MARK 16
16
Jeju ndól̄
(Á̰a̰ī Mat 28.1-8; Luk 24.1-12; Ja̰a̰ 20.1-10)
1Dan ń ndɔ̄ sabat mān̄ kɔ̄ɔ́ anī Mari kə́ Magədala ō, Mari kó̰o̰ Jakə ō, Salome ō mangən̄ ítər yā kaw̄ tə́te dɔ nīń Jeju tə́. 2Kə ndɔ̄*dəmásə́ ní, dəloí, dan ń mbang əɓa anī, nin̄-aw̄n̄ ta bəlo yo tə́. 3Nin̄-ədan̄ naā dɔ dáńdə́ tə́ na:
I náā n a ndūbə̄rū mbal̄ ta bəlo yo tə́ yā kadə̄jí ní?
4Ba dan ń ɔrən̄ dɔdə́ dɔɔ́ anī, a̰a̰n̄ kadə̄ mbal̄ i kə́ ndūbə̄rū kɔ̄ɔ́, ba mbal̄ ní bo ngá̰ý. 5Nin̄-udən̄ bəlo yo ní tə́, anī a̰a̰n̄ balsáá kógə̄ḿ ndi dɔ jī ko̰ tə́, o̰ō̰ kūbə̄ ngāl̄ kə́ ndaa, adə̄ ndíĺdə́ a̰ȳ, ba ni-ədadə́ na:
6Ī-lōōī kadə̄ ndíĺsí a̰ȳ. Ā ī-sāāī i Jeju kə́ Najaret ń əndanən̄ kə máyá̰ tū kāgə̄ kə́ dēsə́ tə́ ní. Ni-oy ba ndól̄ kɔ̄ɔ́, gətóo laā, á̰a̰ī loo ń ənīnən̄ tū tə́ ní n toó. 7Banī āw̄, ə́daī ngé ndóō yá̰a̰ yān gə̄ ō, Piyer ō na: Ni-aw̄ Galile kété nosí tə́. Ā á̰a̰niī i loo ń noō tə́, tītə̄ ń ni-ədańsí ní#16.7 K. 7: Á̰a̰ī Mark 14.28.
8Nin̄-teēn̄ kɔ̄ɔ́ bəlo yo tə́, ba a̰ȳn̄ kɔ̄ɔ́, tɔdɔ̄ ndewn̄ kə̄ rɔ̄də́ gə̄ tə́ malang ō, ndíĺdə́ a̰ȳ ō, banī ədan̄ deē kógə̄ḿ najə̄ alé, tām̄ ɓōĺ rāādə́.
Jeju teē hɔy kə̄ rɔ̄ Mari kə́ Magədala tə́ adə̄ a̰a̰n
(Á̰a̰ī Mat 28.9-10; Ja̰a̰ 20.11-18)
9Jeju ń oy ní ndól̄ dəloí ɓatə kə ndɔ̄ dəmásə́ ní. Deē ń a̰a̰n kété ní i Mari kə́ Magədala, ń Jeju tə̄ɓā ndíĺ kə́ majaĺ gə̄ sīrí kemən tə́ ní. 10Dəyá̰ ní aw̄, əda ngé gə̄ ń nin̄ i kə Jeju kété á ndin̄ əhɔn̄ ndoō ō, nōōn̄ ō ní, gotə najə̄ ní. 11Ba loo ń nin̄-oōn̄ najə̄ ń Mari ədadə́ ní anī taān̄ kemən alé. Ni ədadə́ na Jeju i kə kumneé ō, nəkɔ́ na n-a̰a̰n kə kumneé ō.
Jeju teē hɔy kə̄ rɔ̄ ngé ndóō yá̰a̰ gə̄ tə́ jōó adə̄ a̰a̰nən̄
(Á̰a̰ī Luk 24.13-35)
12Gō tə́ anī Jeju teē hɔy kə̄ rɔ̄ ngé ndóō yá̰a̰ gə̄ tə́ jōó kə ta róbə́ kə́ rangaá adə̄ a̰a̰nən̄ dan ń nin̄ i dɔ róbə́ tə́ ta kaw̄ ngán ɓē gə̄ tə́ ní. 13Nin̄-télən̄ dɔ njadə́ tə́ reē ədan̄ gotə gə̄, ba nin̄-taān̄ kem najə̄ yādə́ aĺ ɓáý to̰.
Jeju teē hɔy kə̄ rɔ̄ ngé ndóō yá̰á̰ kə́ kutə gidə i kógə̄ḿ gə̄ tə́ adə̄ a̰a̰nən̄
(Á̰a̰ī Mat 28.16-20; Luk 24.36-49; Ja̰a̰ 20.19-23; Kəla 1.6-8)
14Gō tə́ anī, ni-teē hɔy kə̄ rɔ̄ ngé kə́ kutə gidə i kógə̄ḿ gə̄ tə́, dan ń ndi a əsan̄ yá̰á̰ ní. Ni ibədə́ tām̄ taā kem najə̄ aĺ yādə́ tə́ ō, tām̄ kem ngan̄g yādə́ tə́ ō. 15Ba ədadə́ na:
Āwī kə̄ loo gə̄ tə́ malang, ə̄nīī mbēr̄ Najə̄ kə́ Majə ādə̄ de gə̄ malang oōn̄.
16Deē ń a taā kem ō, a rāānən̄ batém ō ní, a ajə. Deē ń a taā kem aĺ ní, a gāngə̄n̄ sarya dɔn tə́. 17Yá̰á̰ kə́ to kɔr kum gə̄ ń a ɔjən̄ kadə̄ Nə́ɓā i kə ngé taā kem gə̄ ní n toó: Nin̄ a tə̄ɓān̄ ndíĺ kə́ majaĺ gə̄ kə rīḿ ō, a ɔrə̄n̄ najə̄ kə ta kə́ kijə gə̄ ō. 18Dan ń a əhɔn̄ lī kə jīdə́ ō, a a̰ȳn̄ yá̰á̰ kə́ a tɔ̄l̄ deē ō anī, a rāā yá̰a̰ sedə́ alé. A əndān̄ jīdə́ dɔ ngé mo̰y gə̄ tə́ anī, rɔ̄ ngé mo̰y gə̄ a ngáā.
Jeju tél aw̄ rɔ̄ Nə́ɓā tə́
(Á̰a̰ī Luk 24.50-53; Kəla 1.9-11)
19Gō tə́ dan ń Kɔ́ɔ̄ɓē Jeju ɔr̄ najə̄ sedə́ oy anī, un aw̄n̄ seneé dɔ rā̰ tə́, adə̄ ndi dɔ jī ko̰ Nə́ɓā tə́. 20Ba nin̄ tā a aw̄n̄ kə̄ loo gə̄ tə́ malang ɔjən̄ najə̄. Kɔ́ɔ̄ɓē rāā kəla sedə́, adə̄də́ tɔ́gə yā rāā yá̰á̰ kə́ to kɔr kum gə̄, yā kadə̄ de gə̄ gerə̄n̄ na najə̄ ń ɔjən̄ ní i najə̄ kə́ rɔ̄kum#16.20 K. 20 gətóo kem makətūbə̄ yā Mark kə́rēý gə̄ kə́ kété tə́ kə ta Gərek..
Currently Selected:
MARK 16: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.