MATIYE 6
6
Najə̄ kə́ dɔ kadə̄ ngé ndoō gə̄ yá̰á̰ tə́
1Yá̰a̰ gə̄ kə́ kadə̄ ī-rāāī tá sḭḭ̄ i de kə́ súmūú gə̄ ta kum Nə́ɓā tə́ ní, ī-lōōī rāādə́ ta kum de gə̄ tə́ kadə̄ a̰a̰n̄sí. Ré ī-rāāī yá̰a̰ gə̄ ní i kadə̄ de gə̄ a̰a̰n̄sí anī, Bɔbə̄sí kə́ dɔ rā̰ tə́ a əndā njasí alé. 2Adə̄ ré ā ādə̄ de kə́ nge ndoō yá̰a̰ anī, ī-lōō kadə̄ kɔ̄rə́n̄ bərúnjə́ kété noí tə́ najə̄n tə́, tītə̄ ń ngé gól̄ loo gə̄ a rāān̄neé kem kújə́ kán̄ naā gə̄ tə́ ō, kum róbə kɔsə gə̄ tə́ ō, kadə̄ de gə̄ ɔsən̄neé gɔndə́ ní. Ādə̄ m-ə́dásí najə̄ kə́ bo ngá̰ý, nin̄-əngen̄ yá̰a̰ kəndā nja yādə́ kɔ̄ɔ́ ɓá. 3Ba ḭ̄ ré ā ādə̄ de kə́ nge rɔ̄ to ndoō yá̰á̰ ní a, ādə̄ madí kə́ ngɔr ngá̰ý rɔ̄í tə́ gə̄gē ger̄ gō alé, 4yā kadə̄ yá̰á̰ ń ādə̄n ní toń loo mundə̄ tə́ jəke. Anī Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní a əndā njaí.
Najə̄ kə́ dɔ ndɔ̄ȳ tə́
(Á̰a̰ī Luk 11.2-4)
5Dan ń ā ī-ndɔ̄yī ní a, ī-rāāī tītə̄ yā ngé gól̄ loo gə̄ alé. Nel̄də́ ra kə njadə́ kə̄ dɔɔ́ kem kújə́ kán̄ naā gə̄ tə́ ō, ta gajə róbə gə̄ tə́ ō, yā ndɔ̄yń, kadə̄ de gə̄ a̰a̰n̄də́. Ādə̄ m-ə́dásí najə̄ kə́ bo ngá̰ý, nin̄-əngen̄ yá̰a̰ kəndā nja yādə́ kɔ̄ɔ́ ɓá.
6Ba dan ń ā ī-gḛy ndɔ̄ȳ ní anī, údə́ kújú looí, ba ūtə̄ ta kújə dɔí tə́ tá ī-ndɔ̄ȳ Bɔbí ń ndi kem loo kə́ to loo mundə̄ tə́ ní. Anī Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní, a əndā njaí.
7Dan ń ā ī-ndɔ̄yī anī, ī-lōōī kɔr̄ najə̄ kə́ kógə̄ḿ beē kə̄ naā tə́ kə̄ naā tə́, tītə̄ yā de gə̄ kə́ nin̄ i Jipə aĺ gə̄. Nin̄-ɔjən̄neé na ré n-ɔrə̄n̄ najə̄ ngá̰ý anī n-a n-əngen̄ yá̰á̰ ń na n dəjen̄ ní. 8I beé ní ī-lōōī ndájə̄də́, tām̄ yá̰á̰ ń ndoōn rāāsí ní Bɔbə̄sí ger̄ kété tá kadə̄ ī-dəjeniī ɓáý. 9Adə̄ ré ā ī-ndɔ̄yī ɓáa ī-ndɔ̄yī tītə̄ ń toō beé:
Bɔbə̄jí kə́ ndi dɔ rā̰ tə́,
ādə̄ rīí i kə́ kɔr̄ kam̄,
10ādə̄ Ɓē ko̰o̰ yāí reē ugə̄ ō,
ādə̄ de gə̄ rāān̄ yá̰á̰ ń kemií gḛy ní dɔ nang tə́
tītə̄ ń a rāān̄neé dɔ rā̰ tə́ ní ō.
11Ādə̄jí yá̰a̰ kəsa yājí kə́ ɓōólaā.
12Ī-mā̰ȳ rɔ̄í dɔjí tə́ najə̄ yá̰á̰ kə́ gōtə́ aĺ gə̄ ń jə-rāā seí ní tə́,
tītə̄ ń jḭḭ kɔ́ gə̄ jə-mā̰yń rɔ̄jí dɔ ngé rāājí majaĺ gə̄ tə́ ō ní.
13Ī-lōō kaw̄ sejí ta yá̰a̰ nāā gə̄ tə́,
ba ɔ̄r̄jí kɔ̄ɔ́ jī nge nāājí tə́.
Tɔdɔ̄ ko̰o̰ ɓē ō, tɔ́gə ō, kɔsə gɔn ō i yá̰a̰ yāí gə̄ kə́ njɔ́ḿ gə̄ tə́. Adə̄ i tītə̄ ń noō#6.13 K. 13 Najə̄ ń ḭḭ dɔ … Tɔdɔ̄ ko̰o̰ Ɓē … bátə́ ugə̄ń dɔ … Ādə̄ i tītə̄ ń noō … tə́ ní, gətóo kem makətūbə̄ yā Matiye kə́rēý gə̄ kə́ kété tə́ kə ta Gərek.!
14Yá̰á̰ kə́ majaĺ gə̄ ń madə̄sí gə̄ rāān̄ sesí ní ré ī-mā̰yī rɔ̄sí dɔdə́ tə́ najə̄n tə́ anī, Bɔbə̄sí ń ndi dɔ rā̰ tə́ ní a mā̰ȳ rɔ̄n dɔsí tə́ ō. 15Ba ré yá̰á̰ kə́ majaĺ gə̄ ń madə̄sí gə̄ rāān̄ ní ré sḭḭ̄ ī-mā̰yī rɔ̄sí dɔdə́ tə́ najə̄n tə́ aĺ anī, yá̰á̰ kə́ majaĺ gə̄ ń sḭḭ̄ ī-rāāī ní Bɔbə̄sí a mā̰ȳ rɔ̄n dɔsí tə́ najə̄n tə́ aĺ ō.
Najə̄ kə́ dɔ ndi ɓō tə́ tām̄ yā Nə́ɓā tə́
16Dan ń ā ī-*ndiī ɓō tām̄ yā Nə́ɓā tə́ anī, ī-lōōī rāā dɔ kumsí kadə̄ síndə̄rī tītə̄ ń ngé gól̄ loo gə̄ a rāān̄neé ní. Nin̄-əhɔn̄ ndoō ngá̰ý kadə̄ de gə̄ gerə̄n̄neé kadə̄ na n-ndin̄ ɓō tām̄ yā Nə́ɓā tə́. Ādə̄ m-ə́dásí najə̄ kə́ bo ngá̰ý, nin̄-əngen̄ yá̰a̰ kəndā nja yādə́ kɔ̄ɔ́ ɓá. 17Ba ḭ̄, dan ń ā ī-*ndi ɓō tām̄ yā Nə́ɓā tə́ ní a, ī-rāā ítər dɔí tə́ ō, ī-tə́go kumií kɔ̄ɔ́ ō, 18kadə̄ de gə̄ gerə̄n̄neé na ī-*ndi ɓō tām̄ yā Nə́ɓā tə́ alé. I Bɔbí ń ndi kem loo kə́ to loo mundə̄ tə́ ní ngóy n a ger̄ ní. Loo ń noō tə́ Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní, a əndā njaí.
Yá̰a̰ kənge gə̄ kə́ dɔ rā̰ tə́
(Á̰a̰ī Luk 12.33-34)
19Ī-lōōī kɔsə dɔ dūbə̄ yá̰a̰ kənge yāsí gə̄ kə̄ naā tə́ dɔ nang tə́ laā. Tām̄ dɔ nang tə́ laā kārā a əhɔ ō, yō̰ gə̄ a o̰o̰n̄ kɔ̄ɔ́ ō, ngé ɓogə gə̄ a mbútə̄n̄ kum ndogə̄ mbal̄ yā kɔyń ō. 20Ba ī-kánī yá̰a̰ kənge yāsí gə̄ dɔ naā tə́ dɔ rā̰ tə́. Tām̄ dɔ rā̰ tə́ ní a əhɔn̄ kārā aĺ ō, yō̰ gə̄ a o̰o̰n̄ aĺ ō, ngé ɓogə gə̄ a mbútə̄n̄ loo yā kɔyń aĺ ō. 21Tɔdɔ̄ loo ń yá̰a̰ kənge yāí i tū tə́ ní, kemií i tū tə́ ō.
Lámba yā dā̰ rɔ̄ deē
(Á̰a̰ī Luk 11.34-36)
22Lámba yā dā̰ rɔ̄í i kumií. Ré mo̰y rāā kumií aĺ anī, rɔ̄í malang kə taá i kum loo kə́ unjə̄ kow tə́. 23Ba ré mo̰y kógə̄ḿ rāā kumií anī, rɔ̄í malang i kum til tə́. Adə̄ ré loo kə́ unjə̄ kow kə́ kemií tə́ i til anī, til ń noō i kə́ to kəda aĺ bátə́.
Nə́ɓā aláa Nar
(Á̰a̰ī Luk 16.13)
24De kə́ asə rāā kəla yā kɔ́ɔ̄n gə̄ jōó mbak gətóo. Ré ni a im̄ kə́ kógə̄ḿ ba a táŕ kə́rēý, aĺ ɓáa a əhɔ gō nge kə́ kógə̄ḿ ba a kídə̄ kə́rēý. Sḭḭ̄ ásiī rāā kəla yā Nə́ɓā ō, yā nar ō, naā tə́ mbak alé.
Taā kem Nə́ɓā kə́ mámák
(Á̰a̰ī Luk 12.22-31)
25I tām̄ najə̄ ń toō tə́ n m-ə́dásí na kə ī-lōōī sōl̄ najə̄ yā yá̰a̰ kəsa kə́ yā kadə̄ ə́saī tá ī-ndiīneé kə kumsí ō, najə̄ yā kūbə̄ kə́ yā kadə̄ ō̰ō̰ī rɔ̄sí tə́ ō ní. Ndií ḭ̄ deē kə kumií i yá̰á̰ kə́ tɔȳ yá̰a̰ kəsa ō, rɔ̄í ḭ̄ deē i yá̰á̰ kə́ tɔȳ kūbə̄ kə́ yā ko̰ō̰ ō aĺ a? 26Á̰a̰ī yel̄ kə́ dɔɔ́ gə̄: Nin̄-dubə̄n̄ kōō aĺ ō, əjan̄ kōō aĺ ō, ɔyn̄ kōō kə̄ kem mōyō̰ó̰ aĺ ō, banī Bɔbə̄sí ń ndi dɔ rā̰ tə́ ní adə̄də́ yá̰a̰ kəsa! Sḭḭ̄ ī-tɔyī yel̄ gə̄ sa̰y ngá̰ý aĺ a? 27I náā dansí tə́ n a asə kənī ndɔ̄n ta madə̄ tə́ sḛ́ý sɔɔ̄ń sōl̄ yān gə̄ ní?
28I tām̄ rí tə́ á ī-sōlī najə̄ yā kūbə̄ kə́ yā kadə̄ ō̰ō̰ī tə́ ní? Á̰a̰ī loo tɔgə ń ndə́já kə́ bembeé gə̄ a tɔgən̄ ní. Nin̄-rāān̄ kəla aĺ ō, əjōn̄ kūbə̄ aĺ ō, 29ba m-ə́dásí, mban̄g Salomo̰ nəkɔ́ gə̄gē ní, dan ń ni-əngeń kɔsə gɔn ngá̰ý dan yá̰a̰ kənge yān tə́ gə̄gē ō ní, ni-o̰ō̰ kūbə̄ kə́ ɓálən majə tītə̄ hútə̄ ndə́já kógə̄ḿ alé. 30Sḭḭ̄ ngé taā kem kə́ mámák aĺ gə̄ ń toō, ré Nə́ɓā əla kūbə̄ kə́ majə tītə̄ ń noō rɔ̄ mu ń ra bembeé ɓōólaā ba bírí anī ənīnən̄ kum hor tə́ kɔ̄ɔ́ ní anī, sḭḭ̄ tá Nə́ɓā a adə̄sí kadə̄ tɔȳ loo ń noō aĺ a? 31I beé ní, ī-lōōī sōl̄ kəda na ké ā ə́saī i rí ō, ā ā̰yī i rí ō, ā ō̰ō̰ī i kūbə̄ rí ō wa alé? 32Yá̰a̰ gə̄ ń noō malang ní, i de gə̄ kə́ nin̄ i Jipə aĺ gə̄ n i ngé sāā gō kanjə̄ taā koō ní. Ba Bɔbə̄sí ń ndi dɔ rā̰ tə́ ní ger̄ kadə̄ ndoō yá̰a̰ gə̄ ń noō rāāsí. 33Yá̰á̰ ń kadə̄ ə̄ndāī kumsí gō tə́ ngá̰ý ī-sāāī ta kəga dɔ bang ní, i Ɓē ko̰o̰ yā Nə́ɓā ō, i háĺ kə́ súmūú ń ni-gḛy ní ō. Gō tə́ anī Nə́ɓā a adə̄sí yá̰a̰ gə̄ ń noō malang dɔ tə́ ɓáý. 34I beé ní ī-lōōī sōl̄ tām̄ yā ndɔ̄ kə́ bírí tə́: Ndɔ̄ kə́ bírí a sōl̄ tām̄ yān nəkɔ́ tə́. Tápə̄ kə́ tām̄ yā ndɔ̄ kə́ ɓōólaā tə́ asə ta ndɔ̄ kə́ ɓōólaā tə́.
Currently Selected:
MATIYE 6: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.