PĀ GƏ̄ 116
116
Ndɔ̄ȳ yā de kə́ teē ta yo tə́
1m̄-táŕ Kɔ́ɔ̄ɓē,
tām̄ ni oō ndūḿ loo rāān ɓɔ́ tə́.
2Ni nēl̄ mbīn kōōḿ tə́ ō,
kə dɔ ndɔ̄ gə̄ malang ń m-ā m̄-ndiń kə kumḿ ní,
m-ā m̄-ɓārə́n kadə̄ rāā seḿ ō.
3Yo ɓírə̄m̄ kə kəlā yānneé adə̄ ngan̄g,
loo kə́ ɓádá əhɔm̄, ɔgə̄m̄ loo rāā rɔ̄ḿ,
wur kɔl əsō dɔḿ tə́ ō, m-ə́ngé yá̰á̰ kə́ tōr̄ ō.
4Loo ń noō tə́ m̄-ɓāŕ Kɔ́ɔ̄ɓē kə rīneé:
Ɓɔ́ Kɔ́ɔ̄ɓē, ī-gān̄g dɔḿ!
5Kɔ́ɔ̄ɓē i nge kem ndaa ō, ni i de kə́ súmūú ō.
Kum Nə́ɓā yājí a o̰o̰n tām̄ yā deē tə́.
6Kɔ́ɔ̄ɓē i nge ngɔ̄m̄ de kə́ kumdə́ gān̄g aĺ gə̄.
Kété ní tɔ́gə́ḿ gətóo ba ni ajəm̄.
7Kemḿ, majə kadə̄ ī-tetə kə̄ nang tə́,
tɔdɔ̄ Kɔ́ɔ̄ɓē rāā majə seí.
8Ḭ̄ ī-taām̄ jī yo tə́ ō, ɔ̄l̄ man̄ nōō kə́ kumḿ tə́ ō.
Ādə̄ njaḿ ndetə aĺ ō.
9Kadə̄ m̄-njə̄rań ta kum Kɔ́ɔ̄ɓē tə́ dɔ nang yā ngé ndi kə kumuú gə̄ tə́.
10Dan ń m-ə́dań na rɔ̄ḿ na tō ndoō ngá̰ý ní gə̄gē a m-ə̄ndā kemḿ dɔí tə́.
11Dan ń m-á̰a̰ woy woy ní m-ə́da na:
De gə̄ malang i ngé sor̄ gə̄.
12I rí n kə m̄-rāā m-ādə̄ Kɔ́ɔ̄ɓē
kum gotə yá̰a̰ malang kə́ majə ń ni-rāā tām̄ yāḿ tə́ ní?
13M-ā m-ún kópə tetə rɔ̄ɔ̄ yā kəla kə̄ dɔɔ́ ō, m-ā m̄-ɓāŕ Kɔ́ɔ̄ɓē kə rīneé ō.
14M-ā m̄-rāā yá̰á̰ ń m-ə̄nī ndūḿ yā rāā kadə̄ Kɔ́ɔ̄ɓē ní,
ta kum gír deē yān gə̄ tə́ malang.
15Ka̰a̰ deē yān gə̄ loo koy tə́
i yá̰á̰ kə́ tōr̄ rɔ̄ Kɔ́ɔ̄ɓē.
16A̰á̰ā̰ Kɔ́ɔ̄ɓē, mā i nge kəla yāí,
nge kəla yāí kə́ dəngam kə́ ngōn̄ kem nge kəla yāí kə́ dəyá̰.
Ḭ̄ ī-tútə kəla ń do̰ō̰mə̄n̄neé ní kɔ̄ɔ́.
17M-ā m̄-ndējī yá̰a̰ tun̄ kə́ yā ɓōkíīneé tɔ̄ȳ ō,
m-ā m̄-ɓāŕ Kɔ́ɔ̄ɓē kə rīneé ō.
18M-ā m̄-rāā yá̰á̰ ń m-ə̄nī ndūḿ yā rāā kadə̄ Kɔ́ɔ̄ɓē ní,
ta kum gír deē yān gə̄ tə́ malang,
19ndágə loo kə́ gīr̄ gidə kújə yān tə́ tə́,
kemií ḭ̄ ɓē kə́ Jerusalem tə́ tə́!
Aleluya!
Currently Selected:
PĀ GƏ̄ 116: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.