Makətūbə̄ ń Pol ndang adə̄ Epejə gə̄ ní 6
6
Najə̄ kə́ dɔ ngán gə̄ tə́ ō, ngé kojədə́ gə̄ tə́ ō
1Ngán gə̄, ōōī ta bɔbə̄sí gə̄ ō, ta kó̰ó̰sí gə̄ ō, kə gō ɓoo naā yāsí kə Kɔ́ɔ̄ɓēé. Nge ń noō i yá̰á̰ kə́ gō tə́. 2Ī-rɔȳ bɔbí ō kó̰ó̰í ō, nge ń noō i gō míndə́ kə́ kété ń Nə́ɓā ənī míndən tāmən tə́ ní. 3Kənī míndə́ ní n toó: Yā kadə̄ ī-ndi majə ō, kadə̄ ī-ndiń kə kumií ta kaw̄ jóo dɔ nang tə́ ō#6.3 K. 2-3: Á̰a̰ī Teē 20.12.
4Sḭḭ̄ bɔbə̄ ngán gə̄ ō kó̰ó̰ ngán gə̄ ō, ī-rāāī ngáńsí gə̄ ādə̄ wōn̄g rāādə́ alé, ba ɔ̄jīdə́ ō, ī-tāāīdə́ ō, kə gō ń Kɔ́ɔ̄ɓē ndigəń ní.
Najə̄ kə́ dɔ ɓəlo gə̄ tə́ ō, kɔ́ɔ̄də́ gə̄ tə́ ō
5Ɓəlo gə̄, ōōī ta kɔ́ɔ̄sí kə́ dɔ nang tə́ laā gə̄ kə ɓōló ō, kə rɔ̄ ndeweé ō, kə kem kə́ rɔ̄kumuú ō, tītə̄ ń ī-rāāīneé kə *Kərist ní. 6Ī-rāāī nge ń noō i tām̄ kumdə́ kə́ i gōsí tə́, tītə̄ kə́ ī-sāāī i kadə̄ nel̄ deē sesí beē alé, ba ī-rāāī i yá̰á̰ ń Nə́ɓā ndigə ní, kə ngarān̄g kemsí gēé malang, kə́ loo ɓəlo gə̄ yā Kərist tə́. 7Ī-rāāī kəla yāsí kə kem ndaá, tītə̄ kə́ ī-rāāī i kəla yā Kɔ́ɔ̄ɓē, ba i yā de gə̄ aĺ beē. 8Ī-gerī majə kadə̄ deē kógə̄ḿ kógə̄ḿ, ɓəlo aké i de kə́ kɔ́ɔ̄ rɔ̄n ní, a ənge yá̰a̰ kəndā nja yān jī Kɔ́ɔ̄ɓē tə́ i kə gō kəla rāān kə́ majə.
9Ba sḭḭ̄ kɔ́ɔ̄ ɓəlo gə̄, ī-rāāī tītə̄ ń noō sedə́ ō. Ī-lōōī ka̰ȳ ndíĺdə́, tɔdɔ̄ ī-gerī kadə̄ nge ń i kɔ́ɔ̄də́ ō, kɔ́ɔ̄sí ō ní, ndi i dɔ rā̰ tə́ ō, ni a rāā yá̰a̰ tām̄ ta kum deē aĺ ō.
Yá̰a̰ rɔ̄ɔ̄ gə̄ kə́ Nə́ɓā adə̄
10Yā tɔ̄ləń ta najə̄ ní, ādī tɔ́gə́sí to kə ta kūl̄ ɓoo naā yāsí kə́ kə Kɔ́ɔ̄ɓēé ō, ādī tɔ́gən adə̄sí tɔ́gə ō. 11Ə́laī yá̰a̰ rɔ̄ɔ̄ malang yā Nə́ɓā rɔ̄sí tə́, kadə̄ ásiīń ra ngan̄g ta yá̰á̰ ń *diabəl a rāā tə́ ní. 12Tɔdɔ̄ ngé gə̄ ń j-a jə-rɔ̄ɔ̄īdə́ ní, i deē ndul gə̄ ń nin̄ i kə dā̰ rɔ̄də́ ō, mósə́də́ ō ní alé, banī i ngé ko̰o̰ ɓē gə̄ ō, kɔ́ɔ̄ yá̰a̰ gə̄ ō, ngār kə́ tilií gə̄ ō, ndíĺ kə́ majaĺ gə̄ ō ń ndin̄ dɔɔ́ dɔ rā̰ tə́ ní. 13Tām̄ najə̄ ń noō tə́ ní, ə́laī yá̰a̰ rɔ̄ɔ̄ yā Nə́ɓā rɔ̄sí tə́, yā kadə̄ ndɔ̄ kə́ majaĺ tə́ anī ī-raīń ngan̄g ō, ī-raī dɔɔ́ ō, dan ń ī-tetiī rɔ̄ɔ̄ gə̄ malang ní.
14I beé ní, ī-ndiī dɔ rɔ̄sí tə́. Kadə̄ ndāŕ do̰ō̰ ɓōdə̄sí i najə̄ kə́ rɔ̄kum ō, kūbə̄ gində̄ yāsí i yá̰á̰ kə́ gōtə́ ō, 15sākə̄rā kə́ njasí tə́, i təngā kə́ ī-təngāī loo kɔjə Najə̄ kə́ Majə kə́ adə̄ de gə̄ kem sɔl̄ lɔm tə́ ō. 16Úniī dér ń i taā kem yāsí ní, ī-ndiīneé tū yá̰a̰ gə̄ tə́ malang. Ā ī-tɔ̄lī hor gərā gə̄ ń ndíĺ kə́ nge ngól̄ loo gə̄ a túrəńsí ní i kə ta kūl̄neé. 17Yā tɔ̄ləń ta anī, ə́laī jākā ń i kajə ń ajiī kɔ̄ɔ́ ní dɔsí tə́ ō, úniī kəyā kaskar ń i najə̄ yā Nə́ɓā ń Ndíĺ adə̄sí ní jīsí tə́ ō. 18Ī-ndɔ̄yī kə kum mbang gə̄ malang kə ta kūl̄ Ndíl. Əhɔī rɔ̄sí tɔgə loo ndi já̰já̰ tə́ ō, ī-rāāī Nə́ɓā ɓɔ́ tām̄ yā deē yān gə̄ tə́ malang ō. 19Ī-ndɔ̄yī tām̄ yāḿ mā tə́ ō, ādə̄ Nə́ɓā əndā najə̄ kə́ gō tə́ taḿ tə́, kadə̄ m-ɔ́jəń Najə̄ kə́ Majə ń to loo mundə̄ tə́ ní kanjə̄ ɓōĺ, 20tām̄ mā i dəngáyá najə̄n tə́. Ī-ndɔ̄yī kadə̄ m-ɔ̄r̄ najə̄ kə́ dɔ tə́ kanjə̄ ɓōĺ tītə̄ ń i gáŕ kadə̄ m̄-rāań ní.
Pol rāā lápə́ya kə́ ta tɔ̄l̄ ta tə́
21m̄-sāā kadə̄ ī-gerī najə̄ kə́ dɔḿ tə́ ō, kəla rāāḿ ō. Ngōkó̰ó̰jí Tisik ń i kó tár yāḿ ní, ni ń i de kə́ bo yā Kɔ́ɔ̄ɓē kə́ ra dɔ ndūn tə́ ní, a ədasí najə̄ malang kə́ dɔḿ tə́. 22M-ə́la seneé kə̄ rɔ̄sí tə́ i yā kadə̄ ɔjəsí yá̰á̰ kə́ sɔɔ̄ dɔḿ ō, sɔl̄ kemsí ō.
23Ādə̄ Bɔbə̄jí Nə́ɓā ō, Kɔ́ɔ̄ɓē yājí Jeju *Kərist ō, adə̄n̄ ngákó̰ó̰jí gə̄ kem sɔl̄ lɔm ō, tár ō, taā kem ō. 24De gə̄ malang ń tárən̄ Kɔ́ɔ̄ɓē yājí Jeju Kərist kə táŕ kə́ a to ngándáńg ní, ādə̄ Nə́ɓā rāā kem majə sedə́.
Currently Selected:
Makətūbə̄ ń Pol ndang adə̄ Epejə gə̄ ní 6: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad