NŌŌ RƆ̄ 2
2
Kɔ́ɔ̄ɓē rāā tītə̄ kə́ ni i madə̄ ba̰ā̰ Jerusalem beé
1I ba̰ý á Kɔ́ɔ̄ɓē utə̄ dɔ ngōmandə kə́ Siyo̰ kə kil̄ man̄ gēé kem wōn̄g yān tə́ beé.
Ni-rāā adə̄ rī ɓār̄ yā Israel ḭḭ dɔɔ́ əsō nang tə́
Ndɔ̄ ń wōn̄g rāānneé tə́ ní, əga kemən dɔ yá̰a̰ kəndā nja yān tə́ alé.
2Kɔ́ɔ̄ɓē nujə kə loo ndi gə̄ yā Jakob malang kanjə̄ kadə̄ kumən o̰o̰n.
Ni tɔ̄ɔ̄ kújə́ kə́ ngan̄g ngá̰ý gə̄ kə́ Juda tə́ kə wōngōó ngá̰ý.
Tɔɔ̄də́ nang tə́ kɔ̄ɔ́ ba əla rɔ̄sɔl̄ dɔ ɓē ko̰o̰ tə́ ō, ngār yān gə̄ tə́ ō.
3Ni-ɔr̄ tɔ́gə Israel malang kɔ̄ɔ́ kə wōngōó ngá̰ý.
Tél kə jīn kə́ ko̰ó̰ kə̄ gogə́ ta kum madə̄ ba̰ā̰n tə́.
Əla hor dɔ ɓē yā Jakob tə́ adə̄ o̰o̰ loo gīr̄ gidə.
4Ndɔ́r̄ ga̰ gərā yān sɔɔ̄ń Jerusalem tītə̄ kə́ ni i madə̄ ba̰ā̰n beé ō,
əhɔ jī ko̰o̰n dɔɔ́ tītə̄ nge rɔ̄ɔ̄ beé ō.
Ni tɔ̄l̄ ngé gə̄ malang ń majən̄ ka̰ā̰ ngá̰ý ní.
Ɓōkə́ wōn̄g yān kə́ ngá̰ý hor tə́
dɔ kújə tandā yā ngōmandə kə́ Siyo̰ tə́.
5Kɔ́ɔ̄ɓē rāā yá̰a̰ tītə̄ kə́ ni i madə̄ ba̰ā̰n beé.
Nujə kə Israel ō, kə kújə yān kə́ majə ngá̰ý gə̄ ō, gidə kógə̄ḿ.
Ni tɔ̄ɔ̄ kújə yān kə́ ngan̄g ngá̰ý gə̄ kɔ̄ɔ́.
Rāā adə̄ de gə̄ nōōn̄ rɔ̄də́ ngá̰ý ō, to̰ō̰n̄ ō, kem ɓē yā ngōmandə kə́ Juda tə́.
6Ni bótə̄yō̰ gong kə́ kɔr gidə ndɔr̄ yān tə́ ō,
nujə kə loo kán̄ naā yānneé kɔ̄ɔ́ ō.
Kɔ́ɔ̄ɓē rāā adə̄ dɔ de kə́ Siyo̰ gə̄ ndígə̄nal rāā nāā gə̄ ō, ngɔ̄m̄ ndɔ̄ sabat ō.
Ni-əla rɔ̄sɔl̄ dɔ mban̄g tə́ ō, dɔ nge tun̄ yá̰á̰ tə́ ō, kə wōngōó ngá̰ý.
7Kɔ́ɔ̄ɓē mbātə́ loo tun̄ yá̰a̰ yān ō, kídə̄ loo kə́ táĺ yān ō.
Ni-əla ndogə̄ mbal̄ gə̄ kə́ gidə kújə́ kə́ majə ngá̰ý gə̄ kə́ Siyo̰ tə́ kem jī madə̄ ba̰ā̰n tə́.
Ndū de gə̄ ɓār̄ ngá̰ý kem kújə yā Kɔ́ɔ̄ɓē tə́,
tītə̄ kə́ ndɔ̄ rāā nāā tə́ beē.
8Kɔ́ɔ̄ɓē núm̄ kadə̄ kə n-nujə ndogə̄ mbal̄ yā ngōmandə kə́ Siyo̰ kɔ̄ɔ́.
A ənī kəlā kə́ yā jɔ̄r̄yɔń gidə loo kadə̄ asə naā ō,
a tél kə jīneé karī kanjə̄ nujə loo aĺ ō.
Ni-rāā adə̄ loo déw yā ngé rɔ̄ɔ̄ gə̄ ō, ndogə̄ mbal̄ ō, ton̄ ndoō ngá̰ý.
9Bápə ta róbə ndogə̄ yān gə̄ dubə̄n̄ nángāá,
Kɔ́ɔ̄ɓē tétə̄ gində̄ kutə̄ tadə́ gə̄ ō, nujən̄ ō.
Mban̄g yān ō, ngār yān gə̄ ō, i dan nápar de gə̄ tə́, adə̄ ndū najə̄ gətóo kɔ̄ɔ́.
Tá ngé koō ta yān gə̄gē a Kɔ́ɔ̄ɓē ɔjədə́ yá̰a̰ adə̄ a̰ā̰n̄ aĺ ō.
10Kum kɔɔ̄ gə̄ yā ngōmandə kə́ Siyo̰ ndin̄ nang tə́ tadə́ mbóo.
Ba ɔyn̄ bumbə́ru kə̄ dɔdə́ tə́ ō, o̰ō̰n̄ kūbə̄ sákə̄ rɔ̄də́ tə́ ō.
Ngámandə kə́ Jerusalem gə̄ əlan̄ dɔdə́ nang tə́.
11Man̄ nōō utə̄ kumḿ ō, kemḿ təngām̄ ngá̰ý ō.
Tɔ́gə́ḿ gətóo kɔ̄ɔ́ adə̄ m-ə̄sō m-ɔ́də nang.
Tɔdɔ̄ ngōmandə yā gír deē yāḿ gə̄ nujə kɔ̄ɔ́ ō.
ngán kə́ dūú gə̄ ō, kə́ ta mba tə́ gə̄ ō, ton̄ kə́ yo tə́ ndágə loo gə̄ kə́ kem ɓēé tə́.
12Nin̄ dəjen̄ kó̰ó̰də́ gə̄ na: Kōō gémē ō, kasə nduú ō i rá?
Nin̄ ton̄ kə́ yo tə́ tītə̄ ngé kənge do gə̄ kə́ ton̄ ndágə loo gə̄ kə́ kem ɓēé tə́ beé ō,
koōdə́ teē kɔ̄ɔ́ kə̄ jī kó̰ó̰də́ gə̄ tə́ ō.
13Jerusalem ngōmandə yāḿ,
kə m-ə́daī na i rí ɓáý to̰?
I náā n to tītīí ta kumḿ mā tə́ ní?
ngōn̄ kə́ madə̄ yāḿ, ngōmandə kə́ Siyo̰, i rí n kə m̄-sɔlə̄ń kemií ní?
Tɔdɔ̄ ī-nujə i nujə kə́ to ɓōĺ ngá̰ý tītə̄ man̄ bā bo ń i yá̰á̰ kə́ laa to ɓōĺ ngá̰ý ní beē.
I náā n a ajiī ní?
14Ngé koō ta yāí gə̄ a̰a̰n̄ yá̰á̰ kə́ kanjə̄ kumən gə̄ ō, kə́ rɔ̄kum aĺ gə̄ ō tām̄ yāí tə́.
Nin̄ ɔjən̄ yá̰á̰ kə́ gōtə́ aĺ yāí kə̄ ndágá wáńg alé,
yā kadə̄ yá̰á̰ ń a reē kə̄ dɔí tə́ ní kə rāāī gáŕ.
Yá̰a̰ gə̄ ń nin̄ a̰ā̰n̄ ba ədanī ní i yá̰á̰ kə́ kanjə̄ kumən gə̄ ō, i gól̄ loo ō.
15Ngé mān̄ róbə gə̄ malang əndan̄ jīdə́ gírí tə́ mbóon̄neé seí.
Nin̄ kɔ̄rə́n̄ ngél ō, tə́gān̄ dɔdə́ nek nek ō,
mbóōon̄neé kə ngōmandə kə́ Jerusalem.
I ɓē ń de gə̄ ɓārə́n̄ na i yá̰á̰ kə́ majə ɔtə̄ kə taá ō,
na i rɔ̄nel̄ yā dɔ nang kə taá malang ō ní n toó a?
16Madə̄ ba̰ā̰í gə̄ malang teēn̄ tadə́ ɔrə̄n̄neé najə̄ dɔí tə́.
Nin̄ kɔ̄rə́n̄ ngél ō, ngórə̄n̄ ngān̄gdə́ ō.
Nin̄ ədan̄ na: Ādə̄ jə-nujiī seneé.
I ndɔ̄ ń jə-ndi j-a jə-ngóō ta mandang ní n toó.
J-ugə̄ kem ndɔ̄ ní tə́ ō, j-a̰a̰ ndɔ̄ ní kə kumjí ō.
17Kɔ́ɔ̄ɓē rāā yá̰á̰ ń núm̄ yā rāā ní.
Ni-rāā yá̰á̰ ń əda najə̄n ní.
Nujə kə looó sák sák kanjə̄ kadə̄ kumən o̰o̰n.
Rāā adə̄ rɔ̄ madə̄ ba̰ā̰í nelə̄n dɔí tə́ ō,
rāā adə̄ tɔ́gə́ ngé rɔ̄ɔ̄í gə̄ i ngá̰ý ō.
18Ngarā̰ kem de kə́ Jerusalem gə̄ nōō kə̄ dɔ Kɔ́ɔ̄ɓē tə́.
Ndogə̄ mbal̄ yā ngōmandə kə́ Siyo̰,
ə́ya̰ man̄ kumií ādə̄ a̰ȳ tītə̄ man̄ kə́ wól loo tə́ beé kadaá ō, ndɔ̄ɔ́ ō.
Ī-lōō taā koō ō, ādə̄ kumií i kə nōó ō.
19Ḭ́ḭ dɔɔ́ ndɔ̄ɔ́, ba ə́ga kɔŕ,
kə mbang gə̄ malang ń ngé ngɔ̄m̄ loo gə̄ a mbélə̄n̄neé gír naā ní.
Ə́dá yá̰á̰ kə́ kemií tə́ malang kə̄ ndágá ta kum Kɔ́ɔ̄ɓē tə́.
Ɔ́y jīí kə̄ dɔɔ́ ta kumən tə́ ī-rāānneé ɓɔ́
tām̄ ndi kə kumuú yā ngání gə̄ ń ɓō a tɔ̄l̄də́ kɔ̄ɔ́ kə só̰ róbə gə̄ malang ní.
20Á̰a̰ā̰, Kɔ́ɔ̄ɓē, á̰a̰ā̰ majə ké i náā n ī-rāān beé toō wa.
Ní, kə dəyá̰ gə̄ kə əsan̄ ngán kemdə́ gə̄ ń i ngáń kə́ majə asə naā beé gə̄ ní a?
Ní, kə de gə̄ kə tɔ̄lə̄n̄ ngé tun̄ yá̰a̰ gə̄ ō, ngé koō ta gə̄ ō, kem loo kə́ táĺ yā Kɔ́ɔ̄ɓē tə́ kɔ̄ɔ́ a?
21Balsáa gə̄ ō, de kə́ tɔgə ɓə́ga gə̄ ō, ton̄ nang tə́ kum róbə kɔsə gə̄ tə́.
Ngáń kə́ mandə yāḿ gə̄ ō, kə́ balsáa yāḿ gə̄ ō, oyn̄ yo kaskar.
Ī-tɔ̄l̄də́ ndɔ̄ wōn̄g yāí tə́ ō,
ə́já míndə́də́ kanjə̄ kadə̄ kumií o̰o̰ī ō.
22Ī-rāā ādə̄ ɓōĺ kə́ ngá̰ý teē kə̄ ta loo gə̄ tə́ reē dɔḿ tə́,
tītə̄ ń de gə̄ a teēn̄neé kə̄ loo gə̄ tə́ yā reē rāā nāā tə́ noó beé.
Ndɔ̄ rāā wōn̄g yā Kɔ́ɔ̄ɓē tə́ ní, de kə́ teē ta yo tə́, aláa ndi kə kumneé gətóo.
Madə̄ ba̰ā̰ḿ tɔ̄l̄ ngánə́ḿ gə̄ ń m-ə̄tōdə́ kə tárá ngá̰ý ní kɔ̄ɔ́.
Currently Selected:
NŌŌ RƆ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.