Makətūbə̄ yā Ester 2
2
Ester tél nə̄yá̰ mban̄g
1Gō yá̰a̰ gə̄ ń noō tə́ ní dan ń wōn̄g yā mban̄g Jerses tetə anī, ni gír̄ dɔ Basti tə́ ō, dɔ yá̰á̰ ń Basti rāā tə́ ní ō, dɔ yá̰á̰ ń i kə́ yā rāā seneé tə́ ní ō. 2Anī ngé kəla yān gə̄ ədanən̄ na: Ādə̄ sāān̄ ngámandə kə́ ger̄ dəngam aĺ ɓáý gə̄ kə́ majən̄ ka̰ā̰ ngá̰ý gə̄ adə̄n̄ mban̄g. 3Ādə̄ mban̄g tə́ndā de gə̄ kem ɓē gə̄ kə́ gō nang yān tə́ malang, kadə̄ ɔyn̄ ngámandə kə́ ger̄ dəngam aĺ ɓáý gə̄ kə́ majən̄ ka̰ā̰ ngá̰ý gə̄ reēn̄ sedə́ kem kújə yā dəyá̰ gə̄ tə́ kem ɓē bo kə́ Sujə tə́. Ādə̄ Hege ń i *áji mbang yā mban̄g kə́ nge ngɔ̄m̄ dəyá̰ gə̄ ní ndi dɔdə́ tə́ ō. Ādə̄ adə̄n̄də́ yibə̄ gə̄ kə́ a ndumən̄ anī rɔ̄də́ ndélē ō. 4Ngōn̄ kə́ dəyá̰ ń a nel̄ mban̄g seneé ní a ndi mban̄g gotə Basti tə́. Mban̄g a̰ā̰ kadə̄ i yá̰á̰ kə́ majə adə̄ ni-rāā tītə̄ ń noō.
5*Jipə kógə̄ḿ kə́ rīn na i Mardose ndi kem ɓē bo kə́ Sujə tə́. Ni i de kə́ gír kaa yā Yair ngōn̄ Simei kə́ ngōn̄ Kisə tə́. Ni i de kə́ gír ɓē yā Benjamḛ tə́. 6Kété ní ni i dan de gə̄ ń Nabukodonosor mban̄g kə́ *Babilon ɔydə́ Jerusalem naā tə́ kə Yekonia mban̄g kə́ *Juda aw̄ sedə́ ɓəlo tə́ ní. 7Tá i Mardose ngeé ń toō n i nge kətō Hadasa ń i Ester ní. Tām̄ kó̰o̰n ō bɔbə̄n ō gətóon̄ kɔ̄ɔ́. Ester ní i ngōn̄ ngōkó̰o̰ bɔbə̄n. Ngōn̄ kə́ dəyá̰ ní ngāl̄ sapə ō, ta kumən majə ka̰ā̰ ngá̰ý ō. Dan ń bɔbə̄n nin̄ kə kó̰o̰n oyn̄ kɔ̄ɔ́ ní i Mardose n un ngɔ̄mən tītə̄ ngōn̄ kemən kə́ dəyá̰ beé ní.
8Dan ń ənīn̄ mber ədan̄neé de gə̄ yá̰a̰ gə̄ ń mban̄g ndang kadə̄ yā rāā ní ō, *ndū najə̄ yān ō oy anī, kánə̄n̄ ngáń kə dəyá̰ gə̄ ngá̰ý aw̄n̄ sedə́ kem ɓē bo kə́ Sujə tə́. Ester i dandə́ tə́. Aw̄n̄ seneé tītə̄ yā gotə ngán kə́ dəyá̰ madə̄n gə̄ kem kújə yā mban̄g tə́. Hege nge ngɔ̄m̄ dəyá̰ gə̄ n ndi dɔn tə́ aw̄ seneé ní. 9Nel̄ Hege kə Ester ngá̰ý adə̄ ni a̰a̰n já̰já̰ dan madə̄n gə̄ tə́. Ni-adə̄n yibə̄ rāā mandə kə́ to yá̰a̰ ō, yá̰a̰ kəsa ō, ngán kə́ dəyá̰ kə́ ndogó mbangāá kə́ sīrí gə̄ ō. Gō tə́ anī ni aw̄ əndā Ester kem kújə yā dəyá̰ gə̄ kə́ majə ngá̰ý tə́, naā tə́ kə ngámandə gə̄ ní. 10Ester əda kadə̄ gír kaan i *Jipə alé, tɔdɔ̄ Mardose ɔgə̄n kəda kɔ̄ɔ́. 11Kə dɔ ndɔ̄ gə̄ ń noō Mardose a njə̄rā i ta kújə yā dəyá̰ gə̄ tə́ yā dəjeń kōō Ester ké to i ba̰ý wa ō, yā gerə̄ń yá̰á̰ ń a rāān̄ seneé ní ō.
12Ngōn̄ kə́ dəyá̰ a rāā rɔ̄n kem nāā kutə gidə i jōó pá tá ré ta i dɔn tə́ kadə̄ aw̄ rɔ̄ mban̄g Jerses tə́ anī a aw̄ ɓáý. Dan ń dəyá̰ gə̄ a rāān̄neé rɔ̄də́ tə́ ní, a ndumən̄ yibə̄ kāgə̄ *mír nāā mehḛ́. Kem nāā kə́ mehḛ́ gə̄ ń na̰yn̄ tə́ ní a ndumən̄ nō kāgə̄ kə́ kotə majə ō, yibə̄ gə̄ kə́ rāān̄ rɔ̄də́ kadə̄ ndélē gə̄ ō. 13Dan ń ngōn̄ kə́ dəyá̰ a ḭḭ kújə yā dəyá̰ gə̄ tə́ ta kaw̄ kə̄ kújə yā mban̄g tə́ ní, a adə̄nən̄ yá̰a̰ malang ń kemən ndigə kaw̄ń jīn tə́ ní. 14A aw̄ rɔ̄ mban̄g tə́ i loo tíbí, ba teē dəloí anī a aw̄n̄ seneé kem kújə kə́ nge ko̰ jōó yā dəyá̰ gə̄ tə́. Sasgas kə́ *áji mbang kə́ nge ngɔ̄m̄ dəyá̰ gə̄ yā mban̄g n əndanən̄ dɔn tə́ kadə̄ aw̄ seneé ní. Ni a tél yā kaw̄ gogə́ rɔ̄ mban̄g tə́ to̰ alé. Ba ré i mban̄g n gḛyn ō ɓārə́n kə rīneé ō tá.
15Ndɔ̄ kógə̄ḿ tə́ anī ta i dɔ Ester ngōn̄ kətō Mardose tə́ kadə̄ aw̄ rɔ̄ mban̄g tə́. Ester i ngōn̄ Abihail ngōn̄ kə́ nān̄ Mardose. Ni-dəje yá̰á̰ kə́ rang alé ba dəje i yá̰á̰ ń Hege, áji mbang yā mban̄g kə́ nge ngɔ̄m̄ dəyá̰ gə̄ ɔjən kadə̄ dəje ní tá ngóy. De gə̄ malang ń dərān̄ Ester dɔ róbə́ tə́ ní ɔjənən̄ kem majə yādə́. 16Adə̄ aw̄n̄ kə Ester rɔ̄ mban̄g Jerses tə́, kem kújə mban̄g yān tə́. I ɓāl̄ ko̰o̰ ɓē yān kə́ ngé ko̰ sīrí tə́, kem nāā kə́ nge ko̰ kutə tə́, adə̄ i kem nāā *Tebet tə́. 17Anī mban̄g gḛy Ester tɔȳ gotə dəyá̰ gə̄ malang ō, rāā majə seneé ō, ənī kemən adə̄n tɔȳ ngámandə gə̄ malang ō. Ni-əla *jākā mbang dɔn tə́ ō, rāān mban̄g kə́ dəyá̰ tə́ kum gotə Basti ō. 18Ni-rāā yá̰a̰ kəsa kə́ ngá̰ý najə̄ yā Ester tə́, ba ɓāŕ de kə́ bo yān gə̄ malang ō, ngé rāā kəla seneé gə̄ ō, adə̄ reēn̄ loo kəsa yá̰á̰ tə́. Ni-ɔr̄ ta lambóó kə́ dɔ de kə́ kem ngán ɓē kə́ ndágá gə̄ tə́ kɔ̄ɔ́ ō, adə̄ de gə̄ kadə karī gə̄ adə̄ asə kə gō tɔ́gəneé ō.
19Dan ń ɔyn̄ ngán kə́ dəyá̰ gə̄ nja kə́ nge ko̰ jōó reēn̄ sedə́ ní, Mardose ndi i ta róbə kújə yā mban̄g tə́. 20Ester əda deē rī ngé kojən gə̄ aĺ ō, ɔjə gír kaan aĺ ō tītə̄ ń Mardose ɔgə̄n̄neé kəda ní. Ni-əndā kemən dɔ najə̄ gə̄ yā Mardose tə́ tītə̄ ń ndiń looneé ní.
Mardose teē dɔ najə̄ kə́ koō naā dɔ tə́ tə́
21Dan ngeé ń noō tə́ ní Mardose ndi i ta róbə kújə yā mban̄g tə́. Anī wōn̄g rāā Bigtan ō Teres ō ń i *áji mbang gə̄ kə́ nge rāā kəla dan ngé ngɔ̄m̄ ta róbə kújə́ tə́ ní, adə̄ sāān̄ tɔ̄l̄ mban̄g Jerses. 22Banī Mardose ger̄ gō adə̄ əda Ester nə̄yá̰ mban̄g. Ester tél kə najə̄ ní əda mban̄g kə rī Mardose. 23Ndəlen̄ gíŕ yá̰á̰ ní anī teēn̄ dɔ tə́ kadə̄ i rɔ̄kum. Anī ənīn̄ kəlā míndə́ áji mbang kə́ jōó gə̄ ní tə́ ba do̰ō̰n̄də́ dɔɔ́ tū kāgə̄ tə́ adə̄ oyn̄. Ndangən̄ yá̰á̰ ní kem makətūbə̄ kənā gotə najə̄ yā mban̄g gə̄ tə́ ta kum mban̄g tə́.
Currently Selected:
Makətūbə̄ yā Ester 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad