MATIYE 28
28
Jeju ndól̄
(Á̰a̰ī Mark 16.1-10; Luk 24.1-12; Ja̰a̰ 20.1-10)
1Gō ndɔ̄ sabat tə́, adə̄ i ndɔ̄ dəmásə́#28.1 Dəmásə: Á̰a̰ī tū «Kum Najə̄ kə́ Ngón̄g Ngón̄g gə̄» tə́. tə́ anī, Mari kə́ Magədala ō, Mari kə́ rang ō, aw̄n̄ ka̰a̰ dɔ ɓádə́ tə́ kə gír looí ɓatə. 2Anī dɔ nang yéȳ ngá̰ý. De kə́ dɔ rā̰ tə́ kógə̄ḿ yā Kɔ́ɔ̄ɓē ḭḭ dɔ rā̰ tə́ jə̄ngā. Ni-reē ndūbə̄rū mbal̄ ń utə̄n̄neé ta bəlo ɓádə́ ní kɔ̄ɔ́, ba ndi dɔ tə́. 3Ni to i tītə̄ tel̄ man̄ beē ō, kūbə̄ yān ndaa táĺ táĺ ō. 4Dan ń áskar gə̄ a̰a̰nən̄ ní, ɓōlə́n̄ ngá̰ý adə̄ ton̄ tītə̄ de kə́ koy kɔ̄ɔ́ gə̄ beé.
5De kə́ dɔ rā̰ tə́ ní əda dəyá̰ gə̄ na:
Sḭḭ̄ ī-lōōī ɓōĺ, m̄-ger̄ kadə̄ ā ī-sāāī i Jeju ń əndanən̄ kə máyá̰ tū kāgə̄ kə́ dēsə́ tə́ ní. 6Ba ni-gətóo laā. Ni-oy ba ndól̄ kɔ̄ɔ́ tītə̄ ń ədań ní. Ī-reē á̰a̰ī loo ń to tū tə́ ní. 7Āwī láẃ ə́daī ngé ndóō yá̰a̰ yān gə̄ na ni-ndól̄ kɔ̄ɔ́ dan de kə́ koy gə̄ tə́, ba aw̄ Galile kété nosí tə́. Ā á̰a̰niī i nú. Najə̄ ń kadə̄ m-ə́dásí ní n noó.
8Nin̄-ɔtə̄n̄ kə ɓōló ō, kə rɔ̄nel̄ kə́ ngá̰ý ō, láẃ ngá̰ý kɔ̄ɔ́ dɔ ɓádə́ tə́, ba a̰ȳn̄ ngɔ̄də̄ aw̄ ədan̄ ngé ndóō yá̰a̰ yā Jeju gə̄ najə̄ ní. 9Jeju tə́nī tadə́ ba ədadə́ na:
m̄-rāāsí lápə́ya!
Nin̄-reēn̄ rɔ̄n tə́ əhɔn̄ njan, ba ɔsən̄ nodə́ nang tə́ non tə́. 10Anī Jeju ədadə́ na:
Ī-lōōī ɓōĺ, ba āw̄ ə́daī ngákó̰ó̰ḿ gə̄ kadə̄ aw̄n̄ Galile. Nin̄ a a̰a̰mə̄n̄ i nú.
Najə̄ kɔr̄ ngé ngɔ̄m̄ loo gə̄
11Dan ń dəyá̰ gə̄ ní i róbó ɓáý ní, ngé ngɔ̄m̄ loo kə́rēý gə̄ reēn̄ kem ɓēé ɔjən̄ ngol gə̄ kə́ dɔ ngé tun̄ yá̰a̰ gə̄ tə́ gotə yá̰a̰ malang ń rāā yá̰á̰ ní. 12Ngol ngé tun̄ yá̰a̰ gə̄ ní əngen̄ naā kə kum kɔɔ̄ gēé, ba dan ń oōn̄ naā oy anī, əndān̄ nar kə́ asə tām̄ jī ngé ngɔ̄m̄ loo gə̄ ní tə́, 13ba ədan̄də́ na:
I najə̄ ń toō n ā ə́daī ní, ə́daī na: Ngé ndóō yá̰a̰ yān gə̄ reē ɓogən̄ nīnə́n ndɔ̄ɔ́ dan ń jə-to j-a jə-ɓīī ní. 14Ba ré najə̄ ní əsō mbī nge ko̰o̰ ɓē tə́ anī, j-a jə-mūjūrū ta kɔ̄ɔ́ kadə̄ əsō dɔsí tə́ alé.
15Ngé ngɔ̄m̄ loo gə̄ taān̄ nar ní ba rāān̄ tītə̄ ń ɔjən̄neédə́ ní. Adə̄ najə̄ ní njə̄rā dan Jipə gə̄ tə́ bátə́ ɓōólaā.
Jeju teē hɔy kə̄ rɔ̄ ngé ndóō yá̰a̰ yān gə̄ tə́
(Á̰a̰ī Mark 16.14-18; Luk 24.36-49; Ja̰a̰ 20.19-23; Kəla 1.6-8)
16Ngé ndóō yá̰a̰ yān gə̄ ń nin̄ i deē kutə gidə i kógə̄ḿ ní, aw̄n̄ Galile dɔ mbal̄ ń Jeju ədadə́ na kə aw̄n̄ tū tə́ ní tə́. 17Dan ń a̰a̰n̄ Jeju anī, ɔsən̄ nodə́ nang tə́ non tə́, banī kem ngé kə́rēý gə̄ tɔ́sə̄də́. 18Jeju reē rɔ̄də́ tə́ ngɔr ba ɔr̄ najə̄ ń toō sedə́, ədadə́ na:
Adə̄mə̄n̄ tɔ́gə malang dɔ yá̰á̰ kə́ dɔ rā̰ tə́ gə̄ tə́ ō, dɔ yá̰á̰ kə́ dɔ nang tə́ gə̄ tə́ ō. 19Ní, āwī kə̄ dan nápar de gə̄ tə́ malang, ī-rāāī ādə̄ de gə̄ télən̄ ngé ndóō yá̰a̰ yāḿ gə̄. Ī-rāāīdə́ batém kə rī Bɔbə̄ Ngōn̄ ō, Ngōn̄ ō, Ndíĺ kə́ Táĺ ō. 20Ī-ndóōīdə́ yá̰a̰ malang ń m-ə́dásí kadə̄ ī-rāāī ní. Ba mā i sesí kə dɔ ndɔ̄ gə̄ bátə́ ta ngóy ndɔ̄ gə̄ tə́.
Currently Selected:
MATIYE 28: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.