MATIYE 10
10
Ngámbang kəla kə́ kutə gidə i jōó gə̄
(Á̰a̰ī Mark 3.13-19; Luk 6.12-16)
1Jeju ɓāŕ ngé ndóō yá̰a̰ yān kə́ kutə gidə i jōó gə̄, ba adə̄də́ tɔ́gə kadə̄ tə̄ɓān̄neé ndíĺ kə́ yḛr gə̄ ō, kadə̄ rāān̄neé kadə̄ rɔ̄ ngé mo̰y gə̄ malang ngáā ō, rɔ̄ de kə́ nujə gə̄ malang tél majə gogə́ ō. 2Rī ngámbang kəla yān kə́ kutə gidə i jōó gə̄ ní n toó: Nge kə́ kété bang i Simo̰ ń a ɓāŕnən̄ na i Piyer ní nin̄ kə ngōkó̰o̰n Andəre ō, tá Jakə kə́ ngōn̄ Jebede nin̄ kə ngōkó̰o̰n Ja̰a̰ ō, 3Pilipə nin̄ kə Bartelemi ō, Toma nin̄ kə Matiye nge taā lambóo ō, Jakə kə́ ngōn̄ Alpe nin̄ kə Tade ō, 4Simo̰ nge rɔ̄ɔ̄ dɔ ɓē tə́ nin̄ kə Judas Iskariot nge kəla Jeju jī de gə̄ tə́ ō.
Jeju əla ngámbang kəla yān kə́ kutə gidə i jōó gə̄
(Á̰a̰ī Mark 6.7-13; Luk 9.1-6)
5Dan ń Jeju əla ngé kə́ kutə gidə i jōó gə̄ ní, ni-tāādə́ ədadə́ na:
Āwī kem ɓē yā nápar de kə́ rang gə̄ tə́ aĺ ō, údiī kem ɓē gə̄ kə́ Samari tə́ aĺ ō. 6Banī āwī rɔ̄ ngán Israel gə̄ ń nin̄ i tītə̄ batə̄ kə́ tadə́ tḭ̄ḭ̄ kɔ̄ɔ́ gə̄ ní tə́. 7Loo ń ā āwī anī ɔ́jiī de gə̄ najə̄ kə gō róbó dɔɔ́ dɔɔ́, ə́daīdə́ na Ɓē ko̰o̰ kə́ dɔ rā̰ tə́ na reē rɔ̄də́ tə́ ngɔr. 8Ī-rāāī ngé mo̰y gə̄ ādə̄ rɔ̄də́ ngáā ō, ī-ndólī de kə́ koy gə̄ ō, ī-rāāī ādə̄ bānjə̄ ur̄ kɔ̄ɔ́ rɔ̄ ngé bānjə̄ gə̄ tə́ ō, ī-tə̄ɓāī ndíĺ kə́ majaĺ gə̄ kɔ̄ɔ́ ō. Sḭḭ̄ ə́ngeī i karī ní, ādī de gə̄ karī ō. 9Ī-lōōī kun lɔ́r, aláa gində̄ arjā̰a̰, aláa njár̄ sə́lē kem ngong nar tə́ jīsí tə́. 10Ī-lōōī kun ngong mbā jīsí tə́ ō, kɔy kūbə̄ gə̄ jōó dɔ naā tə́ ō, kɔy sākə̄rā gə̄ ō, kun kāgə̄ tɔ́sə̄ ō, tɔdɔ̄ i gōtə́ kadə̄ nge rāā kəla ənge yá̰a̰ kəsa yān.
11Loo n ré údiī kem ɓē kógə̄ḿ kə́ bo tə́ aké i kə́ dūú tə́ anī, ī-dəjeī kadə̄ ɔjən̄sí de kə́ asə kəhɔsí kə̄ rɔ̄n tə́, ba ī-ndiī looneé bátə́ kadə̄ ḭ́ḭīneé. 12Dan ń ā údiī kə̄ kújú anī ə́daī de kə́ kemeé gə̄ na: Ādə̄ kem sɔl̄ lɔm to tām̄ yāsí tə́. 13Ré de kə́ kem kújə́ ní tə́ gə̄ asən̄ kənge kem sɔl̄ lɔm anī, kem sɔl̄ lɔm yāsí ní to tām̄ yādə́ tə́. Ba ré nin̄-asən̄ aĺ anī ādə̄ kem sɔl̄ lɔm yāsí tél to tām̄ yāsí tə́ gogə́. 14Ré de gə̄ əhɔn̄sí kə̄ rɔ̄də́ tə́ aĺ ō, oōn̄ najə̄ yāsí aĺ ō anī, ī-teēī kɔ̄ɔ́ kem kújə́ ń noō tə́, aláa kem ɓē ń noō tə́, ba ī-*gógī bumbə́rú kə́ njasí tə́. 15Ādə̄ m-ə́dásí najə̄ kə́ bo ngá̰ý, ndɔ̄ sarya tə́ anī yá̰á̰ ń a reē dɔ ɓē ń noō tə́ ní, yā nang kə́ Sodom ō Gomor ō i só tə́ ngá̰ý tɔȳ yān.
De gə̄ a rāān̄ ngámbang kəla yā Jeju gə̄ yá̰a̰ kə́ tōr̄
(Á̰a̰ī Mark 13.9-13; Luk 21.12-17)
16Á̰a̰ī, m-ə́lásí i mbée tītə̄ batə̄ gə̄ kə̄ dan soó gə̄ tə́. I tām̄ ń toō tə́ ní ādī kumsí edə̄ tītə̄ yā lī gə̄ ō, ādī kemsí ndaa táĺ tītə̄ yā dér gə̄ ō. 17Əndāī kum kedə̄ dɔ rɔ̄sí tə́ najə̄ yā de gə̄ tə́, tɔdɔ̄ nin̄ a əlan̄sí jī ngé rāā sarya gə̄ tə́ ō, a əndan̄sí kə mərawaá kem kújə kán̄ naā yādə́ gə̄ tə́ ō. 18A aw̄n̄ sesí rɔ̄ ngé ko̰o̰ ɓē gə̄ tə́ ō, rɔ̄ mban̄g gə̄ tə́ ō, najə̄ yāḿ mā tə́, kadə̄ ā ɔ̄rī najə̄ kə́ kum tə́ ādīdə́ ō, ādī nápar de kə́ rang gə̄ ō. 19Loo ń a əlan̄sí jī de gə̄ tə́ anī, ī-lōōī sōl̄ kəda na ké ā ə́daī na i rí ō, ké loo kədan i ba̰ý ō wa. Tɔdɔ̄ Nə́ɓā a ədasí najə̄ i kum mbang nəkɔ́ ń noō tə́ kadə̄ ā ə́daīdə́. 20Tɔdɔ̄ i sḭḭ̄ n ā ɔ̄rī najə̄ ní alé, banī i Ndíl Bɔbə̄sí n a ɔr̄ najə̄ ní kemsí tə́ ní.
21De gə̄ a əlan̄ ngákó̰ó̰də́ gə̄ ta yo tə́ ō, bɔbə̄ ngōn̄ a əla ngōnən ta yo tə́ ō. Ngán gə̄ a ḭḭn̄ yā mbātə́ bɔbə̄də́ gə̄ kə kó̰ó̰də́ gə̄ ō, a əlan̄də́ ta yo tə́ ō. 22De gə̄ malang a imə̄n̄sí najə̄ yā rīḿ tə́, banī deē n a əhɔ sásáp mbóńg ta tɔ̄l̄ ta tə́ ní a ajə. 23Ré a rāān̄sí ndoō tə́ kem ɓē kógə̄ḿ tə́ anī, ā̰yī kə̄ kem ɓē kə́ rang tə́. Ādə̄ m-ə́dásí najə̄ kə́ bo ngá̰ý, ā ā̰yī kə̄ gō ɓē gə̄ malang kə́ Israel tə́ aĺ ɓáý n Ngōn̄ Deē a reēń ní.
24Nge ndóō yá̰a̰ tɔȳ nge kɔjən yá̰a̰ aĺ ō, nge kəla tɔȳ kɔ́ɔ̄n aĺ ō. 25Ré nge ndóō yá̰a̰ reē to tītə̄ nge kɔjən yá̰a̰ ō, nge kəla reē to tītə̄ kɔ́ɔ̄n ō ɓáa asə beé. Dan ń ɓārə́n̄ kɔ́ɔ̄ kújə na i Beljebul ní, a ədan̄ najə̄ kə́ tōr̄ ngá̰ý tɔȳ nge n noō ɓáý dɔ de gə̄ kə́ kem kújə yān tə́.
Deē ń kadə̄ ī-ɓōĺniī ní
(Á̰a̰ī Luk 12.2-7)
26Adə̄ ī-ɓōlíī de gə̄ alé, tɔdɔ̄ yá̰á̰ kógə̄ḿ kə́ to loo mundə̄ tə́ kə́ yā kadə̄ dɔ a teē ndágá aĺ ní gətóo ō, yá̰á̰ kógə̄ḿ kə́ to loo ɓɔ̄ɔ̄ rɔ̄ tə́ kə́ yā kadə̄ deē ger̄ aĺ ní gətóo ō. 27Najə̄ ń m-ə́dásí kum til tə́ ní, ə́daī loo kə́ kadaá tə́ ō, najə̄ ń kɔdə̄n̄ ta mbīsí tə́ ní, ə̄nīī kə́ mbēr̄ tə́ dɔ kújə tə́ dɔɔ́ ō. 28Ī-lōōī ɓōĺ ngé gə̄ ń asən̄ tɔ̄l̄ dā̰ rɔ̄ deē ba asən̄ tɔ̄l̄ ndíl deē aĺ ní. Deē ń kadə̄ ī-ɓōĺniī ní i Nə́ɓā ń asə rāā kadə̄ dā̰ rɔ̄ deē ō, ndíl deē ō, udə kum hor Gehen tə́ ní. 29A igən̄ kə́lē jōó gúrsə kógə̄ḿ aĺ a? Ba ni kógə̄ḿ dandə́ tə́ kə́ əsō nang tə́ kanjə̄ kadə̄ Bɔbə̄sí ndigə ní gətóo. 30Yāsí sḭḭ̄ tā a nənga dɔsí gə̄gē ní, Nə́ɓā tə́da kutən malang. 31I beé ní ī-lōōī ɓōĺ, tɔdɔ̄ gātə̄sí sḭḭ̄ tɔȳ gātə̄ kə́lē kə́ ngá̰ý gə̄.
