PĀ GƏ̄ 143
143
Kɔ́ɔ̄ɓē, ī-lōō rāā sarya seḿ
1Pā yā Dabid.
Kɔ́ɔ̄ɓē, ōō ndɔ̄ȳ yāḿ,
ī-nēl̄ mbīí ōoń ndūḿ ń m̄-rāāīneé ɓɔ́ ní.
Ḭ̄ i de kə́ nge ra dɔ ndūí tə́ ō, de kə́ gōtə́ ō ní ī-tūrə̄m̄ najə̄ tə́!
2Mā i nge kəla yāí adə̄ ī-lōō rāā sarya seḿ,
tɔdɔ̄ de kə́ súmūú ta kumií tə́ gətóo.
3Madə̄ ba̰ā̰ḿ rāā kumḿ ndoō tə́,
ənīm̄ nang tə́ ba tə́ɓām̄ kə njaneé,
rāā adə̄ m̄-ndi kum loo kə́ risə til nding tə́
tītə̄ de gə̄ ń oyn̄ jōó kɔ̄ɔ́ ní beē.
4Tɔ́gə́ḿ teē rɔ̄ḿ tə́ kɔ̄ɔ́, kemḿ nelə̄m̄ alé.
5Əga kemḿ dɔ yá̰á̰ kə́ mān̄ kɔ̄ɔ́ tə́,
m̄-tél m̄-gír̄ gō yá̰a̰ malang ń ī-rāā tə́ ní,
yá̰á̰ ń ī-rāā kə jīí ní, m̄-gír̄ yá̰á̰ ngá̰ý dɔ tə́.
6M-ə́la jīḿ kə̄ rɔ̄í tə́ m̄-rāāīneé ɓɔ̄ɔ̄.
Mā m̄-rā noí tə́ tītə̄ dɔ nang kə́ tutə kákə́rá kákə́rá beē.
7Kɔ́ɔ̄ɓē, ī-tūrə̄m̄ najə̄ tə́ láẃ na tɔ́gə́ḿ təgā kɔ̄ɔ́.
Ī-lōō tūr̄ gidií taḿ tə́!
Na sōgə́ jīḿ ɓoo naā kə ngé gə̄ ń a aw̄n̄ kə̄ ɓádá ní.
8Ədam̄ najə̄ kə́ dɔ kem majə yāí tə́ dəloí ɓatə,
tɔdɔ̄ m-ə̄ndā kemḿ dɔí tə́.
Ɔ́jəm̄ róbə́ ń kadə̄ m-úń ní, tɔdɔ̄ m̄-tūr̄ rɔ̄ḿ kə̄ rɔ̄í tə́.
9Kɔ́ɔ̄ɓē, ī-gān̄g dɔḿ jī madə̄ ba̰ā̰ḿ gə̄ tə́.
m̄-rāāī i loo ɓɔ̄ɔ̄ rɔ̄ yāḿ tə́.
10Ī-ndóōm̄ loo rāā yá̰á̰ ń kemií ndigə ní,
tɔdɔ̄ ḭ̄ i Nə́ɓā yāḿ.
Ndílí i Ndíĺ kə́ majə,
ādə̄ njə̄rā seḿ dɔ róbə́ kə́ gidə asə naā majə tə́!
11Ā ī-rāām̄ kadə̄ m̄-ndi kə kumḿ, tɔdɔ̄ ḭ̄ i Kɔ́ɔ̄ɓē.
Ā ī-teē seḿ kɔ̄ɔ́ dan wur kɔl kə́ əsō dɔḿ tə́, kə ta kūl̄ háĺ kə́ gōtə́ yāí.
12Ā ī-rāā kadə̄ madə̄ ba̰ā̰ḿ gə̄ gətóon̄ kɔ̄ɔ́ malang sɔɔ̄ń kem majə yāí ō,
ā ī-rāā kadə̄ madə̄ kɔ̄lə̄ḿ gə̄ oyn̄ malang kɔ̄ɔ́ ō,
tɔdɔ̄ mā i nge kəla yāí.
Currently Selected:
PĀ GƏ̄ 143: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.