JOB 21
21
Najə̄ ń Job tūr̄ əda kə tɔ́gɔ́ ní, əda na ndi majə yā ngé kem ndul gə̄ na i yá̰á̰ kə́ to rɔ̄kum
1Anī Job ɔr̄ najə̄ əda na:
2Ōōī a, ōōī najə̄ kɔrə̄ḿ, i tītə̄ ń noō n ā ī-sɔlīneé kemḿ ní.
3Ī-tə́gāī tasí dɔḿ tə́, anī m-ā m-ɔ̄r̄ najə̄.
Ba ré m-ɔ̄r̄ najə̄ oy anī, ásiī mbóo seḿ.
4Deē ń m-ā m̄-nōō rɔ̄ḿ dɔn tə́ ní i deē ndul a?
Ní loo kadə̄ m̄-tə́gā taḿ i ba̰ý?
5Ī-tūrī rɔ̄sí kə̄ rɔ̄ḿ tə́ anī yá̰a̰ a ɔr kumsí, yā kadə̄
ā ə̄ndāī jīsí tasí tə́.
6Dan ń əga kemḿ mə̄kɔ́ dɔ yá̰a̰ malang ń rāām̄ tə́ ní,
ɓōĺ rāām̄ ngá̰ý ō, dā̰ḿ ndām̄ ngaa ngaan ō.
7Ngé kem ndul gə̄ ndin̄ kə kumdə́ ō, tɔgən̄ ɓə́ga ō,
tɔ́gə́də́ aw̄ kum kə̄ kété kété ō, i najə̄ rí tə́?
8Ngáńdə́ gə̄ ndin̄ ngan̄g kadədə́ tə́ ō,
Nin̄ a̰a̰n̄ ngán kaadə́ gə̄ ō.
9Lɔm i kem kújə yādə́ tə́, adə̄ gerə̄n̄ yá̰á̰ kə́ to ɓōĺ alé.
Ndéy yā Nə́ɓā ɔdə rɔ̄də́ nja kógə̄ḿ alé.
10Man̄g kə́ bəra yādə́ tál̄ kə́ kó̰o̰ anī, a ndān̄ i ngōn̄ ō,
kó̰o̰ man̄g yādə́ ɔr̄ ngōn̄ alé, ba ojə i ngōn̄ tá ō.
11Nin̄ əya̰n̄ ngáńdə́ gə̄ adə̄ rāān̄ walya tītə̄ ɓūtə̄ yá̰a̰ kul̄ gə̄ beé ō,
əya̰n̄ ngán kaadə́ gə̄ adə̄ kógə̄n̄ naā ō.
12Nin̄ dānə̄n̄ gō pā yādə́ gə̄ i kə kɔdɔɔ́ ō, kə kəndeé ō, kɔ̄rə́n̄ nal rāān̄neé rɔ̄nel̄ ō.
13Nin̄ ndin̄ majə bátə́ kadə̄ ndɔ̄də́ təgāń.
Kum i ngá̰ý aĺ anī, nin̄ i ɓádá kɔ̄ɔ́.
14Tá kété ní, nin̄ ədan̄ Nə́ɓā na kə ɔr̄ rɔ̄n rɔ̄də́ tə́ kɔ̄ɔ́,
na nel̄də́ ger̄ róbə yān gə̄ alé.
15Nə́ɓā kə́ tɔ́gən i ngá̰ý ní, ké asə kadə̄ deē rāā ɓəlo yān wa.
Ké deē a ənge i rí gír rāān ɓɔ́ tə́ wa.
16De gə̄ ngeé ń noō ní ndi majə yādə́ i kem jīdə́ nin̄ kɔ́ gə̄ tə́ aĺ a?
Loo ń noō tə́ ní najə̄ ń na:
Ādə̄ yá̰á̰ kə́ rāā loo mundə̄ tə́ yā ngé tɔ̄l̄ de gə̄ i rɔ̄ḿ tə́ ngɔr alé ní, kum kədan na i rí?
17Hor lámba yā ngé tɔ̄l̄ de gə̄ a oy i dɔɔ́ dɔɔ́ a?
Yá̰á̰ kə́ nujə sák sák a teē dɔdə́ tə́ i dɔɔ́ dɔɔ́ a?
