PĀ GƏ̄ 92
92
Kɔ́ɔ̄ɓē, ɓōkíī tɔ̄ȳ i yá̰á̰ kə́ majə
1Pā. I pā kə́ ndɔ̄ sabat tə́.
2Kɔ́ɔ̄ɓē, ɓōkíī tɔ̄ȳ i yá̰á̰ kə́ majə.
Nə́ɓā kə́ dɔɔ́ sa̰y ngá̰ý, kɔsə gɔnií kə pāá i yá̰á̰ kə́ majə.
3Kəda najə̄ kem majə yāí dəloí ɓatə i yá̰á̰ kə́ majə ō,
kəda najə̄ yá̰á̰ kə́ rɔ̄kum yāí ndɔ̄ɔ́ i yá̰á̰ kə́ majə ō.
4Majə kadə̄ deē dān̄ gō kə kənde kə́ kəlān i sḛ́ý beē ō,
kə́ kəlān asə tām̄ ō, kə́ kəlān i ngá̰ý ō.
5Tɔdɔ̄ Kɔ́ɔ̄ɓē, yá̰a̰ rāāí adə̄m̄ rɔ̄nel̄ ō,
ré m̄-rā ta kəla gə̄ ń ī-rāādə́ kə jīí tə́ ní ɓáa, m-úr i kɔĺ rɔ̄nel̄ ō.
6Kɔ́ɔ̄ɓē, kəla rāāī gə̄ boon̄ to ɓōĺ ngá̰ý ō,
gír̄ yāí teē sa̰y ngá̰ý ō!
7De kə́ mbóo asə ger̄ yá̰á̰ kógə̄ḿ tū tə́ alé.
De kə́ kumən gān̄g aĺ asə ger̄ yá̰á̰ kógə̄ḿ tū tə́ alé.
8Ré de kə́ sew aĺ gə̄ tɔgən̄ ngá̰ý tītə̄ mu ō,
ngé rāā yá̰a̰ majaĺ gə̄ malang teēn̄ deē ō anī,
i yā kadə̄ nujən̄ sedə́ kə́ njɔ́ḿ gə̄ tə́.
9Banī ḭ̄ ń ī-ndi dɔɔ́ noō ní,
ḭ̄ i Kɔ́ɔ̄ɓē ngándáńg.
10Á̰a̰ madə̄ ba̰ā̰í gə̄, Kɔ́ɔ̄ɓē,
á̰a̰ madə̄ ba̰ā̰í gə̄ a oyn̄ kɔ̄ɔ́ ō,
ngé rāā yá̰a̰ majaĺ gə̄ malang a tə̄ndān̄ naā yā tḭ̄ḭ̄ ō.
11Ḭ̄ ī-tél ādə̄m̄ tɔ́gə gogə́ rang adə̄ m̄-ngan̄g tītə̄ dɔgə beé ō,
úr yibə̄ kə́ kijə dɔḿ tə́ ō.
12Ngé gə̄ ń a umə̄mə̄n̄ ní, m-á̰á̰də́ kə kumḿ ō,
ngé kem ndul gə̄ ń ənīmə̄n̄ rɔ̄ ní, m-ōō kōōdə́ kə mbīḿ ō.
13Banī de kə́ súmūú tɔgə tītə̄ kāgə̄ túmbur beé.
Ta jīn tɔ̄ɔ̄ tītə̄ kāgə̄ sédər kə́ Liban beé.
14Ni i kāgə̄ kə́ deē əhɔn ɓē yā Kɔ́ɔ̄ɓē tə́.
Ni hútə̄ ndágə loo kə́ gīr̄ gidə kújə yā Kɔ́ɔ̄ɓē Nə́ɓā yājí tə́.
15Ká ré ni tɔgə ɓə́ga kɔ̄ɔ́ gə̄gē anī a a̰a̰n̄ ɓáý.
Bəton i ngá̰ý ɓáý ō, rɔ̄n to mbōl̄ ō.
16Ni ɔjə háĺ kə́ súmūú yā Kɔ́ɔ̄ɓē kə̄ ndágá:
Kɔ́ɔ̄ɓē i mbal̄ yāḿ! Ni i de kə́ tə́la rɔ̄n naā tə́ alé!
Currently Selected:
PĀ GƏ̄ 92: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.