Makətūbə̄ yā Nehemi 13
13
Nehemi tūr̄ gíŕ yá̰a̰ gə̄
1Dan ngeé ń noō tə́ ní tə́dan̄ makətūbə̄ yā Moijə adə̄n̄ de gə̄ oōn̄ ndágə looó, anī teēn̄ dɔ loo ń ndangən̄ tū tə́ na Amon ō Moab ō na a udən̄ dan ngé kán̄ naā gə̄ yā Nə́ɓā tə́ aĺ i kə́ bátə́ gə̄ tə́ ní tə́. 2Tɔdɔ̄ nin̄ tə́nīn̄ ta ngán *Israel gə̄ kə yá̰a̰ kəsaá aĺ ō, kə maná aĺ ō. Tá Moab gə̄ mangən̄ Balam kə naraá kadə̄ ndɔ̄ĺ ngán Israel gə̄ ō, banī Nə́ɓā yājí tūr̄ ndɔ̄ĺ adə̄ tél i tɔ́r̄ ta. 3Dan ń oōn̄ *ndū najə̄ ní anī ɔrə̄n̄ tə̄rā gə̄ kɔ̄ɔ́ dan ngán Israel gə̄ tə́.
4Kété ní i Eliasib kə́ *nge tun̄ yá̰a̰ n əndān̄ dɔn tə́ kadə̄ əndā kumən gō kújə gə̄ kə́ kadə *kújə yā Nə́ɓā yājí tə́ ní. Ni i nge Tobia kə́ ngɔr ngá̰ý, 5adə̄ ni-adə̄n kem kújə́ kógə̄ḿ kə́ kemən bo. Kété ní a kánə̄n̄ yá̰á̰ kə́ ndējə̄ gə̄ ō, kajaja ō, ngáń gájə́ yá̰a̰ rāā kəla gə̄ ō, dɔ kōō gémē kə́ kɔr̄ ō dɔ kasə *nduú kə́ guḿ ō, dɔ yibə̄ ō#13.5 Kōō gémē kə́ kɔr̄ ní: Ré gémē i kem yá̰a̰ kutə ɓáa a ɔrə̄n̄ kem kógə̄ḿ., yá̰á̰ kə́ tām̄ yā *ngán Lebi gə̄ tə́ ō, gōsə̄ pā gə̄ tə́ ō, ngé ngɔ̄m̄ ta róbə gə̄ tə́ ō, *yá̰a̰ ndējə̄ kə́ tām̄ yā *ngé tun̄ yá̰a̰ gə̄ tə́ ō, i kem kújə́ ní tə́.
6Dan ń yá̰a̰ gə̄ ń noō a rāān̄neé yá̰á̰ tə́ ní mā i Jerusalem alé, tɔdɔ̄ m̄-tél m-āw̄ gogə́ rɔ̄ Artajerses mban̄g kə́ *Babilon tə́, ɓāl̄ ko̰o̰ ɓē yān kə́ nge ko̰ kutə mətá gidə i jōó tə́. Gō tə́ sḛ́ý anī m̄-dəje mban̄g ta róbə 7ba m̄-tél m̄-reē gogə́ Jerusalem. Loo ń noō tə́ m-á̰á̰ yá̰á̰ kə́ majaĺ ń Eliasib rāā tām̄ yā Tobia tə́ ní: Ni-adə̄n kem kújə́ kógə̄ḿ kə́ dan kújə gə̄ kə́ kadə *kújə yā Nə́ɓā tə́. 8Tōrə̄m̄ ngá̰ý adə̄ m-ādə̄ ɔyn̄ yá̰a̰ malang kə́ kem kújə yā Tobia tə́ ɓōkə́n̄ ndágá kɔ̄ɔ́. 9Gō tə́ anī m-ādə̄ ɔyn̄ kem kújə gə̄ kɔ̄ɔ́ adə̄ unjə̄ ō, m-ādə̄ tél reēn̄ kə ngáń gájə́ yá̰a̰ rāā kəla gə̄ kə́ kem *kújə yā Nə́ɓā tə́ ō, yá̰á̰ kə́ ndējə̄ gə̄ ō, kajaja ō, gogə́ kemeé.
10M-ōō kadə̄ yá̰á̰ kə́ tām̄ yā *ngán Lebi gə̄ tə́ ní adə̄n̄də́ alé, adə̄ ngán Lebi gə̄ ō, gōsə̄ pā gə̄ ō ń a rāān̄ kəla ní a̰ȳn̄ naā loo ndīdə́ gə̄ tə́ kógə̄ḿ kógə̄ḿ kɔ̄ɔ́. 11m̄-gákə̄ ngé rāā sarya gə̄ m-ə́dádə́ na: De gə̄ əya̰n̄ *kújə yā Nə́ɓā kɔ̄ɔ́ i tām̄ rí tə́? Gō tə́ anī m̄-kán̄ *ngán Lebi gə̄ ō, gōsə̄ pā gə̄ ō, ba m-ādə̄ tél unən̄ ta kəla yādə́ gogə́. 12Loo ń noō tə́ *Juda gə̄ malang reēn̄ kə dɔ kōō gémē kə́ nge ko̰ kutə kə́ kɔr̄ gə̄#13.12 Kōō gémē kə́ kɔr̄ ní: Á̰a̰ī 13.5 ō, dɔ kasə *nduú kə́ kíjə ō, dɔ yibə̄ ō, yā kán̄ kem kújə ngɔ̄m̄ yá̰a̰ gə̄ tə́. 13De gə̄ ń m̄-gə̄rādə́ kadə̄ ngɔ̄mə̄n̄ kújə ngɔ̄m̄ yá̰a̰ gə̄ ní i Selemia kə́ *nge tun̄ yá̰a̰ ō, Sadok nge ndang makətūbə̄ ō, Pedaya kə́ ngōn̄ *Lebi ō. Deē ń ərōdə́ tə́ ní i Hanan kə́ ngōn̄ Jakur kə́ ngōn̄ Matania. Nin̄ malang ní de gə̄ rāān̄də́ i de gə̄ kə́ ran̄ dɔ ndūdə́ tə́. I nin̄ n i ngé nə̄ɓō ngákó̰ó̰də́ gə̄ *yá̰a̰ ndējə̄ gə̄ ní.
14Nə́ɓā yāḿ, ādə̄ əga kemií dɔḿ tə́ najə̄ yá̰á̰ ń noō tə́. Ī-lōō kadə̄ dɔí ndígə̄nal háĺ kə́ súmūú ń m̄-rāań kəla tām̄ yā *kújə yā Nə́ɓā yāḿ tə́ ō, kəla yān tə́ ō ní.
15Dan ngeé ń noō tə́ ní m-á̰a̰ *Juda gə̄ loo mbə̄sā kan̄ *kāgə̄ nduú tə́ kə njadə́ ndɔ̄ *sabat tə́, i loo mbə́rē kan̄ kāgə̄ nduú gə̄ tə́. Ngé kə́rēý gə̄ ətōn̄ dɔ do̰ō̰ kōō gémē gə̄ ō, ɔyn̄ kasə *nduú gə̄ ō, kan̄ kāgə̄ nduú gə̄ ō, kótə̄ gə̄ ō, yá̰a̰ kə́ rang kə́ tayā tayā gə̄ ō, gidə kərō gə̄ tə́ aw̄n̄neé Jerusalem ndɔ̄ *sabat tə́. m̄-kɔ̄l̄ sedə́ ndɔ̄ kigə yá̰a̰ yādə́ gə̄ tə́. 16De kə́ Tir gə̄ ń ndin̄ kem ɓēé ní reēn̄ kə kānjə̄ gə̄ ō, yá̰a̰ gātə̄ kə́ rang kə́ tayā gə̄ ō igən̄neé jī *Juda gə̄ tə́ ō, kem ɓē kə́ Jerusalem tə́ ō, ndɔ̄ *sabat tə́. 17m̄-gákə̄ de kə́ bo kə́ Juda tə́ gə̄ m-ə́dádə́ na: I majaĺ kə́ ba̰ý n ā ī-rāāī beé ní? Sḭḭ̄ ī-rāāī ndɔ̄ sabat i ndɔ̄ kə́ karī tə́! 18Kaasí gə̄ rāān̄ i tītə̄ ń noō ō aĺ a? I tām̄ najə̄ ń noō tə́ n Nə́ɓā yājí rāā adə̄ yá̰á̰ kə́ to kum kaȳ aĺ gə̄ malang ń toō reēn̄neé dɔjí tə́ ō, dɔ ɓē ń toō tə́ ō ní. Ba sḭḭ̄, ndɔ̄ *sabat ń ī-rāāī i ndɔ̄ kə́ karī tə́ ní, ī-rāāī i kadə̄ wōn̄g tél rāā Nə́ɓā kə ngán *Israel gēé gogə́ ɓáý to̰!
19Loo ń noō tə́ m-ə́da kadə̄ utə̄n̄ ta róbə gə̄ kə́ Jerusalem loo tíbí kɔ̄ɔ́ pá tá kadə̄ ndɔ̄ *sabat əla gíŕ ɓáý ō, kadə̄ teēn̄ ta alé bátə́ kadə̄ ré gír ndɔ̄ *sabat gān̄g tá ō. m̄-tə́ndā ngé kəla yāḿ kə́rēý gə̄ ta róbə gə̄ tə́ kadə̄ ngɔ̄mə̄n̄ majə kadə̄ yá̰a̰ gātə̄ kə́rēý udə kem ɓēé ndɔ̄ kə́ kɔr̄ kam̄ tə́ alé. 20Adə̄ ngé gātə̄ gə̄ ō, ngé kigə yá̰á̰ kə́ tayā tayā gə̄ ō, ɓīīn̄ gidə ɓē kə́ Jerusalem tə́ ndágá ndɔ̄ kógə̄ḿ aláa jōó. 21m̄-tāādə́ m-ə́da na: Ī-ɓīī gidə ndogə̄ mbal̄ tə́ i tām̄ rí tə́? Ré ī-téĺ ə́laī gír gogə́ rang to̰ anī m-ā m-ādə̄ a əhɔn̄sí! Əla gír kum mbang ngeé ń noō tə́ ní nin̄ reēn̄ ndɔ̄ *sabat tə́ to̰ alé. 22Gō tə́ anī m-ə́dá *ngán Lebi gə̄ kadə̄ tə́gon̄ majaĺ kə́ rɔ̄də́ tə́ kɔ̄ɔ́ kadə̄ unjə̄n̄ njáý njáý, ba kə aw̄ kə n gɔ̄mə̄n̄ ta róbə gə̄ kə́ yā kudəń kə̄ kem ɓēé, yā kadə̄ de gə̄ ɓōlə́n̄neé ndɔ̄ *sabat ba rāān̄neé ndɔ̄ ní i ndɔ̄ kə́ kɔr̄ kam̄ tām̄ yā Nə́ɓā tə́.
Nə́ɓā yāḿ, ādə̄ əga kemií dɔḿ tə́ tām̄ yā nge ń noō tə́ ō, á̰a̰ kum tō ndoō yāḿ tām̄ kem majə yāí kə́ ngá̰ý tə́ ō.
23I dan ngeé ń noō tə́ n m-á̰a̰ń *Jipə gə̄ kə́ táān̄ dəyá̰ Asdod gə̄ ō Amon gə̄ ō, Moab gə̄ ō ní. 24Núsə́ ngáńdə́ kə́rēý gə̄ a ɔrə̄n̄ i ta Asdod, ba deē kógə̄ḿ dandə́ tə́ kə́ ger̄ kɔr ta yā Jipə gə̄ ní gətóo. Nin̄ gerə̄n̄ i ta yā gír de kə́ rang gə̄. 25m̄-kɔ̄l̄ sedə́ ō, m̄-ndɔ̄ĺdə́ ō. M-ə́nda de kə́ dəngam kə́rēý gə̄ kə́ dandə́ tə́ ō, m̄-ró̰ȳ nənga dɔdə́ ō. Gō tə́ anī m-ādə̄ túbən̄ njadə́ kə rī Nə́ɓāá kadə̄ adə̄n̄ tə̄rā gə̄ ngáńdə́ kə́ dəyá̰ gə̄ kadə̄ táān̄ to̰ aĺ ō, kadə̄ táān̄ dəyá̰ tə̄rā gə̄ adə̄n̄ ngáńdə́ kə́ dəngam gə̄ to̰ aĺ ō, táān̄ tām̄ yādə́ nin̄ kɔ́ gə̄ tə́ to̰ aĺ ō. 26I yá̰á̰ ń noō n rāā adə̄ Salomo̰ mban̄g kə́ *Israel tə́ rāań majaĺ ní aĺ a? Dan nápar de gə̄ malang tə́ ní mban̄g kə́ tītə̄n gətóo. Kété ní Nə́ɓā tárən ō, əndān mban̄g dɔ ngán Israel gə̄ tə́ malang ō. Ɓá tā ba i ni n dəyá̰ tə̄rā gə̄ rāānən̄ adə̄ rāā majaĺ ní! 27Kadə̄ de gə̄ oōn̄ naā tə́ na sḭḭ̄ na ī-rāāī yá̰á̰ kə́ majaĺ ngá̰ý kə Nə́ɓā yājí ō a? Kadə̄ ədan̄ na sḭḭ̄ na ī-rāāī háĺ kə́ sew aĺ kə Nə́ɓāá, adə̄ na ī-táāī dəyá̰ tə̄rā gə̄ a?
28Ngōn̄ Yoyada kógə̄ḿ kə́ dəngam kə́ ngōn̄ Eliasib ngol *ngé tun̄ yá̰a̰ gə̄ i um Sanbalat kə́ Horon, adə̄ m̄-tə́ɓān kɔ̄ɔ́ rɔ̄ḿ tə́.
29Nə́ɓā yāḿ, ādə̄ əga kemií dɔdə́ tə́, tɔdɔ̄ kəla *tun̄ yá̰a̰ ō, *madə̄ naā kə́ kəhɔ kə *ngé tun̄ yá̰a̰ gēé ō ngán *Lebi gēé ō ní, nin̄ rāān̄ adə̄ majaĺ tákə̄!
30M-ɔ̄r̄ tə̄rā gə̄ malang mbo̰ō̰də́ tə́ m̄-tə́goń majaĺ kə́ dɔ dáńdə́ tə́ kɔ̄ɔ́ adə̄ unjə̄n̄ njáý njáý ō, m-ādə̄ kəla yā *ngé tun̄ yá̰a̰ gə̄ ō ngán *Lebi gə̄ ō to gotoó gogə́ ō. Nin̄ kógə̄ḿ kógə̄ḿ ran̄ ta kəla yādə́ gə̄ tə́. 31M-ādə̄ de gə̄ tél ndējə̄n̄ kīr̄ gogə́ kə ndɔ̄n gēé ō, ndējə̄n̄ kan̄ yá̰á̰ kə́ teē ta kəga dɔ gə̄ ō.
Nə́ɓā yāḿ, ādə̄ əga kemií dɔḿ tə́ tām̄ yā yá̰á̰ kə́ majə tə́!
Currently Selected:
Makətūbə̄ yā Nehemi 13: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad