Kəla rāā Ngámbang kəla gə̄ 14
14
Pol nin̄ kə Barnabas i kem ɓē kə́ Ikoniyɔm tə́
1Yá̰á̰ nəkɔ́ kə́ kógə̄ḿ beē ń toō rāā yá̰a̰ kem ɓē kə́ Ikoniyɔm tə́ ō: Pol nin̄ kə Barnabas udən̄ kújə́ kán̄ naā yā *Jipə gə̄ tə́, ba ɔrə̄n̄ najə̄ kɔr̄ kógə̄ḿ kə́ rāā adə̄ Jipə gə̄ ngá̰ý ō, Gərek gə̄ ngá̰ý ō, télən̄ ngé taā kem gə̄. 2Banī *Jipə gə̄ ń taān̄ kem aĺ ní, sə̄lān̄ de gə̄ ń i Jipə aĺ gə̄ ní adə̄ gírə̄n̄ yá̰á̰ kə́ majaĺ kə ngákó̰ó̰jí gēé. 3Banī Pol nin̄ kə Barnabas ndin̄ Ikoniyɔm dan oy tām̄. Nin̄-ɔrə̄n̄ najə̄ kanjə̄ ɓōĺ, tɔdɔ̄ ənīn̄ kemdə́ mámák adə̄n̄ Kɔ́ɔ̄ɓē. Ni-adə̄də́ tɔ́gə adə̄ rāān̄ yá̰á̰ kə́ to kɔr kum gə̄ ō, yá̰á̰ kə́ yáā gə̄ ō, yā kadə̄ najə̄ kə́ dɔ kem majə yā Nə́ɓā kə́ ajə deē tə́ ń nin̄-ɔjən̄ ní i najə̄ kə́ rɔ̄kum. 4De kə́ kem ɓēé gə̄ kēngə̄n̄ naā, kə́rēý gə̄ i gō *Jipə gə̄ tə́ ō, gotə gə̄ i gō ngámbang kəla gə̄ tə́ ō.
5*Jipə gə̄ ō, de gə̄ kə́ nin̄ i Jipə aĺ gə̄ ō, naā tə́ kə ngār yādə́ gə̄ gḛyn̄ rāā Pol nin̄ kə Barnabas yá̰á̰ kə́ tōr̄. Nin̄-gḛyn̄ tə́nīdə́ kə mbalá yā tə́nī tɔ̄l̄də́. 6Dan ń nin̄-gerə̄n̄ gō anī, a̰ȳ aw̄ ɓɔ̄ɔ̄n̄ rɔ̄də́ kem ɓē gə̄ kə́ Likaoni tə́, adə̄ i kem ɓē kə́ Listər tə́ ō, Derbə tə́ ō, kem ngán ɓē gə̄ kə́ kə gō gidə ɓē gə̄ ní tə́ ō. 7Nin̄-ɔjən̄ Najə̄ kə́ Majə kem ɓē gə̄ ní tə́.
Pol ō Barnabas ō ugən̄ Listər
8Deē kógə̄ḿ kə́ ni a ndi i nang tə́ ba a ra dɔɔ́ alé i kem ɓē kə́ Listər tə́. I de kə́ kó̰o̰n ojən kə lígə̄rīí adə̄ njə̄rā ndɔ̄ kógə̄ḿ alé. 9Ndɔ̄ kə́rēý tə́ ndi a oō najə̄ kɔr̄ Pol. Dan ń Pol əndā kumən dɔn tə́ anī, a̰ā̰ kadə̄ taā kem kə́ a ajə deē i kemən tə́. 10Loo ń noō tə́ Pol ədan kə tɔ́gɔ́ na kə ḭḭ dɔɔ́ kə ra dɔ njan tə́ súmūú! Anī deē ní ḭḭ bal ba njə̄rā. 11Dan ń kósə de gə̄ a̰a̰n̄ yá̰á̰ ń Pol rāā ní anī, əgan̄ kɔ́ŕ ədanə̄ń kə ta Likaoni na nə́ɓā gə̄ na télən̄ de gə̄ ba na reēn̄ rɔ̄də́ tə́. 12Nin̄-ɓārə́n̄ Barnabas na i Jewus, ba ɓārə́n̄ Pol na i Hermes, tɔdɔ̄ i ni n i nge kɔr̄ najə̄ kə rī madə̄neé ní#14.12 Jewus ō Hermes ō i rī nə́ɓā kə́ rɔ̄kum aĺ gə̄ ń Gərek gə̄ a ndɔ̄ȳn̄ ní. Jewus i ngār yā nə́ɓā gə̄, banī Hermes i ngōmbang kəla yādə́.. 13*Nge tun̄ yá̰a̰ yā nə́ɓā Jewus ń kújə rāā ɓesə̄ yān ra i ta róbə kə́ yā kudəń kə̄ kem ɓēé tə́ ní, reē kə man̄g kə́ bəra gə̄ kə́ súūn̄də́ kə hútə̄ kāgə̄ kə́ sétə̄ gidə naā tə́ gēé ta róbə gə̄ tə́. Ni ō kósə de gə̄ ō, ndigən̄ tɔ̄l̄ man̄g kə́ bəra gə̄ ní ba tun̄də́ kadə̄ Barnabas nin̄ kə Pol. 14Dan ń ngámbang kəla gə̄, adə̄ i Barnabas nin̄ kə Pol oōn̄ najə̄ yá̰á̰ ní anī, *rə́yā̰n̄ kūbə̄ yādə́ gə̄, ba a̰ȳ udən̄ dan kósə de gə̄ tə́. 15Nin̄-əgan̄ kɔŕ ngá̰ý ədan̄ na:
Madə̄jí gə̄, ā ī-rāāī i rí kə beē? Jḭḭ i deē ndul gə̄ kə́ jə-to tītə̄sí ō! Najə̄ kə́ Majə ń j-ədasí ní, i yā kadə̄ ə́ya̰īneé ɓesə̄ kə́ kanjə̄ kumən gə̄ ń toō kɔ̄ɔ́, ba kadə̄ ī-tūrīneé rɔ̄sí kə̄ rɔ̄ Nə́ɓā kə́ ndi kə kumneé tə́, ni ń rāā dɔ rā̰ ō, dɔ nang ō, bā bo ō, yá̰a̰ malang kə́ tū tə́ ō ní. 16Kem ɓāl̄ kə́ mān̄ kɔ̄ɔ́ gə̄ tə́ ní, Nə́ɓā əya̰ nápar de gə̄ malang adə̄ unən̄ i gō róbə yādə́ nin̄ kɔ́ gə̄. 17Ɓá tā ba ni-əya̰də́ kanjə̄ kədadə́ najə̄ kə́ kum tə́ kə́ dɔ rāā majə yān tə́ alé. Tām̄ ni-adə̄sí man̄ kə́ dɔ rā̰ tə́ ō, ɓāl̄ gə̄ kə́ kōō gə̄ teēn̄ tū tə́ ngá̰ý ō, adə̄sí yá̰a̰ kəsa kə́ ə́saī adə̄ ndān̄ kemsí ō, rāā adə̄ kemsí nel̄sí ngá̰ý ō.
18Kə najə̄ gə̄ ń ɔrə̄n̄ noō gə̄gē ní, na̰y i sḛ́ý kadə̄ asən̄ kɔgə̄ kósə de gə̄ ní tun̄ yá̰á̰ kadə̄də́ alé.
19Loo ń noō tə́ *Jipə gə̄ ḭḭn̄ A̰tiyos ō Ikoniyɔm ō reē ugə̄n̄. Nin̄-sə̄lān̄ kósə de gə̄ ba tə́nīn̄ Pol kə mbalá yā tɔ̄lən. Gō tə́ anī ndɔ́r̄ aw̄ ənīnən̄ gidə ɓē tə́, tām̄ nin̄-ɔjən̄neé na oy kɔ̄ɔ́. 20Ba dan ń ngé taā kem gə̄ kánə̄n̄ naā dɔn tə́ anī, ḭḭ dɔɔ́ ba tél udə gogə́ kem ɓēé. Teē kə ndɔ̄ kə́ noō anī, aw̄ Derbə kə Barnabas.
Pol nin̄ kə Barnabas tél aw̄n̄ gogə́ A̰tiyos kə́ dɔ nang kə́ Siri tə́
21Pol nin̄ kə Barnabas ɔjən̄ Najə̄ kə́ Majə kem ɓē kə́ Derbə tə́. Nin̄-rāān̄ adə̄ de gə̄ ngá̰ý télən̄ ngé ndóō yá̰a̰ gə̄. Gō tə́ anī nin̄-tél aw̄n̄ gogə́ Listər ō, Ikoniyɔm ō, A̰tiyos kə́ Pisidi tə́ ō. 22Nin̄-mbūsə̄n̄ ngé taā kem gə̄ kə najá ō, əlan̄ go̰ kemdə́ tə́ kadə̄ ran̄ ngan̄g dɔ taā kem yādə́ tə́ ō. Nin̄-ədan̄də́ na:
I gáŕ kadə̄ wur kɔl əsō dɔjí tə́ pá tá j-a j-udiī kem *Ɓē ko̰o̰ yā Nə́ɓā tə́ ɓáý. 23Nin̄-gə̄rān̄ *kum kɔɔ̄ gə̄ kem Egəlijə gə̄ tə́ kógə̄ḿ kógə̄ḿ adə̄n̄ ngé taā kem gə̄, ba gō tə́ anī *ndin̄ ɓō tām̄ yā Nə́ɓā tə́ ō, ndɔ̄ȳn̄ ō, pá tá kadə̄ ɓɔ̄ɔ̄n̄də́ kə Kɔ́ɔ̄ɓē ń taān̄ kemən ní ɓáý.
24Nin̄-əndan̄ dɔ nang kə́ Pisidi gāngə̄n̄ ba aw̄ ugə̄n̄ Pampili. 25Nin̄-ɔjən̄ de kə́ Perjə gə̄ najə̄ yā Nə́ɓā, ba gō tə́ anī aw̄n̄ Atali. 26Nin̄-unən̄ to bo loo ń noō tə́ ba aw̄n̄ ta kaw̄ A̰tiyos. A̰tiyos i ɓē ń kété əya̰n̄də́ kem jī Nə́ɓā tə́ tū tə́ kadə̄ rāā majə sedə́ kadə̄ aw̄ rāān̄ kəla ń nin̄-rāān̄ tɔ̄lə̄n̄ ta ní tə́.
27Dan ń ugə̄n̄ A̰tiyos anī, ɔsən̄ dɔ ngé taā kem gə̄ naā tə́, ba ənīn̄də́ gotə yá̰a̰ malang ń Nə́ɓā rāā kə ta kūl̄də́ ní ō, ɔjən̄də́ loo teē ń Nə́ɓā teē ta róbə adə̄ de gə̄ kə́ nin̄ i *Jipə aĺ gə̄, yā kadə̄ nin̄-taān̄ kem ō ní. 28Ba nin̄-ndin̄ kə ngé taā kem gēé loo ngeé ń noō tə́ dan oy tām̄.
Currently Selected:
Kəla rāā Ngámbang kəla gə̄ 14: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad