MATIYE 20
20
Ngé rāā kəla gír naraá kem ndɔr̄ kāgə̄ nduú tə́
1Tɔdɔ̄ Ɓē ko̰o̰ kə́ dɔ rā̰ tə́ to i tītə̄ de kə́ kə ta kújəneé kə́ teē dəloí ɓatə ɔy de gə̄ kadə̄ aw̄ rāān̄ kəla kem ndɔr̄ kāgə̄ nduú yān tə́ beé. 2Deē ní oōn̄ naā kə ngé kəla gə̄ ní kadə̄ kəla kə́ ndɔ̄ kógə̄ḿ i njáŕ sə́lē arjā̰a̰ kógə̄ḿ, ba gō tə́ anī əya̰də́ adə̄ aw̄n̄ kem ndɔr̄ kāgə̄ nduú yān tə́. 3Ni teē ndágá yḛŕ mbangāá anī, ənge de kə́rēý gə̄ ran̄ ndágə looó karī kanjə̄ rāā kəla kə́rēý. 4Anī ni-ədadə́ na kə aw̄ rāān̄ kəla kem ndɔr̄ kāgə̄ nduú yān tə́ ō, na n-a n-adə̄də́ gúrsə kə́ asə kə gō kəla yādə́. De gə̄ ní aw̄n̄ ndɔr̄ ní tə́. 5Deē ní teē ndágá dan kadaá ō, ta jī loo sɔl̄ tə́ ō, ba rāā tītə̄ kə́ kété ɓáý to̰. 6Ni teē ndágá ta jī mbang kur tə́ anī, ənge de kə́rēý gə̄ kə́ ran̄ ndágə looó ɓáý to̰ anī dəjedə́ na ké ran̄ kə ndɔ̄í bátə́ kadə̄ mbang udəń kə̄ dɔdə́ tə́ kanjə̄ rāā kəla i tām̄ rí tə́ wa. 7Anī nin̄-tél ədanən̄ na i tɔdɔ̄ deē ɔydə́ kəlaá alé. Anī ni ədadə́ na ré i beé ɓáa kə aw̄n̄ ndɔr̄ yān tə́ ō.
8Loo tíbí anī kɔ́ɔ̄ ndɔr̄ ní əda pajā yān na kə ɓāŕ ngé kəla gə̄ kə adə̄də́ nar yādə́. Kə əla gír dɔ ngé gə̄ ń reēn̄ gō gogə́ ní tə́, ba kə tɔ̄l̄ ta dɔ ngé kə́ kété gə̄ tə́. 9Ngé gə̄ ń aw̄n̄ ndɔrɔ́ ta jī mbang kur tə́ ní reēn̄ anī əngen̄ njáŕ sə́lē arjā̰a̰ kógə̄ḿ kógə̄ḿ kə dɔdə́ gēé. 10Dan ń ngé gə̄ ń ɔyn̄də́ kəlaá ta kəga dɔ ní reēn̄ anī, gírə̄n̄ kemdə́ tə́ kadə̄ n-a n-əngen̄ yādə́ kadə̄ a tɔȳ dɔ. Banī adə̄n̄də́ i njáŕ sə́lē arjā̰a̰ kógə̄ḿ kógə̄ḿ ō. 11Dan ń taān̄ gúrsə yādə́ anī, tāmən̄ kə kɔ́ɔ̄ ndɔrɔ́ ədan̄ na: 12De gə̄ ń toō ń reēn̄ gō gogə́ ní rāān̄ kəla i kum mbang kógə̄ḿ beē ngóy ba adə̄də́ gúrsə tītə̄ yājí jḭḭ ń jə-rāā kəla dəloí bátə́ loo tíbə dɔjí tə́ á kɔr asəjí nák ō, mbang rāājí ngá̰ý ō ní i tām̄ rí tə́? 13Ba deē ní tél əda deē kógə̄ḿ kə́ dandə́ tə́ na: Madə́ḿ, i yá̰á̰ kə́ gōtə́ aĺ n m̄-rāā seí ní alé. J-oō naā seí i dɔ njáŕ sə́lē arjā̰a̰ kógə̄ḿ tə́ aĺ a? 14Ī-taā gúrsə yāí ba ɔ́tə āw̄. m̄-ndigə kadə̄ de kə́ gō gogə́ ń toō kadə̄ asə kə yāí ō. 15M-ásə rāā yá̰á̰ kə́ kemḿ gḛy kə yá̰a̰ yāḿ aĺ a? Aláa ə̄ndā madí gə̄ nii i tām̄ kem ndaa kə́ m̄-rāā tə́ a? 16Adə̄ ngé kə́ gogə́ gə̄ a télən̄ ngé kə́ kété gə̄, ba ngé kə́ kété gə̄ a télən̄ ngé kə́ gogə́ gə̄.
Jeju tāā nja kə́ nge ko̰ mətá na n-a n-oy ba na n-ndól̄
(Á̰a̰ī Mark 10.32-34; Luk 18.31-34)
17Dan ń Jeju əsō róbó a aw̄ kə̄ Jerusalem ní, ni-ɔr̄ ngé kə kutə gidə i jōó gə̄ kə kéŕdə́ ba ədadə́ róbó na:
18Ōōī a, j-a j-awī i kə̄ Jerusalem, ba nú ní a əlan̄ Ngōn̄ Deē jī ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ tə́ ō. Nin̄ a gāngə̄n̄ sarya yo dɔn tə́ ō, 19a əlanən̄ jī de gə̄ kə́ nin̄ i Jipə aĺ gə̄ tə́ kadə̄ a mbóon̄ seneé ō, a əndanən̄ kə ndéy mərawaá ō, a əndanən̄ kə máyá̰ tū kāgə̄ kə́ dēsə́ tə́ ō, kadə̄ oy. Ba ndɔ̄ kə nge ko̰o̰ mətá anī, ni a ndól̄.
Yá̰á̰ ń kó̰ó̰ Jakə nin̄ kə Ja̰a̰ dəje Jeju ní
(Á̰a̰ī Mark 10.35-45)
20Tā anī kó̰ó̰ ngán Jebede gə̄ reē rɔ̄ Jeju tə́ ngɔr kə ngánən gēé, ba ɔsə non nang tə́ non tə́ yā dəjen̄ yá̰á̰ kógə̄ḿ. 21Jeju dəjen na ké gḛy i rí wa, anī ni-ədan na:
I kadə̄ adə̄ ngánə́ḿ kə́ jōó gə̄ ń toō ndin̄ kadií tə́, kógə̄ḿ dɔ jī ko̰í tə́ ō, kógə̄ḿ dɔ jī gelií tə́ ō, kem Ɓē ko̰o̰ yāí tə́. 22Jeju tél ədadə́ na gerə̄n̄ kum yá̰á̰ ń dəjenən̄ toó alé, ké asən̄ ka̰ȳ yá̰á̰ kə́ kem kopoó ń n-a n-rāā yā ka̰ȳ toó wa.
Anī nin̄-tél ədanən̄ na n-asən̄.
23Anī Jeju ədadə́ na:
Ā ā̰yī yá̰á̰ kə́ kem kópə yāḿ tə́ rɔ̄kum, ba yā ndi dɔ jī ko̰ḿ tə́ aké dɔ jī geləḿ tə́ ní, i mā n m-ā m-ādə̄ nge ń noō ní alé, banī i tām̄ yā ngé gə̄ ń Bɔbə́ḿ əndā yá̰á̰ ń toō dɔ jīn tām̄ yādə́ tə́ ní.
24Dan ń gotə ngé ndóō yá̰á̰ kə́ kutə gə̄ oōn̄ anī, rāān̄ wōn̄g kə ngákó̰o̰ naā kə́ jōó gə̄ ní. 25Banī Jeju ɓāŕdə́ ba ədadə́ na:
Ī-gerī kadə̄ ngār gə̄ kə́ dɔ nápar de gə̄ tə́ i ngé rāā ngār dɔdə́ tə́ gə̄ ō, de kə́ bo yādə́ gə̄ i ngé ndi dɔdə́ tə́ gə̄ ō. 26Banī majə kadə̄ to i tītə̄ ń noō dansí tə́ alé. Ba ré de kə́rēý gḛy kadə̄ ni i de kə́ bo kə́ dansí tə́ anī, ādə̄ kɔ́ɔ̄ tél nge rāā kəla yāsí. 27Ba ré de kə́rēý gḛy kadə̄ ni i de kə́ kété no madə̄n gə̄ tə́ dansí tə́ anī, ādə̄ kɔ́ɔ̄ tél ɓəlo yāsí. 28Yā Ngōn̄ Deē i tītə̄ n noō ō. Ni-reē yā kadə̄ i de gə̄ n rāān̄ kəla yān alé, ba i ni n kadə̄ rāā kəla tām̄ yādə́ tə́ ō, kadə̄ adə̄ rɔ̄n yá̰a̰ gān̄g dɔ tə́ tām̄ yā de kə́ ngá̰ý gə̄ tə́ ō ní.
Jeju rāā adə̄ ngé kum tɔ̄ɔ̄ gə̄ jōó a̰a̰n̄ loo
(Á̰a̰ī Mark 10.46-52; Luk 18.35-43)
29Dan ń nin̄-teēn̄ kɔ̄ɔ́ kem ɓē kə́ Jeriko tə́ anī, kósə de kə́ ngá̰ý gə̄ unən̄ gō Jeju. 30Ɓáa ngé kum tɔ̄ɔ̄ gə̄ jōó ndin̄ bɔ̄gə̄ róbə́ tə́. Loo ń nin̄-oōn̄ kadə̄ na i Jeju n a mān̄ anī, unən̄ ndūdə́ kə̄ dɔɔ́ ngá̰ý ədan̄neé na:
Kɔ́ɔ̄ɓē, ngōn̄ kaa Dabid, á̰a̰ kum tō ndoō yājí tə́!
31Kósə de gə̄ ndángə̄n̄də́ kadə̄ ndin̄ tadə́ mbóo, banī nin̄-əgan̄ kɔŕ tɔȳ kə́ kété ɓáý ədan̄ na:
Kɔ́ɔ̄ɓē, ngōn̄ kaa Dabid, á̰a̰ kum tō ndoō yājí tə́!
32Anī Jeju dəba. Ni-ɓāŕdə́, dəjedə́ na ké gḛyn̄ kadə̄ kə n-rāā i rí n kə n-adə̄də́ wa.
33Anī nin̄-ədanən̄ na:
Kɔ́ɔ̄ɓē, jə-gḛy kadə̄ kumjí a̰a̰ loo!
34Kum Jeju o̰o̰n sedə́ adə̄ ni ɔdə kumdə́ kə jīneé. Anī kumdə́ a̰a̰ loo kə̄ ta jī gə̄ tə́ beē ō, nin̄-unən̄ gōn ō.
Currently Selected:
MATIYE 20: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.