Kəda ta kum de gə̄ tə́ na mā i deē yā Jeju
(Á̰a̰ī Luk 12.8-9)
32Deē ń əda ta kum de gə̄ tə́ na ni na i deē yāḿ anī, mā m-ā m-ə́da ta kum Bɔbə́ḿ kə́ ndi dɔ rā̰ tə́ na ni i deē yāḿ ō. 33Ba deē ń a əda ta kum de gə̄ tə́ na ni na i deē yāḿ aĺ ní, m-ā m-ə́da ta kum Bɔbə́ḿ kə́ ndi dɔ rā̰ tə́ na ni i deē yāḿ aĺ ō.
Ā ī-ndigiī Jeju tɔȳ ngéésí gə̄ ō, tɔȳ dā̰ rɔ̄sí sḭḭ̄ kɔ́ gə̄ ō
(Á̰a̰ī Luk 12.51-53; 14.26-27)
34Ī-lōōī kɔjəń na m̄-reē i yā kadə̄ loo kə́ dɔ nang tə́ to lɔm. m̄-reē i yā kadə̄ loo kə́ dɔ nang tə́ to lɔm alé, banī m̄-reē i kənī rɔ̄ɔ́ loo tə́. 35Tɔdɔ̄ m̄-reē i kɔr̄ de kə́ dəngam tə́ kadə̄ bɔbə̄n tə́ kɔ̄ɔ́ ō, kɔr̄ ngōn̄ kə́ dəyá̰ tə́ kadə̄ kó̰o̰n tə́ kɔ̄ɔ́ ō, kɔr̄ dəyá̰ kadə̄ umən kə́ dəyá̰ tə́ kɔ̄ɔ́ ō. 36Adə̄ madə̄ ba̰ā̰ deē i de kə́ kem kújú gōn tə́.
37Deē ń tár bɔbə̄n aláa kó̰o̰n tɔȳm̄ ní, kɔ́ɔ̄ asə tél deē yāḿ alé. Deē ń tár ngōnən kə́ dəngam aláa kə́ dəyá̰ tɔȳm̄ ní, kɔ́ɔ̄ asə tél deē yāḿ alé. 38Deē ń kɔ́ɔ̄ un kāgə̄ kə́ dēsə́ yān aĺ ō, un gōḿ aĺ ō ní, kɔ́ɔ̄ asə tél deē yāḿ alé. 39Deē ń o̰o̰n tɔdɔ̄ rɔ̄n ngá̰ý ní a tḭ̄ḭ̄ ta rɔ̄n. Ba deē ń tḭ̄ḭ̄ ta rɔ̄n tām̄ yāḿ tə́ ní a tél yā kənge rɔ̄n ní gogə́.
Yá̰a̰ kəndā nja
(Á̰a̰ī Mark 9.41)
40Deē ń əhɔsí kə̄ rɔ̄n tə́ anī əhɔm̄ i mā kə̄ rɔ̄n tə́. Ba deē ń əhɔm̄ kə̄ rɔ̄n tə́ ní əhɔ i nge ń əlam̄ ní kə̄ rɔ̄n tə́. 41Deē ń əhɔ nge koō ta kə̄ rɔ̄n tə́ loo nge koō ta tə́ ní, a ənge yá̰a̰ kəndā nja yā nge koō ta. Deē ń əhɔ de kə́ súmūú kə̄ rɔ̄n tə́ loo de kə́ súmūú tə́ ní a ənge yá̰a̰ kəndā nja yā de kə́ súmūú. 42Ādə̄ m-ə́dásí najə̄ kə́ bo ngá̰ý, náā nəkɔ́ ń a adə̄ de kə́ dūú kógə̄ḿ kə́ dan ngé gə̄ ń toó tə́ man̄ kə́ sɔl̄ kem kɔ̄yɔ́ kadə̄ a̰ȳ tām̄ i nge ndóō yá̰a̰ yāḿ ní, kɔ́ɔ̄ a nal̄ yá̰á̰ kəndā nja yān aĺ bátə́.
Currently Selected:
MATIYE 10: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.