MATIYE 17
17
Rɔ̄ Jeju tūr̄ kə́ rang
(Á̰a̰ī Mark 9.2-13; Luk 9.28-36)
1Ndɔ̄ mehḛ́ gō tə́ anī, Jeju un Piyer ō, Jakə ō, Ja̰a̰ kə́ ngōkó̰o̰ Jakə ō, ba aw̄ sedə́ kə kéŕdə́ dɔ mbal̄ kógə̄ḿ kə́ ngāl̄ tə́. 2Anī ta kumən tél tūr̄ kə́ rang kɔ̄ɔ́ kə̄ ta kumdə́ tə́ noō. Ta kumən ní ndə́lē tītə̄ mbang beé ō, kūbə̄ yān gə̄ ndaan̄ tītə̄ loo kə́ unjə̄ kow beé ō. 3Gō tə́ anī ngé ndóō yá̰á̰ kə́ mətá gə̄ ní a̰a̰n̄ Moijə ō, Eli ō, ra a ɔrə̄n̄ najə̄ kə Jejuú. 4Anī Piyer əda Jeju na:
Kɔ́ɔ̄ɓē, majə kadə̄ jə-ndi laā ngá̰ý. Ré ī-ndigə anī, m-ā m̄-rāā kújə tandā gə̄ mətá loo ń toō tə́ laā, kógə̄ḿ yāí ō, kógə̄ḿ yā Moijə ō, kógə̄ḿ yā Eli ō.
5Dan ń a ɔr̄ najə̄ kə̄ tan tə́ ɓáý anī, kil̄ man̄ kógə̄ḿ kə́ ndə́lē reē utə̄ dɔdə́ kɔ̄ɔ́. Anī ndū deē kógə̄ḿ ɔr̄ najə̄ dan kil̄ man̄ ní tə́, əda na:
Nge ń toō i Ngōn̄ kó tár yāḿ ń rɔ̄nel̄ yāḿ malang i dɔn tə́ ní. Ōōī najə̄ yān.
6Dan ń ngé ndóō yá̰a̰ yān gə̄ oōn̄ ndū deē ní anī, ɓōĺ asədə́ nák, adə̄ əsō sébən̄ kumdə́ nang tə́. 7Jeju reē rɔ̄də́ tə́, ɔdədə́ kə jīneé ba ədadə́ na: Ḭ́ḭī dɔɔ́, ī-lōōī ɓōĺ.
8Loo ń noō tə́ nin̄-ɔrə̄n̄ dɔdə́ dɔɔ́ anī, a̰a̰n̄ i Jeju ngóy n ra kə kérneé.
9Dan ń a risən̄ dɔ mbalá kə̄ nang tə́ anī, Jeju ədadə́ na yá̰á̰ ń a̰a̰n̄ ní kə lōōn̄ kəda deē kógə̄ḿ gotə, bátə́ kadə̄ ré Ngōn̄ Deē oy ba ndól̄ pá tá.
10Anī ngé ndóō yá̰a̰ yān gə̄ dəjenən̄ na, ké i tām̄ rí tə́ áké ngé ndóō de gə̄ ndū najə̄ gə̄ ədan̄ na i gáŕ kadə̄ Eli na a reē kété tá ní wa.
11Ni-tél ədadə́ na Eli na a reē rɔ̄kum, yā kəndā yá̰a̰ gə̄ malang kə gō loodə́ gēé gogə́ rang. 12Banī ādə̄ m-ə́dásí, Eli reē kɔ̄ɔ́ ɓá, ba de gə̄ ger̄nən̄ aĺ ō, rāān̄ yá̰a̰ malang ń kemdə́ ndigə ní seneé ō. Nin̄ a rāān̄ Ngōn̄ Deē yá̰á̰ kə́ tōr̄ gə̄ kə́ tītə̄ ń noō ō.
13Loo ń noō tə́ ngé ndóō yá̰a̰ yān gə̄ gerə̄n̄ kadə̄ ɔr̄ i najə̄ yā Ja̰a̰ Batistə sedə́.
Jeju rāā adə̄ rɔ̄ nge mo̰y kónó ngáā
(Á̰a̰ī Mark 9.14-29; Luk 9.37-43a)
14Dan ń ugə̄n̄ rɔ̄ kósə de gə̄ tə́ anī, dəngam kógə̄ḿ reē rɔ̄ Jeju tə́, ɔsə kejən nang tə́ non tə́, ba ədan na:
15Kɔ́ɔ̄ɓē, á̰a̰ kum tō ndoō yā Ngōnə̄ḿ tə́, tɔdɔ̄ a əsō yel̄. Adə̄ ré ɔsə seneé ɓáa a ənīn kum hor tə́, aláa i kum man̄ tə́ dejə. 16m̄-reē seneé rɔ̄ ngé ndóō yá̰a̰ yāí gə̄ tə́, ba mo̰y ní dum̄ dɔdə́ kɔ̄ɔ́.
17Anī Jeju un najə̄ ɔr̄, əda na:
Sḭḭ̄ de kə́ majaĺ gə̄ ō, kə́ ngé taā kem aĺ gə̄ ō, kə m̄-ndi sesí i bátə́ rə́ngáý tə́? Kə m̄-tə́gā taḿ dɔsí tə́ i bátə́ rə́ngáý tə́? Ī-reēī kə ngōnōó laā ādə̄mī.
18Jeju ndán̄g ndíl kə majaĺ ní, adə̄ teē kem ngōn̄ ní tə́ kɔ̄ɔ́. Anī rɔ̄ ngōn̄ ní ngáā kə̄ tajī tə́ noō.
19Loo ń noō tə́ ngé ndóō yá̰a̰ yā Jeju gə̄ reēn̄ rɔ̄n tə́, ba dəjenən̄ kə kéŕdə́ na ké i tām̄ rí tə́ áké n-tə̄ɓān̄ ndíĺ ní sétə́ wa?
20Anī Jeju tél ədadə́ na:
I tɔdɔ̄ sḭḭ̄ ī-taāī kem mámák alé. Ādə̄ m-ə́dásí najə̄ kə́ bo ngá̰ý, ré taā kem yāsí dūúnń i tītə̄ kum mutardə#17.20 Mutardə: Á̰a̰ī Mat 13.31 gə̄gē, ré ədaī mbal̄ n toō na kə ndɔ́tə̄ laā kɔ̄ɔ́ ba kə aw̄ nú anī, a ndɔ́tə̄ ō, yá̰á̰ kə́ dum̄sí a gətóo ō. 21Tá ɓáý to̰ ní ndíĺ kə́ majaĺ kə́ tītə̄ n noō a teē karī alé, a teē i dan ń deē ndɔ̄ȳ Nə́ɓā ō, deē ndi ɓō tām̄ yā Nə́ɓā tə́ ō ní tá ngóy.
Jeju tél tāā najə̄ koyn ō ndólə̄n ō
(Á̰a̰ī Mark 9.30-32; Luk 9.43b-45)
22Ndɔ̄ kógə̄ḿ tə́, ngé ndóō yá̰a̰ yā Jeju gə̄ əngen̄ naā malang Galile anī, Jeju ədadə́ na:
A əlan̄ Ngōn̄ Deē jī de gə̄ tə́ 23kadə̄ tɔ̄l̄nən̄, ba kə ndɔ̄ kə́ nge ko̰ mətá anī a ndól̄. Ba najə̄ ní tōr̄ wurdə́ ngá̰ý.
Jeju nin̄ kə Piyer adə̄n̄ nar tām̄ yā kújə kə́ táĺ tə́
24Dan ń Jeju nin̄ kə ngé ndóō yá̰a̰ yān gēé ugə̄n̄ Kapernaum anī, ngé taā lambóó kə́ tām̄ yā kújə yā Kɔ́ɔ̄ɓē tə́ gə̄ reēn̄ rɔ̄ Piyer tə́, ba dəjenən̄ na ké ngoldə́ ní ké a adə̄ lambóó kə́ tām̄ yā kújə yā Kɔ́ɔ̄ɓē tə́, aké a adə̄ aĺ wa?
25Piyer tél ədadə́ na a adə̄. Dan ń a udə kə̄ kújú anī, Jeju utə̄ dəjen na:
Simo̰, gír̄ yāí tə́ ní, mban̄g kə́ dɔ nang tə́ gə̄ a taān̄ lambóo, aláa a tīrə̄n̄ dɔ yá̰a̰ i jī náā gə̄ tə́? A taān̄ i jī ngáń ngé ɓē gə̄ tə́, aké i jī tə̄rā gə̄ tə́ ḿ?
26Piyer tél ədan na, i jī tə̄rā gə̄ tə́.
Anī Jeju ədan na:
I beé ní, ngáń ngé ɓē gə̄ i tū tə́ alé. 27Ba kadə̄ de gə̄ n noō əsōn̄neé sɔɔ̄ńjí aĺ ní, āw̄ ta bā bo tə́ ə̄nī kuȳ. Kānjə̄ kə́ ta kəga dɔ ń a un kuȳ ní ə́hɔn ba ī-teē tan, ā ə́ngé njáŕ sə́lē arjā̰a̰ kə kum madə̄ jōó tan tə́. Ɔ̄r̄, ba āwń ādə̄də́ tām̄ yāḿ tə́ ō, tām̄ yāí tə́ ō.
Currently Selected:
MATIYE 17: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.