ᐋᐴᓯᑕᓖᑦ ᐱᓂᐊᕐᖕᓂᖏᑦ 28
28
ᓄᓇᒥ ᒪᐅᓪᑕᒥ
1ᓄᓇᒦᓕᕋᑦᑕ ᑐᑭᓯᓕᖅᐳᒍᑦ ᕿᑭᖅᑕᖅ ᐊᑎᖃᕐᖕᒪᑦ ᒪᐅᓪᑕᒥᒃ. 2ᑕᕝᕙᓂ ᓄᓇᖃᖅᑐᑦ ᐱᑦᓯᐊᕐᕕᒋᕚᑎᒍᑦ, ᐃᑯᐊᓚᑎᑦᓯᓪᓗᑎᒃ ᑐᓐᖓᓱᒃᑎᑉᐹᑎᒍᑦ, ᓯᓚᓗᓕᕐᖕᒪᑦ ᐃᒃᑮᕐᖕᓇᖅᓯᓪᓗᓂᓗ. 3ᐸᐅᓗᓯ ᕿᔪᖕᓂᒃ ᓄᐊᑦᓯᓪᓗᓂ ᐃᑯᒪᒧᑦ ᐃᓕᓯᓇᓱᐊᖅᑎᓪᓗᒍ, ᖁᒡᓗᒋᐊᖅ ᑐᖁᓐᓇᖅᑐᓕᒃ ᐆᓇᖅᑐᓕᐊᕋᓱᐊᑐᖅ ᓴᖅᑭᑉᐳᖅ, ᐸᐅᓗᓯᐅᑉ ᐊᒡᒐᖏᓐᓂᒃ ᑮᓯᒐᒥ ᐊᑕᓕᖅᐳᖅ. 4ᒪᐅᓪᑕᒥᐅᓪᓕ ᑕᑯᒐᒥᑦᔪᒃ ᐊᒡᒐᖏᓐᓂ ᓂᕕᖓᔪᖅ, ᐃᒻᒥᖕᓄᑦ ᐅᖃᖅᐳᑦ, “ᓇᓗᓇᓐᖏᓚᖅ ᐅᓇ ᐃᓄᐊᖅᑎᐅᖕᒪᑦ, ᐃᒫᓂᑦ ᐱᐅᓕᔭᐅᒐᓗᐊᕋᒥ, ᐊᑭᓂᐊᖅᑕᐅᓂᕐᖕᒥᓄᑦ ᐃᓅᑦᔮᔪᓐᓃᖅᑐᖅ.” 5ᐸᐅᓗᓯᐅᓪᓕ ᖁᒡᓗᒋᐊᖅ ᐃᑯᒪᒧᑦ ᐃᒋᑉᐹ, ᖃᓄᐃᓕᔭᐅᓇᓂ ᑖᑦᓱᒧᖓ. 6ᐃᓄᐃᑦ ᐅᑕᖅᑭᓕᖅᐳᑦ ᐸᐅᓗᓯ ᐳᕕᓕᕐᖕᓂᐊᕋᓱᒋᓪᓗᒍ, ᐅᕝᕙᓘᓐᓃᑦ ᑐᖁᓗᓂ ᐅᕐᕈᐃᓐᓇᕐᖕᓂᐊᕋᓱᒋᓪᓗᒍ; ᐊᑯᓂ ᐅᑕᖅᑭᓚᐅᕐᓗᑎᒃ ᖃᓄᐃᑉᐸᓪᓕᖏᒻᒪᑦ, ᐊᓯᐊᓂᒃ ᐃᓱᒪᖃᓕᖅᐳᑦ ᐅᖃᕐᓗᑎᒃ, “ᒎᑎᐅᓇ.”
7ᓇᔪᖅᑕᑦᑕ ᖃᓂᒋᔮᓂ ᐳᑉᓕᐊᓯ ᓄᓇᖁᑎᖃᕋᒥ, ᕿᑭᖅᑕᒥ ᑕᕝᕙᓂ ᐊᖓᔪᖅᑳᕆᔭᐅᔪᖅ, ᑖᑦᓱᒪ ᑐᓐᖓᓱᒃᑎᑦᓯᐊᖅᐹᑎᒍᑦ, ᐅᓪᓗᓂᒡᓗ ᐱᖓᓱᓂᒃ ᑐᔪᕐᖕᒥᐊᕆᕚᑎᒍᑦ. 8ᐳᑉᓕᐊᓯᐅᓪᓗ ᐊᑖᑕᖓ ᐃᓂᓪᓚᖓᓚᐅᖅᐳᖅ ᐆᑎᕐᖕᓇᖅᓯᖃᑦᑕᕐᖕᓇᖅᑐᒥᒃ ᖃᓂᒪᓪᓗᓂ, ᐊᐅᖕᒥᒡᓗ ᐊᓇᖃᓯᐅᑦᔨᕙᒃᓗᓂ; ᐸᐅᓗᓯᐅᑉ ᐳᓛᕆᐊᕐᓗᓂᐅᒃ ᑐᒃᓯᐅᑎᕚ, ᐸᑎᒻᒥᓪᓗᒍ, ᐋᖅᑭᒃᐹ. 9ᐸᐅᓗᓯ ᑍᒫᒃ ᐋᖅᑭᒃᓯᖕᒪᑦ, ᕿᑭᖅᑕᒥᐅᑦ ᐊᓯᖏᑦ ᖃᓂᒻᒪᓯᓖᑦ ᕾᑕᐅᒋᕗᑦ, ᐋᖅᑭᒃᑕᐅᓪᓗᑎᒃ. 10ᓱᓇᑐᐃᓐᓇᕐᖕᓂᒡᓗ ᐊᒥᓱᓂᒃ ᑐᓂᓯᕕᒋᕚᑎᒍᑦ; ᐅᒥᐊᕐᔪᐊᒃᑯᑦ ᐊᐅᓪᓚᓕᕋᑦᑕ ᑕᖁᐊᒃᓴᖅᑖᖅᑎᑉᐹᑎᒍᑦ ᐱᔭᕆᐊᑲᖅᑕᓕᒫᑦᑎᓐᓂᒃ.
ᒪᐅᓪᑕᒥᑦ ᕉᒪᒧᑦ ᐃᖏᕐᕋᓂᕗᑦ
11ᑕᖅᑮᑦ ᐱᖓᓱᑦ ᐊᓂᒍᖅᑎᓪᓗᒋᑦ ᐊᓕᒃᓵᓐᑐᕆᐊᒥᐅᑦ ᐅᒥᐊᕐᔪᐊᖁᑎᖓᒍᑦ ᐊᐅᓪᓚᖅᐳᒍᑦ, ᑖᓐᓇ ᐅᒥᐊᕐᔪᐊᖅ ᕿᑭᖅᑕᒥ ᐅᑮᔪᕕᓂᐅᖕᒪᑦ, ᓇᓗᓁᒃᑯᑕᖃᖅᑐᖅ ᒎᑎᓐᖑᐊᖕᓂᒃ ᒪᕐᕈᓕᐊᕕᓃᖕᓂᒃ ᑲᔅᑐᕆᒥᒡᓗ ᐳᓚᒃᓯᒥᒡᓗ,#28:11 ᑲᔅᑐᕆ ᐳᓚᒃᓯᓗ ᒪᕐᕈᓕᐊᕕᓃᒃ ᒎᑎᒋᔭᐅᔪᑦ, ᑖᒃᑯᐊ ᒎᑎᖃᓚᐅᕐᖕᒪᑕ ᐊᒥᓱᓂᒃ ᐅᕝᕙᓘᓐᓃᑦ ᒎᑎᐅᖃᑕᐅᔪᖅ 12ᓮᕋᑰᓯᒧᑦ ᑎᑭᓐᓇᑕ, ᑕᕝᕙᓃᑉᐳᒍᑦ ᐅᓪᓗᓂᒃ ᐱᖓᓱᓂᒃ. 13ᑕᕝᕙᓐᖓᓪᓗ ᐊᐅᓪᓚᕋᑦᑕ ᕇᒡᒋᐅᒥᒧᑦ ᑎᑭᑉᐳᒍᑦ; ᖃᐅᑎᓪᓗᒍ ᐅᓪᓗᓪᓗᐊᑉ ᓇᓛᓂᑦ ᐊᓄᕌᓕᕐᖕᒪᑦ ᐃᖏᕐᕋᓯᕗᒍᑦ, ᐅᓪᓘᒃ ᒪᕐᕉᒃ ᐊᓂᒍᕐᖕᒪᑎᒃ ᐳᑎᐅᓕᒧᑦ ᑎᑭᑉᐳᒍᑦ. 14ᑕᕝᕙᓂ ᐅᒃᐱᖅᑑᖃᑎᒌᓂᒃ ᑲᑎᓯᒐᑦᑕ, ᑖᒃᑯᐊ ᓇᔪᖅᑕᐅᑬᓐᓇᕈᒪᕗᑦ ᐱᓇᓱᐊᕈᓯᓕᒫᒥᒃ. ᑕᕝᕙᓐᖓᑦ ᕉᒪᒧᐊᖅᐳᒍᑦ. 15ᐅᒃᐱᖅᑑᖃᑎᒌᓪᓕ ᑕᕝᕙᓃᑦᑐᑦ ᑐᓴᕋᒥᒃ ᐅᕙᑦᑎᓐᓂᒃ, ᐸᕐᕆᐊᖅᐹᑎᒍᑦ ᑲᑎᓪᓗᑕ ᑕᑯᕋᓐᓈᕐᕕᖕᒥ ᐊᐱᐅᓯᒥᒃ ᐊᑎᓕᖕᒥ, ᐊᓯᖏᓪᓗ ᑐᔪᕐᖕᒥᕕᖕᓂᑦ ᐱᖓᓱᓂᒃ ᐊᑎᓕᖕᒥ ᑲᑎᒋᕙᕗᑦ. ᐸᐅᓗᓯᐅᑉ ᑕᑯᒐᒥᒋᑦ ᒎᑎ ᐊᖏᔪᒥᒃ ᖁᔭᒋᕚ, ᐊᖏᔪᒥᒃ ᐱᕙᓪᓕᖅᑎᑕᐅᓪᓗᓂ.
ᕉᒪᒥ
16ᕉᒪᒧᓪᓕ ᑎᑭᓐᓇᑕ, ᐸᐅᓗᓯ ᓇᖕᒥᓂᖅ ᐃᒡᓗᖃᖅᑎᑕᐅᕗᖅ, ᐅᓇᑕᖅᑐᒃᓴᒥᒃ ᖃᐅᔨᓴᖅᑎᖃᕐᓗᓂ.
17ᐅᓪᓗᐃᑦ ᐱᖓᓱᑦ ᐊᓂᒍᕐᖕᒪᑕ ᐸᐅᓗᓯᐅᑉ ᔫᑎᑦ ᓯᕗᓕᖅᑎᖏᑦ ᑲᑎᖁᓕᖅᐰᑦ; ᑲᑎᒪᓕᕐᖕᒪᑕ ᐅᖃᐅᑎᕔᑦ, “ᔫᑎᐅᖃᑎᒃᑳ, ᐃᓅᖃᑎᑦᑎᓐᓄᑦ ᐊᑭᕋᖅᑐᕐᖕᓂᕐᖕᒥᒃ ᐊᑐᓚᐅᖅᑎᓐᓇᖓ ᐃᓕᖅᑯᓯᑦᑎᓐᓄᓪᓘᓐᓃᑦ ᓯᕗᓕᕕᓂᑦᑎᓐᓄᓪᓘᓐᓃᑦ, ᔨᕉᓴᓕᒻᒥ ᑎᒍᔭᐅᓚᐅᖅᐳᖓ, ᕉᒪᒥᐅᓄᑦ ᑐᓂᔭᐅᓪᓗᖓ. 18ᑖᒃᑯᐊᓕ ᐅᕙᓐᓂᒃ ᖃᐅᔨᓴᕋᒥᒃ ᑎᒍᔭᐅᓯᒪᔪᓐᓃᖅᑎᑦᓯᖁᔨᓚᐅᖅᐳᑦ, ᖃᐅᔨᒐᒥᒃ ᐸᓯᔭᐅᑦᔪᑎᒃᓴᖃᖏᓐᓇᒪ ᑐᖁᑕᐅᑦᔪᑎᒃᓴᒥᒃ. 19#ᐋᐴᓯᑕᓖᑦ 25:11.ᔫᑎᑦ ᐊᑲᐅᒃᓴᖏᒻᒪᑕ ᑕᒪᑐᒥᖓ, ᐅᖃᕋᓱᓕᓚᐅᖅᐳᖓ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐃᖅᑲᖅᑐᖅᑕᐅᔪᒪᓪᓗᖓ, ᐸᓯᒃᓯᕈᑎᒃᓴᖃᖏᒃᑲᓗᐊᕐᓗᖓ ᐃᓅᖃᑎᑦᑎᓐᓄᑦ ᔫᑎᓄᑦ. 20ᑕᒪᑐᒧᖓ ᑕᕝᕙ ᑕᑯᔪᒪᓚᐅᖅᐸᑦᓯ ᐅᖃᓪᓚᒡᕕᒋᔪᒪᓪᓗᓯᓗ, ᐊᒻᒪᑦᑕᐅᖅ ᒪᑯᓄᖓ ᐊᖅᓵᖅᑑᔭᓄᑦ ᐊᑦᑐᖏᖅᓱᖅᑕᐅᓯᒪᕗᖓ ᐃᓴᕆᐊᓕᒥᐅᑦ ᓂᕆᐅᖕᓂᕆᔭᖓᓐᓂᒃ ᓂᕆᐅᖕᓂᖃᕐᖕᓂᕋ ᐱᑦᔪᑎᒋᓪᓗᒍ.”
21ᑖᒃᑯᐊ ᐅᖃᐅᑎᕚᑦ, “ᑎᑎᖅᑲᐅᓯᐊᓚᐅᖅᓯᒪᓐᖏᓚᒍᑦ ᔫᑎᐊᒥᑦ ᐱᑦᔪᑎᒋᓗᑎᑦ, ᑕᐅᕙᓐᖓᑦ ᐃᓅᖃᑎᕗᑦ ᑎᑭᓯᒪᔪᑦ ᐅᖃᐅᓯᖃᓚᐅᕋᑎᒃ ᐅᕝᕙᓗ ᐱᐅᖏᑦᑐᒥᒃ ᐅᖃᐅᓯᖃᖅᑐᖃᓚᐅᕋᓂ ᐱᑦᔪᑎᒋᓗᑎᑦ. 22ᑐᓴᕈᒪᔪᐊᓘᕗᒍᓪᓕ ᐃᓱᒪᒋᔭᕐᖕᓂᒃ; ᖃᐅᔨᒪᒐᑦᑕ ᓇᓂᑐᐃᓐᓇᖅ ᐃᓄᐃᑦ ᐊᑭᕋᖅᑐᖃᑦᑕᕐᖕᒪᑕ ᑕᒪᑐᒧᖓ ᐃᓚᐅᕕᒋᔭᕐᖕᓄᑦ.”
23ᐸᐅᓗᓯᒥᒡᓗ ᑲᑎᒪᖃᑎᖃᕐᕕᒃᓴᒥᖕᓂᒃ ᐅᓪᓗᒥᒃ ᓇᓗᓁᖅᓯᕗᑦ, ᓇᓪᓕᐅᑎᖕᒪᓪᓗ ᐅᓄᕐᖕᓂᖅᓴᒻᒪᕆᐊᓗᐃᑦ ᕾᕗᑦ ᓇᔪᖅᑕᖓᓄᑦ. ᐅᓪᓛᒥᑦ ᐱᒋᐊᕐᓗᒍ ᐅᓐᓄᒧᑦ ᑎᑭᓪᓗᒍ, ᓇᓗᓇᕈᓐᓃᖅᑎᑦᓯᕗᕐᓗ ᐅᖃᐅᓯᖃᕐᓗᓂ ᒎᑎᐅᑉ ᐊᑕᓂᐅᕕᖓᓂᒃ ᔩᓱᓯᒥᒡᓗ ᑐᑭᓯᔭᐅᑎᑦᓯᓇᓱᐊᖅᐳᖅ ᒨᓯᓯᐅᑉ ᐱᖁᔭᖏᑦ, ᓇᓚᐅᑦᑍᔪᓪᓗ ᐊᒡᓚᖏᑦ ᐊᑐᕐᓗᒋᑦ. 24ᐃᓚᖏᑦ ᐅᒃᐱᓕᖅᐳᑦ ᐅᖃᐅᓯᖏᓐᓂᒃ, ᐃᓚᖏᓪᓕ ᐅᒃᐱᓐᖏᓚᑦ. 25ᑖᒃᑯᐊᓗ ᐃᒻᒥᖕᓄᑦ ᐊᖏᖃᑎᒌᒍᓐᓃᕋᒥᒃ, ᐊᓂᕗᑦ, ᐸᐅᓗᓯ ᐃᒫᒃ ᐅᖃᕐᖕᒪᑦ: “ᐊᓂᕐᖕᓂᖅ ᐃᑦᔪᕐᖕᓁᑦᑐᖅ ᓈᒻᒪᓈᑦᓯᐊᕐᓗᓂ ᐅᖃᖅᓯᒪᕗᖅ ᑐᑭᓯᓇᖅᑐᒥᒃ ᓯᕗᓕᕕᓂᑦᓯᓐᓄᑦ ᐂᓮᐊᓯᒃᑯᑦ ᐅᖃᕋᒥ:
26 #
ᐂᓮᐊᓯ 6:9,10. ‘ᐃᓄᐃᑦ ᐅᐸᒡᓗᒋᑦ ᐅᖃᐅᑎᒃᑭᑦ,
ᑐᓴᖃᑦᑕᕋᓗᐊᕐᓗᓯ ᑐᑭᓯᔪᓐᓇᕐᖕᓂᐊᓐᖏᓚᓯ;
ᑕᑯᖃᑦᑕᕋᓗᐊᕐᓗᓯᓗ, ᐃᓕᑕᖅᓯᓂᐊᓐᖏᓚᓯ.
27ᐃᓄᐃᑦ ᐅᑯᐊ ᐃᓱᒪᖏᑦ ᓯᑎᔪᐊᓘᓕᕐᖕᒪᑕ,
ᓯᐅᑎᖏᓪᓗ ᑐᓵᑦᓯᐊᖏᑦᑐᐊᓘᓕᕐᓗᑎᒃ,
ᐃᔨᖏᓪᓗ ᓯᑯᓐᖏᖓᓪᓗᑎᒃ; ᑍᒤᖏᒃᑯᑎᒃ ᑕᑯᓂᐅᓴᒐᒥᒃ,
ᓯᐅᑎᒥᖕᓄᓪᓗ ᑐᓵᓕᕋᔭᕋᒥᒃ,
ᐆᒻᒪᑎᒥᒃᑎᒍᓪᓗ ᑐᑭᓯᐊᓕᕐᓗᑎᒃ,
ᐅᕙᓐᓄᓪᓗ ᓵᒋᐊᕋᔭᖅᐳᑦ ᐅᕙᖓᓗ ᐋᖅᑭᒃᑲᔭᕋᒃᑭᑦ.’
28“ᑕᒪᓐᓇ ᐱᓪᓗᒍ ᖃᐅᔨᒪᖁᕙᑦᓯ ᒎᑎᐅᑉ ᐱᐅᓕᒃᓯᓂᖓ ᑐᕌᖓᑎᑕᐅᓕᖅᐳᖅ ᔫᑎᐅᖏᑦᑐᓄᑦ; ᑖᒃᑯᐊ ᓈᓚᒍᓐᓇᕐᖕᒪᑕ.”
[ 29ᐸᐅᓗᓯ ᑍᒫᒃ ᐅᖃᕐᖕᒪᑦ, ᔫᑎᑦ ᕿᒪᕉᑎᓕᖅᐳᑦ ᐂᕙᖃᑎᒌᓕᕐᓗᑎᒡᓗ ᐃᒻᒥᖕᓄᑦ.]#28:29 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ
30ᐊᕐᕌᒍᒃ ᒪᕐᕉᒃ ᓈᓪᓗᒋᒃ ᐸᐅᓗᓯ ᑕᕝᕙᓂ ᐃᓂᖃᓚᐅᖅᐳᖅ ᐃᒡᓗᒥᓂ ᓇᖕᒥᓂᖅ ᐊᑭᓕᖅᓱᐃᓪᓗᓂ, ᕾᔪᓕᒫᓂᒃ ᑐᓐᖓᓱᒃᑎᑦᓯᖃᑦᑕᓚᐅᖅᐳᖅ. 31ᒎᑎᐅᑉ ᐊᑕᓂᐅᕕᖓᓂᒃ ᐊᔪᕆᖅᑐᐃᑦᔪᑎᖃᕐᓗᓂ ᐃᓕᓐᓂᐊᖅᑎᑦᓯᑦᔪᑎᖃᕐᓗᓂᓗ ᐊᑕᓂᕐᖕᒥᒃ ᔩᓱᓯ ᙭ᔅᑑᓯᒥᒃ ᓯᕘᕋᓇᓂ ᐊᒡᕕᐊᖅᑕᐅᓇᓂᓗ.
Currently Selected:
ᐋᐴᓯᑕᓖᑦ ᐱᓂᐊᕐᖕᓂᖏᑦ 28: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.