Kəla rāā Ngámbang kəla gə̄ 17
17
Pol ō Silas ō ugə̄n̄ kem ɓē kə́ Tesalonik tə́
1Pol nin̄ kə Silas əndan̄ nang kə́ Ampipolis ō, kə́ Apoloni ō gāngə̄n̄, ba aw̄ ugə̄n̄ kem ɓē kə́ Tesalonik tə́. Kújə́ kán̄ naā yā *Jipə gə̄ i kem ɓē ní tə́. 2Anī Pol aw̄ gōdə́ tə́ kem kújə́ ní tə́ tītə̄ ń i jī bēl̄ loo rāān yān ní. Ni-ɔr̄ najə̄ sedə́ kə dɔ ndɔ̄ *sabat gə̄ mətá kə gō naá. 3Ni ɔjədə́ kum najə̄ kə́ ndang kem makətūbə̄ yā Nə́ɓā tə́ ō, ɔjədə́ kadə̄ kə gō ń ndangən̄neé ní, i gáŕ kadə̄ *Kərist ní a̰a̰ tápə̄ ō, oy ba ndól̄ dan de kə́ koy gə̄ tə́ ō. Ni ədadə́ na:
Jeju ń m-ɔ́jə́sí najə̄ yān toó, i ni n i Kərist ní.
4*Jipə kə́rēý gə̄ dandə́ tə́ ndigən̄ najə̄ yān ní, adə̄ nin̄-ɓoon̄ rɔ̄də́ tū yā Pol nin̄ kə Silas tə́. Gərek gə̄ ngá̰ý kə́ ngé rɔȳ Nə́ɓā rāān̄ tītə̄ ń noō ō, dəyá̰ kə́ ngáā ngáā gə̄ ō.
5Banī nii rāā *Jipə gə̄, adə̄ ɔyn̄ de kə́ kur̄ dɔdə́ gətóo gə̄ ń əngen̄də́ kum róbə kɔsə gə̄ tə́ ní ō, ɔsən̄ dɔ de gə̄ ń nin̄-sə̄lān̄də́ ní kə̄ naā tə́ ō, rāān̄ adə̄ de gə̄ əsōn̄ wōn̄g kem ɓēé ō. Ba aw̄n̄ ɓē Jaso̰ sāān̄ Pol nin̄ kə Silas yā kaw̄ sedə́ no kósə de gə̄ ń kánə̄n̄ naā tə́ ní. 6Ba dan ń nin̄-əngen̄də́ aĺ anī ndɔ́rə̄n̄ Jaso̰ ō, ngákó̰ó̰jí kə́rēý gə̄ ō, aw̄n̄ sedə́ no ngé ko̰o̰ ɓē gə̄ tə́. Nin̄-ədan̄ kə̄ dɔɔ́ ngá̰ý na:
De gə̄ ń toō sól̄yōn̄ de gə̄ kə gō loo gə̄ malang kə́ dɔ nang tə́ laā. Ba ń toō ɓáa nin̄-reē ugə̄n̄ laā, 7anī Jaso̰ əhɔdə́ kə̄ rɔ̄n tə́! Nin̄ malang i ngé mbātə́ ndū najə̄ yā *Sejar ō, ədan̄ na mban̄g kə́ rang kə́ rīn na i Jeju na ndi noó ō. 8Najə̄ ní adə̄ kósə de gə̄ ō, ngé ko̰o̰ ɓē gə̄ ō wōn̄g ngá̰ý. 9Adə̄ nin̄-ndan̄ kə Jaso̰ ō, madə̄n gə̄ ō adə̄ ɓōkə́n̄ nar nang tə́ no ngé ko̰o̰ ɓē gə̄ tə́ pá tá ngé ko̰o̰ ɓē gə̄ əya̰n̄də́ dɔɔ́ ɓáý.
Pol ō Silas ō ugən̄ kem ɓē kə́ Bere tə́
10Ndɔ̄ɔ́ anī, ngákó̰ó̰jí gə̄ adə̄n̄ Pol nin̄ kə Silas aw̄n̄ kem ɓē kə́ Bere tə́. Dan ń ugə̄n̄ anī aw̄n̄ kújə́ kán̄ naā yā *Jipə gə̄ tə́. 11Kem *Jipə kə́ Bere tə́ gə̄ majə tɔȳ yā ngé kə́ Tesalonik tə́ gə̄. Nin̄-ndigən̄ najə̄ yā Nə́ɓā láẃ ngá̰ý ō, əndān̄ ma̰ȳ najə̄ kə́ ndang kem makətūbə̄ yā Nə́ɓā tə́ kə dɔ ndɔ̄ gə̄, yā ka̰a̰ń ké najə̄ ń Pol əda ní ké i rɔ̄kum wa ō. 12De gə̄ ngá̰ý dandə́ tə́ taān̄ kem naā tə́ kə dəyá̰ Gərek kə́ ngáā ngáā gə̄ ō, dəngam gə̄ ngá̰ý ō.
13Banī loo ń *Jipə kə́ Tesalonik tə́ gə̄ oōn̄ kadə̄ Pol na ɔjə najə̄ yā Nə́ɓā kem ɓē kə́ Bere tə́ ō anī, nin̄-sə̄lān̄ kósə de gə̄ ō, rāān̄də́ adə̄ kemdə́ ndi kə gōó aĺ ō. 14Anī kə̄ ta jī tə́ noō ngákó̰ó̰jí gə̄ adə̄n̄ Pol aw̄ kumən kə̄ bā bo tə́ kɔ̄ɔ́. Banī Silas nin̄ kə Timote tá ndin̄ gotoó kem ɓē kə́ Bere tə́. 15Ngé gə̄ ń dānə̄n̄ Pol ní aw̄n̄ seneé bátə́ ugə̄n̄ kem ɓē kə́ Aten tə́ tá kadə̄ télən̄ ɓáý. Ba Pol tāādə́ kadə̄ ədan̄ Silas ō Timote ō na kə aw̄n̄ gōn tə́ láẃ.
Pol ndi kem ɓē kə́ Aten tə́
16Dan ń ndi a ngóōdə́ kem ɓē kə́ Aten tə́ ní, wōn̄g asən nák, tɔdɔ̄ ni-a̰a̰ kadə̄ ɓesə̄ gə̄ taān̄ loo kem ɓēé. 17Ni-ɔr̄ najə̄ kem kújə́ kán̄ naā tə́ kə *Jipə gə̄ ō, kə ngé rɔȳ Nə́ɓā gə̄ ō. Ni-ɔr̄ najə̄ ndágə looó kə dɔ ndɔ̄ gə̄ kə de gə̄ ń ni-əngedə́ ní ō. 18Ngé ndóō de gə̄ kum kedə̄ kə́rēý gə̄ ń a ɓārə́n̄də́ na Epikuriyḛ gə̄ #17.18 Epikuriyḛ gə̄ i ngé sāā rɔ̄nel̄ yādə́ nin̄ kɔ́ gə̄. ō, Estoisiyḛ gə̄ #17.18 Estoisiyḛ gə̄ i ngé wur kil gə̄. ō ní, de kə́rēý gə̄ dandə́ tə́ ɔrə̄n̄ najə̄ seneé ō. Ngé kə́rēý gə̄ dəjen̄ najə̄ ədan̄ na:
Nge najə̄ wa gə̄ ń toō sāā kəda na i rí?
Ngé kə́ rang gə̄ oōn̄ Pol loo kɔjə najə̄ yā Jeju tə́ ō, loo kɔr̄ najə̄ kə́ dɔ koy tá ndól̄ tə́ ō anī ədan̄ na:
Tītə̄ kə́ a ɔjə i najə̄ yā nə́ɓā kə́ jə-gerī aĺ gə̄ beé wa.
19Nin̄-əhɔnən̄ ba aw̄n̄ seneé dɔ mbal̄ Areopajə#17.19 Areopajə i rī ngōn̄ mbal̄ kógə̄ḿ kə́ kem ɓē kə́ Aten tə́. De gə̄ a oōn̄ naā dɔ yá̰á̰ kə́ kem ɓēé tə́ i dɔ tə́. Ta tɔ̄l̄ ta anī Areopajə tél i rī loo koō naā dɔ yá̰á̰ kə́ kem ɓēé tə́ yā ngé ko̰o̰ ɓē gə̄. tə́ ba ədanən̄ na:
Yá̰á̰ kə́ kijə ń ɔ́jə de gə̄ ní j-asə ger̄ karī a? 20Tām̄ najə̄ kɔrīí gə̄ ń j-oō ní, i najə̄ kə́ to kɔr kum ngá̰ý gə̄, adə̄ jə-sāā ger̄ kum. 21Aten gə̄ malang naā tə́ kə tə̄rā gə̄ ń ndin̄ dɔ dáńdə́ tə́ ní, kəla rāādə́ i kɔr̄ najə̄ kə́ dɔ yá̰á̰ kə́ kɔtə̄ kijə ɓáý gə̄ tə́ ō, i koō najə̄ kə́ dɔ yá̰á̰ kə́ kɔtə̄ kijə ɓáý gə̄ tə́ ō ngóy.
22Loo ń noō tə́ Pol ń ra i kə njan kə́ dɔɔ́ dɔ mbal̄ Areopajə tə́ ní əda na:
Sḭḭ̄ Aten gə̄, m-á̰a̰ kadə̄ sḭḭ̄ i de gə̄ kə́ ī-ɓōlíī ndíĺ yá̰a̰ gə̄ ngá̰ý. 23Tɔdɔ̄ dan ń m̄-njə̄rā kem ɓē yāsí tə́ ō, m-ə̄ndā ma̰ȳ yá̰a̰ gə̄ ń ā ī-ndɔ̄yīdə́ gə̄ ní ō anī, m-āw̄ bátə́ m-ə́nge *loo tun̄ yá̰á̰ kógə̄ḿ kə́ ndangən̄ najə̄ ń toō dɔ tə́ na:
I tām̄ yā nə́ɓā kə́ jə-gerə̄n aĺ tə́. Majə! Yá̰á̰ ń sḭḭ̄ ā ī-ndɔ̄yī kanjə̄ gerə̄n ní, i yá̰á̰ ń toō bang n mā m̄-reē kɔjə̄sí tə́ kadə̄ ī-gerī ní. 24Nə́ɓā ń rāā dɔ rā̰ ō, dɔ nang ō, yá̰a̰ malang kə́ tū tə́ ō ní, ni i Kɔ́ɔ̄ɓē dɔ rā̰ tə́ ō dɔ nang tə́ ō. Tá kújə gə̄ ń de gə̄ rāān̄ kə jīdə́ tām̄ yān tə́ ní, ni-ndi kemeé aĺ ō. 25Kəla yān i kəla kə́ deē a rāā kə jīneé aĺ ō, ni-gḛy i yá̰á̰ kə́rēý á kadə̄ deē adə̄n aĺ ō, tɔdɔ̄ i ni n i nge rāā kadə̄ de gə̄ malang ndin̄ kə kumdə́ ō, nge kəla koō kemdə́ tə́ ō, nge kadə̄də́ gotə yá̰á̰ kə́ rang gə̄ malang ō ní. 26Ni-əndā gíŕ nápar de gə̄ malang i kə de kə́ kal kógə̄ḿ beē ō, əndādə́ dɔ nang tə́ malang ō. Ni-rāā ɓar ō ɓāl̄ ō tām̄ yādə́ tə́ ō, ɔjə dɔ nin̄ loo gə̄ ń kadə̄ ndin̄ tū tə́ ní ō. 27Ni-rāā tītə̄ ń noō i yā kadə̄ nin̄-sāān̄neé Nə́ɓā, na ré majanī a əngenən̄ loo mám̄ loo tə́. Kə́ rɔ̄kum tə́ tā anī jḭḭ̄ kógə̄ḿ kógə̄ḿ ní, Nə́ɓā i sa̰y rɔ̄jí tə́ alé. 28Tɔdɔ̄ i tītə̄ ń gōsə̄ pā yāsí kə́rēý gə̄ ədan̄neé ní:
Jə-ndiī kə kumjí ō, jə-rāāī rɔ̄jí ō, jə-ndiī ō i kemən tə́. Nin̄-ədan̄ ɓáý to̰ na:
Tɔdɔ̄ jḭḭ̄ i gír kaa kə́ kógə̄ḿ beē seneé. 29Ba ré jḭḭ̄ i gír kaa kə́ kógə̄ḿ beē kə Nə́ɓāá anī, i só tə́ kadə̄ jə-gírī na Nə́ɓā i yá̰á̰ kə́ tītə̄ ɓesə̄ lɔ́r, aláa ɓesə̄ gində̄ arjā̰a̰, aláa ɓesə̄ mbal̄ marbər kə́ deē tɔ́sə̄ kə jīneé kə gō kum kedə̄ yānneé alé. 30Nə́ɓā əhɔ gír ɓāl̄ gə̄ ń de gə̄ gerə̄n̄neé yá̰a̰ aĺ tə́ ní to̰ alé. Banī ngɔlaā ni-tāā de gə̄ malang kə̄ loo gə̄ tə́ kadə̄ tūrə̄n̄ háĺdə́. 31Tɔdɔ̄ ni-gān̄g ndɔ̄ ń kadə̄ a gāngəń sarya kə́ gōtə́ dɔ de gə̄ malang kə́ dɔ nang tə́ ní kɔ̄ɔ́. Ni a gān̄g sarya ní i kə ta kūl̄ deē ń ni-əndān ní. Deē ní oy banī ni-ndólə̄n, ɔjəń de gə̄ malang kadə̄ n-a n-gān̄g sarya ní i kə ta kūl̄ deē ní rɔ̄kum.
32Dan ń nin̄-oōn̄ najə̄ kə́ dɔ koy tá ndól̄ tə́ anī ngé kə́rēý gə̄ lurnən̄, ba ngé kə́ rang gə̄ ədan̄ na:
Ndɔ̄ kə́ rang tə́ tá j-a j-oō najə̄ yāí ń toō ɓáý.
33I beé tā ní Pol teē dandə́ tə́ aw̄. 34Banī de kə́rēý gə̄ dandə́ tə́ əhɔn̄ gō Pol ō, télən̄ ngé taā kem gə̄ ō. Denis ń ni i kə́ kógə̄ḿ yā ngé sarya kə́ bo gə̄ kə́ dɔ mbal̄ Areopajə tə́ ní, i dan de gə̄ ní tə́ ō, dəyá̰ kógə̄ḿ kə́ rīn na i Damaris i sedə́ ō, de kə́ rang gə̄ i sedə́ ɓáý to̰ ō.
Currently Selected:
Kəla rāā Ngámbang kəla gə̄ 17: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad