JOB 20
20
Sopar əda na yá̰á̰ kə́ tōr̄ na rāā nge kem ndul
1Loo ń noō tə́ Sopar kə́ Naama ɔr̄ najə̄ əda na:
2Yá̰á̰ gə̄ ń kem rāā yāḿ tél reē seḿ dɔ tə́ ō,
loo tə́gā ń m̄-tə́gā taḿ sétə́ ō ní n toó:
3M-ōō yá̰á̰ ndóō kógə̄ḿ kə́ to tájə̄ ndū ngá̰ý tām̄ yāḿ tə́,
banī dɔḿ ədam̄ najə̄ kə́ yā kadə̄ m̄-tūr̄ m-ə́da dɔ tə́.
4-5Nəkɔ́ ń jóo toó,
əla gír ndɔ̄ ń əndānəń deē ndul dɔ nang tə́ ní,
tetə rɔ̄ɔ̄ yā ngé kem ndul gə̄ aw̄ sa̰y aĺ ní ī-ger̄ aĺ a?
Rɔ̄nel̄ yā nge kídə̄ yá̰a̰ yā Nə́ɓā i rɔ̄nel̄ kə́ dan i ngá̰ý alé.
6Ká ré ni ngāl̄ bátə́ ugə̄ń dɔ rā̰ tə́ gə̄gē,
ká ré dɔn ɔdəń no rā̰ gə̄gē anī,
7ni a gətóo kɔ̄ɔ́ i kə́ njɔ́ḿ gə̄ tə́, tītə̄ ń yedə̄n gətóoń ní beē.
Ngé gə̄ ń kété a̰a̰nən̄ ní, a ədan̄ na ké ni i rá wa.
8Ni a aw̄ tītə̄ loo kaw̄ nī kɔ̄ɔ́ beé. I náā n a əngen dan ń tə̄ɓānən̄ adə̄ ni a̰ȳ aw̄ kɔ̄ɔ́
tītə̄ yá̰á̰ kə́ deē a̰ā̰ kem nī tə́ dan ndɔ̄ɔ́ beé ní.
9Deē ń a̰a̰n kété ní, a a̰a̰n to̰ alé. Loo ń ni-ndi tū tə́ ní gə̄gē a, loo ní a a̰a̰n to̰ alé.
10I gáŕ kadə̄ ngánən gə̄ əgān̄ tətō ngé ndoō gə̄ ō,
nəkɔ́ a tél kə yá̰á̰ ń ənge kə ta róbə́ kə́ gōtə́ aĺ ní yā kadə̄ gogə́ kə jīneé ō.
11Kem kə̄ngān ngan̄g tītə̄ yā de kə́ balsáa beé ɓá tā,
ba ni a oy i kə balsáaneé.
12Yá̰á̰ kə́ majaĺ nel̄ tan ngá̰ý adə̄ ni ɓɔ̄ɔ̄n i gír kəlā ndo̰n tə́.
13Nel̄ tan ngá̰ý, adə̄ a əsan i jəke jəke kanjə̄ kəya̰n dɔɔ́ ō,
ni ngɔ̄mən kem tan tə́ ɓáý ō.
14Yá̰á̰ ń ni-əsa ní ndum kemən tə́ ō,
tél kong lī kemən tə́ ō.
15I gáŕ kadə̄ tōmbə̄ yá̰a̰ kənge gə̄ ń ni táā jī de gə̄ tə́ ní,
yá̰á̰ ń ur kemən tə́ ní, Nə́ɓā rāā adə̄ tōmbə̄ kɔ̄ɔ́.
16Yá̰á̰ ń ni njíbə̄ manə̄n ní, i kong lī.
Ndo̰ lī kakə́m a tɔ̄lən.
17Yibə̄ tejə kə́ ngá̰ý tītə̄ bā ō,
yibə̄ mba kə́ ngá̰ý tītə̄ man̄ dɔ mbal̄ ō ní, kum de kə́ majaĺ a a̰a̰ to̰ alé.
18Ni-tél kə yá̰a̰ tətōneé adə̄ gogə́, tɔdɔ̄ ni asə kur alé.
Yá̰á̰ ní a rāā majə seneé alé.
Ni a rāā rɔ̄nel̄ yá̰á̰ ń ni-ənge tū gātə̄ yān tə́ ní alé.
19Tɔdɔ̄ ni-əsa tətō ngé tɔ́gə gətóo gə̄ ō, əya̰də́ kɔ̄ɔ́ ō,
taā kújə yādə́ ō, ni-rāā kújə́ kógə̄ḿ aĺ ō.
20Dan ń yá̰a̰ asə tan aĺ ní, yá̰á̰ kógə̄ḿ kə́ tū yá̰a̰ kənge yān gə̄ tə́
kə́ ni a asə ngɔ̄m̄ a gətóo.
21Kəsa wa yān rāā adə̄ yá̰a̰ mān̄ tan alé,
adə̄ ni a ndi majə dan i ngá̰ý alé.
22Ni-ndi i dan yá̰a̰ kənge kə́ ngá̰ý tə́, banī wur kɔl əsō dɔn tə́,
ngé rɔ̄ tō ndoō gə̄ malang a tetən̄ jīdə́ dɔn tə́.
23Dan ń ndi a kán̄ yá̰a̰ kə̄ kemən tə́ kadə̄ rosə kemən anī,
Nə́ɓā a bə̄gā wōn̄g yān dɔn tə́.
Wōn̄g ní a edə kə́ man̄ tə́ dɔn tə́ kum gotə yá̰a̰ kəsa.
24Ré ni a̰ȳ ta yá̰a̰ rɔ̄ɔ̄ kə́ rāā kə gindīí tə́ anī,
ga̰ gərā kə́ rāā kə gində̄ nə̄ngá kasaá a ɔsən kadə̄ teē dām̄ kə́rēý tə́.
25Ni mbīŕ kum gərā ɔr̄, kum gərā ní teē rɔ̄n tə́.
Dan nəkɔ́ ń kum gərā teē wurən tə́ kɔ̄ɔ́ mbatə anī,
ɓōĺ kə́ ngá̰ý udə kemən tə́.
26Loo malang ń ni ɓɔ̄ɔ̄ rɔ̄n tū tə́ ní, loo kə́ risə til nding udə tū tə́.
Hor kógə̄ḿ kə́ deē ɔsə gír alé o̰o̰n.
Yá̰á̰ kə́ to kum kaȳ aĺ teē dɔ gotə yá̰á̰ ń na̰y kem kújə tandā yān tə́ ní!
27Dɔ rā̰ ɔjə yá̰á̰ kə́ gōtə́ aĺ ń ni-rāā ní kə̄ ndágá wáńg ō,
dɔ nang teē kə gírneé dɔɔ́ ō!
28Yá̰a̰ kənge kə́ kem kújə yān tə́ a̰ȳ aw̄ kɔ̄ɔ́
ndɔ̄ wōn̄g yā Nə́ɓā tə́ tītə̄ man̄ kə́ nūgə́ beé.
29Yá̰á̰ ń Nə́ɓā ngɔ̄m̄ tām̄ yā nge kem ndul tə́ ní n noó,
yá̰a̰ ndəbā ń Nə́ɓā adə̄n ní n noó.
Currently Selected:
JOB 20: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.