MATIYE 11
11
De gə̄ ń Ja̰a̰ Batistə əladə́ ní
(Á̰a̰ī Luk 7.18-35)
1Dan ń Jeju ɔjə ngé ndóō yá̰a̰ yān kə́ kutə gidə i jōó gə̄ yá̰a̰ gə̄ oy anī ndɔ́tə̄ kɔ̄ɔ́ loo ní tə́ ba aw̄ ndóō de gə̄ yá̰á̰ tə́ ō, kɔjə najə̄ yā Nə́ɓā tə́ ō, kem ɓē gə̄ kə́ gō nang ngeé ń noō tə́.
2Dan ń Ja̰a̰ i kújə dəngáyá ní, ni-oō kōō yá̰a̰ gə̄ ń Kərist rāā ní. 3Anī əla ngé ndóō yá̰a̰ yān gə̄ rɔ̄n tə́ kadə̄ aw̄ dəjenən̄ na ké ni n i nge ń kadə̄ reē ní aké kə n-ngóōn̄ i de kə́ rang ɓáý wa.
4Anī Jeju tél ədadə́ na:
Yá̰a̰ gə̄ ń ōōī ō á̰a̰ī ō ní, ī-tél āw̄ ɔ́jiī Ja̰a̰ gotə: 5Ngé kum tɔ̄ɔ̄ gə̄ a̰a̰n̄ loo ō, ngé tə́sō motə gə̄ tél njə̄rān̄ majə ō, bānjə̄ ur̄ kɔ̄ɔ́ rɔ̄ ngé bānjə̄ gə̄ tə́ ō, mbíkī gə̄ oōn̄ loo ō, de kə́ koy gə̄ ndólə̄n̄ ō, ngé ndoō gə̄ oōn̄ Najə̄ kə́ Majə ō. 6Ba rɔ̄nel̄ i kə deē ń a lōō gír taā kemḿ mā tə́ aĺ ní.
7Dan ń de gə̄ ní ɔtə aw̄n̄ anī, Jeju tél a ɔr̄ najə̄ yā Ja̰a̰ kə kósə de gēé, ədadə́ na:
Yá̰a̰ ń āwī ka̰á̰ kem dəla loo tə́ ní i rí? I tə̄ɓā kə́ nél a yéȳ a? 8Ba i rí bang n āwī ka̰á̰ ní? I de kə́ tə́la kūbə̄ kə́ majə ngá̰ý gə̄ rɔ̄n tə́ a? Ngé ko̰ō̰ kūbə̄ kə́ majə ngá̰ý gə̄ a ndin̄ i kem kújə yā mban̄g gə̄ tə́. 9Ní, āwī i ka̰a̰ rí tə́? I ka̰a̰ nge koō ta tə́ a? A̰á̰ā̰, i nge koō ta. Ba ādə̄ m-ə́dásí, ni i de kə́ bo tɔȳ nge koō ta. 10I ni n ndangən̄ najə̄ ń toō ɔjənə̄ń dɔn ní:
Á̰a̰ā̰, m-ā m-ə́la nge kəla yāḿ kété noí tə́ kadə̄ aw̄ rāā gō róbə yāí.
11Ādə̄ m-ə́dásí najə̄ kə́ bo ngá̰ý, dan ngán gə̄ ń dəyá̰ gə̄ ojən̄də́ tə́ ní, nge kógə̄ḿ kə́ bo tɔȳ Ja̰a̰ Batistə gətóo. Banī de kə́ dūú ngá̰ý kə́ kem Ɓē ko̰o̰ kə́ dɔ rā̰ tə́ bo tɔȳn. 12Əla gír kem ndɔ̄ gə̄ ń Ja̰a̰ Batistə a ɔjəń de gə̄ najə̄ tə́ bátə́ ngɔlaā ní, ənīn̄ Ɓē ko̰o̰ kə dɔ rā̰ tə́ rɔ̄ɔ̄ i kə ngangāá ngá̰ý, adə̄ i ngé gə̄ ń a rɔ̄ɔ̄n̄ kə ngangāá ngá̰ý ní n a taān̄ ní. 13Ngé koō ta gə̄ malang ō, ndū najə̄ gə̄ malang ō, ɔrə̄n̄ najə̄ kə́ dɔ Ɓē ko̰o̰ tə́ bátə́ ugə̄ń ɓāl̄ yā Ja̰a̰ tə́. 14Ba ré ī-ndigiī ger̄ kum najə̄ ń toō anī, Eli ń kadə̄ a reē ní i Ja̰a̰. 15Náā nəkɔ́ ń i kə mbīneé yā koōń najə̄ anī, ādə̄ kɔ́ɔ̄ oō.
16De kə́ kōnīí laā gə̄ ń toō kə m-ɔ́jə sedə́ i náā gə̄ ō? Nin̄-ton̄ i tītə̄ ngán gə̄ kə́ ndin̄ ndágə looó, ba kə́rēý gə̄ ɓārə́n̄ madə̄də́ gə̄ ədan̄də́ na: 17Jə-kɔ̄ĺ nal j-ənīń pā ndām̄ j-adə̄sí, anī sḭḭ̄ ɔdiī ndām̄ aĺ ō, j-ənī pā yo a sḭḭ̄ ɔ́diī nōō aĺ ō. 18Tɔdɔ̄ dan ń Ja̰a̰ reē ní, əsa yá̰a̰ aĺ ō, a̰ȳ yá̰a̰ aĺ ō, anī de gə̄ ədan̄ na ndíĺ kə́ majaĺ na i kemən tə́. 19Ba dan ń Ngōn̄ Deē reē ní, əsa yá̰a̰ ō, a̰ȳ yá̰a̰ ō anī de gə̄ ədan̄ na ni na i nge kəsa wa ō, nge kasə rāā ō, ni na i madə̄ ngé taā lambóo gə̄ ō, ngé rāā majaĺ gə̄ ō, banī yá̰a̰ rāān gə̄ ɔjə kadə̄ najə̄ i yā kum kedə̄ yā Nə́ɓā.
Ɓē gə̄ ń de kə́ kemeé gə̄ mbātə́n̄ taā kem ní
(Á̰a̰ī Luk 10.13-15)
20Anī Jeju əla gír tə́da najə̄ kə́ ngan̄g ngan̄g gə̄ dɔ ɓē gə̄ ń ni-rāā yá̰á̰ kə́ yáā gə̄ ngá̰ý kemeé, banī de kə́ kemeé gə̄ mbātə́n̄ tūr̄ háĺdə́ ní, əda na:
21Rɔ̄ tō ndoō a reē dɔí tə́, Korajḛḛ! Rɔ̄ tō ndoō a reē dɔí tə́, Betsaida! Tɔdɔ̄ yá̰á̰ kə́ yáā gə̄ ń rāān̄ yá̰a̰ loosí ní, nə́ngētə́ rāān̄ yá̰a̰ i kem ɓē kə́ Tir tə́ ō, Sidon tə́ ō anī, de kə́ kemeé gə̄ a o̰ō̰n̄ kūbə̄ sákə̄ tə́ yā kəhɔń ndoō ō, a ndin̄ kum bū tə́ ō, yā kɔjəń kadə̄ na n-ndigən̄ tūr̄ háĺdə́. 22Ní, ādə̄ m-ə́dásí, ndɔ̄ sarya tə́ anī, yā ɓē kə́ Tir ō, Sidon ō, a to só tə́ ngá̰ý tɔȳ yāsí sḭḭ̄. 23Ba ḭ̄, ɓē kə́ Kapernaum, ɔ́jəń na ā ḭ́ḭ kum kə̄ dɔɔ́ yā kugə̄ no rā̰ tə́ a? A télən̄ seí kə̄ nang tə́ bátə́ yā kəlaī ɓádá. Tɔdɔ̄ yá̰á̰ kə yáā gə̄ ń rāān̄ yá̰a̰ looí ní ré rāān̄ yá̰a̰ i Sodom anī, ɓōólaā ń toō gə̄gē ní ɓē kə́ Sodom a ndi noó ɓáý. 24Ní, ādə̄ m-ə́dásí, ndɔ̄ sarya tə́ anī, yā gō nang kə́ Sodom a to só tə́ ngá̰ý tɔȳ yāsí.
Ī-reēī rɔ̄ḿ tə́ anī ā ɔ̄rī koō
(Á̰a̰ī Luk 10.21-22)
25Dan ngeé ń noō tə́ ní Jeju ɔr̄ najə̄, əda na:
Bɔbə́ḿ, ḭ̄ ń i Kɔ́ɔ̄ɓē dɔ rā̰ tə́ ō dɔ nang tə́ ō ní, m̄-ɓōkíī tɔ̄ȳ tām̄ ɓɔ̄ɔ̄ ń ī-ɓɔ̄ɔ̄ dɔ yá̰a̰ gə̄ ń toō kɔ̄ɔ́ tām̄ yā ngé kum kedə̄ gə̄ tə́ ō, ngé ger̄ yá̰a̰ gə̄ tə́ ō, ba ī-teē kum de kə́ dūú gə̄ dɔ tə́ ní. 26A̰á̰ā̰, Bɔbə́ḿ, i tītə̄ ń noō tɔdɔ̄ i nge ń noō n á̰a̰ kadə̄ i yá̰á̰ kə́ nel̄ kemií ní.
27Bɔbə́ḿ əla yá̰a̰ malang gír jīḿ tə́. Deē kógə̄ḿ kə́ gerə̄m̄ mā Ngōnən gətóo, ba i Bɔbə́ḿ nəkɔ́ tá ngóy ō, deē kógə̄ḿ kə́ ger̄ Bɔbə́ḿ gətóo, ba i mā Ngōnən nəkɔ́ tá ngóy ō, deē ń mə̄kɔ́ ngōn̄ m̄-ndigə teē kumən dɔn tə́ ní tá ngóy ō.
28Sḭḭ̄ gə̄ ń kɔr rāāsí tām̄ yá̰á̰ kə́ ɔȳ gə̄ ń ə̄tōī tə́ ní, ī-reēī kə̄ rɔ̄ḿ tə́ malang, anī m-ā m-ādə̄ ā ɔ̄rī koō. 29Úniī njúkə yāḿ ə̄nīī kɔ́ɔ́sí tə́ ba ī-téliī ngé ndóō yá̰a̰ yāḿ gə̄. Tɔdɔ̄ mā i de kə́ sɔl̄ lɔ́ḿ ō, m-ɔ́jə rɔ̄ḿ aĺ ō, loo ń noō tə́ ā ɔ̄rī koō. 30Tɔdɔ̄ yá̰á̰ ń m-ə̄ndā dɔ de gə̄ tə́ ní ɔȳ aĺ ō, yá̰a̰ kətō yāḿ i kə́ hɔɔ́lɔ̄ ō.
Currently Selected:
MATIYE 11: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.