MATIYE 9
9
Jeju rāā adə̄ rɔ̄ nge mo̰y lígə̄rī ngáā
(Á̰a̰ī Mark 2.1-12; Luk 5.17-26)
1Adə̄ Jeju tél al̄ gogə́ kem toó, ənda bā bo gān̄g ɓáý ba aw̄ kem ɓē yān tə́. 2Anī de gə̄ reēn̄ kə nge lígə̄rī kógə̄ḿ kə́ to kem waá rɔ̄n tə́. Dan ń Jeju a̰a̰ taā kem yādə́ anī, əda nge lígə̄rī ní na:
Ngōnə̄ḿ, ə́hɔ kemií ngan̄g, yá̰á̰ kə́ majaĺ gə̄ ń ī-rāā ní Nə́ɓā mā̰ȳ rɔ̄n dɔ tə́ kɔ̄kə́. 3Anī ngé ndóō de gə̄ ndū najə̄ kə́rēý gə̄ ədan̄ kə̄ kemdə́ tə́ na:
Deē ń toō tájə̄ i Nə́ɓā! 4Jeju ger̄ gír̄ kə kemdə́ tə́ adə̄ ni-ədadə́ na:
Ī-gírī najə̄ kə́ majaĺ kə́ beē gə̄ kemsí tə́ i tām̄ rí tə́? 5Kəda na yá̰á̰ kə́ majaĺ yāí gə̄ ń ī-rāā ní Nə́ɓā mā̰ȳ rɔ̄n dɔ tə́ kɔ̄kə́ ō, kəda na kə ḭ́ḭ dɔɔ́ kə ī-njə̄rā ō ní i nge kə́ rá n i kə́ ngan̄g aĺ ngá̰ý tɔȳ madə̄ ní? 6Ní, yā kadə̄ ī-gerīneé na Ngōn̄ Deē i kə tɔ́gə mā̰ȳ rɔ̄n dɔ yá̰á̰ kə́ majaĺ gə̄ tə́ dɔ nang tə́ ní, dan ń ni-əda beé anī tūr̄ tan əda nge lígə̄rī ní na:
Ḭ́ḭ dɔɔ́, ún waá yāí ba aw̄ ɓēé.
7Anī deē ní ḭḭ dɔɔ́, ba aw̄ ta kaw̄ ɓēé. 8Dan ń kósə de gə̄ a̰a̰n̄ yá̰á̰ ń noō anī, ɓōĺ rāādə́ ō, nin̄-ɔsən̄ gɔn Nə́ɓā tām̄ kadə̄ ń ni-adə̄ de gə̄ tɔ́gə kə́ tītə̄ ń noō ní ō.
Jeju ɓāŕ Matiye
(Á̰a̰ī Mark 2.13-17; Luk 5.27-32)
9Jeju ḭḭ loo ń noō tə́ aw̄, ba dan ń a mān̄ anī a̰a̰ deē kógə̄ḿ ndi loo taā lambóó tə́, rī deē ní na i Matiye. Ni ədan na:
Ún gōḿ! Anī deē ní ḭḭ dɔɔ́ ba un gō Jeju.
10Dan ń Jeju ndi ta yá̰a̰ kəsa tə́ kem kújə yā Matiye tə́ anī, ngé taā lambóo gə̄ ngá̰ý ō, ngé rāā majaĺ gə̄ ngá̰ý ō, reēn̄ ba əsan̄ yá̰a̰ naā tə́ kə Jeju ō, ngé ndóō yá̰á̰ yān gə̄ ō. 11Loo ń Parijiyḛ gə̄ a̰a̰n̄ tītə̄ ń noō anī, dəjen̄ ngé ndóō yá̰a̰ yān gə̄ na ké i tām̄ rí tə́ á ngoldə́ a əsa yá̰a̰ kə ngé taā lambóo gə̄ ō, ngé rāā majaĺ gə̄ ō ní wa. 12Jeju oō najə̄ ní adə̄ ədadə́ na:
I ngé rɔ̄ ngan̄g gə̄ n a sāān̄ nja doktór ní alé, ba i ngé rɔ̄ ngan̄g aĺ gə̄ n a sāān̄ njan ní. 13Āw̄ ī-ndóōī kum najə̄ yā Nə́ɓā ń na,
yá̰á̰ ń m̄-gḛy ní i rāā kem majə ba i-tɔ̄l̄ dā̰ tun̄ kadə̄m̄ alé ní.
