PĀ GƏ̄ 91
91
Nge ɓɔ̄ɔ̄ rɔ̄n ɓē Nə́ɓā kə́ dɔɔ́ sa̰y ngá̰ý tə́
1Deē ń ndi loo ń Nə́ɓā kə́ dɔɔ́ a ɓɔ̄ɔ̄ rɔ̄n tū tə́ tə́ ní
to i ndíĺ Nə́ɓā kə́ bo kə́ tɔ́gən i ngá̰ý tə́.
2M-ə́da najə̄ kə́ dɔ Kɔ́ɔ̄ɓē tə́ na:
Ni i loo ɓɔ̄ɔ̄ rɔ̄ yāḿ, ndogə̄ mbal̄ kə́ ngan̄g ngá̰ý yāḿ,
Nə́ɓā yāḿ: Adə̄ m-ə̄ndā kemḿ i dɔn ni tə́!
3I ni n i nge kɔrī kɔ̄ɔ́ kum gūmbə̄ ń əyān̄ noí tə́ ní ō,
nge kajií dɔ mo̰y ngāl̄bɔ̄gīí kə́ nge tɔ̄l̄ deē tə́ ní ō.
4Ni a ngɔ̄mī.
Ā ə́nge loo ɓēé looneé kadə̄ ī-ɓɔ̄ɔń rɔ̄í,
tītə̄ ngōn̄ kə̄njá kə́ ɓɔ̄ɔ̄ rɔ̄n gír bɔ̄gə̄ kó̰o̰n tə́ beē.
Kem majə yān rāā rɔ̄n i der tə́ ō, kūbə̄ gində̄#91.4 Kūbə̄ gində̄: I kūbə̄ rɔ̄ɔ̄. tə́ ō.
5Ā ī-ɓōĺ yá̰á̰ kə́ ndɔ̄ɔ́ kə́ a əla ɓōĺ kə́ ngá̰ý kem deē tə́ aĺ ō,
kum gərā kə́ teē pit kadaá aĺ ō.
6Ā ī-ɓōĺ mo̰y ngāl̄bɔ̄gīí kə́ njə̄rā kum loo kə́ risə til tə́ aĺ ō,
yá̰á̰ kə́ tōr̄ kə́ a tɔ̄l̄ kósə de gə̄ dan kadə ndaá aĺ ō.
7A̰á̰ā̰, ká ré de gə̄ dūbú oyn̄neé kadií tə́,
aké de gə̄ dūbú kutə oyn̄neé dɔ jī ko̰í tə́ gə̄gē anī,
yá̰á̰ kógə̄ḿ a ɔdə rɔ̄í ḭ̄ alé.
8Yāí i kadə̄ ī-teē kumií ngóy,
anī ā á̰a̰ loo kəndā ń Nə́ɓā a əndā nja de kə́ sew aĺ gə̄ ní.
9Rɔ̄kum Kɔ́ɔ̄ɓē, i ḭ̄ n i loo ɓɔ̄ɔ̄ rɔ̄ yāḿ ní!
Ḭ̄ ī-rāā Nə́ɓā kə́ dɔɔ́ sa̰y ngá̰ý i loo ndi yāí tə́,
10yá̰á̰ kə́ to kum kaȳ aĺ a teē dɔí tə́ alé,
yá̰á̰ kə́ majaĺ a ɔdə kújə tandā yāí alé!
11Tām̄ Kɔ́ɔ̄ɓē a əda deē yān kə́ dɔ rā̰ tə́ gə̄ kadə̄ a ngɔ̄m̄nī
loo malang ń ā āw̄ tū tə́ ní tə́.
12Nin̄ a ətōnī kə jīdə́
yā kadə̄ kɔkərɔ əga njaí alé.
13Ā ī-tə́ɓā dɔ ɓɔl ō lī kakə́m ō kə njaí
kanjə̄ kadə̄ yá̰á̰ kógə̄ḿ rāāī,
ā ī-tə́ɓā dɔ kagə ō lī kə́ to ɓōĺ ō kə njaí.
14Dan ń ni-əhɔ gōḿ adə̄ ngan̄g ní m̄-gān̄g dɔn.
M-ā m̄ ngɔ̄mən tɔdɔ̄ ni ger̄ rīḿ.
15Ré ɓārə́m̄ anī m-ā m̄-ndigən,
m-ā m̄-ndi seneé dan wur kɔl tə́.
M-ā m̄-gān̄g dɔn ō, m-ā m-ɔ́sə gɔnən ō.
16M-ā m-ādə̄ a ndi kə kumneé ndɔ̄ ngá̰ý kadə̄ asən ō,
m-ā m-ɔ́jən kadə̄ a ger̄ na mā i nge kajən ō.
Currently Selected:
PĀ GƏ̄ 91: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.