PĀ GƏ̄ 94
94
Nə́ɓā rāā ba̰ā̰ tām̄ yá̰a̰ rāā kə́ gōtə́ aĺ tə́
1Kɔ́ɔ̄ɓē, Nə́ɓā kə́ nge rāā ba̰ā̰,
Nə́ɓā kə́ nge rāā ba̰ā̰, ɔ́jə kə̄ ndágá kadə̄ ī-ndi noó.
2Nge gān̄g sarya kə́ dɔ nang tə́, ḭḭ dɔɔ́!
Ə̄ndā nja ngé kɔjə rɔ̄də́ gə̄ sɔɔ̄ń kəla rāādə́.
3Ngé kem ndul gə̄ a tetən̄ rɔ̄ɔ̄ i bátə́ ta kə́ rá?
Kɔ́ɔ̄ɓē, i bátə́ ta kə́ rá?
4Nin̄ malang ń noō ń i ngé rāā madə̄də́ gə̄ yá̰á̰ kə́ tōr̄ ní tə́gān̄ gúdə́ ō,
mbáȳn̄ ədan̄ na tɔ́gə́də́ na to noó ō,
tə́dan̄ najə̄ kə́ to ngonjə̄ gə̄ ō, ɔjən̄ rɔ̄də́ ō.
5Kɔ́ɔ̄ɓē, nin̄ rāān̄ kum deē yāí gə̄ ndoō tə́!
Ngé gə̄ ń i deē yāí gə̄ ní, nin̄ əlan̄ rɔ̄sɔl̄ dɔdə́ tə́.
6Nin̄ tɔ̄lə̄n̄ dəyá̰ kə́ ngaa koy ō, de kə́ nge nam̄ ɓē ō,
nin̄ tɔ̄lə̄n̄ ngán hal gə̄ ndāńg ō.
7Ba ədan̄ na Kɔ́ɔ̄ɓē na a̰a̰ yá̰á̰ ń noō alé,
Nə́ɓā yā Jakob na ger̄ gō alé.
8Ōōī, sḭḭ̄ ń i mbóo de gə̄ dan madə̄sí gə̄ tə́ ní,
sḭḭ̄ ń dɔsí un yá̰a̰ aĺ ní, ā ī-gerī kum najə̄ i ndɔ̄ kə́ rá tə́?
9Kɔ́ɔ̄ɓē ń rāā mbī deē ní asə koō loo aĺ a?
Ni ń rāā kum deē ní asə ka̰a̰ loo aĺ a?
10Ni ń ənda nápar de gə̄ tām̄ majaĺ yādə́ tə́ ní,
asə kənda deē tām̄ yá̰á̰ kə́ majaĺ kə́ kɔ́ɔ̄ rāā tə́ aĺ a?
Kɔ́ɔ̄ɓē ń rāā adə̄ deē ger̄ yá̰á̰ ní,
11ger̄ kadə̄ yá̰a̰ gə̄ ń deē núm̄ yā rāā ní,
i yá̰á̰ kə́ kanjə̄ kumən gə̄.
12Kɔ́ɔ̄ɓē, rɔ̄nel̄ i kə deē ń ɔ̄jən kə ndéyé ō,
ī-ndóōn yá̰a̰ kə ndū najə̄ yāí ō ní.
13Ni a ndi lɔm ndɔ̄ ń yá̰a̰ a tōrəń rɔ̄ de gə̄ tə́ ní ō,
dan ń a əjan̄ bəlo kə́ bo tām̄ yā ngé kem ndul gə̄ tə́ ní ō.
14Tɔdɔ̄ Kɔ́ɔ̄ɓē əya̰ gír deē yān gə̄ kɔ̄ɔ́ alé,
ni əya̰ yá̰a̰ yān kɔ̄ɔ́ alé.
15De gə̄ a télən̄ yā gān̄g sarya kə gōó majə,
yā kadə̄ de gə̄ malang ń kemdə́ i súmūú ni a tetən̄ rɔ̄də́ gō tə́.
16I náā n a ḭḭ yā mbātə́ najə̄
gō ngé kem ndul gə̄ ń noō tə́ yā rɔ̄ɔń dɔḿ tə́ ní?
I náā n a ḭḭ yā kənī najə̄ gírə́ḿ tə́
yā rɔ̄ɔń kə ngé rāā majaĺ gə̄ ń noō ní?
17Nə́ngētə́ gēé Kɔ́ɔ̄ɓē dḭḭ̄m̄ aĺ anī,
loo kə́ beē tə́ mā i de kə́ ɓádá kɔ̄ɔ́.
18Kɔ́ɔ̄ɓē, dan ń m-ə́da na: M-ā m-ə̄sō!
Anī kem majə yāí əhɔm̄ kə̄ dɔɔ́.
19Dan ń sōl̄ yá̰a̰ tɔȳ dɔḿ anī,
ḭ̄ ī-sɔl̄ kemḿ, ī-rāā adə̄ rɔ̄ḿ tél nelə̄m̄ gogə́.
20Yá̰á̰ kə́rēý ɓoosí naā tə́ kə ngé gān̄g sarya gōtə́ aĺ gə̄ ń noō a?
Nin̄ əgan̄ rɔ̄də́ gidə ndū najə̄ tə́ a rāān̄neé de gə̄ yá̰á̰ kə́ tōr̄ gə̄.
21Nin̄ ɓoon̄ naā dɔ de kə́ súmūú tə́ yā tɔ̄lən.
Nin̄ əndān̄ najə̄ dɔ de kə́ sew tə́.
22Banī Kɔ́ɔ̄ɓē tél i loo ɓɔ̄ɔ̄ rɔ̄ yāḿ kə́ ngan̄g ngá̰ý,
Nə́ɓā yāḿ i mbal̄ ń m-ā m̄-ɓɔ̄ɔ̄ rɔ̄ḿ tū tə́ ní.
23Ni-rāā adə̄ yá̰a̰ rāādə́ kə́ gōtə́ aĺ gə̄ tél rāādə́ nin̄ kɔ́ gə̄.
Ni nujədə́ sák sák kə kem ndul yādə́ nin̄ kɔ́ gɔ̄ɔ́.
Kɔ́ɔ̄ɓē Nə́ɓā yājí nujə sedə́.
Currently Selected:
PĀ GƏ̄ 94: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.