Tɔdɔ̄ m̄-reē i ɓāŕ de kə́ súmūú gə̄ tə́ alé,
ba i ɓāŕ ngé rāā majaĺ gə̄ tə́.
Jeju ō, ndi ɓō kə́ tām̄ yā Nə́ɓā tə́ ō
(Á̰a̰ī Mark 2.18-22; Luk 5.33-39)
14Tā anī ngé ndóō yá̰a̰ yā Ja̰a̰ gə̄ reēn̄ rɔ̄ Jeju tə́ ba dəjenən̄ na ké i tām̄ rí tə́ á nin̄ ō, Parijiyḛ gə̄ ō, na ndin̄ ɓō tām̄ yā Nə́ɓā tə́, ba ngé ndóō yá̰a̰ yān gə̄ na ndin̄ ɓō tām̄ yā Nə́ɓā tə́ aĺ ní wa? 15Anī Jeju tél ədadə́ na:
Dan ń nga dəyá̰ ndiń kə madə̄n gēé ɓáý ní madə̄n gə̄ ní a əhɔn̄ ndoō a? Banī ndɔ̄ gə̄ a reēn̄ noó kadə̄ a ɔrə̄n̄ nga dəyá̰ dandə́ tə́ kɔ̄ɔ́, tā anī a ndin̄ ɓō tām̄ yā Nə́ɓā tə́ tā.
16De kə́ yā kənī kum ngísə kūbə̄ kə ta kūbə̄ kə́ kijií gətóo, tɔdɔ̄ ta kūbə̄ kə́ kijə ń ənīn̄neé kum kə́ ngísə́ ní a ndɔ́r̄ ngísən ní kə̄ rɔ̄n tə́ kadə̄ a rə̄yā̰ tɔȳ kə́ kété ɓáý. 17Tá a ɓōkə́n̄ kasə kə́ tām̄ ngōn̄ kem sɔl kə́ lōō kɔ̄ɔ́ gə̄ tə́ aĺ ō, tɔdɔ̄ ré ī-rāā beé anī, sɔl gə̄ a ndūbə̄n̄ kɔ̄ɔ́ yā kadə̄ kasə ní əla loo nang tə́ ō sɔl gə̄ ní nujən̄ kɔ̄ɔ́ ō. Ba a ɓōkə́n̄ kasə kə́ tām̄ ngōn̄ i kem sɔl kə́ kijə gə̄ tə́, tītə̄ ń noō ɓáa kasə ní ō, sɔl gə̄ ní ō, a ton̄ majə.
Gotə najə̄ yā ngōn̄ ngār ō, yā dəyá̰ kə́ ɔdə ta kūbə̄ yā Jeju ō
(Á̰a̰ī Mark 5.21-43; Luk 8.40-56)
18Jeju a ɔr̄ najə̄ sedə́ kə̄ tan tə́ ɓáý anī, ngār kógə̄ḿ reē ɔsə non nang tə́ non tə́ ba ədan na:
Ngōnə̄ḿ kə́ dəyá̰ əhɔ tan kə̄ naā tə́ i ngɔr ɓáý, banī ī-reē ə̄ndā jīí dɔn tə́, anī a ndól̄ yā ndi kə kumneé. 19Jeju ḭḭ dɔɔ́, un gōn naā tə́ kə ngé ndóō yá̰a̰ yān gēé.
20Ɓá anī dəyá̰ kógə̄ḿ kə́ mósə́ téēn ba dan gān̄g aĺ rāā ɓāl̄ kutə gidə i jōó dɔn tə́, ngḛy gidən tə́ ba ɔdə ta kūbə̄ yān, 21tɔdɔ̄ əda kə̄ kemən tə́ na: Ré m-ɔ́də ta kūbə̄ yān ngóy anī, rɔ̄ḿ a ngáā. 22Banī Jeju tūr̄ rɔ̄n a̰a̰n, ba ədan na:
Ngōnə̄ḿ, əhɔ kemií ngan̄g na taā kem yāí ajiī. Anī gíŕ mósə gān̄g dɔ dəyá̰ ní tə́ kə̄ ta jī tə́ beē.
23Dan ń Jeju ugə̄ ɓē yā ngār ní tə́, ba a̰a̰ gōsə̄ gə̄ ō, kósə de kə́ ka̰a̰də́ ɓār̄ mbiti gə̄ ō ní a, 24ədadə́ na:
Ī-teēī kɔ̄ɔ́, tɔdɔ̄ ngōn̄ ní oy alé, ba a ɓīī i mbée.
Anī nin̄-əgōn̄ naā dɔn tə́. 25Dan ń ɔsən̄ kə kósə de gēé adə̄ teēn̄ ndágá oy anī, Jeju udə kújú, əhɔ ta jī ngōn̄ kə́ dəyá̰ ní anī ni-ndól̄. 26Ká̰a̰ najə̄ ní taā kem ɓē gə̄ kə gō nang ngeé ń noō tə́ malang.
Jeju rāā adə̄ ngé kum tɔ̄ɔ̄ gə̄ jōó a̰a̰n̄ loo
27Jeju teē noō anī ngé kum tɔ̄ɔ̄ gə̄ jōó unən̄ gōn, nin̄-ədan̄ na:
Ngōn̄ kaa Dabid, a̰a̰ kum tō ndoō yājí tə́!
28Loo ń Jeju udə kújú anī, ngé kum tɔ̄ɔ̄ gə̄ ní reēn̄ rɔ̄n tə́. Anī ni dəjedə́ na:
Ī-taāī kem kadə̄ m-ásə rāā yá̰a̰ ń noō a? Anī nin̄-tél ədanən̄ na:
A̰á̰ā̰ Kɔ́ɔ̄ɓē.
29Tā anī Jeju ɔdə kumdə́, ba ədadə́ na:
Ā ə́ngeī yá̰á̰ ní kə gō taā kem yāsí.
30Anī kumdə́ teē adə̄ a̰a̰n̄ loo. Gō tə́ anī Jeju tāādə́ ɓa ɓang, ədadə́ na:
Ōōī majə, ādī deē kógə̄ḿ gə̄gē ger̄ gō alé.
31Banī nin̄-teēn̄ anī ɔrə̄n̄ najə̄ yā Jeju adə̄ najə̄ ní taā gō nang ngeé ń noō malang.
Jeju rāā adə̄ de kə́ ɔr̄ najə̄ aĺ ɔr̄ najə̄
32Dan ń nin̄-teēn̄ kə̄ ndágá anī, de gə̄ reēn̄ kə deē kógə̄ḿ rɔ̄ Jeju tə́. Deē ní ndíĺ kə́ majaĺ i kemən tə́, adə̄ ni a ɔr̄ najə̄ alé. 33Loo ń Jeju tə̄ɓā ndíĺ kə́ majə aĺ ní kɔ̄ɔ́ anī, deē ní əla gír kɔr̄ najə̄. Ɔr kum kósə de gə̄ ngá̰ý adə̄ ədan̄ na:
Jóo toō deē a̰a̰ yá̰á̰ kə́ beē dɔ nang kə́ Israel tə́ aĺ ɓáý.
34Banī Parijiyḛ gə̄ ədan̄ na:
I ngār yā ndíĺ kə́ majaĺ gə̄ n adə̄n tɔ́gə́ á tə̄ɓań ndíĺ kə́ majaĺ gə̄ ní.
Kum Jeju o̰o̰n tām̄ yā kósə de gə̄ tə́
35Jeju un gō ɓē kə́ bo gə̄ ō, ngán ɓē gə̄ ō malang. Ni ndóō de gə̄ yá̰a̰ kem kújə́ kán̄ naā yādə́ gə̄ tə́ ō, ənī mbēr̄ Najə̄ kə́ Majə kə́ dɔ Ɓē ko̰o̰ tə́ ō, rāā adə̄ rɔ̄ ngé mo̰y gə̄ malang ō, rɔ̄ de kə́ nujə gə̄ malang ō ngáā. 36Dan ń Jeju a̰a̰ kósə de gə̄ anī kumən o̰o̰n tām̄ yādə́ tə́, tɔdɔ̄ de gə̄ ní ɔrən̄ ō, tɔ́gə́də́ ur̄ wak kɔ̄ɔ́ ō, tītə̄ batə̄ gə̄ kə́ nge kul̄də́ gətóo beé. 37Anī ni-əda ngé ndóō yá̰a̰ yān gə̄ na:
Kōō kə́ yā kəja i ngá̰ý, ba ngé kəjan gə̄ i ngá̰ý alé, 38ní ī-dəjeī kɔ́ɔ̄ kōō ní adə̄ əla kə de gēé kadə̄ əjan̄ kōō yān ní.
Currently Selected:
MATIYE 9: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.