JOB 14
14
Job tūr̄ əda kə tɔ́gɔ́ na i yá̰á̰ kə́ to wur tōr̄ n rāā deē ndul ní
1Deē ndul ń dəyá̰ ojən ní, ndɔ̄n gə̄ i ngá̰ý aĺ ō, a̰a̰ tápə̄ ngá̰ý ō.
2Ni to tītə̄ hútə̄ yá̰á̰ kə́ ndɔ̄w̄ ba gōtə́ anī, ndəlē kɔ̄ɔ́ beē ō,
a̰ȳ tītə̄ ndíl kāgə̄ beé ō, ndi dan i ngá̰ý aĺ ō.
3Tá i ni n ə̄ndā kumií dɔn tə́ ní, i mā n āw̄ seḿ kə̄ loo sarya tə́ ní!
4I náā n asə rāā kadə̄ yá̰á̰ kə́ unjə̄ njáý njáý teē tū yá̰á̰ kə́ majaĺ tákə̄ tə́ ní?
De kə́ asə rāā nge ń noō gətóo.
5Dan ń ndɔ̄n kə́ kadə̄ ndiń kə kumneé i kə́ kɔjə kɔ̄ɔ́ ɓá ní,
dan ń ḭ̄ ɔ́jə kutə nāā gə̄ kə́ tām̄ yān tə́ kɔ̄ɔ́ ɓá ō,
ə́ja nja loo kə́ kadə̄ ni mān̄ dɔ tə́ aĺ ɓá ō ní,
6ī-tūr̄ kumií á̰a̰ loo kə̄ loo kə́ rang tə́ ādə̄ ni-taā koō sḛ́ý ō,
rāā rɔ̄nel̄ ndɔ̄ kɔr̄ koō yān tə́ ō, tītə̄ yā nge rāā kəla gír naraá beē.
7Tɔdɔ̄ kāgə̄ əndā kemən dɔ yá̰á̰ kógə̄ḿ tə́ ɓáý.
Ré deē tə́gān kɔ̄ɔ́ anī ni-tél sitə gogə́ ō, asən tɔ̄ɔ̄ ta jīn gə̄ aĺ ō.
8Ká ngəran tɔgəń i ɓə́gá gíŕ nángāá,
aké bə̄dēn oyń i kɔ̄ɔ́ kum bumbə́rú tə́ gə̄gē,
9ré usə man̄ otən anī ni sitə ō, tɔ̄ɔ̄ ta jīn gə̄ tītə̄ yā ngōn̄ kāgə̄ kə́ dūú ō.
10Banī go̰ rɔ̄ɔ̄ a oy ō, a sitə̄ ō.
Dan ń koō deē teē kɔ̄ɔ́ ní ni i rá?
11Man̄ bā bo iī ō, man̄ bā gə̄ iīn̄ ō, loo tutə káḿ káḿ kem kār̄də́ gə̄ tə́ ō.
12De gə̄ ń oyn̄ ní a ḭḭn̄ dɔɔ́ alé.
Nin̄ a ndólə̄n̄ aĺ ō, a ḭḭn̄ dɔ ɓīī tə́ aĺ ō, bátə́ kadə̄ dɔ rā̰ gətóoń kɔ̄ɔ́.
13Nə́ngētə́ ī-ɓɔ̄ɔ̄m̄ i ɓádá anī, loo ń de kə́ koy gə̄ ton̄ tū tə́ ní anī,
nə́ngētə́ ī-ngɔ̄mə̄n̄ i bátə́ kadə̄ wōn̄g yāí mānəń kɔ̄ɔ́ anī,
nə́ngētə́ ɔ́jə i ndɔ̄ gə̄ kə́ kadə̄ gíŕdə́ gān̄g a, a əga kemií dɔḿ tə́ anī,
14banī deē ń oy ní a tél yā ndi kə kumneé ɓáý a?
Ré i beé anī, dan ń m-ā m̄-rāāń kəla ngámbá ní,
m-ā m̄-ngóō bátə́ kadə̄ nge mān̄ gírə́ḿ reē unəń ta kəla kə̄ kété.
15Loo ń noō tə́ ré ī-ɓārə́m̄ anī, m-ā m̄-ndigiī.
Ngur ka̰a̰ yá̰á̰ ń ī-rāā kə jīí ní rāāī ngá̰ý.
16Ba ngɔlaā ɓáa ḭ̄ ī-tə́da njaḿ gə̄ ō,
ə̄ndā kumií gíŕ yá̰a̰ rāāḿ kə́ gōtə́ aĺ gə̄ tə́ ō.
17Ḭ̄ ī-tūr̄ mbātə́ najə̄ yāḿ gə̄ kem ngɔngɔɔ́ ba ūtə̄ ta ō,
yá̰á̰ kə́ gōtə́ aĺ ń m̄-rāā ní, ī-utə̄ gidə kə hō̰rō̰ó̰ kɔ̄ɔ́.
18Ɓá tā ba mbal̄ bo əsō tétə̄ rárák ō,
mbal̄ kə́ ngan̄g ndɔ́tə̄ loo yān tə́ kɔ̄ɔ́ ba aw̄ loo kə́ rang tə́ ō,
19man̄ əsa mbal̄ gə̄ ō, man̄ kə́ nūgə́ ndēr̄ nang kə́ a ur ndujə̄ ō.
Kəndā kem dɔ tə́ yā deē ndul ní, ḭ̄ ī-nujəń sák sák kɔ̄ɔ́ ō.
20Ḭ̄ ə̄nīn nang tə́ ō, ni-aw̄ i kaw̄ kə́ njɔ́ḿ gə̄ tə́ ō.
Ḭ̄ ī-tūr̄ ta kumən kɔ̄ɔ́, adə̄ deē a̰a̰n a gerə̄n to̰ aĺ ō, ī-tə̄ɓān kɔ̄ɔ́ ō.
21Rɔȳn̄ i ngánən gə̄ a ger̄ aĺ ō, əlan̄ i rɔ̄sɔl̄ dɔdə́ tə́ a usən aĺ ō.
22I dā̰ rɔ̄n nəkɔ́ ngóy kə kérneé n a̰a̰ tápə̄ ní,
i wurən nəkɔ́ ngóy kə kérneé n tōrə̄n ní.
Currently Selected:
JOB 14: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.