Kəla rāā Ngámbang kəla gə̄ 13
13
Gə̄rān̄ Sol ō Barnabas ō ba əlan̄də́
1*Ngé koō ta gə̄ ō, ngé ndóō de gə̄ yá̰a̰ gə̄ ō, ndin̄ kem Egəlijə kə́ A̰tiyos tə́. De gə̄ ní i Barnabas ō, Simeo̰ ń a ɓāŕnən̄ na i de kə́ ndul ní ō, Lusius kə́ Siren ō, Manahen ń ətōn̄də́ naā tə́ kə Herod nge ko̰o̰ ɓēé ní ō, Sol ō. 2Ndɔ̄ kógə̄ḿ tə́ dan ń nin̄-ɔsən̄ dɔdə́ naā tə́ ba rāān̄ kəla adə̄n̄ Kɔ́ɔ̄ɓē ō, *ndin̄ ɓō tām̄ yā Nə́ɓā tə́ ō anī, *Ndíĺ kə́ Táĺ ədadə́ na kə ɔrə̄n̄ Sol ō Barnabas ō kə əndān̄də́ tayā tām̄ yān tə́, kadə̄ rāān̄ kəla ń na n-ɓāŕdə́ kə rīí ní. 3Loo ń noō tə́ nin̄-*ndin̄ ɓō tām̄ yā Nə́ɓā tə́ ō, ndɔ̄ȳn̄ Nə́ɓā ō, əndān̄ jīdə́ dɔdə́ tə́ ba əya̰n̄də́ adə̄ aw̄n̄.
Barnabas ō Sol ō nin̄ i dor̄ kə́ Sipər tə́
4Barnabas ō Sol ō ń i *Ndíĺ kə́ Táĺ n əladə́ ní, aw̄n̄ Selosi. Nin̄-unən̄ to bo loo ń noō tə́, ba aw̄n̄ kumdə́ sɔɔ̄ dor̄ kə́ Sipər. 5Dan ń ugə̄n̄ Salamin anī, ɔjən̄ najə̄ yā Nə́ɓā kem kújə́ kán̄ naā gə̄ yā *Jipə gə̄ tə́. Ja̰a̰ Mark i sedə́, i ni n i nge rāā sedə́ ní.
6Nin̄-əndan̄ dan dor̄ kə́ Sipər gāngə̄n̄, aw̄ ugə̄n̄ Papos. Nin̄-əngen̄ de kə́ nge rāā mbōlí kógə̄ḿ kə́ a ɓāŕnən̄ na i Bar Jeju. Deē ní i *Jipə ō, i *nge koō ta kə́ rɔ̄kum aĺ ō. 7Ni-ndi i kə Serjiyus Polus ń i nge ko̰o̰ ɓē ní. Serjiyus Polus ngeé ń toō i de kə́ kur̄ dɔn to. Ni ɓāŕ Barnabas nin̄ kə Sol, tɔdɔ̄ ni gḛy koō najə̄ yā Nə́ɓā. 8Banī Elimas ń kumən na i nge rāā mbōlí ní ɔgə̄də́ ō, sə̄lā nge ko̰o̰ ɓē kadə̄ taā kem najə̄ yā Nə́ɓā aĺ ō. 9Loo ń noō tə́ *Ndíĺ kə́ Táĺ rosə kem Sol ń a ɓāŕnən̄ na i Pol ō ní#13.9 Sol:, Əla gír loo ń toō tə́ ní a ɓārə́n̄ Sol na i Pol. Sol i rīn yā Jipə gə̄, ba Pol i rīn yā Rom gə̄., adə̄ əndā kumən dɔn tə́, 10ba ədan na:
Ḭ̄ i de kə́ kum kedə̄ gól̄ loo rosə kemií ō, de kə́ ger̄ tūr̄ gíŕ yá̰á̰ ngá̰ý ō, ḭ̄ i ngōn̄ *diabəl ō, ḭ̄ i madə̄ kɔ̄l̄ yá̰a̰ malang kə́ gōtə́ ō, a asiī rāā gō róbə yā Kɔ́ɔ̄ɓē kə́ ra súmūú kadə̄ rúgə̄ kə̄ loo gə̄ tə́ i rə́ngáý tə́? 11Ń toō ní á̰a̰ā̰, Kɔ́ɔ̄ɓē a əndaī, kumií a a̰a̰ loo aĺ ō, ā á̰a̰ kum mbang aĺ ō, kadə̄ dan oy tām̄. Anī kum Elimas a̰a̰ loo aĺ kə̄ ta jīī tə́ noō, ni-ra i kum loo kə́ risə til nding tə́. Ni-ənī gir̄ gində̄ wir wir a sāań de kə́ yā kəhɔ ta jīn kɔrənneé ta róbə. 12Dan ń nge ko̰o̰ ɓē a̰a̰ yá̰á̰ ń rāā yá̰á̰ ní anī, taā kem. Yá̰á̰ ndóō yā Kɔ́ɔ̄ɓē ɔr kumən ngá̰ý.
Pol ō Barnabas ō aw̄n̄ A̰tiyos kə́ Pisidi tə́
13Pol nin̄ kə madə̄n gēé alə̄n̄ kem to boó Papos, ba aw̄n̄ Perjə kə́ Pampili tə́. Ja̰a̰ Mark əya̰də́ loo ń noō tə́ ba tél dɔ tə́ aw̄ gogə́ *Jerusalem. 14Banī nin̄-unən̄ ta njə̄rā mbā yādə́ kum kə̄ kété, nin̄-ḭḭn̄ Perjə aw̄ ugə̄n̄ A̰tiyos kə́ Pisidi tə́. Ndɔ̄ *sabat tə́ anī, nin̄-udən̄ kújə́ kán̄ naā tə́ ba aw̄ ndin̄ nang tə́. 15Dan ń tə́dan̄ najə̄ kə́ kem makətūbə̄ *ndū najə̄ gə̄ tə́ ō, kə́ kem makətūbə̄ yā *ngé koō ta gə̄ tə́ ō oy anī, ngār gə̄ kə́ dɔ kújə́ kán̄ naā tə́ gə̄ əla ədan̄də́ na:
Ngákó̰ó̰jí gə̄, ré āwī kə najə̄ kə́ a əla go̰ kem ngé kán̄ naā gə̄ tə́ anī ə́daī! 16Anī Pol ḭḭ dɔɔ́, wél̄ jīn, ba əda na: *Israel gə̄ ō, sḭḭ̄ ngé rāā kəla kadə̄ Nə́ɓā ō, ōōī najə̄ yāḿ. 17Nə́ɓā yā ngán Israel gə̄ gə̄rā kaají gə̄. Ni ɔsədə́ kə̄ dɔɔ́ dan ń ndin̄ Ejiptə tə́ ní. Gō tə́ anī teē sedə́ kem ɓē kə́ Ejiptə tə́ kə ta kūl̄ tɔ́gə jīneé. 18Ni ətōdə́ kem dəla loo tə́ asə ɓāl̄ kutə sɔ́. 19Ni nujə nápar de kə́ rang gə̄ gír sīrí dɔ nang kə́ Kanaan tə́, ba tél kə dɔ nang yādə́ adə̄ gír deē yān gə̄ kadə̄ télən̄ kɔ́ɔ̄n. 20Yá̰a̰ gə̄ ń noō malang rāān̄ yá̰a̰ i kem ɓāl̄ kə́ ɓú sɔ́ kə kə́ kutə mí tə́.
Gō tə́ anī ni adə̄də́ ngé sarya gə̄ bátə́ ugə̄ń ɓāl̄ yā Samuel *nge koō ta tə́. 21Gō tə́ anī nin̄ dəjen̄ mban̄g, anī Nə́ɓā adə̄də́ Saul kə́ ngōn̄ Kis. I de kə́ gír ɓē yā Benjamḛ tə́. Ni o̰o̰ ɓē ɓāl̄ kutə sɔ́. 22Gō tə́ anī Nə́ɓā mbātə́ Saul ba adə̄də́ Dabid kadə̄ ni i mban̄g yādə́. Ni əda najə̄ kə́ dɔn tə́ na: M-ə́nge Dabid ngōn̄ Jese, ni i de kə́ kə gō kemḿ. Ni a rāā yá̰a̰ malang ń kemḿ ndigə ní. 23Nə́ɓā teē kə Jeju nge kajə *Israel gə̄ i gír kaa yā Dabid tə́ tītə̄ ń ənīń ndūn ní. 24Kété tá kadə̄ Jeju reē ní, Ja̰a̰ ənī mbēr̄ *batém tūr̄ hál, tām̄ yā ngán Israel gə̄ tə́ malang. 25Ba dan ń Ja̰a̰ a rāā yā tɔ̄l̄ ta ndɔ̄ yān gə̄ ngɔr anī əda na: Ɔ́jiīń na mā i náā? Mā i deē ń ā ī-ngóōī tan ní alé. Banī ōōī, deē kógə̄ḿ a reē gōḿ tə́ noō, kə́ kəla sākə̄rā kə́ njan tə́ gə̄gē ngóý ní, m-ásə́ tútə alé.
26Ngákó̰ó̰ḿ gə̄, sḭḭ̄ ngán kaa Abəraham gə̄ ō, sḭḭ̄ gə̄ ń ī-reēī laā i rāā kəlaá kadə̄ Nə́ɓā ō ní, najə̄ kajə ń toō əlan̄neé adə̄n̄jí i jḭḭ̄. 27Tɔdɔ̄ de kə́ *Jerusalem gə̄ ō, ngār yādə́ gə̄ ō, gerə̄n̄ Jeju alé. Tá najə̄ yā *ngé koō ta gə̄ ń a tə́dan̄ kə dɔ ndɔ̄ *sabat gə̄ malang ní, nin̄-gerə̄n̄ kum aĺ ō. Nin̄-rāān̄ adə̄ najə̄ gə̄ ní reē udən̄ gírí, tɔdɔ̄ nin̄-gāngə̄n̄ sarya dɔn tə́. 28Nin̄-əngen̄ najə̄ kógə̄ḿ dɔn tə́ yā tɔ̄lə̄n̄neé alé, banī nin̄-mērə̄n̄ Pilatə tɔ̄lən. 29Dan ń nin̄-rāān̄ adə̄ najə̄ gə̄ malang ń ndangən̄ dɔn tə́ ní reē udən̄ gírí oy anī, ɔr̄nən̄ kɔ̄ɔ́ tū kāgə̄ kə́ dēsə́ tə́, ba aw̄ ənīnən̄ kem bəlo yo tə́. 30Banī Nə́ɓā rāā adə̄ ni-ndól̄ dan de kə́ koy gə̄ tə́. 31De gə̄ ń njə̄rān̄ kə Jeju ḭḭn̄ seneé Galile reēn̄ *Jerusalem ní, Jeju ndɔ̄bə̄də́ adə̄ a̰a̰nən̄ ndɔ̄ ngá̰ý. Ngɔlaā nin̄ i de kə́ kum tə́ yān gə̄ ta kum ngán *Israel gə̄ tə́. 32Jḭḭ jə-reē kə Najə̄ kə́ Majə ń toō yā kədasí ō: Yá̰á̰ ń Nə́ɓā ənī míndən najə̄n tə́ adə̄ kaají gə̄ ní, 33ni-rāā yá̰á̰ ní ngɔlaā adə̄jí jḭḭ̄ ngán kaadə́ gə̄. Tɔdɔ̄ Jeju ń oy ní, ni-ndólən dan de kə́ koy gə̄ tə́, tītə̄ ń ndangən̄ kem makətūbə̄ Pā gə̄ tə́ dɔ ninə̄n i jōó ní.
Ndangən̄ na:
I ḭ̄ n i Ngōnə̄ḿ ní,
əla gír ɓōólaā ní mā i Bɔbí.
34Tá Nə́ɓā əda ɓáý to̰ na n-a n-ndólə̄n dan de kə́ koy gə̄ tə́, yā kadə̄ ndum to̰ alé. Ni-əda najə̄ ní i tītə̄ ń toō:
M-ā m-ādə̄sí yá̰á̰ kə *táĺ gə̄ ō,
kə́ a mānə̄n̄ aĺ bátə́ gə̄ ō ń m-ə̄nā ndūḿ najə̄n tə́ m-ādə̄ Dabid ní.
35I tām̄ najə̄ ń toō tə́ n ni-əda kem makətūbə̄ kə́ ndang tə́ loo kə́ rang tə́ ɓáý to̰ yā kɔjəń kadə̄ i rɔ̄kum ní, əda na:
Ḭ̄ ā ə́ya̰ de kə́ *táĺ yāí kadə̄ ndum ɓádá alé.
36Dabid rāā yá̰á̰ ń kem Nə́ɓā ndigə ní ɓāl̄ yān tə́. Gō tə́ anī oy, adə̄ dubə̄nən̄ kadə kaan gə̄ tə́ ō, nīnə́n ndum ō. 37Banī nge ń Nə́ɓā ndólə̄n ní, ndum alé. 38-39Ngákó̰ó̰ḿ gə̄, majə kadə̄ ī-gerī na mā̰ȳ rɔ̄ kə́ dɔ yá̰á̰ kə́ majaĺ gə̄ tə́ ní ədan̄sí najə̄n i kə ta kūl̄ Jejuú. Tá yá̰á̰ kə́ majaĺ gə̄ malang ń ī-rāāī á *ndū najə̄ yā Moijə asə kɔr̄sí kɔ̄ɔ́ kum tə́ aĺ ní, náā nəkɔ́ ń taā kem ní kɔ́ɔ̄ teē kum tə́ kɔ̄ɔ́ kə ta kūl̄ Jeju. 40I beé ní ī-ngɔ̄mī rɔ̄sí tá ādī yá̰á̰ ń *ngé koō ta gə̄ ədan̄ najə̄n ní rāāsí alé, nin̄-ədan̄ na:
41Sḭḭ̄ ngé kídə̄ loo gə̄, á̰a̰ī ō, ādī ɔr kumsí ō, ba ī-gətóoī kɔ̄ɔ́!
Tɔdɔ̄ m-ā m̄-rāā yá̰á̰ kógə̄ḿ dan ń sḭḭ̄ ā ī-ndiīneé kə kumsí ɓáý ní tə́,
tām̄ ré deē ənīsí i gotə anī ā ī-taāī kem alé.
42Dan ń Pol nin̄ kə Barnabas teēn̄ ndágá anī, rāān̄də́ ɓɔ́ kadə̄ tél reē ɔrə̄n̄ najə̄ nəkɔ́ kə́ kógə̄ḿ beē ń noō ndɔ̄ *sabat kə́ gogə́ tə́ ɓáý. 43Dan ń ngé kán̄ naā gə̄ tḭ̄ḭ̄n̄ naā anī, *Jipə gə̄ ngá̰ý ō, Jipə tél gə̄ kə́ ngé rɔȳ Nə́ɓā gə̄ ō, unən̄ gō Pol nin̄ kə Barnabas. Nin̄-ɔrə̄n̄ najə̄ sedə́ ō, ɔjə̄n̄də́ kadə̄ əhɔn̄ gō majə ń Nə́ɓā rāā sedə́ ní adə̄ ngan̄g ō.
44Kə ndɔ̄ *sabat kə́ rang anī, na̰y sḛ́ý a i de gə̄ malang kə́ kem ɓēé n kánə̄n̄ naā yā koō najə̄ yā Kɔ́ɔ̄ɓē ní. 45Dan ń *Jipə gə̄ a̰a̰n̄ kadə̄ de gə̄ ní i ngá̰ý anī, nii asədə́ nák adə̄ nin̄ a tɔ́sə̄n̄ i najə̄ yā Pol kə̄ ndágá ō, a tájə̄nən̄ i mbée ō. 46Loo ń noō tə́ Pol nin̄ kə Barnabas ədan̄də́ kanjə̄ ɓōĺ na:
Majə kadə̄ i sḭḭ̄ n ədan̄sí najə̄ yā Nə́ɓā kété ní! Ba dan ń sḭḭ̄ kɔ́ gə̄ ī-mbātíī ō, á̰a̰ī kadə̄ ī-ndetiī kadə ndi kə kumuú kə́ ngándáńg aĺ ō ɓá ní, jḭḭ jə-tūr̄ rɔ̄jí kə̄ rɔ̄ de gə̄ kə́ nin̄ i *Jipə aĺ gə̄ tə́. 47Tɔdɔ̄ yá̰á̰ ń Kɔ́ɔ̄ɓē ɔsə sejí ta rāā ní n toō:
M-ə̄ndāī kadə̄ ḭ̄ i loo kə́ unjə̄ kow yā nápar de gə̄ ō,
kadə̄ ɔ́jə najə̄ kə́ dɔ kajə tə́ bátə́ kadə̄ ugə̄ ta ngóy dɔ nang tə́ ō.
48Dan ń de gə̄ ń nin̄ i *Jipə aĺ gə̄ ní oōn̄ najə̄ gə̄ ń noō ní anī, rɔ̄də́ nel̄də́ ngá̰ý ō, ɔsən̄ gɔn najə̄ yā Kɔ́ɔ̄ɓē ō. De gə̄ malang ń Nə́ɓā reē sedə́ i tām̄ yā ndi kə kumuú kə́ ngándáńg tə́ ní, taān̄ kem. 49Najə̄ yā Kɔ́ɔ̄ɓē taā gō nang ngeé ń noō malang. 50Banī *Jipə gə̄ sə̄lān̄ dəyá̰ kə́ ngáā ngáā kə́ kem ɓēé gə̄ kə́ ngé rɔȳ Nə́ɓā ō, sə̄lān̄ de kə́ bo bo kə́ kem ɓēé gə̄ ō, adə̄ rāān̄ Pol nin̄ kə Barnabas ndoō tə́ ō, tə̄ɓān̄də́ kɔ̄ɔ́ gō nang yādə́ tə́ ō. 51Pol nin̄ kə Barnabas *gógə̄n̄ bumbə́rú kə́ njadə́ tə́ ba aw̄n̄ Ikoniyɔm. 52Ba ngé ndóō yá̰a̰ gə̄ kə́ A̰tiyos tá rɔ̄də́ nel̄də́ ngá̰ý ō, *Ndíĺ kə́ Táĺ rosə kemdə́ ō.
Currently Selected:
Kəla rāā Ngámbang kəla gə̄ 13: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad