PĀ GƏ̄ 60
60
Nə́ɓā oō nōō yā gír deē yān gə̄
(K. 7-14: Á̰a̰ī Pā 108.7-14)
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā yā Dabid kə́ yā kəgań kem deē dɔ yá̰á̰ kə́ rāā yá̰á̰ tə́ ō, yā ndóoń deē yá̰a̰ ō. 2I dan ń Dabid rɔ̄ɔń Aram gə̄ kə́ Mesopotami#60.2 Mesopotami: Á̰a̰ī Tkg 24.10 tə́ ō kə́ Soba tə́ ō ní. Ta téĺdə́ anī Joab tetə deē yā Edom gə̄ dūbú kutə gidə i jōó rɔ̄ɔ̄, wól loo ń a ɓārə́n̄ na i wól loo yā katə̄ ní tə́.
3Nə́ɓā ḭ̄ ī-mbātə́jí, ī-tə̄ndā ī-tḭ̄jí kə̄ loo gə̄ tə́.
I wōn̄g n rāāī ní ba úńjí dɔɔ́ gogə́ rang.
4Ī-rāā ādə̄ dɔ nang ndebə ō njar ō ní,
ī-tél ə̄ndā ta naā tə́ gogə́ tām̄ a yéȳ i mbée!
5Ī-rāā ādə̄ yá̰á̰ kə́ ngan̄g rāā gír deē yāí gə̄.
Ḭ̄ ādə̄jí kasə kə́ ngan̄g adə̄ j-a̰ȳ.
6Ngé gə̄ ń ɓōlə́n̄ ndílí ní, ḭ̄ ī-rāā
ādə̄ a̰ȳn̄ naā kɔ̄ɔ́ no nge kur gə̄rā tə́.
7Yā kadə̄ kó tár yāí gə̄ télən̄neé de gə̄ kə́ gāngə̄n̄ dɔdə́ kɔ̄ɔ́ ɓáa,
ájə́jí kə jī ko̰í ō, ī-ndigə ɓār̄ yājí ō.
8Nə́ɓā ɔr̄ najə̄ kem kújə́ kə́ táĺ yān tə́ əda na:
I mā n m̄-tetə rɔ̄ ní!
M-ā m̄-kēgə̄ ɓē kə́ Sisem naā tə́.
M-ā m̄-gán̄g wól loo kə́ Sukot naā tə́ gír loo ngá̰ý.
9Galaad i yāḿ ō Manase i yāḿ ō.
Epəraim i jākā gində̄ kə́ dɔḿ tə́ ō,
Juda i kāgə̄ ko̰o̰ ɓē yāḿ ō.
10Moab i səmbē ndogə̄ man̄ yāḿ.
m̄-ɓōkə́ sākə̄rā yāḿ dɔ Edom tə́.
M-úr kɔĺ rɔ̄ dɔ dɔ nang yā Pilistin gə̄ tə́.
11I náā n a aw̄ seḿ ɓē kə́ ngan̄g tə́ ní?
I náā n a aw̄ seḿ bátə́ yā kugə̄ seḿ dɔ nang kə́ Edom tə́ ní?
12I ḭ̄ Nə́ɓā ń ī-mbātə́jí kɔ̄ɔ́ ní ngóy aĺ a?
I ḭ̄ Nə́ɓā ń ī-teē kə ngé rɔ̄ɔ̄ yājí gēé to̰ aĺ ní ngóy aĺ a?
13Ī-rāā sejí ādə̄ jə-rɔ̄ɔń madə̄ ba̰ā̰jí.
Tɔdɔ̄ kadə̄ deē ndul dḭḭ̄ deē madə̄n i gól̄ loo karī.
14Ré Nə́ɓā i sejí anī, j-a jə-tetə rɔ̄ɔ̄!
Tɔdɔ̄ i ni n a tə́ɓā madə̄ ba̰ā̰jí gə̄ kə njaneé ní.
Currently Selected:
PĀ GƏ̄ 60: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.