Makətūbə̄ yā Soponi 3
3
Jerusalem oō ɓāŕ yā Nə́ɓā alé
1I yá̰á̰ kə́ to kum kaȳ aĺ kə́ ba̰ý beē,
tām̄ yā ɓē kə́ əsō wōn̄g tə́ ō, nujə tə́ ō,
kə́ ngé kḭḭ de gə̄ gúu
taān̄ loo kemeé tə́ ō tə́!
2Ɓē ní oō ɓār̄
yā Kɔ́ɔ̄ɓē alé.
Ni ndigə tāā ń
Kɔ́ɔ̄ɓē tāān ní aĺ ō,
ənī kemən
adə̄ Kɔ́ɔ̄ɓē aĺ ō,
ndɔ́tə̄ ngɔr kə̄
rɔ̄ Nə́ɓā yān tə́ aĺ ō.
3De kə́ bo yān gə̄ ton̄ i tītə̄
ɓɔl gə̄ kə́ a nōōn̄ beé ō,
ngé sarya yān gə̄ ton̄ i tītə̄
soó gə̄ kə́ aw̄n̄ ndo̰ó̰
ta loo tíbə́ tə́, ba dəloí anī,
yá̰a̰ kəsa yādə́ gətóo kɔ̄ɔ́ beē ō.
4*Ngé koō ta yān gə̄
i ngé gān̄g róbə gə̄.
Nin̄ i de gə̄ kə́ ngé
gól̄ madə̄də́ gə̄.
*Ngé tun̄ yá̰a̰ yān gə̄
ɓōlə́n̄ gidə yá̰a̰ yā Nə́ɓā aĺ ō,
rāān̄ yá̰a̰ gə̄ ń
*ndū najə̄ yān əda ní aĺ ō.
5Ɓá tā ba Kɔ́ɔ̄ɓē i kem ɓēé,
ni-rāā yá̰á̰ kógə̄ḿ
kə́ gōtə́ aĺ alé.
Ni-gān̄g sarya yān
dəloí kə dɔ ndɔ̄ gə̄.
Banī de kə́ majaĺ gə̄
rāān̄ yá̰a̰ kanjə̄ rɔ̄sɔl̄.
6Kɔ́ɔ̄ɓē əda na:
m̄-rāā adə̄ nápar de
kə́ ngá̰ý gə̄ gətóon̄ kɔ̄ɔ́.
Ndogə̄ mbal̄ yādə́ gə̄ ń
a rɔ̄ɔ̄n̄neé dɔ rɔ̄də́ tə́ ní,
m̄-nujəń kɔ̄ɔ́.
m̄-rāā adə̄ deē gətóo
kum róbə kɔsə yādə́ gə̄ tə́.
Deē mān̄ tū tə́ to̰ alé!
Ɓē bo yādə́ gə̄
i kə́ nujəń kɔ̄ɔ́:
deē kógə̄ḿ kə́ kemeé to̰ gətóo.
7M-ə́da rɔ̄ḿ najə̄, m-ə́da na:
ngɔlaā ní ɓē a ɓōĺ gidəḿ,
a ndigə tāā yāḿ gə̄.
Adə̄ najə̄ gə̄ ń m-ə́lań
ɓōĺ kemən tə́ ní,
m-ā m̄-rāā yá̰a̰ gə̄ ń
m-ə́dá ní aĺ ō,
m-ā m̄-rāā yá̰a̰ kə ɓēé aĺ ō.
I beé aĺ bátə́, tām̄ de kə́ kemeé gə̄
nāgə́n̄ láẃ rāān̄ yá̰á̰ kə́ majaĺ gə̄.
8Kɔ́ɔ̄ɓē əda
wáńg kə̄ ndágá na:
I beé ní, ī-ngóōī ndɔ̄ ń
kadə̄ m̄-reēń yā kəndā
najə̄ dɔsí tə́ ní!
m̄-gḛy kɔsə dɔ gotə nápar
de kə́ rang gə̄ kə̄ naā tə́,
m̄-gḛy kɔsə dɔ
ɓē ko̰o̰ gə̄ kə̄ naā tə́,
yā kadə̄ m̄-bə̄gań wōn̄g
yāḿ kə́ ngá̰ý dɔdə́ tə́.
A̰á̰ā̰, hor wōn̄g yāḿ
a o̰o̰ dɔ nang kə taá malang.
Nə́ɓā a tūr̄ gíŕ nápar de gə̄
9A̰á̰ā̰, m-ā m̄-tə́go
ta nápar de gə̄
kadə̄ *unjə̄ njáý njáý.
Loo ń noō tə́ nin̄ malang
a asən̄ ndɔ̄ȳm̄
mā Kɔ́ɔ̄ɓē ō,
a rāān̄ kəla yā kadə̄m̄
kə kemdə́ kə́ kógə̄ḿ ō.
10Ngé rɔȳḿ gə̄ ń nin̄ i kə̄ kem ɓē gə̄
tə́ malang ní,
a ḭḭn̄ gidə bā gə̄ kə́ *Etiopi tə́ sa̰y yā reē ō,
a reēn̄ kə *yá̰a̰ ndējə̄ yādə́ gə̄ yā kadə̄m̄ ō.
