JOB 30
30
Najə̄ ń Job tūr̄ əda kə tɔ́gɔ́ yā kadə̄ gír najə̄ yān gāngəń ní
1Ba ngɔlaā mā i kur̄ kəgō yā ngé gə̄ ń ɓālə̄ḿ tɔȳ yādə́ ní,
nin̄ ń kété m̄-kídə̄ bɔbə̄də́ gə̄,
adə̄ m̄-mbātə́ kəladə́ dan bísə́ kə́ ngé ngɔ̄m̄ yá̰a̰ kul̄ yāḿ gə̄ tə́ ní.
2M-ā m̄-rāā i rí kə tɔ́gə jīdə́? Tɔ́gə́də́ malang i kə́ oy kɔ̄ɔ́.
3Ndoō ō, ɓō ō ndəlēdə́. Nin̄-sāān̄ yá̰á̰ kə́ yā ngó̰ȳ kem kə̄sā gə̄ tə́,
kem loo kə́ to ɓōĺ kə́ ndágə doy kə́ deē gətóo tū tə́ tə́.
4Nin̄ ró̰ȳn̄ mu kə́ ɗa katə̄ kadə túpə́ kámbə gə̄ tə́,
yá̰a̰ kəsadə́ i ngəra kāgə̄ jene.
5De gə̄ tə̄ɓān̄də́ kɔ̄ɔ́ kem ɓēé ō,
ndangən̄də́ tītə̄ loo ndang ngé ɓogə gə̄ beé ō.
6Nin̄ ton̄ i kadə kóongó gə̄ tə́ ō,
kem bəlo loo gə̄ kə́ dɔ nang tə́ ō, kem bəlo mbal̄ gə̄ tə́ ō.
7Nin̄ nōōn̄ kem túpə́ kámbə gə̄ tə́ tītə̄ man̄g gə̄ beé ō,
kánə̄n̄ naā kə̄ dɔ naā tə́ gír kōn̄ gə̄ tə́ ō.
8Nin̄ i ngán de kə́ kur̄ dɔdə́ gətóo gə̄ ō, ngán de kə́ rīdə́ gətóo gə̄ ō.
Tə̄ɓān̄də́ kɔ̄ɔ́ kem ɓēé i kə sálang kāgāá.
9Ba ngolaā nin̄ a ənīn̄ pā i seḿ māá ō, m̄-tél i kur̄ kəgō yādə́ ō.
10Nel̄də́ seḿ alé, nin̄ tūrə̄n̄ gidədə́ taḿ tə́ kɔ̄ɔ́,
aláa tībə̄n̄ hōr̄ kumḿ tə́ kanjə̄ kadə̄ usədə́ yá̰á̰ kógə̄ḿ.
11Dan ń Nə́ɓā ɔr̄ tɔ́gə́ḿ kɔ̄ɔ́ ō, ənīm̄ nang tə́ ō ní,
yá̰á̰ kə́ ɔgə̄də́ rāā yá̰á̰ kə́ majaĺ seḿ gətóo.
12Kósə de kə́ ngá̰ý gə̄ ḭḭ ran̄ dɔɔ́ yā sekə́m̄,
nin̄ sāān̄ tə́la njadə́ gəlaḿ tə́ kadə̄ m̄-teē m-ə̄sō.
Nin̄ rāān̄ róbə yādə́ bátə́ reē ugə̄n̄neé rɔ̄ḿ tə́, yā rāań kadə̄ taḿ tḭ̄ḭ̄.
13Nin̄ gāngə̄n̄ gírə́ḿ ō, rāān̄ kəla kə́ yā kadə̄ yá̰á̰ kə́ majaĺ rāām̄neé ō,
sāān̄ kadə̄ deē dḭḭ̄də́ loo rāā kəla ní tə́ aĺ ō.
14Nin̄ mānə̄n̄ dan yá̰á̰ kə́ tɔ̄ɔ̄ kɔ̄ɔ́ gə̄ tə́ láẃ ngá̰ý kum kə̄ rɔ̄ḿ tə́.
Nin̄ mbə́rēn̄ naā gíŕ gájə́ yá̰á̰ kə́ tétə̄ gə̄ tə́.
15Yá̰á̰ kə́ to ndíl ka̰ȳ reē kə̄ dɔḿ tə́ kə ngangāá ngá̰ý.
Ni-ɔr̄ sōl̄ yá̰a̰ aĺ yāḿ kemḿ tə́ kɔ̄ɔ́
gidə kógə̄ḿ tītə̄ nél beé.
Gír ndi majə yāḿ gān̄g tītə̄ kil̄ man̄ kə́ tḭ̄ḭ̄ kɔ̄ɔ́ beé.
16Ngɔlaā kajə yāḿ teē rɔ̄ḿ tə́ tītə̄ man̄ kə́ a də̄yā̰ kɔ̄ɔ́ beé.
Ndɔ̄ kə́ majaĺ gə̄ əhɔmə̄n̄ kə̄ rɔ̄də́ tə́ adə̄ ngan̄g.
17Ndɔ̄ɔ́ anī rɔ̄ḿ tōrə̄m̄ bátə́ kem kə̄ngāḿ tə́ ō,
tōrə̄m̄ kanjə̄ kəya̰m̄ kadə̄ m̄-taā koō ō.
18Kūbə̄ kə́ rɔ̄ḿ tə́ nujə sɔɔ̄ń yá̰a̰ rāān kə́ kə tɔ́gɔ́.
Ni ɓirə̄m̄ tītə̄ kɔ́ɔ kūbə̄ ngāl̄ yāḿ kə́ gír madə̄ gə̄ tə́ beē.
19Ni-ənīm̄ kum bɔr tə́.
m̄-tél m̄-to tītə̄ bumbə́ru ō, bū ō.
20M-ə́ga kɔŕ ngá̰ý kə̄ dɔí tə́, banī ḭ̄ Nə́ɓā yāḿ ī-ndigəm̄ alé.
m̄-ra noí tə́, banī usiī dɔḿ tə́ alé.
21Ḭ̄ ī-tél de kə́ kumən o̰o̰n aĺ tām̄ yāḿ tə́ ō.
ḭ̄ ī-rāām̄ yá̰á̰ kə́ tōr̄ kə tɔ́gí ō.
22Ḭ̄ únəm̄ dɔ sə́ndá néĺ tə́ āw̄ seḿ kɔ̄ɔ́ kə ngɔ̄də̄ boó ō,
nél man̄ kə́ əla kə tɔ́gɔ́ yéȳm̄ kə̄ loo gə̄ tə́ ō.
23Mā m̄-ger̄ majə kadə̄ ī-tél ā āw̄ seḿ i kə̄ ɓē yā yo tə́.
I loo kənge naā yā de gə̄ malang ń ndin̄ kə kumdə́ ní.
24Ba dan ń ni sə́ra jīn anī, ɓāŕ yá̰a̰ a rāā yá̰á̰ kógə̄ḿ alé,
ká ré yá̰á̰ kə́ tōr̄ rāādə́ adə̄ əgan̄ kɔŕ gə̄gē anī, ɓāŕ yá̰a̰ a rāā yá̰á̰ kógə̄ḿ alé.
25Tá ngé gə̄ ń yá̰a̰ tōr̄ rɔ̄də́ ngá̰ý ní, m̄-nōō sedə́ aĺ a?
Dan ń m-á̰a̰ nge ndoō ní, m̄-sōl̄ m-ādə̄n aĺ a?
26M-ə̄ndā kemḿ dɔ ndi majə tə́ anī, i yá̰á̰ kə́ tōr̄ n teē kə̄ ta róbə́ tə́ ní.
m̄-ndi m-ā m̄-ngóō i loo kə́ unjə̄ kow, anī i loo kə́ risə til n reē ugə̄.
27Kemḿ négə́m̄ wut wut kanjə̄ dəba. Ndɔ̄ kə́ majaĺ gə̄ teēn̄ dɔḿ tə́.
28m̄-njə̄rā kə kəhɔ ndoó. Mbang gətóo tām̄ yāḿ tə́!
Dan kósə de gə̄ tə́ gə̄gē, m̄-ɓāŕ yá̰a̰ kadə̄ deē rāā seḿ.
29m̄-tél i madə̄ tal̄ gə̄ ō, ngōkó̰o̰ burum ō, sɔɔ̄ń nōō yāḿ kə́ to ɓōĺ.
30Ndārə́ḿ téĺ kə́ ndul ō ɔr̄ ō.
Mo̰y gajə əla hor dɔḿ tə́ adə̄ kə̄ngāḿ o̰o̰ hor bir bir.
31M-úgə kənde m̄-dānəń i gō nōō rɔ̄ ō,
m̄-kɔ̄ŕ nal m̄-dānəń i gō ndū ngé nōō gə̄ ō.
Currently Selected:
JOB 30: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.