Makətūbə̄ ń Pol ndang adə̄ Rom gə̄ ní 16
16
Kəla lápə́ya yā Pol
1Mā m̄-tāāsí najə̄ yā ngōkó̰ó̰jí kə́ dəyá̰ ń rīn na i Pebe ní. Ni i nge kəla kə́ kem Egəlijə kə́ Sankəre tə́. 2Ə́hɔīin̄ kə̄ rɔ̄sí tə́ kə rī Kɔ́ɔ̄ɓēé tītə̄ ń majə kadə̄ de gə̄ yā Nə́ɓā rāān̄neé kə naá ní. Ré i yá̰á̰ kógə̄ḿ n tōr̄ rɔ̄n anī, ī-rāāī seneé. Tɔdɔ̄ ni-rāā kə de gēé ngá̰ý ō, rāā seḿ mə̄kɔ́ ō.
3Ī-rāāī Pərisil ō Akilas ō lápə́ya ādə̄mī. Nin̄ i madə̄ kəlaḿ kə́ loo kɔjə najə̄ yā Jeju *Kərist tə́. 4Nin̄-ənīn̄ rɔ̄də́ kɔ̄ɔ́ tām̄ yāḿ tə́, adə̄ i mā ngóy n dɔḿ a ndígə̄nal yá̰á̰ ń nin̄-rāān̄ seḿ toō aĺ ní alé, ba i de gə̄ kə́ kem Egəlijə gə̄ tə́ malang, kə́ gō nang yā de gə̄ kə́ nin̄ i Jipə aĺ gə̄ tə́. 5Ī-rāāī de kə́ kem Egəlijə tə́ gə̄ ń a kánə̄n̄ naā loodə́ ní lápə́ya ādə̄mī ō. Ī-rāāī kó tár yāḿ Epenetə ń i nge taā kem Jeju Kərist kə́ ta kəga dɔ sasak kə́ gō nang kə́ Aji tə́ ní lápə́ya ādə̄mī ō. 6Ī-rāāī Mari ń ɔr sesí ngá̰ý ní lápə́ya ādə̄mī ō. 7Ī-rāāī Andəronikus ō Junias ō lápə́ya ādə̄mī. Nin̄ i mósə́ḿ gə̄ ō, madə̄ dəngáýḿ gə̄ ō. Nin̄ i ngámbang kəla kə́ bo gə̄, tá nin̄ i ngé yā *Kərist gə̄ kété noḿ mā tə́ ɓáý to̰.
8Ī-rāāī Ampəliatus lápə́ya ādə̄mī. Ni i madə́ḿ kə́ ngá̰ý loo kun gō Kɔ́ɔ̄ɓē tə́. 9Ī-rāāī Urbḛ lápə́ya ādə̄mī ō. Ni i madə̄ kəlají loo kɔjə najə̄ yā Kərist tə́. Ī-rāāī kó tár yāḿ Sətakis lápə́ya ō. 10Ī-rāāī Apel lápə́ya ādə̄mī. Ni-rāā yá̰á̰ kə́ ɔjə kə̄ ndágá kadə̄ ni i nge taā kem Kərist. Ī-rāāī de kə́ kem kújə yā Aristobul tə́ gə̄ lápə́ya ādə̄mī. 11Ī-rāāī Erodiyo̰ lápə́ya ādə̄mī. Ni i mósə́ḿ. Ī-rāāī ngé taā kem kə́ ɓē Narsisií gə̄ lápə́ya ādə̄mī. 12Ī-rāāī Təripen ō Teripojə ō lápə́ya ādə̄mī. Nin̄ i dəyá̰ gə̄ kə́ ɔrən̄ ta kəla yā Kɔ́ɔ̄ɓē tə́ aĺ ō. Ī-rāāī Persis lápə́ya ādə̄mī ō. Ni i kó tár yāḿ kə́ rāā kəla ngá̰ý tām̄ yā Kɔ́ɔ̄ɓē tə́. 13Ī-rāāī Rupus lápə́ya ādə̄mī. Ni i de kə́ Kɔ́ɔ̄ɓē gə̄rān dan ngé kəla yān gə̄ tə́. Ī-rāāī kó̰o̰n ń rāā rɔ̄n i kó̰ó̰ḿ mā tə́ ō ní lápə́ya ādə̄mī. 14Ī-rāāī Asḛkəritə ō Pəlegon ō Hermes ō Patərobas ō Hermas ō, ngákó̰ó̰jí kə́ rang gə̄ ń ndin̄ sedə́ ní ō, lápə́ya ādə̄mī. 15Ī-rāāī Pilologə ō Juli ō Nere ō ngōkó̰o̰n kə́ dəyá̰ ō, Olempas ō, gotə ngé yā Nə́ɓā madə̄də́ gə̄ malang ń ndin̄ sedə́ ní ō lápə́ya.
16Ī-ɓirī naā kə̄ rɔ̄sí tə́ ī-rāāīneé naā lápə́ya kə́ loo ngákó̰o̰ naā gə̄ tə́. De kə́ kem Egəlijə yā *Kərist tə́ gə̄ malang rāān̄sí lápə́ya ō.
Tāā kə́ ta tɔ̄l̄ ta tə́
17Ngákó̰ó̰ḿ gə̄, m-ɔ̄jə̄sí kadə̄ ī-ngɔ̄mī rɔ̄sí najə̄ yā ngé gán̄g de gə̄ naā tə́ ń nin̄ i ngé rāā yá̰a̰ gə̄ kə́ əgan̄ de gə̄ bə̄dē tə́ ní ō, ngé mbātə́ kun gō yá̰á̰ ndóō ń ndóōn̄sí ní ō. Əya̰īdə́ ba āwī sa̰y kɔ̄ɔ́ rɔ̄də́ tə́. 18Tɔdɔ̄ de gə̄ ń noō nin̄-rāān̄ i kəla yā Kərist Kɔ́ɔ̄ɓē yājí alé, ba a rāān̄ i kəla tām̄ yā kemdə́ tə́. De gə̄ ń i kə́ kumdə́ gān̄g aĺ ní, nin̄-gólə̄n̄də́ kə najə̄ yādə́ kə́ majə gēé ō, kə́ nel̄ gēé ō. 19Koō ń sḭḭ̄ ōōī najə̄ ta Kɔ́ɔ̄ɓē tə́ ní, de gə̄ gerə̄n̄. Adə̄ rɔ̄ḿ nelə̄m̄ najə̄ yāsí tə́, ba m̄-gḛy kadə̄ sḭḭ̄ i de kə́ ngáā gə̄ kadə̄ ī-rāāī yá̰á̰ kə́ majə ō, ī-tə́laī rɔ̄sí dan yá̰á̰ kə́ majaĺ gə̄ tə́ aĺ ō. 20Na̰y i ngɔr kadə̄ Nə́ɓā kə́ nge kadə̄ de gə̄ kem sɔl̄ lɔm a rējə̄ *Sətan kɔ̄ɔ́ gír njasí tə́.
Ādə̄ Kɔ́ɔ̄ɓē yājí Jeju rāā kem majə sesí.
21Timote#16.21 Timote: Á̰a̰ī Kəla 16.1-3; 17.14-15; 18.5 kə́ madə̄ kəlaḿ rāāsí lápə́ya ō, Lusius ō, Jaso̰ ō, Sosipatər ō nin̄ ń i ngééḿ gə̄ ní rāān̄sí lápə́ya.
22Ba mā Tertius kə́ nge ndang makətūbə̄ ń toō m̄-rāāsí lápə́ya ō. Mā i nge kun gō Kɔ́ɔ̄ɓē madə̄sí ō.
23Gayus kə́ bəra mbāḿ ō, kə́ bəra mbā ngé kán̄ naā gə̄ malang ō, rāāsí lápə́ya. Erastə nge ngɔ̄m̄ gúrsə yā ɓē ō, ngōkó̰ó̰jí Kartus ō, rāān̄sí lápə́ya.
24Ādə̄ Kɔ́ɔ̄ɓē yājí Jeju *Kərist rāā kem majə sesí malang. *Ādə̄ i tītə̄ ń noō#16.24 K. 24 gətóo kem makətūbə̄ Rom kə́rēý gə̄ kə́ kété tə́ kə ta Gərek..
Tɔ̄ȳ kə́ ta tɔ̄l̄ ta tə́
25Kɔsə gɔn i yā Nə́ɓā! Ni asə mbūsə̄sí kadə̄ ī-raī ngan̄g kə ta kūl̄ Najə̄ kə́ Majə ń m-ɔ́jə́ ní. Najə̄ kə́ Majə ní i najə̄ yā Jeju *Kərist. Yá̰a̰ kə́ deē ger̄ alé ń to loo ɓɔ̄ɔ̄ tə́ i jóó ngá̰ý ní, Nə́ɓā rāā adə̄ de gə̄ gerə̄n̄ i kə ta kūl̄ Najə̄ kə́ Majə ngeé ń toō. 26Yá̰á̰ ní rāā yá̰a̰ kem ndɔ̄ yājí gə̄ ń toō tə́ adə̄ to i kə̄ dɔ ndágá. Tītə̄ ń Nə́ɓā kə́ ndi ngándáńg əda ń yá̰a̰ gə̄ kə́ ɔsə kə de gēé kadə̄ rāān̄ ní, nápar de gə̄ malang gerə̄n̄ najə̄ ní ta kūl̄ najə̄ gə̄ ń *ngé koō ta gə̄ ndangən̄ ní, yā kadə̄ ré nin̄-taān̄ kem anī oōn̄ ta Nə́ɓā.
27Kɔsə gɔn i yā Nə́ɓā, i nəkɔ́ kal kógə̄ḿ beē ngóy n i de kə́ nge kum kedə̄. Kadə̄ de gə̄ ɔsən̄ gɔnən kə ta kūl̄ Jeju Kərist kə dɔ ɓāl̄ gə̄ ɓāl̄ gə̄! *Adə̄ i tītə̄ ń noō.
Currently Selected:
Makətūbə̄ ń Pol ndang adə̄ Rom gə̄ ní 16: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad