PĀ GƏ̄ 12
12
Najə̄ yā Kɔ́ɔ̄ɓē dan de kə́ nujə kɔ̄ɔ́ gə̄ tə́
1Pā kə́ kem makətūbə̄ yā gōsə̄ pā gə̄ tə́. A dānə̄n̄ gō i kə kənde kə́ kəlān i sɔ́sɔ́. I pā yā Dabid.
2Kɔ́ɔ̄ɓē, ī-dḭḭ̄m̄ tə́!
Gír de kə́ ran̄ dɔ ndūdə́ tə́ gə̄ təgān̄ kɔ̄ɔ́,
de kə́ asən̄ kadə̄ deē ənī kemən adə̄də́ gətóon̄ kɔ̄ɔ́.
3De gə̄ a tə́dan̄ i najə kə́ majaĺ gə̄ dɔ naā tə́,
tadə́ nel̄ ngá̰ý kə naá, ba kemdə́ əhɔ naā alé.
4Ādə̄ Kɔ́ɔ̄ɓē rāā adə̄ ngé ta nel̄ gə̄ ba kemdə́ i yá̰á̰ kə́ rang gə̄ ō,
ngé gán̄g rɔ̄də́ gə̄ ō ń noō gətóon̄ kɔ̄ɔ́.
5Nin̄ ń ədan̄ na n-gerə̄n̄ najə̄ kə́ yā kəda tetəń rɔ̄ɔ̄,
na n-a n-əhɔn̄ tadə́ ngan̄g adə̄ na n-ɓōlə́n̄ deē alé ní.
6Banī Kɔ́ɔ̄ɓē əda na, ń toō ní n-a n-ḭḭ dɔɔ́ yā dḭḭ̄ ngé tɔ́gə
gətóo gə̄ ń a rāān̄ kumdə́ ndoō tə́ ní ō, ngé rɔ̄ to ndoō gə̄ ń a tṵ́ṵ̄n̄ ní ō.
Na n-a n-dḭḭ̄ deē ń a əjanən̄
kə̄ gogə́ kə gidə jīdə́ ní ō.
7Najə̄ kɔr̄ Kɔ́ɔ̄ɓē i najə̄ kə́ unjə̄.
To i tītə̄ gində̄ arjā̰a̰ kə́ nō horoó beē,
kə́ ɔrə̄n̄ yedə̄n nja sīrí adə̄ unjə̄ njáý njáý.
8-9Kɔ́ɔ̄ɓē, ngé kem ndul gə̄ dáȳn̄ kə̄ loo gə̄ tə́ ō,
gír̄ rāā majaĺ rosə kemdə́ ō,
ba ā ī-ngɔ̄m̄jí ngándáńg ta de kə́ majaĺ gə̄ ń noō tə́,
tɔdɔ̄ ḭ̄ i nge ra dɔ ndūí tə́.
Currently Selected:
PĀ GƏ̄ 12: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.