Makətūbə̄ kə́ ndang adə̄n̄ Hebəro gə̄ 13
13
Loo rāā yá̰a̰ kadə̄ nel̄ Nə́ɓā
1Ī-táriī naā kə́ loo ngákó̰o̰ naā gə̄ tə́. 2Ādī dɔsí ndígə̄nal dɔ rāā mbā tə́ alé. Tɔdɔ̄ loo rāā mbā tə́ ní, de kə́rēý gə̄ rāān̄ *de kə́ dɔ rā̰ tə́ gə̄ mbā kanjə̄ kadə̄ ger̄ gō. 3Ādī əga kemsí dɔ ngé gə̄ ń i kújə dəngáyá ní, tītə̄ kə́ sḭḭ̄ i dəngáyá sedə́ beé ō. Ādī əga kemsí dɔ ngé gə̄ ń rāān̄də́ yá̰á̰ kə́ tōr̄ gə̄ tə́ ní ō, tām̄ sḭḭ̄ kɔ́ gə̄, i kə dā̰ rɔ̄sí ō.
4Ādə̄ de gə̄ malang ɓōlə́n̄ gidə taā naā ō, kadə̄ majaĺ tákə̄ tə̄rá taā naā alé#13.4 Kadə̄ majaĺ tákə̄ tə̄rá taā naā alé, kumən na i ādə̄ ngé taā naā gə̄ ran̄ dɔ ndūdə́ ń ənīn̄ adə̄n̄ naā ní tə́. ō, tɔdɔ̄ Nə́ɓā a gān̄g sarya dɔ ngé gə̄ ń sāān̄ naā loo kaya tə́ ní ō, dɔ ngé rāȳ gə̄ tə́ ō.
5Kadə̄ háĺsí i háĺ ngé rāā ta nar gə̄ alé, ba kadə̄ yá̰á̰ ń ə́ngeī ngɔlaā ní asəsí. Tɔdɔ̄ Kɔ́ɔ̄ɓē nəkɔ́ əda na: M-ā m-ə́ya̰ī kɔ̄ɔ́ aĺ ō, m-ā m̄-mbātíī aĺ ō. 6Adə̄ j-asiī kənī kemjí mámák kədań najə̄ ń toō:
Kɔ́ɔ̄ɓē i nge rāā seḿ,
m-ā m̄-ɓōĺ yá̰á̰ kógə̄ḿ alé.
Deē a rāā i rí seḿ?
7Ādə̄ əga kemsí dɔ nge kɔr no ngé kán̄ naā gə̄ yāsí á ɔjən̄sí najə̄ yā Nə́ɓā ní. Ə̄ndāī ma̰ȳ loo ndidə́ dɔ nang tə́ laā ō, ta ngóýdə́ ō, ba ī-ndájī taā kem yādə́. 8Jeju *Kərist to i kum gotən, tagə́bēé ō, ɓōólaā ō, ni a to i kum gotən ngándáńg ō. 9Ī-lōōī kadə̄ yá̰á̰ ndóō kə́ mbā kə́ gíŕdə́ i dáńg dáńg gə̄, rāān̄sí ādī ndúmī ta róbə. Kadə̄ kem majə kə́ Nə́ɓā rāā sejí n adə̄jí tɔ́gə ní, i yá̰á̰ kə́ majə, tɔȳ kadə̄ i *ndū najə̄ gə̄ dɔ yá̰a̰ kəsa tə́. Ngé gə̄ ń unən̄ gō ndū najə̄ kə́ dɔ yá̰a̰ kəsa gə̄ tə́ ní əngen̄ yá̰á̰ kógə̄ḿ gírí alé.
10Jḭḭ̄ j-awī kə *loo tun̄ yá̰á̰ kə́ ngé gə̄ ń rāān̄ kəla yā Nə́ɓā kem kújə tandā yā Moijə tə́ ní asən̄ kəsa *yá̰a̰ ndējə̄ kə́ tun̄ dɔ tə́ alé. 11Ngol *ngé tun̄ yá̰a̰ gə̄ aw̄ kə mósə dā̰ gēé i kem *loo kə́ táĺ ngá̰ý tə́ yā kadə̄ i *yá̰á̰ kə́ tun̄ tām̄ yā mā̰ȳ rɔ̄ tə́ dɔ majaĺ gə̄ tə́. Banī rɔ̄ dā̰ gə̄ ní a róōn̄ i gidə gérger tə́ ndágá. 12I tām̄ najə̄ ń noō tə́ n Jeju oyń gidə ɓē tə́ ndágá ō yā tə́goń de gə̄ kadə̄ unjə̄n̄ njáý njáý kə ta kūl̄ mósən nəkɔ́ ní. 13I beé ní, ādə̄ jə-tə́gāī tají gíŕ yá̰á̰ kə́ to rɔ̄sɔl̄ gə̄ tə́ tītə̄ yān, ba jə-teē j-awī gōn tə́ gidə ɓē tə́ ndágá. 14Tɔdɔ̄ dɔ nang tə́ laā ní j-əngeī ɓē kə́ to ngándáńg alé, ba j-a jə-sāāī i ɓē kə́ ndɔ̄ń tə́ a to ɓáý. 15I beé ní, jə-ndējī Nə́ɓā tɔȳ yājí tītə̄ *yá̰a̰ tun̄ beé kə ndɔ̄ gə̄ ndɔ̄ gə̄, kə ta kūl̄ Jeju. Kumən na ādə̄ jə-tɔ̄yī rīn kə tam tají kə ndɔ̄ gə̄ ndɔ̄ gə̄. 16Ādə̄ dɔsí ndígə̄nal rāā majə kə deé aĺ ō, rāā kə naá aĺ ō. Tām̄ i *yá̰a̰ tun̄ kə́ tītə̄ ń noō gə̄ n nelə̄n̄ Nə́ɓā ní.
17Ōōī najə̄ ta nge kɔr no ngé kán̄ naā gə̄ ō, ə́laī dɔsí gír tɔ́gə yādə́ tə́ ō. Tɔdɔ̄ nin̄-əndān̄ kumdə́ gíŕsí tə́ tām̄ a ɔjən̄ Nə́ɓā gotə. Ré ōōī tadə́ anī, a rāān̄ kəla kə rɔ̄nelēé. Ré i beé aĺ anī a nōōn̄ i rɔ̄də́ n a rāān̄neé, ba ngé ń noō a teēsí yá̰á̰ tə́ alé.
18Ī ndɔ̄yī tām̄ yājí tə́, tɔdɔ̄ jə-ger̄ majə kadə̄ kemjí ɔjəjí yá̰á̰ kə́ majaĺ alé. Tām̄ jə-gḛy ngɔ̄m̄ háĺjí yā rāāń majə tū yá̰a̰ gə̄ tə́ malang ō. 19m̄-rāāsí ɓɔ́ nəkɔ́, ī-ndɔ̄yī ngá̰ý kadə̄ m̄-tél kə̄ rɔ̄sí tə́ gogə́ láẃ.
Ndɔ̄ȳ
20I kə ta kūl̄ mósə yā *madə̄ naā kə́ a to ngándáńg n Kɔ́ɔ̄ɓē yājí Jeju *Kərist i nge kul̄ kə́ bo yā batə̄ gə̄ ní. Nə́ɓā kə́ nge kadə̄ kem sɔl̄ lɔm ndólə̄n dan de kə́ koy gə̄ tə́ kɔ̄ɔ́. 21Kadə̄ əndān̄sí kə gōó tām̄ yá̰á̰ kə́ majə gə̄ tə́ malang, yā kadə̄ ī-rāāī gō kem ndigə yān. Kadə̄ ni-rāā yá̰á̰ kə́ əsō kumən kemjí tə́ kə ta kūl̄ Jeju Kərist ń kɔsə gɔn i tām̄ yān tə́ ngándáńg ngándáńg ní. *Adə̄ i tītə̄ ń noō!
Káān̄ ta najə̄ ō, lápə́ya ō
22Ngákó̰ó̰ḿ gə̄, m̄-rāāsí ɓɔ́ kadə̄ ī-tə́gāī tasí, ī-ndigiī yá̰á̰ ndóō kə́ yā mbūsə̄n̄ńsí ń toō. Tɔdɔ̄ yá̰á̰ ń m̄-ndang m-ādə̄sí kem makətūbə̄ ń toō tə́ ní, ngāl̄ ngá̰ý alé. 23Majə kadə̄ ī-gerī kadə̄ ɔrə̄n̄ ngōkó̰ó̰jí Timote dəngáyá, adə̄ ré ní ugə̄ láẃ anī, j-a j-aw̄ seneé mbak yā go̰ō̰sí.
24Ī-rāāī nge kɔr no ngé kán̄ naā gə̄ malang lápə́ya ō, de gə̄ yā Nə́ɓā malang lápə́ya ō. Ngé kə́ Itali tə́ gə̄ rāān̄sí lápə́ya ō.
25Ādə̄ Nə́ɓā rāā kem majə sesí malang.
Currently Selected:
Makətūbə̄ kə́ ndang adə̄n̄ Hebəro gə̄ 13: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad