JOB 26
26
Job tūr̄ əda kə tɔ́gɔ́ na dḭḭ̄ ń na ī-dḭḭ̄n ní i dḭḭ̄ kə́ to ngár̄ aĺ bátə́!
1Anī Job tél əda na:
2Deē ń tɔ́gən gətóó ní ḭ̄ ī-ger̄ loo rāā seneé ngá̰ya̰á̰!
Deē ń tɔ́gə jīn gətóó ní ḭ̄ ī-ger̄ loo dḭḭ̄n ngá̰ya̰á̰!
3Deē ń kum kedə̄ yān gətóó ní ḭ̄ ī-ger̄ loo kadə̄n kɔjə̄ ngáya̰á̰!
Ḭ̄ ɔ́jə kə̄ ndágá kadə̄ kum kedə̄ yāí i ngá̰ý kə́ njɔ́ḿ gə̄ tə́!
4Ba i náā n ɔr̄ najə̄ seneé ní? I náā n əndā najə̄ taí tə́ ní?
Nə́ɓā o̰o̰ ɓē dɔ yá̰a̰ gə̄ tə́ malang
5Loo ń de kə́ koy gə̄ to a ndewn̄ tū tə́ ní,
rúu tɔȳ gír bā bo ń yá̰á̰ kə́ kə kumuú gə̄ i tū tə́ ní.
6Tɔdɔ̄ loo kə́ ɓádá to i kə̄ dɔ ndágá doy ta kum Nə́ɓā tə́ ō,
yá̰á̰ kə́ utə̄ dɔ bəlo kə́ bo gətóo ta kumən tə́ ō.
7I ni n teē kem dɔ rā̰ kə́ dām̄ mbɔ́r ɓē kə́ ko̰ó̰ tə́ kə̄ gogə́
dɔ ɓōdə̄ loo tə́ ní ō, rāā adə̄ dɔ nang ra ɓōdə̄ loo tə́ ní ō.
8I ni n ngɔ̄m̄ man̄ dan kil̄ man̄ gə̄ tə́
kanjə̄ kadə̄ kil̄ man̄ gə̄ tɔ̄ɔ̄n̄ kɔ̄ɔ́ gírí sɔɔ̄ń kɔȳ man̄ ní ō,
9utə̄ kum nāā kə́ ndaa ngóńg ngóńg kə kil̄ maná ō.
10Ni-əja nja loo kə́ gōr̄ gong dɔ man̄ tə́,
i dɔ nin̄ loo kə́ unjə̄ kow nin̄ kə loo kə́ risə til ndingií tə́.
11Dan ń ni ndán̄g bir̄ njan gə̄ ń dɔ rā̰ ndi dɔ tə́ ní anī,
doȳ#26.11 Doȳ, i yá̰á̰ kə́ tītə̄ sīl̄ ba tan kə́ dɔɔ́ laa adə̄ dəyá̰ gə̄ a əndān̄ jóo tū tə́.gə̄ ndewn̄ ō, ɓōĺ rāādə́ ō.
12Nə́ɓā njar bā bo kə ta kūl̄ tɔ́gəneé ō,
Ni-tetə tɔ́gə́ nél balway kə ta kūl̄ kur̄ dɔneé ō.
13Koō kə́ tan tə́ ɔy loo dɔ rā̰ tə́ ō.
Ni-ɔsə lī kə́ to ɓōĺ ngá̰ý kə jīneé adə̄ teē dām̄ kə́rēý tə́ ō.
14Kəla rāān gə̄ ní ré i núsən kə́ sḛ́ý beē ngóy n noó,
i kōōn kə́ sḛ́ý beē ngóy n j-ōōī noó anī,
kəla rāān kə́ bo gə̄ ń kōōdə́ ɓār̄ tītə̄ ndán̄g man̄ beé ní,
i náā n a ger̄ kum ní?
Currently Selected:
JOB 26: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.