MATIYE 16
16
Parijiyḛ gə̄ ō Sadusiyḛ gə̄ ō gḛyn̄ kadə̄ Jeju rāā yá̰á̰ kə́ yáā kadə̄ n-a̰a̰n̄
(Á̰a̰ī Mark 8.11-13; Luk 12.54-56)
1 Parijiyḛ gə̄ ō Sadusiyḛ gə̄ ō reēn̄ rɔ̄ Jeju tə́ ngɔr, ba dəjenən̄ najə̄ kógə̄ḿ sāān̄neé tan. Ədanən̄ na kə rāā yá̰á̰ kə́ yáā kógə̄ḿ kə́ ɔjə kadə̄ tɔ́gə ḭḭ rɔ̄ Nə́ɓā kadə̄ n-a̰a̰n̄. 2Anī Jeju tél ədadə́ na:
Ta mbang kur tə́ ɓáa sḭḭ̄ ədaī na man̄ na a edə alé, tɔdɔ̄ no rā̰ na kərē bḭḭ. 3Ba ta gír loo tə́ anī, sḭḭ̄ ə́daī na man̄ na a edə ɓōólaā, tɔdɔ̄ loo na to gudum. Adə̄ ré sḭḭ̄ á̰a̰ī no rā̰ ɓáa ī-gerī yá̰á̰ ń a rāā yá̰á̰ ní. Ba ré i yá̰a̰ kə́ ɔjə dɔ yá̰a̰ gə̄ ń a rāān̄ yá̰a̰ ngɔlaā toó ɓáa sḭḭ̄ ī-gerī loon alé. 4Gír de kə́ majaĺ gə̄ ō, kə́ ngé kəhɔ gō Nə́ɓā aĺ gə̄ ō, kə́ ngɔlaā gə̄ sāān̄ ka̰a̰ yá̰á̰ kə́ yáā, banī a rāān̄ yá̰á̰ kə́ yáā kə́ rang yā kadə̄də́ alé, i yā Jonas tá ngóy. Gō tə́ anī ni-əya̰də́, ba ɔtə aw̄.
Kaa mápa yā Parijiyḛ gə̄ ō Sadusiyḛ gə̄ ō
(Á̰a̰ī Mark 8.14-21)
5Dan ń ngé ndóō yá̰a̰ yā Jeju gə̄ teēn̄ bā kə̄ gidə kə́rēý tə́ ní dɔdə́ ndígə̄nal kun mápa kɔ̄ɔ́. 6Anī Jeju ədadə́ na kə əndān̄ kum kedə̄ dɔ rɔ̄də́ tə́ majə najə̄ yā kaa mápa yā Parijiyḛ gə̄ tə́ ō, yā Sadusiyḛ gə̄ tə́ ō.
7Anī nin̄-gírə̄n̄ kemdə́ tə́ ədan̄ na majanī na i tām̄ mápá ń na n-unən̄ jīdə́ tə́ aĺ ní.
8Banī Jeju ger̄ gír̄ yādə́, adə̄ tél ədadə́ na:
I tām̄ rí tə́ á ī-gírī dɔ mápá kə́ gətóo jīsí tə́ ní? Sḭḭ̄ i de kə́ ngé taā kem mámák aĺ gə̄! 9Ī-gerī kum aĺ ɓáý a? Dɔsí ndígə̄nal mápá kə́ mí gə̄ ń m-ādə̄ de gə̄ dūbú mí ní a? Aké dɔsí ndígə̄nal kutə dōbə̄ gə̄ ń ɔ́yiī gotə kə́ na̰y kemeé ní a? 10Dɔsí ndígə̄nal mápá kə́ sīrí gə̄ ń m-ādə̄ de gə̄ dūbú sɔ́ ní? Aké dɔsí ndígə̄nal kutə dōbə̄ gə̄ ń ɔ́yiī gotə mápá kə́ na̰y gə̄ kemeé āwīneé ní a? 11I najə̄ yā mápa n m-ɔ̄r̄ sesí aĺ ní ī-rāāī i ba̰ý n ī-gerīneé kum aĺ ní? M-ə́dásí na kadə̄ kumsí gól̄sí kə kaa mápa yā Parijiyḛ gə̄ ō, yā Sadusiyḛ gə̄ ō alé.
12Loo ń noō tə́, nin̄-gerə̄n̄ kadə̄ ədadə́ na kə kumdə́ kə gól̄də́ alé i dɔ kaa mápá ń a ɔrə̄n̄neé mápá tə́ ní alé, ba i dɔ yá̰a̰ n Parijiyḛ gə̄ ō Sadusiyḛ gə̄ ō a ndóōn̄ de gə̄ tə́ ní.
Piyer əda na Jeju i Kərist
(Á̰a̰ī Mark 8.27-30; Luk 9.18-21)
13Jeju ugə̄ gō nang kə́ Sejare kə́ Pilipə tə́ anī dəje ngé ndóō yá̰a̰ yān gə̄ najə̄ əda na: Mā Ngōn̄ Deē ní, de gə̄ ədan̄ na mā i náā?
14Nin̄-tél ədanən̄ na:
De kə́rēý gə̄ ədan̄ na ḭ̄ na i Ja̰a̰ Batistə, de kə́ rang gə̄ ədan̄ na ḭ̄ na i Eli, de kə́ rang gə̄ ɓáý to̰ ədan̄ na ḭ̄ na i Jeremi, aláa na i nge koō ta kógə̄ḿ kə́ dan madə̄ gə̄ tə́.
15Jeju ədadə́ na:
Ba sḭḭ̄ kɔ́ gə̄ ní, ə́daī na mā i náā.
16Simo̰ Piyer ə́dan na: Ḭ̄ i Kərist Ngōn̄ Nə́ɓā kə́ ndi kə kumneé.
17Loo ń noō tə́ Jeju tél ədan na:
Ḭ̄ i kə rɔ̄nelēé Simo̰ ngōn̄ Jonas, tɔdɔ̄ i Bɔbə́ḿ kə́ ndi dɔ rā̰ tə́ n teē kumií dɔ yá̰á̰ ń toō tə́ ní, ba i deē ndul alé. 18Banī mā m-ə́daī na ḭ̄ i mbal̄ ō, mā m-ā m̄-rāā Egəlijə yāḿ dɔ mbal̄ ń toō tə́ ō. Yo a asə rāā yá̰a̰ seneé alé. 19M-ā m-ādī lakélé ta róbə Ɓē ko̰o̰ kə́ dɔ rā̰ tə́. Yá̰á̰ ń ā ī-do̰ō̰ dɔ nang tə́ ní, a do̰ō̰n̄ dɔ rā̰ tə́ ō, yá̰á̰ ń ā ī-tútə dɔ nang tə́ ní, a tútən̄ dɔ rā̰ tə́ ō.
20Loo ń noō tə́ Jeju tāā ngé ndóō yá̰a̰ yān gə̄ ɓang ɓang na kə lōōn̄ kəda deē gotə sḛ́ý na ni na i Kərist.
Jeju əda najə̄ koyn ō ndólə̄n ō
(Á̰a̰ī Mark 8.31—9.1; Luk 9.22-27)
21Jeju əla gír kəda ngé ndóō yá̰a̰ yān gə̄ kum mbang nəkɔ́ ń noō tə́ wáńg na i gáŕ kadə̄ n-aw̄ Jerusalem kadə̄ n-a̰a̰ tápə̄ ngá̰ý jī kum kɔɔ̄ gə̄ tə́ ō, ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ tə́ ō. Na a tɔ̄l̄nən̄, ba ndɔ̄ kə́ nge ko̰ mətá anī n-a n-ndól̄.
22Anī Piyer ɓārə́n kə̄ gogə́ ba gɔŕyɔ̄n najə̄, ədan na:
Kɔ́ɔ̄ɓē, Nə́ɓā a ngɔ̄mī, ni a ɔgə̄ kadə̄ yá̰á̰ ń noō rāāī! I tītə̄ ń noō alé, yá̰á̰ kə́ tītə̄ ń noō a teē dɔí tə́ alé!
23Anī Jeju tūr̄ rɔ̄n ba əda Piyer na:
Sətan, ī-tél kɔ̄ɔ́ gōḿ tə́! Ḭ̄ i bə̄dē kə́ əga njaḿ kadə̄ m-ə̄sō. Tɔdɔ̄ gír̄ kə́ kemií tə́ i gír̄ yā Nə́ɓā alé, ba i gír̄ yā de gə̄.
24Gō tə́ anī Jeju əda ngé ndóō yá̰a̰ yān gə̄ na:
Ré deē kógə̄ḿ gḛy reē gōḿ tə́ anī, adə̄ kɔ́ɔ̄ gír̄ dɔ rɔ̄n tə́ to̰ alé, ādə̄ kɔ́ɔ̄ əla dɔn gír kāgə̄ kə́ dēsə́ yān tə́ ba un gōḿ. 25Tɔdɔ̄ deē ń gḛy kajə rɔ̄n ní kɔ́ɔ̄ a tḭ̄ḭ̄ ta. Banī deē ń tḭ̄ḭ̄ ta rɔ̄n najə̄ yāḿ mā tə́ ní, a tél yā kənge rɔ̄n ní gogə́. 26Ré deē ənge dɔ nang malang kə taá ba tḭ̄ḭ̄ ta rɔ̄n kɔ̄ɔ́ ní, a teēn i rí? Aláa i rí n, deē a ādə̄ kum gotə rɔ̄n yā gāngəń dɔ rɔ̄n ní? 27Tɔdɔ̄ Ngōn̄ Deē a reē kə deē yān kə́ dɔ rā̰ tə́ gə̄ ō, kə kɔsə gɔn yā Bɔbə̄n ō. Loo ń noō tə́ ni a əgā de gə̄ kógə̄ḿ kógə̄ḿ malang ɔjəń dɔ yá̰a̰ rāādə́ gə̄. 28Ādə̄ m-ə́dásí najə̄ kə́ bo ngá̰ý, de kə́rēý gə̄ kə́ dan de gə̄ ń ran̄ laā tə́ ní, a a̰a̰n̄ Ngōn̄ Deē loo reē tə́ kə́ mban̄g tə́ pá tá kadə̄ a oyn̄ ɓáý.
Currently Selected:
MATIYE 16: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.