Gotə Israel gə̄
11Ndɔ̄ ń noō tə́ ní,
rɔ̄ gír deē yāḿ gə̄
a sɔl̄də́ najə̄ yá̰a̰
rāādə́ gə̄ malang
kə́ majaĺ tə́ to̰ aĺ ō,
najə̄ yá̰á̰ ń nin̄ rāān̄
seḿ tə́ ní to̰ aĺ ō.
Tām̄ kum mbang ngeé ń
noō tə́ ní, de gə̄ ń noō malang ń
əgōn̄ ɔjənə̄ń rɔ̄də́ ní,
m-ā m-ɔ̄r̄də́ kɔ̄ɔ́ ɓēé loosí ō,
a asəsí jā̰ā̰ bɔ̄gə̄sí dɔ
mbal̄ bo yāḿ kə́ *táĺ tə́ ō.
12I de kə́ dansí tə́ gə̄ ń
najə̄də́ gətóo ō,
i ngé ndoō gə̄ ō ní
ngóy n m-ā m-ə́yá̰də́ ní.
Nin̄ a əngen̄ loo
kə́ yā ɓɔ̄ɔń rɔ̄də́ kemḿ tə́.
13*Israel gə̄ ń a teēn̄ ta yo tə́ ní,
a rāān̄ yá̰á̰ kə́ majaĺ to̰ aĺ ō,
a sorə̄n̄ to̰ aĺ ō,
a gólə̄n̄ madə̄də́ gə̄
kə najə̄ kə́ tadə́ tə́ to̰ aĺ ō.
Nin̄ a asən̄ kəsa yá̰a̰ ō,
ɓīī ō, de kə́ yā rāādə́
kadə̄ ɓōlə́n̄ gətóo ō.
A télən̄ yā rāā ɓē kə́ Jerusalem gogə́
14Ɓē kə́ *Siyo̰, ə̄nī pā ō, ī-ndām̄ ō!
Sḭḭ̄ de kə́ *Israel gə̄,
ə́gaī kɔŕ rɔ̄nel̄!
A̰á̰ā̰, ɓē kə́ Jerusalem,
ī-rāā rɔ̄nel̄ kə dan
wurií gēé malang!
15Najə̄ ń əndān̄ dɔsí tə́
á ɔȳsí ní, Kɔ́ɔ̄ɓē un kɔ̄ɔ́.
Ni-rāā adə̄ madə̄ ba̰ā̰sí gə̄ aw̄n̄ kɔ̄ɔ́.
Kɔ́ɔ̄ɓē ń i mban̄g kə́ *Israel tə́ ní,
ni i dansí tə́.
Adə̄ majə kadə̄ ī-ɓōlíī
yá̰á̰ kə́ to kum kaȳ aĺ to̰ alé.
16Ndɔ̄ ngeé ń noō tə́ ní,
a ədan̄ kem ɓē kə́ Jerusalem tə́ na:
Ɓē kə́ *Siyo̰, ī-lōō ɓōĺ,
ī-lōō kadə̄ jīí ur̄ wak!
17Kɔ́ɔ̄ɓē Nə́ɓā yāí
i kemií tə́ danaá bang.
I ni n i go̰ rɔ̄ɔ̄
kə́ nge tetə rɔ̄ɔ̄ ní.
Rɔ̄n nelə̄n ngá̰ý najə̄ yāí tə́.
Tár yān adī ndi
kə kumuú kə́ kijə.
Ni ndām̄ tām̄ yāí tə́
kə kɔŕ rɔ̄nelēé
18tītə̄ kə́ ndɔ̄ rāā nāā tə́ beē.
Kɔ́ɔ̄ɓē əda na:
Jerusalem, m-ā m̄-rāā kadə̄
yá̰á̰ kə́ to kum kaȳ aĺ
gətóo kɔ̄ɔ́ rɔ̄í tə́,
yā kadə̄ rɔ̄í sɔlīiń to̰ alé.
19Kum mbang ngeé ń noō tə́ ní,
de gə̄ malang ń rējə̄n̄sí
kə yá̰a̰ rāā kə́ gōtə́ aĺ ní,
m-ā m̄-rāādə́ kadə̄ oyn̄.
Kum mbang ngeé ń noō tə́ ní,
de gə̄ yāsí gə̄ ń əngen̄ do ní,
m-ā m̄-ndem̄ ta dodə́.
Ngé gə̄ ń ɔyn̄də́ aw̄n̄ sedə́
dɔ ɓē kə́ rang tə́
dɔ gúú tə́ ní, m-ā
m̄-tél yā reē sedə́ gogə́.
M-ā m̄-rāā kadə̄ a rɔyn̄sí ō,
a gerə̄n̄ rīsí kə̄ kem
ɓē gə̄ malang ń əlan̄ rɔ̄sɔl̄
dɔsí tə́ tū tə́ ní tə́ ō.
20Kum mbang ngeé noō tə́ ní,
m-ā m̄-rāāsí kadə̄ ī-tél ī-reēī gogə́.
m-ā m-ɔ́sə dɔsí naā tə́.
M-ā m̄-tūr̄ yá̰á̰ ń rāāsí ní kɔ̄ɔ́
kə̄ ta kumsí tə́ beē.
M-ā m̄-rāā kadə̄ rīsí a ɓār̄ ō,
m-ā m̄-rāā kadə̄ a rɔyn̄sí ō,
dan gír de gə̄ malang
kə́ dɔ nang tə́ tə́.
I Kɔ́ɔ̄ɓē n ɔr̄ najə̄ ní.
Currently Selected:
Makətūbə̄ yā Soponi 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad