PĀ GƏ̄ 35
35
De kə́ najə̄ gətóo dɔn tə́ rāā Kɔ́ɔ̄ɓē ɓɔ́
1Pā yā Dabid.
Kɔ́ɔ̄ɓē, m̄-rāāī ɓɔ́, ə̄ndā najə̄ dɔ ngé sekə́m̄ gə̄ tə́ ō,
ī-rɔ̄ɔ̄ ngé rɔ̄ɔ̄ḿ gə̄ ō!
2Ún der ō, kūbə̄ gində̄ ō, ba ḭ́ḭ dɔɔ́ ī-dḭḭ̄m̄!
3Əhɔ nənga dɔɔ́ ɔ̄gəń madə̄ ba̰ā̰ḿ gə̄ ngɔ̄də̄ gōḿ.
m̄-ngóō kadə̄ ə́dam̄ na i ḭ̄ n ā ájəm̄ ní.
4Ngé gə̄ ń sāān̄ tɔ̄lə̄m̄ ní
ādə̄ ndə̄ngān̄ rɔ̄də́ ō, ādə̄ rɔ̄də́ sɔl̄də́ ō!
Ngé gə̄ ń nómə̄n̄ rāām̄ yá̰á̰ kə́ to kum kaȳ aĺ ní
ādə̄ télən̄ kə gōdə́ kə rɔ̄sɔlɔ̄ɔ́.
5Loo ń nge kaw̄ kəla yā Kɔ́ɔ̄ɓē a mbəredə́ kə̄ gogə́ anī,
ādə̄ ton̄ tītə̄ təsá kə́ nél ɔy dáyń beē!
6Loo ń nge kaw̄ kəla yā Kɔ́ɔ̄ɓē a ngɔ̄də̄də́ róbó anī
ādə̄ loo risə til dɔdə́ tə́ ō,
ādə̄ loo ndəte sedə́ ō.
7Nin̄ ɓɔ̄ɔ̄n̄ dɔ mbḛ̄ ō réng ō yā kəhɔm̄neé kanjə̄ kumən,
ndērə̄n̄ bəlo kadə̄ m-ə̄sō kemeé.
8Ādə̄ yá̰á̰ kə́ majaĺ ngá̰ý kógə̄ḿ kə́ rāā yá̰á̰ jóo aĺ ɓáý teē rétə́ kə̄ rɔ̄də́ tə́.
Ādə̄ gūmbə̄ ń nin̄ kɔ́ gə̄ əyān̄ ní tél əhɔdə́ ō,
ādə̄ yá̰á̰ kə́ majaĺ ń noō tɔ̄l̄də́ ō.
9Anī m-ā m̄-tḭ́ḭ̄ bal walya najə̄ yā Kɔ́ɔ̄ɓē tə́ ō,
m-ā m̄-ndām̄ ndām̄ kə rɔ̄nelēé tām̄ kajə kə́ ni ajəm̄ tə́ ō.
10Najə̄ ń a ḭḭ ngarā̰ kemḿ tə́ yā teē taḿ tə́ ní n toó:
Kɔ́ɔ̄ɓē, de kə́ to tītīí i náā?
Ḭ̄ ī-gān̄g dɔ de kə́ tɔ́gən gətóo jī de kə́ ngan̄g tɔȳn tə́,
ī-gān̄g dɔ de kə́ əlan̄ rɔ̄sɔl̄ dɔn tə́ ō nge ndoō ō
jī nge kəsa tətōdə́ tə́.
11De kə́ kum tə́ aĺ gə̄ ḭḭn̄ seḿ ba dəjemə̄n̄ gír najə̄
kə́ m̄-ger̄ kum aĺ.
12Rāān̄ yá̰a̰ kə́ majaĺ seḿ kə̄rā majə kə́ m̄-rāā sedə́ tə́ ba əya̰mə̄n̄ kə kérə́ḿ.
13Dan ń ton̄ mo̰y ní, m-ō̰ō̰ kūbə̄ kəhɔ ndoō ō#35.13 Kūbə̄ kəhɔ ndoō: Á̰a̰ī Job 16.15,
m̄-*ndi ɓō tām̄ yā Nə́ɓā tə́ m̄-téləń kə rɔ̄ḿ kə̄ nang tə́ ō,
m̄-ndɔ̄ȳ ndɔ̄ȳ kə́ kógə̄ḿ beē kə̄ nja naā tə́ ō.
14M-āw̄ ō m̄-tél ō tītə̄ kə́ i madə̄ taḿ aké i ngōkó̰ó̰ḿ deē n i mo̰y ní.
Rɔ̄ḿ nelə̄ḿ aĺ bátə́ ō, tɔ́gə́ḿ ur̄ wak ō, tītə̄ kə́ i kó̰o̰ kojəḿ n oy beé.
15Ba dan ń m-ā m̄-bibə́rī ní,
nin̄ ɔsən̄ dɔdə́ naā tə́ ba əgōmə̄n̄ ō,
əndān̄ rɔ̄də́ naā tə́ yā rɔ̄ɔ̄m̄ ō.
Tə̄rā gə̄ ń i de kə́ m̄-ger̄də́ aĺ gə̄ ní, əgan̄ naā dɔḿ tə́ ō, əgan̄ kɔŕ ō.
16Dan ń a̰a̰n̄ kadə̄ njaḿ əhɔ dɔ nang aĺ anī nin̄ lurmə̄n̄ ō,
do̰o̰n̄ tadə́ dɔḿ tə́ ō.
17Kɔ́ɔ̄ɓē, loo kadə̄ ī-ra á̰á̰ yá̰á̰ ń noō kə kumií karī i ba̰ý?
Ī-lōō kadə̄ yá̰á̰ kə́ majaĺ ń toō rāām̄ ō,
ī-taām̄ jī ɓɔl gə̄ ń toō tə́ ō.
18M-ā m̄-rāāī kə́ra dan ngé kán̄ naā kə́ ngá̰ý gə̄ tə́,
m-ā m̄-ɓōkíī tɔ̄ȳ dan kósə de gə̄ tə́.
19Ādə̄ mā i kur̄ kəgō yā ngé gə̄ ń kemdə́ majaĺ seḿ kanjə̄ kumən ní alé.
Ngé gə̄ ń imə̄mə̄n̄ kanjə̄ kumən ní, ādə̄ asədə́ kɔr̄ najə̄ kə naá kə ngēl̄ kumdə́.
20Najə̄ kə́ ɔjə dɔ lápə́ya teē tadə́ tə́ nja kógə̄ḿ alé,
ba a tétə̄n̄ i najə̄ tá dɔ de gə̄ ń ndin̄ loo yādə́ jəke kem ɓēé tə́ ní.
21Nin̄ teēn̄ tadə́ ngá̰ý ədan̄neé najə̄ dɔḿ tə́ na:
Ha, j-a̰a̰n loo rāā yá̰á̰ kə́ gōtə́ aĺ kə kumjí!
22Banī Kɔ́ɔ̄ɓē, yá̰á̰ ń rāā yá̰á̰ ní ḭ̄ á̰a̰ā̰ kə kumií, adə̄ ī-lōō ndi taí mbóo ō,
ī-lōō kɔr̄ rɔ̄í rɔ̄ḿ tə́ kɔ̄ɔ́ ō!
23Nə́ɓā yāḿ, ḭ́ḭ dɔɔ́ ī-gān̄g sarya yāḿ,
Kɔ́ɔ̄ɓē, á̰a̰ loo ráý ráý ba ī-rɔ̄ɔ̄ dɔḿ tə́!
24Kɔ́ɔ̄ɓē, ḭ̄ ń i de kə́ gōtə́ ní, ī-gān̄g sarya yāḿ!
Nə́ɓā yāḿ, ādə̄ asədə́ rāām̄ kur̄ kəgō yādə́ tə́!
25Ī-lōō kadə̄ ədan̄ na:
Ha, j-a j-əlaniī tají tə́ i gidə kógə̄ḿ beē!
Ī-lōō kadə̄ ədan̄ na:
J-urən kɔ̄ɔ́ ɓá!
26Ngé gə̄ ń rāān̄ rɔ̄nel̄ tām̄ yá̰á̰ kə́ to kum kaȳ aĺ kə́ teē dɔḿ tə́ ní,
ādə̄ rɔ̄də́ sɔl̄də́ malang!
Ngé gə̄ ń ɔjən̄ rɔ̄də́ dɔḿ tə́ ní, ādə̄ rɔ̄sɔl̄ əhɔdə́ ō,
ādə̄ əlan̄ rɔ̄sɔl̄ dɔdə́ tə́ ō.
27Ngé gə̄ ń ndigən̄ kadə̄ gāngə̄n̄ sarya yāḿ kə gōó ní,
a əgan̄ kɔr̄ rɔ̄nel̄. Nin̄ a ədan̄, ba tél a ədan̄ ɓáý to̰ na:
Kɔ́ɔ̄ɓē tetə rɔ̄ɔ̄, ni ndigə kadə̄ nge kəla yān ndi majə.
28Ta ndo̰ḿ a ɔsə gɔn háĺ kə́ gōtə́ yāí ō,
a ɓōkíī tɔ̄ȳ kə dɔ ndɔ̄ gə̄ ō!
Currently Selected:
PĀ GƏ̄ 35: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.