑐᕐᓗ ᓰᐱᓂᒃ, ᐊᒪᕈᕐᖕᒥᒃ ᕾᓕᖅᑐᒥᒃ ᑕᑯᒐᒥ ᓰᐲᑦ ᕿᒤᓐᓇᕐᓗᒋᑦ ᕿᒫᕗᖅ; ᐊᒪᕉᑉ ᓰᐲᑦ ᐊᖑᓪᓗᒋᑦ ᓯᐊᒻᒪᖅᑎᑉᐰᑦ. 13ᑎᓕᔭᐅᓯᒪᑐᐃᓐᓇᖅᑐᖅ ᕿᒫᕗᖅ ᑎᓕᔭᐅᓯᒪᑐᐃᓐᓇᕋᒥ ᓰᐱᓂᒃ ᐊᓐᓂᕈᓱᖏᓐᓇᒥ. 14#ᒫᑎᐅᓯ 11:27; ᓘᑲᓯ 10:22.ᐅᕙᖓ ᐰᖅᓯᔨᑦᓯᐊᖑᕗᖓ; ᓇᖕᒥᓂᒃᑲ ᐃᓕᑕᕆᕙᒃᑲ ᐃᓕᑕᕆᔭᐅᓪᓗᖓᓗ ᑖᒃᑯᓄᖓ. 15ᓲᕐᓗ ᐊᑖᑕᐅᑉ ᐃᓕᑕᕆᖕᒪᖓ ᐅᕙᖓᓗ ᐊᑖᑕ ᐃᓕᑕᕆᒐᒃᑯ; ᐃᓅᓯᕋᓗ ᑐᓂᕙᕋ ᓰᐲᑦ ᐱᓪᓗᒋᑦ. 16ᐊᓯᖏᓐᓂᒃ ᓱᓕ ᓰᐱᖁᑎᖃᖅᐳᖓ, ᑕᕝᕙᓐᖓᑦ ᓰᐱᒃᑯᕕᖕᒥᒃ ᐱᓯᒪᖏᑦᑐᓂᒃ; ᑖᒃᑯᐊᑦᑕᐅᖅ ᑕᕝᕗᖓ ᐃᑎᖅᑎᑦᓴᕆᐊᖃᖅᐸᒃᑲ; ᓂᐱᓐᓂᒃ ᑐᓴᕈᒫᖅᐳᑦ. ᐊᑕᐅᓯᐅᖃᑎᒌᒍᒫᖅᐳᑦ, ᐊᑕᐅᓯᕐᖕᒥᒡᓗ ᐰᖅᓯᔨᖃᕐᓗᑎᒃ.
17“ᑕᒪᓐᓇ ᐱᓪᓗᒍ ᐊᑖᑕᐅᑉ ᓇᒡᓕᒋᕚᖓ, ᐃᓅᓯᓐᓂᒃ ᑐᓂᓯᓂᓐᓄᑦ, ᐊᒻᒪ ᐅᑎᖅᑎᑦᓯᔪᓐᓇᖁᓪᓗᖓ ᐃᓅᓯᓐᓂᒃ. 18ᐃᓅᓯᓐᓂᒃ ᐊᖅᓵᖅᑕᐅᔪᓐᓇᓐᖏᓚᖓ ᑭᓇᒧᓪᓘᓐᓃᑦ, ᓇᖕᒥᓂᕐᓕ ᐃᓱᒪᖅᓱᕐᓗᖓ ᑐᓂᕐᕈᑎᒋᕙᕋ. ᐱᔪᓐᓇᕐᖕᓂᖃᖅᐳᖓ ᑐᓂᕐᕈᑎᒋᓗᒍ, ᐱᔪᓐᓇᕐᖕᓂᖃᕆᕗᖓᓗ ᐊᒻᒪ ᐅᑎᖅᑎᓪᓗᒍ; ᑕᒪᑐᒥᖓ ᑍᒫᒃ ᐊᑖᑕᒪ ᐱᖁᓚᐅᖅᐹᖓ ᐱᓇᓱᐊᖁᓪᓗᖓ.”
