JOB 15
15
Elipaj əda na: Nge kem ndul a teē kum tə́ alé
1Loo ń noō tə́ Elipaj kə́ Teman ɔr̄ najə̄, ni-əda Job na:
2De kə́ nge kum kedə̄ kə́ tītīí ḭ̄ ń toō a əsa i nél n a ndiń kə kumneé ní a?
Najə̄ tūrə̄n i najə̄ kə́ əhɔ naā aĺ tītə̄ ń noō a?
3Najə̄ gə̄ ń ɔ́ýdə́ kə̄ naā tə́ ní, kumdə́ gətóo.
Yá̰a̰ malang ń ə́dá ní, nge kə́ to kun rāań yá̰a̰ gətóo.
4Ḭ̄ āw̄ bátə́ ī-nujə kə ɓōĺ ndíĺ yá̰a̰ yā Nə́ɓāá kɔ̄ɔ́ ō,
ī-nujə kə gír̄ yá̰á̰ kə́ dɔ yá̰á̰ tə́ ta kum Nə́ɓā tə́ kɔ̄ɔ́ ō.
5Yá̰á̰ kə́ gōtə́ aĺ gə̄ ń ī-rāā ní, əndā najə̄ taí tə́ ō,
ḭ̄ ún i najə̄ kɔr̄ ngé kɔr̄ najə̄ kə ngamaá gə̄ ō.
6I najə̄ kə́ taí īkɔ́ tə́ n gān̄g sarya dɔí tə́ ní, ba i mā alé.
I najə̄ kɔrīí n əndā najə̄ dɔí tə́ ní.
7Ḭ̄ i Adam a? I ḭ̄ n ojīnī kété ní a?
Ojīnī kété no ngán mbal̄ gə̄ tə́ a?
8Koō naā yā Nə́ɓā ní ḭ̄ i kum tə́,
adə̄ ɔ́y kum kedə̄ kə́ tū tə́ tām̄ yāí īkɔ́ tə́ ngóý a?
9Yá̰á̰ kə́ ḭ̄ ī-ger̄ kə́ jḭḭ jə-ger̄ aĺ i rí?
Yá̰á̰ kə́ ḭ̄ ī-ger̄ kum kə́ i yá̰á̰ kə́ mbā tām̄ yājí tə́ i rí?
10Á̰a̰ā̰, kum kɔɔ̄ kógə̄ḿ, adə̄ i deē kógə̄ḿ kə́ tɔgə ɓə́ga i danjí tə́ ō,
tá madə̄n ní ɓālə̄n i ngá̰ý tɔȳ yā bɔbí ō.
11Najə̄ gə̄ ń Nə́ɓā ɔr̄ sɔlə̄ń kemií ō,
ngé gə̄ ń j-ɔr̄ seí kə looneé ō ní, i yá̰a̰ aĺ ta kumií tə́ a?
12-13Ngarā̰ kemií ndɔ́rī aw̄ seí sa̰y i najə̄ rí tə́?
Dan ń ī-tūr̄ ta wur katə̄ yāí kə̄ dɔ Nə́ɓā tə́ ō,
ɔ̄r̄ najə̄ ngá̰ý ō ní, ī-mbel á̰á̰jí kə kə̄lá kumií i najə̄ rí tə́?
14Deē ndul i rí kə́ ngá̰ý á rāā tītə̄ kə́ ni i de kə́ unjə̄ njáý njáý ní?
Deē ń i dəyá̰ n ojən ní i rí á əda na ni na i de kə́ gōtə́ ní?
15De kə́ táĺ gə̄ yā Nə́ɓā gə̄gē Nə́ɓā ənī kemən adə̄də́ aĺ ō,
dɔ rā̰ i kə́ unjə̄ njáý njáý ta kumən tə́ aĺ ō.
16Anī deē ndul ń i yá̰á̰ kə́ to yēńg ō, nujə kɔ̄ɔ́ ō,
rāā yá̰á̰ kə́ gōtə́ aĺ láẃ ngá̰ý tītə̄ loo ka̰ȳ man̄ beé ō ní, yān i kə́ to ráá aĺ a?
17Ōō najə̄ yāḿ, m-ā m-ɔ́jiī yá̰á̰ kógə̄ḿ kadə̄ ī-ger̄,
yá̰á̰ ń m-á̰a̰ majən ní, m-ā m-ɔ́jə gotə.
18Yá̰á̰ ń ngé kum kedə̄ gə̄ əngen̄ jī kaadə́ gə̄ tə́ ní,
ɔjən̄ gotə kə ta njaá kanjə̄ mundə̄ yá̰á̰ kógə̄ḿ.
