MATIYE 4
4
Sətan nāā Jeju
(Mark 1.12-13; Luk 4.1-13)
1Gō tə́ anī, Ndíl Nə́ɓā ɔr Jeju aw̄ seneé kem dəla loo tə́ yā kadə̄ diabəl nāan. 2Jeju ndi ɓō tām̄ yā Nə́ɓā tə́ ndɔ̄ kutə sɔ́ ō, kadə kutə sɔ́ ō, ɓá anī ɓō rāān. 3Loo ń noō tə́ diabəl reē rɔ̄n tə́ ngɔr ba ədan na:
Ré ḭ̄ i Ngōn̄ Nə́ɓā anī, ə́da kūbə̄rū mbal̄ gə̄ ń toō ādə̄ télən̄ mápa. 4Banī Jeju tūr̄ ədan na:
I kə́ ndang kem makətūbūú na:
Deē a ndi kə kumneé i kə ta kūl̄ yá̰a̰ kəsaá ngóy alé,
ba i kə ta kūl̄ najə̄ gə̄ malang ń teēn̄ ta Nə́ɓā tə́ ní.
5Anī diabəl aw̄ seneé Jerusalem ń i ɓē kə́ táĺ ní tə́, əndān jam kújə yā Kɔ́ɔ̄ɓē tə́ dɔɔ́, ba ədan na:
6Ré ḭ̄ i Ngōn̄ Nə́ɓā anī, ḭ́ḭ bal ə̄sō nang tə́, tɔdɔ̄ ndangən̄ kem makətūbūú na:
Nə́ɓā a əda deē yān kə́ dɔ rā̰ tə́ gə̄ kadə̄ ətōīn̄ ta jīdə́ tə́ dɔɔ́
na sōgə́ mbal̄ tə́gā njaí.
7Ba Jeju tél ədan na:
Ndangən̄ ɓáý to̰ na ā ī-nāā Kɔ́ɔ̄ɓē Nə́ɓā yāí alé.
8 Diabəl aw̄ seneé dɔ mbal̄ kógə̄ḿ kə́ ngāl̄ ngá̰ý tə́ ɓáý to̰, ɔjən ɓē ko̰o̰ gə̄ malang kə́ dɔ nang tə́, naā tə́ kə yá̰á̰ kə́ to kɔsə gɔn yādə́ gēé 9ba ədan na:
Ré ɔ́sə noí nang tə́ noḿ tə́ ī-rɔȳm̄ anī, m-ā m-ādī yá̰a̰ gə̄ ń noō malang.
10Anī Jeju tél ədan na:
Āw̄ kɔ̄ɔ́, Sətan! Tɔdɔ̄ ndangən̄ kem makətūbūú ədan̄ na:
I Kɔ́ɔ̄ɓē Nə́ɓā yāí ngóy n ā ī-rɔȳn ō,
i ni ngóy n ā ī-rāā kəla yān ō ní.
11Anī diabəl əya̰n. Loo ń noō tə́ de kə́ dɔ rā̰ tə́ gə̄ reēn̄ rɔ̄ Jeju tə́ ba adə̄nən̄ yá̰a̰ kəsa.
Jeju əla gír kəla yān gō nang kə́ Galile tə́
(Mark 1.14-15; Luk 4.14-15)
12Dan ń Jeju oō kadə̄ əhɔn̄ Ja̰a̰ anī, ɔr̄ rɔ̄n loo ń noō tə́ kɔ̄ɔ́ ba aw̄ Galile. 13Ni ndɔ́tə̄ Najaret, ba aw̄ ndi Kapernaum ń i ɓē kə́ dɔ gɔ́sə bā bo kə́ Galile tə́ ní, gō nang kə́ Jabulo̰ tə́ ō Nepətali tə́ ō. 14I tītə̄ ń noō n najə̄ ń Ijai nge koō ta əda ní reē udəń gírí majə ní, ni-əda na:
15Nang kə́ Jabulo̰ ō, nang kə́ Nepətali ō,
róbə́ kə́ kaw̄ kə̄ bā bo tə́ ō, nang kə́ gidə bā Jurdḛ tə́ ō,
Galile ń nápar de kə́ rang gə̄ ndin̄ tū tə́ ní ō,
16gír de gə̄ ń ndin̄ kum til tə́ ní,
a̰a̰n̄ loo kə́ unjə̄ kow ngá̰ý.
Ngé gə̄ ń ndin̄ ɓē ń yo o̰o̰ ɓē dɔ tə́,
adə̄ loo kə́ tū tə́ risə til nding ní,
loo a unjə̄ kow dɔdə́ tə́.
17Loo ń noō tə́ Jeju əla gír kɔjə de gə̄ najə̄, ədadə́ na:
Ī-tūrī háĺsí, tɔdɔ̄ Ɓē ko̰o̰ kə́ dɔ rā̰ tə́ i ngɔr.
Jeju ɓāŕ ngé ndo̰ kānjə̄ gə̄ sɔ́
(Á̰a̰ī Mark 1.16-20; Luk 5.1-11)
18Jeju a njə̄rā kə gō kadə bā bo kə́ Galile anī, a̰a̰ ngákó̰o̰ naā gə̄ jōó, Simo̰ ń a ɓāŕnən̄ na i Piyer ní ō, ngōkó̰o̰n Andəre ō. Ra a ənīn̄ i réng kum bā bo tə́, tɔdɔ̄ nin̄ i ngé ndo̰ kānjə̄ gə̄. 19Ni ədadə́ na:
Ī-reēī gōḿ tə́, anī m-ā m̄-rāāsí kadə̄ ā ī-téliī ngé ndo̰ de gə̄. 20Kə̄ ta jī tə́ beé, nin̄-əya̰n̄ réng yādə́ gə̄ ba unən̄ gōn.
21Ni ɔtə kə̄ kété anī a̰a̰ ngákó̰o̰ naā kə́ rang gə̄ jōó ɓáý to̰, i Jakə ngōn̄ Jebede nin̄ kə ngōkó̰o̰n Ja̰a̰. Ndin̄ i kem toó naā tə́ kə bɔbə̄də́ Jebede, ba a tṵ́ṵ̄n̄ i kum réng. Jeju ɓāŕdə́, 22anī kə̄ ta jī tə́ beé nin̄-əya̰n̄ to ō bɔbə̄də́ ō ba unən̄ gōn.
Jeju ndóō de gə̄ yá̰a̰ ō, rāā adə̄ rɔ̄ de gə̄ ngáā ō
23Jeju un gō nang kə́ Galile malang, a ndóō de gə̄ yá̰a̰ kem kújə́ kán̄ naā yādə́ gə̄ tə́ ō, a ənī mbēr̄ Najə̄ kə́ Majə kə́ dɔ Ɓē ko̰o̰ tə́ ō, rāā adə̄ rɔ̄ ngé mo̰y kə́ tayā tayā gə̄ malang ngáā ō, rāā adə̄ rɔ̄ de kə́ nujə gə̄ malang tél majə gogə́ ō, dan ngán Israel gə̄ tə́. 24Lūlūn ɓār̄ gō nang kə́ Siri tə́ malang, adə̄ de gə̄ reēn̄ kə ngé mo̰y gə̄ ō, ngé rɔ̄ tōr̄ kə́ tayā tayā gə̄ ń i ngé ndíĺ kə́ majaĺ gə̄ ō, ngé kəsō yel̄ gə̄ ō, ngé lígə̄rī gə̄ ō ní rɔ̄n tə́. Ba ni-rāā adə̄ rɔ̄də́ ngáā. 25Adə̄ kósə de kə́ ngá̰ý gə̄ unən̄ gōn. Nin̄-ḭḭn̄ i gō nang kə́ Galile tə́ ō, Dekapol tə́ ō, Jerusalem tə́ ō, gō nang kə́ Jude tə́ ō, gidə bā Jurdḛ tə́ ō.
Currently Selected:
MATIYE 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.