19ᑕᕝᕙ ᔫᑎᑦ ᐊᖏᖃᑎᒌᒍᓐᓃᕆᕗᑦ ᐅᖃᐅᓰᑦ ᑕᒪᒃᑯᐊ ᐱᓪᓗᒋᑦ. 20ᐊᒥᓱᑦ ᑕᕝᕙᓃᑦᑐᑦ ᐅᖃᖅᐳᑦ, “ᐊᓂᕐᖕᓂᕐᓗᖕᒥᒃ ᐃᓗᒻᒥᖅᑕᐅᓯᒪᒐᒥ, ᐃᓱᒤᕈᑎᓯᒪᕗᖅ; ᓱᖕᒪᓄᓇ ᓈᓚᒃᐱᓯᐅᒃ?”
21ᐊᓯᖏᑦ ᐅᖃᖅᐳᑦ, “ᐊᓂᕐᖕᓂᕐᓗᖕᒥᒃ ᐃᓗᒻᒥᖅᑕᐅᓯᒪᔪᖅ ᑍᒫᒃ ᐅᖃᓪᓚᒍᓐᓇᓐᖏᓚᖅ. ᖃᓄᖅ ᐊᓂᕐᖕᓂᕐᓗᒃ ᑕᐅᑐᖏᑦᑐᓂᒃ ᑕᐅᑐᓕᖅᑎᑦᓯᔪᓐᓇᖅᐹ?”
ᔩᓱᓯᐅᑉ ᓇᕐᕈᒋᔭᐅᓂᖓ ᔫᑎᓂᑦ
22ᐅᑭᐅᖑᓚᐅᖅᐳᖅ ᑐᒃᓯᐊᕐᕕᒡᔪᐊᑉ ᐊᑐᖅᑕᐅᔪᓐᓇᖅᓂᖓᑕ ᐅᒃᑯᐃᕐᑕᐅᓂᖓᓂ ᓇᓪᓕᐅᓐᓂᖅᓯᐅᑎᓪᓗᒋᑦ ᔨᕉᓴᓕᒻᒥ; 23ᔩᓱᓯ ᐱᓱᒃᑎᓪᓗᒍ ᑐᒃᓯᐊᕐᕕᒡᔪᐊᕐᖕᒥ, ᓲᓗᒨᓂᐅᑉ ᑐᖅᓲᖓᓂᒃ ᑍᔭᐅᔪᒃᑯᑦ. 24ᔫᑎᑦ ᔩᓱᓯ ᐊᕙᓗᕚᑦ ᐅᖃᐅᑎᓪᓗᒍ, “ᖃᓄᖅ ᐊᑯᓂᐅᑎᒋᔪᖅ ᐅᕙᑦᑎᓐᓄᑦ ᐅᖃᖅᑍᓕᒪᓂᐊᖅᐲᑦ? ᐅᖃᐅᑎᑦᓯᐊᓚᐅᖅᑎᒍᑦ ᓱᓕᑦᓯᐊᕐᓗᑎᑦ ᙭ᔅᑑᓯᐅᖕᒪᖔᖅᐱᑦ.”
25ᔩᓱᓯᐅᑉ ᑭᐅᕔᑦ, “ᐅᖃᐅᑎᓚᐅᖅᐸᑦᓯ, ᐅᒃᐱᓚᐅᓐᖏᓚᓯᓕ. ᐱᓂᐊᕐᖕᓃᑦ ᐱᓂᐊᕐᖕᓂᕆᔭᒃᑲ ᐊᑖᑕᒪ ᐊᑎᖓᓂ, ᑕᒪᒃᑯᐊ ᓇᓗᓁᖅᓯᕗᑦ ᐅᕙᓐᓂᒃ; 26ᐅᒃᐱᓐᖏᓚᓯᓕ, ᓰᐱᖁᑎᓐᓄᑦ ᐃᓚᒋᔭᐅᖏᓐᓇᑦᓯ. 27ᓰᐱᖁᑎᒪ ᓂᐱᒐ ᑐᓴᖅᐹᑦ, ᖃᐅᔨᒪᒐᒃᑭᑦ, ᒪᓕᒃᐹᖓ. 28ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᑐᓂᓯᕕᒋᕙᒃᑲ, ᐊᓯᐅᔪᖃᕐᖕᓂᐊᓐᖏᓚᑦ, ᓇᓪᓕᐊᓐᓂᒃᓘᓐᓃᑦ ᐊᖅᓵᖅᑕᐅᓂᐊᓐᖏᓚᖓ ᑖᒃᑯᓂᖓ ᐱᓯᒪᔭᓐᓂ. 29ᐊᑖᑕᒐ ᑐᓂᓯᓯᒪᔪᖅ ᐅᕙᓐᓄᑦ ᑖᒃᒪᑯᓂᖓ, ᑕᒤᓐᓂᑦ ᐊᖏᓂᖅᐸᐅᕗᖅ, ᑭᓇᒧᓪᓘᓐᓃᑦ ᐊᑖᑕᒐ ᐊᖅᓵᖅᑕᐅᔪᓐᓇᓐᖏᓚᖅ ᑖᒃᑯᓂᖓ ᑎᒍᒥᐊᕐᖕᓂᖓᓂᒃ. 30ᐅᕙᖓᓗ ᐊᑖᑕᓗ ᐊᑕᐅᓯᐅᕗᒍᒃ.”
31ᑕᕝᕙ ᔫᑎᑦ ᐅᔭᖅᑲᓂᒃ ᑎᒍᓯᒋᕗᑦ ᔩᓱᓯ ᒥᓪᓗᕈᒪᓪᓗᒍ. 32ᔩᓱᓯᐅᑉ ᐅᖃᐅᑎᕔᑦ, “ᐱᓂᐊᑦᓯᐊᕐᖕᓂᕐᖕᓂᒃ ᐊᒥᓱᓂᒃ ᐃᓕᑦᓯᓐᓄᑦ ᐱᓇᓱᐊᓚᐅᖅᐳᖓ ᐊᑖᑕᒥᑦ ᐱᔪᓂᒃ; ᐱᓂᐊᕐᖕᓃᑦ ᑕᒪᒃᑯᐊ ᓇᓪᓕᐊᑦ ᐱᓪᓗᒋᑦ ᒥᓪᓗᕈᒪᕕᓯᓐᖔ?”
33 #
ᒨᓯᓯ ᐱᖓᔪᖏᑦ 24:16. ᔫᑎᑦ ᑭᐅᕚᑦ, “ᐱᓂᐊᑦᓯᐊᕐᖕᓂᕆᓚᐅᖅᑕᑎᑦ ᐱᓪᓗᒋᑦ ᒥᓪᓗᕈᒪᓐᖏᓚᑦᑎᒋᑦ ᒎᑎᒥᒡᓕ ᐅᖃᕐᖕᓂᕐᓘᑎᖃᕐᖕᓃᑦ ᐱᓪᓗᒍ; ᐃᓄᑐᐃᓐᓇᐅᓪᓗᑎᑦ, ᐃᓕᖕᓂᒃ ᒎᑎᓐᖑᖅᑎᓐᓇᕕᑦ.”
34 #
ᐃᓐᖏᕈᑦ 82:6. ᔩᓱᓯᐅᑉ ᑭᐅᕔᑦ, “ᐱᖁᔭᑦᓯᓐᓂ ᑎᑎᕋᖅᓯᒪᔪᖃᖅᐳᖅ, ‘ᐅᖃᐅᑎᕙᑦᓯ, ᐃᓕᑦᓯ ᒎᑎᐅᕗᓯ.’ 35ᒎᑎᐅᑉ ᐃᓄᐃᑦ ᑍᓚᐅᖅᐸᒋᑦ ᒎᑎᓂᒃ ᐃᓄᖕᓄᑦ ᐅᖃᓪᓚᒃᑎᓪᓗᒍ ᑍᑦᓱᒪᓂ, ᖃᐅᔨᒪᕗᒍᑦ ᐊᒡᓔᑦ ᐊᑭᕋᖅᑐᖅᑕᐅᔪᓐᓇᖏᒻᒪᑕ, 36ᒎᑎᐅᑉ ᐃᑦᔪᕐᖕᓁᑎᓚᐅᖅᑕᖓᓄᑦ ᑎᓕᓚᐅᖅᑕᖓᓄᓪᓗ ᓄᓇᕐᔪᐊᕐᖕᒧᑦ ᐅᖃᕈᓐᓇᖅᐱᓰ ‘ᒎᑎᒥᒃ ᐅᖃᕐᖕᓂᕐᓘᑎᖃᖅᐳᑎᑦ,’ ᐅᖃᓚᐅᕐᖕᓂᕋ ᐱᓪᓗᒍ, ‘ᒎᑎᐅᑉ ᐃᕐᖕᓂᕆᕚᖓ’? 37ᐊᑖᑕᒪ ᐱᓂᐊᖅᑕᐅᖁᔭᖏᓐᓂᒃ ᐱᓇᓱᐊᖏᒃᑯᒪ, ᐅᒃᐱᕆᑦᑍᓕᓯᓐᖓ; 38ᐱᓇᓱᐊᕈᒃᑭᓪᓕ, ᐅᒃᐱᕆᖏᒃᑲᓗᐊᕈᑦᓯᓐᖓ, ᐱᓂᐊᕐᖕᓃᑦ ᐅᒃᐱᕆᓯᒋᒃ, ᐃᓕᑕᖅᓯᓕᖁᓪᓗᓯ ᖃᐅᔨᓕᕐᓗᓯᓗ ᐊᑖᑕ ᐅᕙᓐᓃᒻᒪᑦ ᐅᕙᖓᓗ ᐊᑖᑕᓐᓃᓐᓇᒪ.”
39ᑕᕝᕙ ᔩᓱᓯ ᑎᒍᓇᓱᐊᕋᓗᐊᖅᐹᑦ, ᕿᒪᒃᓯᕗᕐᓕ ᑖᒃᑯᓇᓐᖓᑦ.
40 #
ᔪᐊᓇᓯ 1:28. ᐅᑎᓕᕆᕗᖅ ᔪᐊᕐᑕᓂᐅᑉ ᑰᖓᑕ ᐊᑭᐊᓄᑦ ᔪᐊᓇᓯᐅᑉ ᐹᑉᑎᑦᓯᕕᒋᖃᑦᑕᓚᐅᖅᑕᖓᓄᑦ, ᑕᕝᕙᓃᓕᕐᓗᓂ. 41ᐊᒥᓱᑦ ᐅᐸᒃᐹᑦ; ᐅᖃᕐᓗᑎᒃ, “ᔪᐊᓇᓯ ᓇᓗᓁᒃᑯᑕᕐᖕᓂᒃ ᐱᓇᓱᐊᓚᐅᓐᖏᓚᖅ, ᐅᖃᐅᓯᕆᓚᐅᖅᑕᓕᒫᖏᓪᓕ ᑖᓐᓇ ᐱᓪᓗᒍ ᓱᓕᑦᓯᐊᖅᐳᑦ.” 42ᑕᕝᕙᓃᑦᑐᑦ ᐊᒥᓱᑦ ᔩᓱᓯᒧᑦ ᐅᒃᐱᓕᖅᐳᑦ.
Currently Selected:
ᔪᐊᓇᓯᐅᑉ ᐊᒡᓚᖏᑦ 10: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.