Kəla rāā Ngámbang kəla gə̄ 16
16
Timote aw̄ naā tə́ kə Pol ō Silas ō
1Pol aw̄ ugə̄ Derbə ō Listər ō. Nge ndóō yá̰á̰ kógə̄ḿ ndi kem ɓē ngeé ń noō tə́, rīn na i Timote. Ni i ngōn̄ dəyá̰ *Jipə kógə̄ḿ. Kó̰o̰n i nge taā kem, ba bɔbə̄n i Gərek. 2Rī Timote ní ɓār̄ majə ngá̰ý dan ngákó̰ó̰jí gə̄ kə́ Listər tə́ ō, kə́ Ikoniyɔm tə́ ō. 3Pol gḛy kadə̄ aw̄ seneé. Adə̄ ni unən ba *əja mɔtən najə̄ yā *Jipə gə̄ ń ndin̄ gō nang ngeé ń noō tə́ ní. Tām̄ nin̄ malang ní gerə̄n̄ kadə̄ bɔbə̄n i Gərek. 4Ndū gə̄ ń ngámbang kəla gə̄ ō, *kum kɔɔ̄ kə́ *Jerusalem gə̄ ō, ran̄ dɔ tə́ ní, Pol nin̄ kə Silas ədan̄ ngé taā kem gə̄ kə́ kem ɓē gə̄ ń nin̄-aw̄n̄ tū tə́ ní ō, mērə̄n̄də́ tetə rɔ̄də́ gō tə́ rāā ō. 5De gə̄ kə́ kem Egəlijə gə̄ tə́ əngen̄ tɔ́gə dɔ taā kem tə́ ō, kutədə́ reē kə̄ dɔ naā tə́ kə dɔ ndɔ̄ gə̄ ō.
Yá̰a̰ ndɔ̄bə̄ Pol kem ɓē kə́ Təroas tə́
6Pol nin̄ kə Silas əndan̄ nang kə́ Pəriji ō kə́ Galasi ō gāngə̄n̄, tɔdɔ̄ *Ndíĺ kə́ Táĺ ɔgə̄də́ kɔjə najə̄ dɔ nang kə́ Aji tə́. 7Dan ń nin̄-ugə̄n̄ dɔ nin̄ nang kə́ Miji tə́ anī, sāān̄ kaw̄ dɔ nang kə́ Bitini tə́, banī Ndíĺ Jeju ɔgə̄də́ kɔ̄ɔ́. 8Tā anī nin̄-əndan̄ nang kə́ Miji gāngə̄n̄ ba aw̄n̄ Təroas. 9Ndɔ̄ɔ́ anī yá̰a̰ ndɔ̄bə̄ Pol: Ni-a̰a̰ deē kógə̄ḿ kə́ Masedəwan. Deē ní ra kə njan kə́ dɔɔ́ rāān ɓɔ́ ba ədan na: Ī-reē Masedəwan ī-dḭḭ̄jí! 10Gō yá̰a̰ ń noō ń ndɔ̄bə̄ Pol tə́ ní, kə̄ ta jī tə́ noō jə-sāā kaw̄ Masedəwan, tām̄ jə-ger̄ majə ngá̰ý kadə̄ Nə́ɓā ɓāŕjí i kadə̄ j-aw̄ j-ɔjə de kə́ gō nang ngeé ń noō tə́ gə̄ Najə̄ kə́ Majə.
Lidə taā kem Kɔ́ɔ̄ɓē kem ɓē kə́ Pilipə tə́
11J-un to bo Təroas ba j-aw̄ súmūú kumjí sɔɔ̄ dor̄ kə́ Samotəras. Teē kə ndɔ̄ kə́ noō anī j-aw̄ Neapolis. 12J-ḭḭ noó j-aw̄ Pilipə ń i ɓē kə́ gō nang kə́ Masedəwan tə́ kə́ bo tɔȳ madə̄ gə̄ malang ō, i ɓē kə́ de kə́ Rom gə̄ rāān̄ ɓē tū tə́ ō ní. Jə-ndi kem ɓē ngeé ń noō tə́ dan oy tām̄. 13Ndɔ̄ *sabat tə́ anī jə-teē kem ɓēé, ba j-aw̄ kadə bā kógə̄ḿ tə́, loo kə́ jə-gír̄ kadə̄ loo ndɔ̄ȳ i tū tə́ tə́. Jə-ndi nang tə́ ba j-ɔr̄ najə̄ kə dəyá̰ gə̄ ń kánə̄n̄ naā ní. 14Dəyá̰ kógə̄ḿ kə́ Tiyatir ndi dan dəyá̰ gə̄ ní tə́, rīn na i Lidə. Ni i nge gātə̄ kūbə̄ kə́ kərē ning ō, i de kə́ nge rɔȳ Nə́ɓā kété ō. Kɔ́ɔ̄ɓē rāā adə̄ ni-nēl̄ mbīn majə oōń najə̄ kɔr̄ Pol. 15Dan ń rāānən̄ *batém naā tə́ kə ngéén gēé oy anī, mēr̄jí kaw̄ looneé, ni-ədají na:
Ré á̰a̰ī kadə̄ m̄-taā kem Kɔ́ɔ̄ɓē rɔ̄kum anī, ī-reē ī-ndiī looḿ. Ni-ɔsə sejí ta kaw̄ looneé.
Əhɔn̄ Pol ō, Silas ō ənīn̄də́ dəngáyá
16Ndɔ̄ kógə̄ḿ tə́ j-a j-aw̄ kə̄ loo ndɔ̄ȳ tə́ anī, nge kəla kə́ dəyá̰ kógə̄ḿ tə́nī tají: Ndíĺ kə́ majaĺ kógə̄ḿ i kemən tə́. Ndi ɓáa ɔsə seneé ta kɔjə yá̰á̰ kə́ a rāā yā rāā yá̰a̰ gə̄. Adə̄ kɔ́ɔ̄n gə̄ əngen̄ yá̰á̰ ngá̰ý gírən tə́ loo kɔjə yá̰á̰ kə́ a rāā yā rāā yá̰a̰ gə̄ tə́. 17Nge kəla kə́ dəyá̰ ní tél un gōjí, Pol ō jḭḭ ō, ba əga kɔŕ əda na:
De gə̄ ń toō i ngé kəla yā Nə́ɓā kə́ dɔɔ́ gə̄! Nin̄ a ɔjən̄sí i róbə́ kə́ yā kadə̄ deē un a ajə! 18Ni-rāā yá̰á̰ ní ndɔ̄ ngá̰ý. Ta tɔ̄l̄ ta anī wōn̄g rāā Pol ngá̰ý, adə̄ ni-tūr̄ rɔ̄n ba əda ndíĺ ní kə tɔ́gɔ́ na:
Ī-teē kem dəyá̰ ń toō tə́ kɔ̄ɔ́ kə rī Jeju *Kərist! Anī ndíĺ ní teē kɔ̄ɔ́ kem dəyá̰ ní tə́ kə̄ ta jī tə́ noō. 19Ba loo ń kɔ́ɔ̄ nge kəla kə́ dəyá̰ ní gə̄ a̰a̰n̄ kadə̄ loo kənge yá̰a̰ yādə́ gətóo kɔ̄ɔ́ anī, əhɔn̄ Pol nin̄ kə Silas, ndɔ́rə̄n̄də́ aw̄n̄ sedə́ loo kán̄ naā yā de kə́ kem ɓēé gə̄ tə́ no ngār gə̄ tə́. 20Nin̄-aw̄n̄ sedə́ no ngé rāā sarya gə̄ tə́ ba ədan̄ ngé sarya gə̄ na:
De gə̄ ń toō sól̄yōn̄ de gə̄ adə̄ de gə̄ ndin̄ majə kem ɓē yājí tə́ to̰ alé. Nin̄ i *Jipə gə̄ ō, 21a ɔjən̄ i yá̰a̰ kāgə̄ ɓē kə́ ndū najə̄ yājí jḭḭ de kə́ Rom tə́ gə̄ ɔgə̄jí ndigə ō, ɔgə̄jí kun gō ō.
22Wōn̄g rāā kósə de gə̄ sedə́ ngá̰ý ō. Ngé rāā sarya gə̄ adə̄ ɔrə̄n̄ kūbə̄ kə́ rɔ̄ Pol tə́ ō, kə́ rɔ̄ Silas tə́ ō, ba adə̄n̄ ndūdə́ kadə̄ əndan̄də́ kə ndéyé. 23Dan ń əndan̄də́ ndéy jī ngá̰ý oy anī, ɓōkə́n̄də́ kújə dəngáyá ba tāān̄ nge ngɔ̄m̄ dəngáy gə̄ kadə̄ ngɔ̄m̄də́ kə gōó majə. 24Loo ń nge ngɔ̄m̄ dəngáy gə̄ oō beé anī, ənīdə́ kem kújə dəngáý kə́ gə́lé tə́, ba tə́nī hōŕ njadə́ tə́.
25Ta kaw̄ kə̄ dan loo tə́ anī, Pol nin̄ kə Silas ndɔ̄ȳn̄ ō, ənīn̄ pā tɔ̄ȳn̄neé Nə́ɓā ō. Gotə dəngáy gə̄ oōn̄ ndūdə́. 26Anī dɔ nang yéȳ ngá̰ý kə̄ ta jī tə́ noō adə̄ ngəra kújə dəngáy ndebə ō, ta róbə́ kújə gə̄ teēn̄ malang kɔ̄ɔ́ ō, súĺ gə̄ kə́ nja dəngáy gə̄ tə́ malang ní tadə́ tútə kɔ̄ɔ́ ō. 27Nge ngɔ̄m̄ dəngáy gə̄ ní ndól̄ dɔ ɓīī tə́ rétə́ gēé. Ba dan ń a̰ā̰ kadə̄ ta kújə dəngáy gə̄ i kə́ ran̄ kə wōyōó anī, ni-ɔr̄ kaskar yā tɔ̄ləń rɔ̄n, tɔdɔ̄ ni-ɔjəń na dəngáy gə̄ na a̰ȳn̄ naā kɔ̄ɔ́. 28Banī Pol əga kɔŕ ngá̰ý əda na: Ī-lōō rāā yá̰á̰ kə́ majaĺ kə rɔ̄í, na jḭḭ malang jə-ndi laā!
29Anī nge ngɔ̄m̄ dəngáý gə̄ ní dəje hor ba udə kújə dəngáyá láẃ, əsō nja Pol nin̄ kə Silas tə́. Ɓōĺ rāān adə̄ rɔ̄n ndew yakə yakə. 30Ni teē sedə́ ndágá ba dəjedə́ na:
Kɔ́ɔ̄ḿ gə̄, i rí n kə m̄-rāā tá kadə̄ m-ájəń ní? 31Anī nin̄-tél ədanən̄ na:
Ī-taā kem Kɔ́ɔ̄ɓē Jeju, anī ā ájiī sḭḭ̄ kə ngééí gēé. 32Loo ń noō tə́ nin̄-ɔjənən̄ najə̄ yā Kɔ́ɔ̄ɓē naā tə́ kə ngéén gə̄ ń ndin̄ kem kújə yān tə́ malang ní. 33Nge ngɔ̄m̄ dəngáy gə̄ ɔydə́ kə̄ dan ndɔ̄ɔ́ noō aw̄ tə́go ta dodə́. Gō tə́ anī rāānən̄ *batém kə̄ ta jī tə́ noō, ni ō ngéén gə̄ malang ō. 34Ni-aw̄ kə Pol ō, Silas ō kem kújə yān tə́ ba adə̄də́ yá̰a̰ kadə̄ əsan̄. Rɔ̄ dəngam ní ō, ngéén gə̄ ō, nel̄də́ ngá̰ý najə̄ taā ń nin̄-taān̄ kem Nə́ɓā tə́ ní.
35Dan ń loo tīī unjə̄ anī, ngé rāā sarya gə̄ əlan̄ pajā gə̄ kadə̄ aw̄ ədan̄ nge ngɔ̄m̄ dəngáy gə̄ ní na:
Ə́ya̰ de gə̄ ń noō dɔɔ́ ādə̄ aw̄n̄.
36Nge ngɔ̄m̄ dəngáy gə̄ əda Pol najə̄ ní, ədan na: Ngé rāā sarya gə̄ əla ədamə̄n̄ na kə m-ə́yá̰sí dɔɔ́. I beé ní, ī-teē āwī kə kem sɔlɔ̄ɔ́.
37Banī Pol əda pajā gə̄ na:
Jḭḭ ń i ngán ngé ɓē kə́ Rom tə́ gə̄ ní, nin̄-əndan̄jí kə ndéyé ta kum de gə̄ tə́ kanjə̄ gān̄g sarya dɔjí tə́ kə gō ndū najá ō, ənīn̄jí dəngáyá ō. Ba ń toō ɓáa a sāān̄ i kɔr̄jí dəngáyá jəke loo mundə̄ tə́ a. I beé alé! Ādə̄ nin̄ kɔ́ gə̄ reē ɔrə̄n̄jí dəngáyá! 38Pajā gə̄ tél aw̄ ədan̄ ngé sarya gə̄ najə̄ ní. Loo ń nin̄-oōn̄ kadə̄ Pol nin̄ kə Silas i ngáń ngé ɓē kə́ Rom gə̄ anī, nin̄-ɓōlə́n̄ ngá̰ý ō, 39reē rāān̄də́ ɓɔ́ ō. Gō tə́ anī ɔrə̄n̄də́ dəngáyá ba rāān̄də́ ɓɔ́ kadə̄ teēn̄ kem ɓē ní tə́ ba kə aw̄n̄. 40Dan ń Pol nin̄ kə Silas teēn̄ kújə dəngáyá anī, aw̄n̄ ɓē Lidə. Nin̄-a̰a̰n̄ ngákó̰ó̰də́ gə̄ ō, ɔjə̄n̄də́ ō, tá kadə̄ aw̄n̄ ɓáý.
Currently Selected:
Kəla rāā Ngámbang kəla gə̄ 16: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad