Kəla rāā Ngámbang kəla gə̄ 10
10
Piyer nin̄ kə Kɔrney
1Dəngam kógə̄ḿ kə́ rīn na i Kɔrney ndi kem ɓē kə́ Sejare tə́. Ni i ngol áskar gə̄, ba a ɓārə́n̄ ɓūtə̄ áskar yān gə̄ na i kə́ Itali tə́ gə̄. 2Ni i de kə́ nge rāā yá̰a̰ kə gō ń Nə́ɓā ndigə ní ō, tá ni ō de kə́ kem kújə yān tə́ gə̄ malang ō ní, rāān̄ kəla adə̄n̄ Nə́ɓā ō. Ni-rāā kə *Jipə kə́ ngé ndoō gə̄ ngá̰ý ō, ndɔ̄ȳ Nə́ɓā kə kum mbang gə̄ malang ō. 3Ndɔ̄ kógə̄ḿ tə́ kə mbang kə́ mətá kə́ loo sɔlí anī, *de kə́ dɔ rā̰ tə́ kógə̄ḿ yā Nə́ɓā ndɔ̄bən adə̄ a̰a̰n unjə̄ ká̰ý ká̰ý. Nge kəla ní udə kújú gōn tə́ ba ədan na:
Kɔrney! 4Kɔrney əndā kumən dɔn tə́ ba ɓōĺ rāān adə̄ əda na:
I rí Kɔ́ɔ̄ɓē?
Nge kəla ní tél ədan na:
Nə́ɓā ndigə ndɔ̄ȳ yāí gə̄ ō, ndigə yá̰a̰ gə̄ ń ī-rāań kə ngé ndoō gēé ní ō, dɔn ndígə̄nalií aĺ ō. 5Ba kə́ ngɔr ń toō tə́ ɓáa ə́la de gə̄ kem ɓē kə́ Jope tə́ gō Simo̰ kógə̄ḿ ń rī tɔ̄yn na i Piyer ní tə́ ādə̄ reē. 6Ni-ndi i ɓē Simo̰ kə́ nge kɔr̄ gidə ngə̄rā gə̄ ń kújə yān i kadə bā bo tə́ ní.
7Loo ń *de kə́ dɔ rā̰ tə́ ń ɔr̄ najə̄ seneé ní aw̄ kɔ̄ɔ́ anī, Kɔrney ɓāŕ ngé kəla yān gə̄ jōó ō, áskar kógə̄ḿ kə́ dan áskar gə̄ kə́ ngé ra ngɔr rɔ̄n tə́ gə̄ tə́ kə́ nge rāā yá̰a̰ kə gō ń Nə́ɓā ndigə ní ō, kə́ nge rāā yá̰a̰ gə̄ ń ni-ra seneé ta rāā ní ō 8Ni ɔjədə́ gotə yá̰a̰ malang ń rāā yá̰a̰ ní oy anī əladə́ Jope.
9Teē kə ndɔ̄ kə́ noō dan ń nin̄ i róbó ɓáý á əndān̄ dɔ ɓē kə́ Jope ngɔr ní anī, Piyer al̄ dɔ kújə́ dúŕ duruú dɔɔ́ dan kadə ndaá yā ndɔ̄ȳ Nə́ɓā. 10Banī ɓō rāān adə̄ gḛy kəsa yá̰a̰. Ba dan ń a rāān̄ yá̰a̰ kəsa tām̄ yān tə́ anī, ni-a̰a̰ yá̰á̰ kógə̄ḿ. 11Ni-a̰a̰ dɔ rā̰ teē tan ba yá̰á̰ kógə̄ḿ teē kemeé a reē kum kə̄ nang tə́. Yá̰á̰ ní to tītə̄ kūbə̄ kə́ bo ngá̰ý kə́ əhɔn̄ kílən kə́ sɔ́ gə̄ beé. 12Dā̰ kə́ nja sɔ́ gə̄ malang ō, kur̄ kə́ kagə nang tə́ gə̄ ō, yel̄ kə́ tayā tayā gə̄ malang ō, i kem yá̰á̰ ní tə́. 13Anī ndū deē kógə̄ḿ ɔr̄ najə̄ seneé ədan na:
Piyer, ḭ́ḭ dɔɔ́ ī-tɔ̄l̄ ə́sa! 14Banī Piyer tél əda na:
M-ɔ́də aĺ bátə́ Kɔ́ɔ̄ɓē, tɔdɔ̄ yá̰á̰ kə́ Nə́ɓā ɔgə kəsa, aláa yá̰á̰ kə́ yḛr ní, m-ə́sa nja kógə̄ḿ aĺ ɓáý. 15Ba ndū deē ń ɔr̄ najə̄ seneé kété ní tél ɔr̄ najə̄ seneé nja kə́ nge ko̰ jōó ɓáý to̰ ədan na:
Yá̰á̰ ń Nə́ɓā əda na i yá̰á̰ kə́ *unjə̄ njáý njáý ní, ḭ̄ ī-lōō rāān yá̰á̰ kə́ yḛr tə́. 16Yá̰á̰ ní rāā yá̰a̰ beé nja mətá, ba gō tə́ anī ndɔ́rə̄n̄ yá̰á̰ ní aw̄n̄neé dɔ rā̰ tə́ kə̄ ta jī tə́ noō kɔ̄ɔ́.
17Dan ń Piyer ndi a sāā kum yá̰á̰ ń ndɔ̄bən ní yā ger̄ anī, de gə̄ ń Kɔrney əladə́ ní dəjen̄ ɓē yā Simo̰ ba reē ran̄ ta róbə́ tə́. 18Nin̄-ɓārə́n̄ yá̰a̰ ba dəjen̄ na ké Simo̰ ń rī tɔ̄yn na i Piyer ni ké ndi laā wa. 19Piyer ndi a gír̄ kum yá̰á̰ ń ndɔ̄wn ní ɓáý anī, Ndíl ədan na:
De gə̄ mətá ra a sāānī laā. 20Ḭ́ḭ dɔɔ́ ba ī-risə nang tə́ āw̄ sedə́ kanjə̄ kadə̄ kemií tɔ́sī dɔ tə́, tɔdɔ̄ i mə̄kɔ́ n m-ə́ládə́ ní. 21Loo ń noō tə́ Piyer risə aw̄ rɔ̄ de gə̄ ní tə́ ba ədadə́ na:
Mā i deē ń ā ī-sāāī ní, ba ī-reēī i ba̰ý? 22Nin̄-tél ədanən̄ na:
I Kɔrney kə́ ngol áskar gə̄ n əlají ní. Ni i de kə́ súmūú ō, i de kə́ nge ɓōĺ ndíĺ Nə́ɓā ō, i de kə́ rīn ɓār̄ majə dan *Jipə gə̄ tə́ malang ō. De kə́ dɔ rā̰ tə́ kógə̄ḿ kə́ *táĺ ədan na kə ɓāríī kadə̄ kə ī-reē ɓēé looneé kə ɔ́jən gotə yá̰a̰ gə̄ ń rāān̄ yá̰á̰ ní kadə̄ oō. 23Loo ń noō tə́ Piyer aw̄ sedə́ kújú ba adə̄də́ loo kadə̄ ton̄neé.
Teē kə ndɔ̄ kə́ noō anī əsō róbó aw̄ sedə́. Ngákó̰o̰ naā kə́rēý gə̄ kə́ Jope dānə̄nən̄ aw̄n̄ seneé. 24Teē kə ndɔ̄ kə́ rangaá anī Piyer ugə̄ Sejare. Kɔrney ɔsə dɔ ngéén gə̄ ō, madə̄ tan gə̄ ń ni-ənī kemən adə̄də́ ō ní naā tə́ ndi a ngóońdə́. 25Dan ń Piyer a rāā yā kudə kə̄ kújú anī, Kɔrney ɔjə non ba əsō ɔsə non nang tə́ non tə́ rāānneé lápə́ya kə rɔyɔ́. 26Banī Piyer ədan na kə ḭḭ dɔɔ́ na ni na i deē madə̄n. Ba unən dɔɔ́. 27Ni-ɔr̄ najə̄ kə Kɔrneyé bátə́ udəń kújú. Dan ń ni-a̰a̰ de kə́ ngá̰ý gə̄ ń ndin̄ ní anī, 28ədadə́ na: Ī-gerī majə kadə̄ kudə kújə yā tə̄rā tə́, aláa ɓoo naā kə tə̄rāá i yá̰á̰ kə́ majaĺ ngá̰ý tām̄ yā deē ń ni i *Jipə ní tə́. Banī Nə́ɓā ɔjəm̄ kadə̄ m̄-rāā deē kógə̄ḿ de kə́ yḛr tə́ aĺ ō, de kə́ asə kadə̄ deē aw̄ looneé aĺ tə́ aĺ ō. 29I tām̄ najə̄ ń noō tə́ n dan ń ə́laī gōḿ tə́ ní, m̄-reē i kanjə̄ kadə̄ kemḿ tɔ́sə̄m̄ ní. Ní, ə́damī kum yá̰á̰ ń ə́laīneé gōḿ tə́ ní.
30Anī Kɔrney əda na:
Asə ndɔ̄ mətá kɔ̄ɔ́ ɓōólaā tā, i kə mbang nəkɔ́ ń toō bang, adə̄ i kə mbang kə́ mətá kə́ loo sɔlí, m̄-ndi m-ā m̄-ndɔ̄ȳ i Nə́ɓā ɓēé looḿ, anī deē kógə̄ḿ o̰ō̰ kūbə̄ kə́ ndaa kə́ ndə́lē ngá̰ý teē rétə́ gēé reē ra noḿ tə́ 31ba ədam̄ na: Kɔrney, Nə́ɓā oō ndɔ̄ȳ yāí ō, dɔn ndígə̄nal rāā ń ī-rāā kə ngé ndoō gēé ní aĺ ō. 32Ní, ə́la kəla kem ɓē kə́ Jope tə́, gō Simo̰ ń rī tɔ̄yn na i Piyer ní tə́ ādə̄ reē. Ni-ndi i ɓē Simo̰ kə́ nge kɔr̄ gidə ngə̄rā gə̄ ń ɓē yān i kadə bā bo tə́ ní. 33M-ə́la kəla gōí tə́ kə̄ ta jī tə́ beē, adə̄ ī-reē ní ī-rāā i yá̰á̰ kə́ majə ngá̰ý. Kə́ ngɔr ń toō tə́ ɓáa jə-ndi malang ta kum Nə́ɓā tə́ laā, yā koō yá̰a̰ malang ń Kɔ́ɔ̄ɓē ədaī na kə ə́dájí ní.
Najə̄ ń Piyer ɔr̄ ɓē Kɔrneyé ní
34Piyer ɔr̄ najə̄, əda na:
Ń toō ɓáa m̄-ger̄ tā, kadə̄ kə́ rɔ̄kum tə́ Nə́ɓā a rāā yá̰a̰ tām̄ ta kum deē tə́ alé. 35Ba dan nápar de gə̄ tə́ malang ní, deē ń ɓōĺ Ndílən ō, rāā yá̰á̰ kə́ gōtə́ ō ɓáa a nelə̄n seneé. 36Najə̄ ń Nə́ɓā ɔr̄ kə ngán *Israel gēé ní sḭḭ̄ ī-gerī, ədadə́ i Najə̄ kə́ Majə kə́ dɔ kem sɔl̄ lɔm tə́ kə ta kūl̄ Jeju *Kərist ń i Kɔ́ɔ̄ɓē yā de gə̄ malang ní. 37Yá̰á̰ ń rāā yá̰a̰ gō *batém ń Ja̰a̰ ɔjə najə̄n tə́ ní sḭḭ̄ ī-gerī. Yá̰á̰ ní əla gíŕ Galile, ba gō tə́ anī taā gō nang kə́ Jude malang. 38Kadə̄ ń Nə́ɓā adə̄ Jeju kə́ *Najaret *Ndíĺ kə́ Táĺ ō, tɔ́gə ō ní sḭḭ̄ ī-gerī ō, njə̄rā ń Jeju njə̄rā kə gō loo gə̄ a rāań majə kə de gēé ō, rāā adə̄ de gə̄ malang ń ndin̄ gíŕ tɔ́gə yā *diabəl tə́ ní rɔ̄də́ ngáā ō tɔdɔ̄ Nə́ɓā i seneé ní, sḭḭ̄ ī-gerī ō. 39Kəla malang ń ni-rāā dɔ nang yā *Jipə gə̄ tə́ ō, kem ɓē kə́ *Jerusalem tə́ ō ní, jḭḭ i de kə́ kum tə́ gə̄. Nin̄-tɔ̄l̄nən̄, kə ta kūl kəndan kə máyá̰ tū kāgə̄ kə́ dēsə́ tə́. 40Banī kə ndɔ̄ kə́ nge ko̰ mətá anī Nə́ɓā ndólə̄n dan de kə́ koy gə̄ tə́. Ni-adə̄n ta róbə kɔjə rɔ̄n kə̄ ndágá kadə̄ de gə̄ a̰a̰nən̄. 41I ngán *Israel gə̄ malang n kadə̄ a̰a̰nən̄ ní alé, ba i jḭḭ ń Nə́ɓā gə̄rājí kété kadə̄ jḭḭ i de kə́ kum tə́ yān gə̄ ní, adə̄ i jḭḭ ń j-əsa seneé ō, j-a̰ȳ seneé ō gō ndóĺ ń ni-ndól dan de kə́ koy gə̄ tə́ ní. 42Ni ədají na kə j-əda ngán Israel gə̄ najə̄ ń toō, kə j-ənī mbēr̄ kə j-əda na i ni n Nə́ɓā əndān nge gān̄g sarya dɔ de kə́ ndin̄ kə kumdə́ gə̄ tə́ ō, dɔ de kə́ koy gə̄ tə́ ō ní. 43Ngé koō ta gə̄ malang ɔrə̄n̄ najə̄ yān ədan̄ na náā nəkɔ́ ń taā kemən ní mā̰ȳn̄ rɔ̄də́ dɔ majaĺ yān gə̄ tə́ kə ta kūl̄ rīneé.
De gə̄ kə́ nin̄ i Jipə aĺ gə̄ gə̄gē əngen̄ Ndíĺ kə́ Táĺ
44Piyer ɔr̄ gíŕ yá̰a̰ gə̄ ń toō təgā aĺ ɓáý anī, *Ndíĺ kə́ Táĺ reē dɔ de gə̄ malang ń oōn̄ najə̄ kɔrə̄n ní tə́. 45Ngé taā kem gə̄ ń reēn̄ kə Piyer á nin̄ i *Jipə gə̄ ní, ɔr̄ kumdə́ ngá̰ý kadə̄ de gə̄ ń nin̄ i *Jipə aĺ gə̄ ní gə̄gē əngen̄ Ndíĺ kə́ Táĺ. 46Tɔdɔ̄ nin̄-oōn̄ ndūdə́ loo kɔr̄ najə̄ tə́ kə ta kə́ tayā gə̄ ō, loo *kɔsə gɔn bo Nə́ɓā tə́ ō. Anī Piyer əda na:
47De gə̄ ń toō ń əngen̄ *Ndíĺ kə́ Táĺ tītə̄jí ní, deē asə kɔgə̄ kadə̄ rāān̄də́ *batém a?
48Gō tə́ anī ni-adə̄ ndūn kadə̄ rāān̄də́ *batém kə rī Jeju *Kərist. Anī nin̄-dəjen̄ Piyer kadə̄ kə ndi sedə́ ndɔ̄ kóndóńg wań.
Currently Selected:
Kəla rāā Ngámbang kəla gə̄ 10: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad