PĀ GƏ̄ 101
101
Mban̄g ənī ndūn ta kum Nə́ɓā tə́ yā rāā yá̰á̰ kə́ súmūú
1Pā yā Dabid.
Kɔ́ɔ̄ɓē, m̄-ndígə̄ kənī pā dɔ kem majə tə́ ō dɔ yá̰á̰ kə́ súmūú tə́ ō,
m̄-ndigə kugə kənde ō, tām̄ yāí tə́!
2m̄-ndigə tɔgə kem háĺ kə́ gōtə́ tə́ kum kə̄ kété kété.
I rə́ngáý tə́ n ā ī-reē rɔ̄ḿ tə́ ní?
M-ā m̄-rāā háĺ kə́ gōtə́ dan deē yāḿ gə̄ tə́.
3Yá̰á̰ ń i yá̰á̰ kə́ gōtə́ aĺ ní, m-ā m̄-mbel yā ka̰ā̰ aĺ bátə́.
M-ā m̄-kídə̄ túy taā kem, ni a ndetə kadəḿ ngɔr aĺ bátə́.
4Kem kə́ súmūú aĺ ndetə kadəḿ ngɔr alé,
Yá̰á̰ ń i yá̰á̰ kə́ majaĺ ní, m̄-gḛy gerə̄n alé.
5De kə́ nge tetə najə̄ dɔ madə̄n gə̄ tə́ loo mundə̄ tə́ jəke ní,
m-ā m̄-rāā kadə̄ ni a ɔr̄ najə̄ alé.
Kum kə́ a̰a̰ loo i kə kídə̄ looó ō,
kem kə́ gḛy rī ɓār̄ ngá̰ý ō ní,
m-ā m̄-tə́gā taḿ dɔ tə́ alé.
6M-ā m-á̰á̰ ngé ra dɔ ndūdə́ tə́ gə̄ kə́ kem ɓēé yā ger̄də́,
yā kadə̄ nin̄ ndin̄ kadəḿ tə́.
De kə́ nge rāā yá̰á̰ kə́ gōtə́ a rāā kəla yāḿ.
7De kə́ nge gól̄ loo kə kum kedēé ngá̰ý
a ndi kem kújə yāḿ tə́ alé.
De kə́ nge kɔr̄ najə̄ kə́ sor̄ gə̄
a ra ta kumḿ tə́ alé.
8Kə ndɔ̄í kə ndɔ̄ gə̄ malang ní,
m-ā m̄-rāā kadə̄ ngé kem ndul kə́ kem ɓēé gə̄ malang ɔrə̄n̄ najə̄ alé,
m-ā m-ɔ̄r̄ ngé rāā yá̰a̰ gōtə́ aĺ gə̄ kɔ̄ɔ́ kem ɓē yā Kɔ́ɔ̄ɓē tə́.
Currently Selected:
PĀ GƏ̄ 101: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.