Nə́ɓā a rāā wōn̄g sedə́ i dɔɔ́ dɔɔ́ a?
18Ɓá ta ba de gə̄ ədan̄ na:
Ādə̄ nin̄ ton̄ tītə̄ mu kə́ nél un aw̄ń beé ō,
təsá kə́ nél man̄ ɔy aw̄ń beé ō.
19De gə̄ a ədan̄ na Nə́ɓā na ngɔ̄m̄ ndéy yā bɔbə̄ ngōn̄ tām̄ yā ngōn̄ tə́ a?
Ādə̄ yá̰á̰ kə́ tōr̄
rāā bɔbə̄ ngōn̄ nəkɔ́ tá bɔbə̄ ngōn̄ ger̄!
20Ādə̄ ni-a̰a̰ nujə ń ni a nujə sák sák ní kə kumneé ō,
ādə̄ tan nāā wōn̄g yā Nə́ɓā kə́ tɔ́gən i ngá̰ý ō!
21Tɔdɔ̄, dan ń gír ndɔ̄ yān gān̄g kɔ̄ɔ́ ní,
yá̰á̰ ń a rāā ngánən gə̄ gotən tə́ ní usən alé.
22Nə́ɓā ń i nge rāā sarya mósə de kə́ a̰ȳ nang tə́ ní,
i ni n deē a ndóōn yá̰a̰ gə̄ ń noō ní a?
23De kə́rēý kə́ tɔ́gən i ngá̰ý ɓáý ō,
ndi majə ō, ndi kə lɔmɔɔ́ ō, gān̄g oy.
24Yibə̄n rāā adə̄ ngēl̄ kadən gə̄ ɔȳn̄ ō,
kem kə̄ngān ngan̄g ō.
25De kə́ madə̄ ndi kə wur kataá ō,
tan nāā yá̰á̰ ń i ndi majə ní aĺ ō, ba əsō oy.
26Nin̄ malang ton̄ gíŕ nángāá ō, kəde gə̄ taān̄ rɔ̄də́ malang ō.
27Mā m̄-ger̄ gír̄ kə́ kemsí tə́ majə ō,
yá̰a̰ gə̄ ń ā ī-gírī dɔḿ tə́ ní, m̄-ger̄ ō.
28Tɔdɔ̄ sḭḭ̄ ə́daī na ké kújə yā deē ń kumən o̰o̰n aĺ ní ké i rá wa,
ké i rí n rāā kújə tandā yā ngé gān̄g róbə gə̄ ní wa.
29Ngé njə̄rā mbā gə̄ ní, ī-dəjeīdə́ najə̄ aĺ a?
Ī-gerī kum najə̄ kɔr̄də́ aĺ a?
30Ndɔ̄ ń yá̰á̰ kə́ majaĺ teēń dɔ de gə̄ tə́ ní, ngɔ̄mə̄n̄ nge kem ndul
adə̄ teē kum tə́.
Ndɔ̄ wōn̄g tə́ anī, ɓɔ̄ɔ̄nən̄ adə̄ yá̰a̰ ɔdə rɔ̄n alé.
31I náā n a ɔjən hálən kə́ majaĺ ta kumən tə́ ní?
Yá̰á̰ kə́ majaĺ ń ni-rāā ní, i náā n a əgān kə̄rā ní?
32Ni-oy anī, de gə̄ dānə̄nən̄ ɓádá ō,
ngɔ̄mə̄n̄ dɔ ɓádən ō.
33Nán̄g ta kɔsə kə́ kum wól loo tə́ hɔɔ́lɔ̄ tām̄ yān tə́ ō,
de kə́ kem ɓēé gə̄ malang dānə̄nən̄ ɓádá ō.
Deē asə tə́da kutə ngé reē yon tə́ gə̄ alé.
34I beé ní, ī-nāāī sɔl̄ kemḿ kə najə̄ kə́ kanjə̄ kumən gēé i tām̄ rí tə́?
Yá̰á̰ ń teē tū najə̄ gə̄ ń sḭḭ̄ ī-tūr̄ ə́daī tə́ ní, i yá̰á̰ kə́ gōtə́ alé.
Currently Selected:
JOB 21: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.