19I nin̄ ngóy n Nə́ɓā adə̄də́ dɔ nang kə́ yādə́ tə́ ní.
Dan ngeé ń noō tə́ ní tə̄rā kógə̄ḿ kə́ udə dandə́ tə́ gətóo.
20Á̰a̰ā̰, nge kem ndul ndi i kə sōlōó kə dɔ ndɔ̄ gə̄ ō,
ɓāl̄ gə̄ ń adə̄n̄ de kə́ kumən o̰o̰n aĺ ní, ká i kóndóńg gə̄gē anī,
21ndū yá̰á̰ kə́ to ɓōĺ gə̄ a ɓārə̄n̄ ta mbīn tə́.
Ni-ndi kem lɔm kə́ ngá̰ý tə́ ɓá tā, ba nge nujə loo aw̄ yā kənīn rɔ̄ɔ̄ aláa?
22Ni-taā kem kadə̄ ré na n-udə kum tíl tə́ anī, n-a n-teē to̰ aĺ ō,
kaskar to a ngóōn ō.
23Əndānən̄ i kə rī kadə̄ ni i dā̰ yā māl̄ gə̄.
Ni ger̄ kadə̄ yá̰á̰ ń to a ngóō tan ní, i ndɔ̄ kə́ risə til nding.
24Wur kɔl ō, sōl̄ ō, a əlan̄ ɓōĺ kə́ ngá̰ý kemən tə́.
Nin̄ bə̄gān̄ naā dɔn tə́ tītə̄ mban̄g kógə̄ḿ kə́ əndā dɔ rɔ̄n danaá yā kənī rɔ̄ɔ̄ kə ngangá beē.
25I tɔdɔ̄ ni un jīn dɔɔ́ yā rɔ̄ɔń Nə́ɓā ō,
ni tɔ́sə gātə̄ Nə́ɓā kə́ tɔ́gən i ngá̰ý ō.
26Ni əga dɔn nang tə́ ba əla ngɔ̄də̄ dɔ Nə́ɓā tə́,
der yān kə́ nder̄ utə̄ gidə rɔ̄n.
27Yibə̄n rāā adə̄ ta kumən ndə́lē ō,
mbólən rāān adə̄ bo lútə́ lútə́ ō.
28Kété ní ni-ndi i kem ɓē gə̄ kə́ nujən̄neé sák sák kɔ̄ɔ́ tə́ ō,
i kem kújə gə̄ kə́ deē ndi kemeé to̰ aĺ tə́ ō,
tɔdɔ̄ i kújə gə̄ kə́ a rāān̄ i loo tə́sō kɔ̄ɔ́ gə̄.
29Banī ni a asə tél de kə́ nge kənge yá̰á̰ ngá̰ý aĺ bátə́, aláa yá̰a̰ kənge yān a to alé.
Ni a tél de kə́ bo kem ɓēé alé.
30Ni a teē kɔ̄ɔ́ kum til tə́ alé.
Ni i kāgə̄ kə́ hor o̰o̰ ta jīn gə̄ kɔ̄ɔ́!
Koō kə́ ta Nə́ɓā tə́ a unən yā kaw̄ seneé sa̰y kɔ̄ɔ́.
31Ādə̄ ni-əndā kemən dɔ gól̄ loo tə́ alé, na sōgə́ ndúm̄ ta róbə.
Tɔdɔ̄ gól̄ loo a téĺ yá̰a̰ kəndā nja yān.
32Yá̰á̰ ń noō a rāā yá̰á̰ kété pá tá kadə̄ ni a oy ɓáý ō,
ta jīn gə̄ a sitən̄ to̰ aĺ ō.
33Kanə̄n kə́ ɓogə́ro gə̄ a tə́sōn̄ kɔ̄ɔ́ tītə̄ kan̄ kāgə̄ nduú beē ō,
hútə̄n kə́ ndɔ̄bə̄ gə̄ a urə̄n̄ kɔ̄ɔ́ tītə̄ hútə̄ kāgə̄ olibə beé ō.
34A̰á̰ā̰, gír kojə yā nge kem ndul a ojə ngōn̄ aĺ ō,
hor kógə̄ḿ a o̰o̰ kújə tandā gə̄ yā de kə́ nge kəndā yá̰a̰ jī de gə̄ tə́ nujəń najə̄ ō.
35Deē ń ndān̄ i ngōn̄ yá̰á̰ kə́ majaĺ ní, a ojə i yá̰á̰ kə́ to kum kaȳ aĺ ō,
yá̰á̰ ń ni núm̄ kemən tə́ ní, a gól̄ i ngarā̰ kemən nəkɔ́ ō.
Currently Selected:
JOB 15: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.