PĀ GƏ̄ 34
34
Kɔ́ɔ̄ɓē ɔrə̄m̄ kem sōl̄ yāḿ gə̄ tə́
1Pā yā Dabid. Ni-rāā kɔ̄r̄ ta kum Abimelek tə́. Dan ń Abimelek tə̄ɓān kɔ̄ɔ́ anī ni-ɔr̄ najə̄ gə̄ ń toō:
2M-ā m̄-ndadə̄ Kɔ́ɔ̄ɓē kə dɔ ndɔ̄ gə̄ malang.
M-ā m-ə̄nī taḿ nang tə́ loo tɔ̄ȳn tə́ alé.
3M-ə́ndá gúúḿ najə̄ yā Kɔ́ɔ̄ɓē tə́.
Ādə̄ ngé tél kə rɔ̄də́ kə̄ nang tə́ gə̄
rāān̄ rɔ̄nel̄ loo koō najə̄ kɔrə̄ḿ tə́.
4Ī-ɓoī rɔ̄sí tū yāḿ tə́ ādə̄ j-ɔ́siīneé gɔn Kɔ́ɔ̄ɓē.
Jə-ɓoī tají naā tə́ malang jə-tɔ̄yīneé rīn.
5M-ə́dá Kɔ́ɔ̄ɓē najə̄ anī ni tūrə̄m̄ tə́.
Ni ɔrə̄m̄ kem yá̰á̰ kə́ to ka̰ȳ ndíl gə̄ tə́ kɔ̄ɔ́ malang.
6Ngé gə̄ ń a̰a̰n̄ loo kum kə̄ rɔ̄n tə́ ní ta kumdə́ i kə kəgōó jarya ō,
dɔ kumdə́ a síndə̄rī to̰ aĺ ō.
7Nge rɔ̄ tō ndoō kógə̄ḿ ɓār̄ yá̰a̰ anī Kɔ́ɔ̄ɓē oō ō,
ɔrə̄n kɔ̄ɔ́ dan wur kɔl yān gə̄ tə́ malang ō.
8 Nge kaw̄ kəla yā Kɔ́ɔ̄ɓē a ngɔ̄m̄ dɔ ngé ɓōĺ ndíĺ Kɔ́ɔ̄ɓē gə̄ ō,
a ɔr̄də́ kɔ̄ɔ́ kum yá̰á̰ kə́ majaĺ gə̄ tə́ ō.
9Kɔ́ɔ̄ɓē i de kə́ majə ngá̰ý, ī-nāāī majən á̰a̰ī.
Rɔ̄nel̄ i kə́ deē ń ni i loo ɓɔ̄ɔ̄ rɔ̄ yān ní.
10Sḭḭ̄ ń Kɔ́ɔ̄ɓē ɔr̄ kam̄sí tayā tām̄ yān tə́ ní, ī-ɓōlíī ndílən!
Tɔdɔ̄ ngé gə̄ ń ɓōlə́n̄ ndílən ní a nalə̄n̄ yá̰á̰ kógə̄ḿ alé.
11Ndoō ō ɓō ō a rāā ngé kənge yá̰a̰ gə̄,
banī ngé sāā Kɔ́ɔ̄ɓē gə̄ nalə̄n̄ yá̰á̰ kógə̄ḿ alé.
12Ngánə́ḿ gə̄, ī-reē ōōī najə̄ kɔrə̄ḿ!
M-ā m-ɔ́jə́sí loo ɓōĺ ndíĺ Kɔ́ɔ̄ɓē.
13Deē ń gḛy ndi kə kumneé ō gḛy ndi kə rɔ̄nelēé ō ɓáa,
14ādə̄ kɔ́ɔ̄ mbātə́ kɔr̄ najə̄ kə́ majaĺ ō,
tétə̄ najə̄ aĺ ō.
15Ādə̄ kɔ́ɔ̄ ɔr̄ rɔ̄n kɔ̄ɔ́ kadə yá̰á̰ kə́ majaĺ tə́ ō,
rāā yá̰á̰ kə́ majə ō, sāā róbə kem sɔl̄ lɔm ō, a̰ȳ ngɔ̄də̄ gō tə́ ō.
16Kum Kɔ́ɔ̄ɓē i kə̄ dɔ de kə́ gōtə́ gə̄ tə́ ō,
nēl̄ mbīn yā koōń nōō yādə́ ō.
17Kɔ́ɔ̄ɓē ənī ngé rāā majaĺ gə̄ rɔ̄,
i yā kadə̄ əga kem deē dɔdə́ tə́ dɔ nang tə́ to̰ alé.
18De kə́ sew gə̄ əgan̄ kɔŕ anī Kɔ́ɔ̄ɓē oō ō,
ɔr̄də́ kɔ̄ɔ́ kem wur kɔl yādə́ gə̄ tə́ malang ō.
19Kɔ́ɔ̄ɓē i ngɔr rɔ̄ de gə̄ ń kemdə́ nujə sák sák kɔ̄ɔ́ tə́ ní ō,
ni ajə ngé gə̄ ń ndíĺdə́ sṵý kɔ̄ɔ́ ní ō.
20Yá̰á̰ kə́ to kum kaȳ aĺ gə̄ rāān̄ de kə́ súmūú ngá̰ý,
ba Kɔ́ɔ̄ɓē ɔrə̄n kɔ̄ɔ́ kum tə́ malang.
21Ni ngɔ̄m̄ kə̄ngān gə̄ malang.
Kógə̄ḿ kə́ tetə gətóo.
22Kəla rāā nge kem ndul a tɔ̄lən nəkɔ́ ō,
madə̄ ba̰ā̰ de kə́ súmūú gə̄ a əngen̄ ndéy ō.
23Kɔ́ɔ̄ɓē gān̄g dɔ ngé kəla yān gə̄,
ngé gə̄ ń rāānən̄ i loo ɓɔ̄ɔ̄ rɔ̄ yādə́ tə́ ní,
deē kógə̄ḿ dandə́ tə́ kə́ a ənge ndéy gətóo.
Currently Selected:
PĀ GƏ̄ 34: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.