PĀ GƏ̄ 112
112
Rɔ̄nel̄ yā de kə́ sew gə̄
1 Aleluya!
Rɔ̄nel̄ i kə deē ń ɓōĺ ndíl Kɔ́ɔ̄ɓē ō,
nelə́n kə gō míndən gēé ō ní.
2Gír kaa yān i gír kaa kə́ tɔ́gən i ngá̰ý dɔ nang tə́,
tɔdɔ̄ Nə́ɓā rāā majə kə de kə́ súmūú gēé malang.
3Yá̰a̰ kənge kə́ ngá̰ý ō kə́ al̄ naā ō i kem kújə yān tə́ ō,
yá̰a̰ rāān kə́ gōtə́ to ngándáńg ō.
4Loo kə́ unjə̄ kow kógə̄ḿ unjə̄ kum til tə́
tām̄ yā de kə́ súmūú gə̄ tə́.
Ni i de kə́ súmūú ō, de kə́ nge rāā kem majə ō, kumən a o̰o̰n ō.
5Deē rāā i yá̰á̰ kə́ majə loo ń kumən o̰o̰n tām̄ yā deē madə̄n tə́ ō,
adə̄n yá̰a̰ loo tə̄nā tə́ ō ní.
Ni a rāā yá̰a̰ yān i kə gō róbə́ kə́ súmūú bátə́ ta tɔ̄l̄ ta tə́.
6Yá̰a̰ a yéȳn aĺ i kə́ njɔ́ḿ gə̄ tə́.
A əga kem de gə̄ dɔn tə́ ngándáńg.
7Ni ɓōĺ najə̄ kə́ majaĺ alé,
kemən sōl̄ yá̰á̰ kógə̄ḿ alé, ni-əndā kemən i dɔ Kɔ́ɔ̄ɓē tə́.
8Ni-əhɔ wurən ngan̄g, ɓōĺ yá̰á̰ kógə̄ḿ aĺ ō,
asə kídə̄ madə̄ ba̰ā̰n gə̄ ō.
9Ni-adə̄ ngé rɔ̄ tō ndoō gə̄ yá̰á̰ ngá̰ý.
Háĺ kə́ gōtə́ yān to ngándáńg,
ni-ɔr̄ dɔn dɔɔ́ kanjə̄ rɔ̄sɔl̄.
10Nge kem ndul a̰a̰ anī wōn̄g rāān ngá̰ý,
adə̄ do̰ tan ba jīn ur̄ wak.
Ndə̄ngā yā ngé kem ndul gə̄ ní gotə a to i karī.
Currently Selected:
PĀ GƏ̄ 112: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.