Makətūbə̄ ń Pol ndang adə̄ Titə ní 3
3
Háĺ ngé taā kem Kərist gə̄
1Ī-ter̄ kemdə́ dɔ najə̄ sɔl̄ dɔ tə́ kə̄ no ngār gə̄ tə́ ō, no ngé ko̰o̰ ɓē gə̄ tə́ ō, dɔ najə̄ koō tadə́ tə́ ō, ādə̄ əndānəń dɔ rɔ̄də́ danaá kété tām̄ yā kəla malang kə́ majə tə́ ō, 2tájə̄nəń deē aĺ ō, rɔ̄ɔ̄nəń deē aĺ ō, kadə̄ nin̄ i ngé mā̰ȳ rɔ̄də́ láẃ ngá̰ý dɔ yá̰a̰ rāā kə́ gō tə́ aĺ yā deē tə́ ō, kadə̄ ɔjənə̄ń háĺ kə́ sɔl̄ lɔ́ḿ lɔ́ḿ yādə́ kə̄ no de gə̄ malang tə́ ō. 3Tɔdɔ̄ kété ní, jḭḭ̄ i de kə́ mbóo gə̄ ō, jḭḭ̄ i ngé dɔ ngan̄g gə̄ ō, tají tḭ̄ḭ̄ kɔ̄ɔ́ ō. Jḭḭ̄ i ɓəlo gə̄ yā ngur yá̰á̰ kə́ tayā tayā gə̄ ō, ɓəlo gə̄ yā yá̰á̰ kə́ tayā tayā gə̄ kə́ adə̄n̄ deē rɔ̄nel̄ ō. J-a jə-rāāī i kem ndul ō, jə-ndiī i gír rāā ɓō yá̰á̰ kə́ tayā tayā gə̄ tə́ ō. Jə-majiī aĺ ngá̰ý ō, jḭḭ̄ i ngé kim̄ naā gə̄ ō. 4Ba dan ń kem majə yā Nə́ɓā nge kajəjí ō, tár yān kə́ tām̄ yā de gə̄ tə́ ō, ɔjən̄ rɔ̄də́ kə̄ ndágá ní, 5ni-ajəjí i tām̄ yá̰á̰ kə́ gōtə́ kə́ jḭḭ̄ kɔ́ gə̄ jə-rāāī tə́ alé, banī i tām̄ kumən kə o̰o̰n tām̄ yājí tə́ tə́. Ni-ajəjí ō, rāā adə̄ j-udiī tū ndi kə kumuú kə́ kijə tə́ ō, i kə ta kūl̄ tə́go rɔ̄ yā kojə kijə ō, i kə ta kūl̄ *Ndíĺ kə́ Táĺ ō. 6Ni-adə̄jí Ndíĺ kə́ Táĺ ní ngá̰ý i kə ta kūl̄ Jeju *Kərist nge kajəjí. 7Ni-əda kə̄ ndágá wáńg na najə̄ gətóo dɔjí tə́ i kə ta kūl̄ kem majə yān, i yā kadə̄ jə-téliīń ngé kənge ndi kə kumuú kə́ ngándáńg gə̄, adə̄ i ndi kə kumuú kə́ ngándáńg ń j-əndāī kemjí dɔ tə́ ní. 8Najə̄ ń noō i Najə̄ kə́ Majə kadə̄ deē taā kem.
Adə̄ m-gḛy kadə̄ ī-ra dɔ tə́ ngá̰ý, yā kadə̄ de gə̄ ń taān̄ kem Nə́ɓā ní, əndān̄ kumdə́ gíŕ yá̰á̰ kə́ majə gə̄ tə́ rāān̄. Nge ń noō i yá̰á̰ kə́ majə ō, a rāā majə kə de gēé malang ō. 9Banī ndəle gíŕ yá̰á̰ kə́ kanjə̄ kumən gə̄ ō, kɔr̄ gír kaa gə̄ ō, tṵ́ṵ̄ naā gə̄ ō, tɔ́tə̄ naā dɔ *ndū najə̄ tə́ ń i yá̰á̰ kə́ teē yá̰a̰ aĺ ō, i yá̰á̰ kə́ kanjə̄ kumən gə̄ ō ní, ī-lōō kəla taí danaá. 10De kə́ nge ndóō de gə̄ yá̰á̰ kə́ rɔ̄kum aĺ ní, ī-tāan nja kógə̄ḿ, ba nja kə́ nge ko̰ jōó anī, ɔ̄rə̄n kɔ̄ɔ́ kə̄ gogə́. 11Tɔdɔ̄ ī-ger̄ kadə̄ de kə́ beé i de kə́ tɔ̄ɔ̄ róbə kɔ̄ɔ́ ō, i de kə́ nge rāā majaĺ ō, nəkɔ́ gān̄g sarya dɔ rɔ̄n tə́ kɔ̄ɔ́ ō.
Kɔjə gə̄ kə́ ta tɔ̄l̄ ta tə́
12Ré ndɔ̄ń tə́ m-ə́la Artemas, aláa Tisik looí anī, ə́hɔ rɔ̄í tɔgə ba ī-reē ə́ngem̄ Nikopolis tə́. Tɔdɔ̄ m̄-gḛy ndi nāā kūl̄ tə́ i loo ń noō tə́. 13Ə̄ndā rɔ̄í ta kaw̄ mbā yā Jenas nge ndóō de gə̄ *ndū najə̄ tə́ ō, Apolos tə́ ō, ādə̄ nalə̄n̄ yá̰á̰ kógə̄ḿ alé. 14Majə kadə̄ deē yājí gə̄ ndóōn̄ rāā kəla kə́ majə gə̄ ō, tá kadə̄ nin̄-əndān̄ rɔ̄də́ ta yá̰á̰ kə́ tōr̄ rɔ̄ gə̄ tə́. Loo ń noō tə́, nin̄ a télən̄ de kə́ teē yá̰a̰ aĺ gə̄ alé.
15De gə̄ malang ń i seḿ ní, rāāīn̄ lápə́ya. Ī-rāā ngé taā kem madə̄jí gə̄ lápə́ya.
Ādə̄ Nə́ɓā rāā kem majə sesí malang.
Currently Selected:
Makətūbə̄ ń Pol ndang adə̄ Titə ní 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad