Makətūbə̄ yā Habakuk 3
3
Habakuk ndɔ̄ȳ Nə́ɓā ō Nə́ɓā rāā yá̰a̰ ō
1Ndɔ̄ȳ yā Habakuk *nge koō ta n toó. Ni ənī i kə́ pā tə́, i pā kə́ tītə̄ pā yo beé.
2Kɔ́ɔ̄ɓē, kəla rāāí
kə́ bo bo gə̄ ní, m-ōō gotə.
Kɔ́ɔ̄ɓē, dan ń m-ōō ní, m̄-ndew.
Ī-rāā yá̰á̰ kə́ tītə̄ ń noō gə̄
dan ndijí kə kumjí tə́ ō,
ī-rāā adə̄ de gə̄ gerə̄n̄də́
dan ndijí kə kumjí tə́ ō.
Ká ré wōn̄g rāāī gə̄gē anī,
ādə̄ əga kemií dɔ tár yāí tə́.
3Nə́ɓā ḭḭ i Teman n reē ní.
Nə́ɓā kə́ *táĺ ḭḭ i mbal̄ bo gə̄ kə́ Paran tə́.
Bo yān taā loo malang dɔ rā̰ tə́ ō,
tɔ̄ȳ kə́ de gə̄ tɔ̄ȳnən̄ taā loo
malang dɔ nang tə́ ō.
4Ni ndə́lē tītə̄ loo kə́ unjə̄ kow beé.
Yá̰á̰ kə́ ndə́lē pipir gə̄ teēn̄ kem jīn tə́,
loo ń tɔ́gən a ɓɔ̄ɔ̄ rɔ̄n tū ní tə́.
5Mo̰y ngāl̄bɔ̄gīí kógə̄ḿ njə̄rā kété non tə́ ō,
moy gajə kógə̄ḿ kə́ a əla hor dɔ deē tə́,
njə̄rā gōn tə́ ō.
6Dan ń ni dəba anī dɔ nang ndew.
Dan ń ni-a̰a̰ gír nápar de gə̄ anī,
nin̄ ɓōlə́nən̄ ō.
Mbal̄ bo gə̄ ń ran̄ ngándáńg ní, njárə̄n̄ ō,
ngán mbal̄ kə́ jóó ngá̰ý gə̄ téē tə̄sōn̄ ō,
nin̄ ń kété jóo rāān̄ rɔ̄də́
i kə̄lá róbə yān gə̄ tə́ ní.
7M-á̰a̰ de kə́ Kusan gə̄
loo rugə tə́ gíŕ yá̰á̰
kə́ to kum kaȳ aĺ tə́
kem kújə tandā yādə́ gə̄ tə́ ō,
m-á̰a̰ de kə́ Madian gə̄
loo ndew ndew ɓōĺ tə́
gír dabə yādə́ gə̄ tə́ ō.
8Kɔ́ɔ̄ɓē, ī-rāā wōn̄g
i kə ngán man̄ gēé a?
A̰á̰ā̰, i kə ngán man̄ gēé a?
Wōn̄g ń rāāī ngá̰ý ní
i kə bā boó a?
Ḭ̄ āl̄ ī-ndi dɔ kil̄ man̄ gə̄ tə́
tītə̄ kə́ ī-ndi i dɔ
púsə tetə rɔ̄ɔ̄ tə́ beē,
tītə̄ kə́ āl̄ ī-ndi dɔ
púsə tetə rɔ̄ɔ̄ tə́ beē.
9Ḭ̄ ə̄ndā dɔ ga̰ gərā
yāí danaá,
banī kum gərā yāí gə̄
i túbə̄ ń ī-túbə
ə̄nīń ndūý dan ń
wōn̄g rāāiń tə́ ní.
Dɔ nang teē tan ō,
man̄ dɔ mbal̄ gə̄
kə́rān̄ tiriri ō.
10Mbal̄ bo gə̄ a̰a̰īn̄
anī, ɓōĺ rāādə́ adə̄ ndewn̄.
Man̄ edə kə tɔ́gɔ́ ō,
bā bo nōō tītə̄ ɓɔl beé ō.
Ni-rāā adə̄ bəngálən gə̄
ḭḭn̄ bátə́ aw̄ ugə̄n̄ dɔ rā̰ tə́.
11Mbang ō, nāā ō,
dəba ran̄ gotə kógə̄ḿ
ta kum gərā yāí kə́ ndə́lē gə̄ ń
ī-túr̄ tə́ ní ō,
ta nənga yāí kə́ ndə́lē gə̄ tə́ ō.
12Wōn̄g i ngá̰ý kemií tə́ ō,
ī-njə̄rā kumií kə̄
kété dɔ nang tə́ ō.
Ḭ̄ ī-rējə̄ gotə nápar de gə̄ kɔ̄ɔ́
tɔdɔ̄ wōn̄g rāāī ngá̰ý.
13Ī-teē i yā kajə gír deē yāí gə̄,
i yā kajə mban̄g ń
ḭ̄ ɔ̄r̄ kamə̄n tām̄ yā Nə́ɓā tə́ ní.
Ḭ̄ ī-mbəre ngār yā gír
de kə́ majaĺ gə̄ ə̄nīn ō,
de gə̄ ń ɓoon̄
rɔ̄də́ tū yān tə́ ní,
ḭ̄ ī-nujədə́ sák sák kɔ̄ɔ́ ō.
14Ḭ̄ ī-mbutə dɔ ngār gə̄
yā madə̄ ba̰ā̰ gə̄
i kə kum gərā
yādə́ nin̄ kɔ́ gɔ̄ɔ́.
Kété ní, nin̄ reēn̄
i kə ngɔ̄dɔ̄ɔ́ tītə̄ nél man̄
kə́ əla kə ngangá ngá̰ý beē,
yā reē tə̄ɓājí kadə̄
j-awī kə̄ loo gə̄ tə́ kɔ̄ɔ́.
Nin̄ túrə̄n̄ kɔĺ rɔ̄nel̄
tītə̄ kə́ a rāān̄
i yā kəsa nge ndoō
loo ɓɔ̄ɔ̄ rɔ̄ tə́, gír
dabə yādə́ tə́ beē.
15Ḭ̄ ī-njə̄rā dɔ bā bo tə́ kə sə́nda yāí gēé,
dan bəngál man̄ gə̄ kə́ tɔ́gə́də́ i ngá̰ý tə́.
16M-ōō kōō yá̰á̰ ń noō malang,
adə̄ kemḿ nujə sák sák kɔ̄ɔ́.
Ɓōĺ rāām̄ adə̄ taḿ ndew ō,
rɔ̄ḿ sɔl̄ yélélé ō.
Njaḿ əhɔ dɔ nang aĺ ō.
m̄-ndi kə taḿ kə́ mbóó
m̄-ngóoń ndɔ̄ wur kɔl,
yā kadə̄ m-āw̄ m̄-rɔ̄ɔń gír de gə̄ ń ənīn̄jí rɔ̄ɔ̄ ní tə́.
17Kāgə̄ kótə̄ gə̄ hútə̄n̄ to̰ aĺ ō,
*kāgə̄ nduú gə̄ anə̄n̄ to̰ aĺ ō,
kan̄ *kāgə̄ olibə gə̄ gətóon̄ dɔ kāgə̄
olibə gə̄ tə́ ō,
ndɔr̄ teē yá̰a̰ kəsa to̰ aĺ ō.
Batə̄ gə̄ gətóon̄ kem gɔngɔɔ́ ō,
man̄g gə̄ gətóon̄ gír dabə gə̄ tə́ ō.
18Banī mā m-ə́nge rɔ̄nel̄ i kem Kɔ́ɔ̄ɓē tə́.
Rɔ̄ḿ nelə̄m̄, i najə̄ yā Nə́ɓā ń i nge kajəḿ ní tə́.
19Kɔ́ɔ̄ɓē Nə́ɓā i tɔ́gə́ḿ.
Ni rāām̄ adə̄ m-ɔ́l tītə̄ dul beé ō,
rāām̄ ādə̄ m̄-njə̄rā dɔ loo kə́ kḭḭ kə̄ dɔɔ́ gə̄ tə́ ō.
Currently Selected:
Makətūbə̄ yā Habakuk 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad