Ọbọsuru 7
7
Stifin Etiñ Ikọ Ke Esop
1Akwa Oku ama obup Stifin ete, “Nte mme ikọ emi etiñde edian fi edi akpanikọ?”
2Stifin ama ọbọrọ ete, “Nditọ ete ye mme ete ekpañ utọñ enọ mi! Abasi ke ubọñ Esie ama ọwọrọ owut ete ñnyin Ebraham idem ke ini emi enye okodude ke obio emi ekotde Mesopotemia, mbemiso enye akaka okoduñ ke Haran. 3Ndien ama ọdọhọ enye ete, ‘Wọrọ kpọñ obio emana fo ye ekpuk fo ndien ka ke isọñ emi Ami ndiwutde fi.’ ” 4Ke ntre enye ama ọkpọñ isọñ Kaldia onyuñ aka okoduñ ke Haran. Ke ete Ebraham ama akakpa, Abasi ama anam enye ọwọrọ edi ke isọñ emi mbufo eduñde ke esit mfin emi. 5Abasi ikọnọhọ Ebraham ndomo nde kiet ke isọñ emi nte inyene esie, ikọnọhọ enye ukpọk ikpat kiet ke isọñ oro; edi Abasi, ama ọñwọñọ ete ke Imọ iyenọ enye, ndien ke edidi inyene esie ye eke emana esie emi editienede enye ke edem. Ke ini emi Abasi akanamde eñwọñọ emi, Ebraham ikenyeneke eyen ndomokiet.
6Emi edi se Abasi eketiñde ọnọ enye, mme nditọ fo eyeduñọ ke esen idut, ebiet emi mmọ edidide ifin ndien eyekama mmọ ke idiọk ke isua ikie inañ 7Abasi ama ọdọhọ ete, edi Ami ñyebiom mme mmọ emi mmọ edinamde ñkpọ inọ ikpe, ndien ke akpatre mmọ eyewọñọ ekpọñ idut oro ndien eyedituak ibuot enọ Mi ke ebiet emi.
8Ndien Abasi ama ọnọ Ebraham ido edinim mbobi nte idiọñọ ediomi. Ke ntre ke Ebraham ekenim Aisik mbobi ke usen itiaita, edide urua kiet, ama ekebe ke usen emana esie; Aisik ama enim Jekọb mbobi; ndien Jekọb ama enim mme ete ñnyin duopeba nde mbobi. 9Mme ikpọ ete emi ema efibe Josef eti eti ndien mmọ ema enyam enye ekedi ofin ke isọñ Ijipt. Edi Abasi ama odu ye enye, 10ndien añyaña enye osio ke kpukpru mme ukut esie. Enye ama ọnọ Josef ọniọñ onyuñ anam enye enyene mfọniso ke iso Fero, Edidem Ijipt; do ke enye akanam enye andikara Ijipt ye ofuri ufọk ubọñ esie.
11“Ke ini oro akañ ama odu ke ofuri isọñ Ijipt ye Kenan, emi akadade ediwak ukut ọsọk mme owo. Mme ete ete ñnyin ikekemeke ndinyene udia ndomokiet. 12Ke ntre ke ini emi Jekọb okokopde ete ke udia odu ke isọñ Ijipt enye ama ọdọñ nditọ esie, mme ete ete ñnyin eka Ijipt ke ata akpa edika. 13Ke ọyọhọ ikaba emi mmọ ekekade Josef ama ayararede idem esie ọnọ nditọ ete esie, ndien Fero ama ọdiọñọ abaña ekpuk Josef. 14Josef ama ọdọñ etop ọnọ ete esie Jekọb, onyuñ ọdọhọ ete yak enye ye ofuri ufọk esie edi Ijipt; mmọ ekedi owo ata ye efut ke kpukpru. 15Ke ntre Jekọb ama aka isọñ Ijipt, ke ebiet emi enye ye mme ete ete ñnyin ekekpañade. 16Ema ebuhọde okpo mmọ edi Sekem ebiet emi ekebukde mmọ ke udi emi Ebraham ekedepde oto ubon Hamọ.”
17“Ke ini ekekperede Abasi ndinam eñwọñọ Esie emi Enye akanamde ọnọ Ebraham, ibat ikọt ñnyin emi ekedude ke Ijipt ema etọt eti eti. 18Ke akpatre obufa ọbọñ emi mikọdiọñọke Josef ama ọtọñọ ndikara Ijipt. 19Enye ama anam ñkpọ ye ikọt ñnyin ñkari ñkari onyuñ efik mme ete ete ñnyin ke edinyik mmọ ndiduọñọ mme nditọ nsek mmọ man mmọ ekpaña.”
20“Ekedi ke utọ ini emi ke ekeman Moses ndien Abasi ama ama enye, enye ama onyuñ eye uyai eti eti. Ekekama enye ke ufọk ete esie ke ọfiọñ ita, 21ndien ke ini ema ekemen enye esio ke ufọk, adiaha edidem Fero ama ada enye aman onyuñ akama enye nte eyen esie. 22Ema ekpep enye kpukpru ọniọñ nditọ Ijipt, enye ama onyuñ okop odudu ke ikọ ye ke edinam.”
23“Ke ini Moses ekesimde isua aba, enye ama ebiere ndikese nditọ ete esie mbon Isrel. 24Enye ama okut nte owo Ijipt ọkọtuhọrede eyen ete esie kiet; do enye ama aka ufre ndien enye ama owot owo Ijipt oro. 25Moses ekekere ete ke nditọ ete esie eyediọñọ ete ke Abasi edida imọ inyaña mmọ, edi mmọ ikọfiọkke.
26Ke ndañnsiere, Moses ama edisim nditọ Isrel iba nte ekeñwanade eñwan, ndien enye ama añwana ndikpe nnọ mmọ. Enye ama ọdọhọ ete, Mme ufan, mbufo edi nditọ ete, ndien ntaha mbufo etọhọde kiet ye eken-e?”
27“Edi enye emi akamiade enye eken ama onuk Moses esik ada, onyuñ obup enye ete, ‘Anie ekenam fi andikara ye ekpe ikpe ñnyin? 28Nte afo onyuñ oyom ndiwot mi nte okowotde eyen Ijipt oro ñkpọñ?’
29Ke ini Moses okokopde emi, enye ama efehe ọkpọñ Ijipt ndien okoduñ ke isọñ Midia. Do ke enye okobon ndito iba.”
30“Ke isua aba ama ekebe, Enjel Abasi ama ọwọrọ owut Moses idem ke edeme ikañ ke ntaikañ ikọt ke isọñ utatan emi ekekperede obot Sainai. 31Idem ama akpa Moses ke se enye okokutde, ndien enye ama asaña ekpere ikọt oro nditim nse ọfọn. Edi enye ama okop uyo Ọbọñ ọdọhọde ete, 32‘Ami ndi Abasi mme ete ete mbufo, Abasi Ebraham, Aisik, ye eke Jekọb.’ Moses ama enyek ye ndik ndien ikedomoke aba ndise.”
33Ọbọñ ama ọdọhọ enye ete, “Sioño ikpaukot fo fep, koro ebiet emi afo adade mi edi edisana isọñ. 34Ami mmese, ñnyuñ ñkut ukut emi esimde ikọt Mi ke Ijipt. Ami mmokop mmum mmọ, ndien Ami mmọsuhọde ndi ndinyaña mmọ. Di idahaemi, ndien Ami ñyedọñ fi aka ke Ijipt.” 35“Emi edi kpa Moses oro nditọ Isrel ekesinde. Mmọ ema ebup enye ete, ‘anie ekenam fi andikara ye ekpe ikpe ñnyin?’ Kpa enye ke Abasi ọkọdọñ nte andikara ye andinyaña ọnọ mmọ, oto ke uñwam Enjel emi akayararede idem ọnọ enye ke ntaikañ ikọt. 36Enye ama ada mmọ ọwọrọ ke isọñ Ijipt, ke enye ama akanam mme utibe ñkpọ ye mme ñkpọ ñkpaidem ke Ijipt, ye ke ididuot inyañ, ye ke isọñ utatan ke isua aba.”
37“Moses edi owo emi ọkọdọhọde idut Isrel ete, ‘Abasi eyedọñ prọfet ọnọ mbufo kpa nte emi Enye ọkọdọñde mi, emi edidide oruk mbufo.’ 38Enye edi enyemi okodude ye nditọ Isrel ke isọñ utatan. Moses ekedi esine ufọt ọnọ nditọ Isrel ye Enjel emi eketiñde ikọ ọnọ enye ke obot Sainai, edi enye ke ekeyak mme ikọ uwem enọ esọk ñnyin.”
39“Edi mme ete ñnyin ikenyimeke ndisuk ibuot nnọ enye. Mmọ ema esin ndikpañ utọñ nno enye enyuñ ekere ke esit mmọ nte ekpefiakde enyọñ Ijipt. 40Do ke mmọ ekedọhọ Erọn ete, ‘Nam mme Abasi nọ ñnyin emi edibede iso inọ ñnyin. Ñnyin idiọñọke se itibede ye Moses emi akadade ñnyin ọwọrọ ke isọñ Ijipt.’ 41Ini oro ke mmọ ekenam abasi ubọk owo ke mbiet eyen enañ, enyuñ ewa uwa enọ enye, ndien enam usọrọ ndidara se mmọ ekenamde ke ubọk mmọ.”
42Edi Abasi ama adiañade ọkpọñ mmọ onyuñ ayak mmọ ọnọ ekpono mme ntantaọfiọñ, kpa nte ekewetde ke ñwed profet Emọs:
“ ‘Ndito Isrel! nte mbufo ema ewa uwa ye enọ esọk Mi
ke isua aba emi ekedude ke isọñ utatan?
43Ekedi atayat ndem Molek ke mbufo ekebiom,
ye ntantaọfiọñ ndem mbufo Refan;
mmọ ekedi mme ndem emi mbufo ekenamde ndituak ibuot nnọ.
Ke ntre, Ami ñyedọñ mbufo ekeduk ke idak ifin’ ke ebiet emi ebede isọñ Babilọn.”
44“Mme ete ete ñnyin ekenyene, atayat Abasi ye mmọ ke isọñ utatan, emi ekenamde enye esaña ekekem ye item emi Abasi ọkọnọde Moses, ete yak enye anam ukem ukem nte ekewutde enye. 45Nte okosuk akade iso, mme ete ete ñnyin emi ekebọde atayat emi eto mme ete mmọ ema, emen enye ke ini emi mmọ ekesañade ye Josua ekeda isọñ emi Abasi ekebinde mme idut osio ke iso mmọ. Ndien enye ama odu do tutu esim ini Defid.”
46Defid ama okut unen ke iso Abasi, onyuñ ebeñe Abasi ete yak ayak imọ ibọp ufọk inọ Abasi Jekọb. 47Edi ekedi Sọlọmọn ọkọbọp ufọk ọnọ Abasi. 48Edi ñkoññkan Abasi iduñke ke ufọk emi ubọk owo ọbọpde. Kpa nte Prọfet ọdọhọde:
49Ọbọñ ọdọhọ ete, “Enyọñ edi ebekpo Mi,
ndien isọñ edi udighi ukot Mi.
Nso utọ ufọk ke afo ekeme ndibọp nnọ Mi?
Ebiet ewe ke udunam unọ mi nte itie nduọk odudu Mi?
50Nte idighe Ami ñkanam enyọñ ye isọñ?”
51“Mbufo mme itun, emi enyenede esit ye utọñ emi minaha mbobi. Mbufo ebiet mme ete mbufo. Mbufo esesin Edisana Spirit kpukpru ini kpa nte mme ete mbufo ekesinamde. 52Nte enyene prọfet ndomokiet emi mme ete ete mbufo mikekọbọke? Mmọ ema ewot mme isuñutom Abasi, emi ke ata anyan ini eketọtde ebaña edidi Edisana Isuñutom Esie. Ke emi mbufo emetap enyuñ ewot Enye. 53Mbufo edi mme mmọ emi ekebọde mbet Abasi, emi mme enjel ekeyakde enọ, kpa ye oro mbufo isukke ibuot inọ Enye.”
Etọñọ Stifin Ke Itiat Ewot
54Ke ini mme mbon esop ekekopde mme ñkpọ emi, esit ama ayat mmọ eti eti, ndien mmọ ema eta edet ese enye ke ifiop esit. 55Edi Stifin emi ọkọyọhọde ye Edisana Spirit, ama emenede enyin ese enyọñ onyuñ okut ubọñ Abasi, ye nte Jisọs adade ke ubọk nnasia Abasi. 56Enye ama ọdọhọ ete, “Sese, ami mmokut enyọñ ebererede ye nte Eyen owo adade ke ubọk nnasia Abasi!”
57Mmọ ema esio ñkpo enyuñ eda ubọk mmọ efuk mme utọñ mmọ. Ndien mmọ kpukpru ebumede ekefuk enye ini kiet, 58eduri enye ewọrọ ekpọñ esit obio ndien etọñọ enye ke itiat. Mme ntiense ema ebon mme ọfọñ mmọ enọ akparawa emi ekekotde Sọl ekpeme.
59Mmọ ema eka iso nditọñọ Stifin ke itiat ke adaña emi enye akakade iso ndikot Abasi, ete, “Ọbọñ Jisọs, bọ spirit mi.” 60Enye ama ọtọñọ erọñ onyuñ ofiori ke ọkpọsọñ uyo ete, “Ọbọñ, kubat idiọkñkpọ emi unọ mmọ.” Ke enye ama eketiñ emi ama enye ama akpa.
Currently Selected:
Ọbọsuru 7: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.