MATIYE 22
22
Kūjə́ najə̄ yā yá̰a̰ kəsa kə́ ngá̰ý kə́ ndɔ̄ kaw̄ kújú yā dəyá̰ tə́
(Á̰a̰ī Luk 14.15-24)
1Jeju ɔr̄ najə̄ sedə́ kə kūjə́ najá ɓáý to̰, əda na:
2 Ɓē ko̰o̰ kə́ dɔ rā̰ tə́ i tītə̄ mban̄g kógə̄ḿ kə́ rāā yá̰a̰ kəsa ndɔ̄ kaw̄ kújú yā nə̄yá̰ ngōnən tə́ beē. 3Mban̄g ní əla ngé kəla yān gə̄ gō de gə̄ ń ni-ɓāŕdə́ tə́ ní kadə̄ reēn̄ loo yá̰a̰ kəsa ní tə́. Banī de gə̄ ní mbātə́n̄ reē. 4Ni-əla ngé kəla yān kə́ rang gə̄ ɓáý to̰ kəda de gə̄ ní tə́ na, yá̰a̰ kəsa yān na i kə́ rāā kɔ̄ɔ́. Na tɔ̄lə̄n̄ man̄g kə́ bəra gə̄ ō, bə̄yā̰ gə̄ kə batə̄ gə̄ kə́ yembə gə̄ ō. Yá̰a̰ malang na i kə́ rāā oy kɔ̄ɔ́. Ní, kə reēn̄ loo kəsa yá̰a̰ kaw̄ kújú tə́ tā. 5Banī usə de gə̄ ń ni-ɓāŕdə́ ní sḛ́ý aĺ bátə́, adə̄ aw̄n̄ kə̄ loo yādə́ gə̄ tə́. Nge kógə̄ḿ ɔtə aw̄ ndɔr̄ yān tə́ ō, nge kə́rēý ɔtə aw̄ gātə̄ yān tə́ ō, 6gotə gə̄ əhɔn̄ ngé kəla gə̄ ní rāān̄də́ yá̰á̰ kə́ majaĺ ngá̰ý pá tá tɔ̄lə̄n̄də́ ō. 7Wōn̄g rāā mban̄g ní, adə̄ əla ɓūtə̄ áskar yān gə̄ kadə̄ aw̄ tɔ̄lə̄n̄ ngé tɔ̄l̄ de gə̄ ní kɔ̄ɔ́ ba əlan̄ hor dɔ ɓē yādə́ tə́. 8Gō tə́ anī ni-əda ngé kəla yān gə̄ na:
Yá̰a̰ kəsa kaw̄ kújú i kə́ rāā oy kɔ̄ɔ́, banī de gə̄ ń m̄-ɓāŕdə́ ní i de gə̄ kə́ ndetən̄ kadə aĺ gə̄. 9I beé ní āwī kə̄ ta ngáń róbə gə̄ tə́, ba de gə̄ malang ń ā ə́ngeīdə́ tū tə́ ní, ī-mērīdə́ reē loo kəsa yá̰a̰ kaw̄ kə dəyá̰ kújú tə́. 10Ngé kəla gə̄ ní aw̄n̄ kə̄ ta ngáń róbə gə̄ tə́ ba reēn̄ kə de gə̄ malang ń əngen̄də́ ní. Kánə̄n̄də́ malang loo kógə̄ḿ, de kə́ majə gə̄ ō, de kə́ majaĺ gə̄ ō. Adə̄ de gə̄ rosən̄ kem kújə́ ndáńg ndáńg.
11Loo ń noō tə́ mban̄g udə kújú ra a a̰a̰ de gə̄ ń mērə̄n̄də́ reē loo kəsa yá̰a̰ kaw̄ kə dəyá̰ kújú tə́ ní, anī a̰a̰ deē kógə̄ḿ kə́ ndi kanjə̄ ko̰ō̰ kūbə̄ kaw̄ loo yá̰a̰ kəsa kaw̄ kújú tə́. 12Ni-əda deē ní na:
Madə́ḿ, ī-rāā i ba̰ý n údəń laā kanjə̄ ko̰ō̰ kūbə̄ kə́ yā kaw̄ń loo kəsa yá̰a̰ kaw̄ kə dəyá̰ kújú tə́ ní? Banī deē ní ndi kóńg kanjə̄ kəda najə̄. 13Anī mban̄g əda ngé kəla yān gə̄ na:
Ī-tó̰ō̰ī jīn gə̄ kə njan gə̄ ba ə̄nīniī ndágá kum til tə́. De gə̄ a nōōn̄ ō, a máyā̰n̄ gɔgədə́ ō, i loo ń noō tə́. 14Tɔdɔ̄ de kə́ ɓārə̄n̄də́ gə̄ i ngá̰ý, banī de kə́ gə̄rā gə̄ i sḛ́ý beē.
Najə̄ kə́ dɔ lambóó tə́
(Á̰a̰ī Mark 12.13-17; Luk 20.20-26)
15Tā anī Parijiyḛ gə̄ aw̄ oōn̄ naā dɔ loo kəhɔ Jeju tə́ kə najə̄ kə́ tan tə́. 16Gō tə́ anī əlan̄ ngé ndóō yá̰a̰ yādə́ gə̄, naā tə́ kə de gə̄ yā Herod gēé adə̄ aw̄ dəjen̄ Jeju na:
Ngoljí, jə-ger̄ kadə̄ ḭ̄ i de kə́ nge kəda najə̄ kə́ rɔ̄kum ō, ḭ̄ ndóō de gə̄ gō róbə yā Nə́ɓā i kə najə̄ kə́ rɔ̄kum kanjə̄ ɓōĺ deē ō. Tɔdɔ̄ ḭ̄ ī-rāā yá̰a̰ tām̄ ta kum deē alé. 17I beé ní, ə́dájí gír̄ yāí kə́ dɔ najə̄ ń toō tə́: Ndū najə̄ adə̄ deē ta róbə kadə̄ Sejar lambóo aké ɔgə̄n ḿ?
18Jeju ger̄ ngam yādə́ adə̄ ədadə́ na:
Sḭḭ̄ ngé gól̄ kum de gə̄, ā ī-nāāmī i tām̄ rí tə́?
19Ɔ́jəmī nar ń ā əgānəń lambóó ní. Nin̄-adə̄nən̄ njáŕ sə́lē arjā̰a̰ kógə̄ḿ. 20Anī Jeju dəjedə́ na ké deē ń rāānən̄ tū tə́ toō ké i náā wa. Ké yá̰á̰ ń ndangən̄ tū tə́ toō i rī náā wa. 21Nin̄-tél ədanən̄ na deē ní na i Sejar ō, yá̰á̰ ń ndangən̄ tū tə́ ní na i rīn ō.
Anī Jeju ədadə́ na:
Beé ɓáa yá̰á̰ ń i yā Sejar ní, ī-tél ādī Sejar ō, yá̰á̰ ń i yā Nə́ɓā ní, ādī Nə́ɓā ō.
22Dan ń oōn̄ najə̄ ń noō ní ɔr̄ kumdə́ ngá̰ý. Nin̄-əya̰nən̄ ba ɔtə aw̄n̄.
Najə̄ kə́ dɔ ndól̄ yā de kə́ koy gə̄ tə́
(Á̰a̰ī Mark 12.18-27; Luk 20.27-40)
23 Sadusiyḛ gə̄ ń ədan̄ na deē na oy a na a ndól̄ aĺ ní, reēn̄ rɔ̄ Jeju tə́ kə̄ ndɔ̄ nəkɔ́ ń noō tə́, ba dəjenən̄ na:
24Ngoljí, Moijə əda na ré deē kógə̄ḿ taā dəyá̰ ba oy kanjə̄ kojə ngōn̄ anī, ngōkó̰o̰n kə taā dəyá̰ ní kə ojəń ngōn̄ kadə̄ ra kum gotən. 25Tá kété ní ngákó̰o̰ naā gə̄ sīrí ndin̄ danjí tə́. Nge kə́ nga tɔ́gə taā dəyá̰ ba oy kanjə̄ kojə ngōn̄. Anī ngōkó̰o̰n kə́ nge ko̰ jōó taā dəyá̰ ní gotən tə́. 26Ni ō, nge kə́ ko̰ mətá ō, taān̄ dəyá̰ ní tītə̄ ń noō bátə́ ugə̄ń dɔ nge kə́ nge ko̰ sīrí tə́. 27Ta tɔ̄l̄ ta anī dəyá̰ ní oy ō. 28Ní, ndɔ̄ ń de kə́ koy gə̄ a ndólə̄n̄neé tə́ ní, dəyá̰ ní i yā náā dan ngákó̰o̰ naā kə́ sīrí gə̄ ní tə́? Tɔdɔ̄ nin̄ malang ní taānən̄ kə́ nə̄yá̰də́ tə́!
29Jeju tél ədadə́ na:
Gír̄ yāsí i gír̄ kə́ gōtə́ alé. Tɔdɔ̄ ī-gerī makətūbə̄ yā Nə́ɓā aĺ ō, ī-gerī tɔ́gə yā Nə́ɓā aĺ ō. 30Tām̄ ndɔ̄ ń de kə́ koy gə̄ a ndólə̄n̄neé tə́ ní, dəngam gə̄ a táān̄ dəyá̰ gə̄ aĺ ō, dəyá̰ gə̄ a táān̄ dəngam gə̄ aĺ ō. Nin̄ a ndin̄ i tītə̄ de kə́ dɔ rā̰ tə́ gə̄ beé. 31Ba najə̄ kə́ dɔ ndól̄ de kə́ koy gə̄ tə́ ní, yá̰á̰ ń Nə́ɓā ədasí ní ī-tə́daī aĺ a? 32Nə́ɓā əda na:
Mā i Nə́ɓā yā Abəraham ō, yā Isaak ō, yā Jakob ō.
Jeju ədadə́ dɔ tə́ ɓáý to̰ na,
mā i Nə́ɓā yā de gə̄ kə́ ndin̄ kə kumdə́ gə̄, ba i Nə́ɓā yā de kə́ koy gə̄ alé.
33Kósə de gə̄ ń oōn̄ najə̄ kɔr̄ Jeju ń noō ní, loo ndóō deē yá̰a̰ yān ɔr kumdə́ ngá̰ý.
Gō míndə kə́ bo tɔȳ madə̄ gə̄ malang
(Á̰a̰ī Mark 12.28-34; Luk 10.25-28)
34Dan ń Parijiyḛ gə̄ oōn̄ kadə̄ na Jeju dum̄ ta Sadusiyḛ gə̄ kə najá anī kánə̄n̄ naā. 35Deē kógə̄ḿ dandə́ tə́ i nge ndóō de gə̄ ndū najə̄ yā Nə́ɓā. Ni-dəje Jeju najə̄ kógə̄ḿ yā nāānneé ədan na:
36Ngoljí, i gō míndə kə́ rá n i kə́ bo tɔȳ madə̄ gə̄ malang ní?
37Anī Jeju tél ədan na i nge ń toō:
Ā ī-táŕ Kɔ́ɔ̄ɓē Nə́ɓā yāí kə kemií malang ō,
kə dā̰ rɔ̄í malang ō, kə gír̄ kə́ kemií tə́ malang ō.
38Gō míndə kə́ bo tɔȳ madə̄ gə̄ malang n noó ō, i ni n i kə́ ta kəga dɔ ní ō.
39Ba nge kə́ kutə̄ gō kə́ bo kasə seneé n toó:
Ā ī-tár deē madí tītə̄ ngarān̄g kum rɔ̄í īkɔ́ beē ō.
40 Ndū najə̄ gə̄ malang yā Moijə ō, yá̰á̰ ndóō gə̄ malang yā ngé koō ta gə̄ ō ní, naān̄ rɔ̄də́ i tū najə̄ kə́ jōó gə̄ ń noō tə́.
Kərist ō Dabid ō
(Á̰a̰ī Mark 12.35-37; Luk 20.41-44)
41Dan ń Parijiyḛ gə̄ kánə̄n̄ naā anī, Jeju dəjedə́ na 42ké gír̄ yādə́ na i rí dɔ Kərist tə́ wa. Ké ni i ngōn̄ kaa náā wa.
Anī nin̄-tūr̄ ədanən̄ na i ngōn̄ kaa Dabid.
43Jeju ədadə́ na:
Ré i beé anī Dabid ń ɔr̄ najə̄ kə ta kūl̄ Ndíĺ kə́ Táĺ ní, rāā i ba̰ý n ɓārə́n na i Kɔ́ɔ̄ɓē ní? Tɔdɔ̄ Dabid əda na:
44Kɔ́ɔ̄ɓē əda Kɔ́ɔ̄ɓē yāḿ na
kə reē kə ndi dɔ jī ko̰n tə́,
bátə́ kadə̄ n-əlań ngé ba̰ā̰n gə̄ gír njan tə́.
45Ré Dabid ɓārə́n na i Kɔ́ɔ̄ɓē anī, ni i kaan ɓáý to̰ a?
46Deē kógə̄ḿ kə́ asə tél kə najá yā kədan dɔ tə́ gətóo. Adə̄ əla gír ndɔ̄ ń noō tə́ ní de kə́ nāā dəje Jeju najə̄ to̰ ní gətóo.
Currently Selected:
MATIYE 22: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.