JOB 23
23
Job tūr̄ əda kə tɔ́gɔ́ na Nə́ɓā mbātə́ kɔr̄ najə̄ seneé
1Loo ń noō tə́ Job ɔr̄ najə̄ əda na:
2M-ə́hɔ rɔ̄ḿ tɔgə kadə̄ m̄-nōō rɔ̄ḿ alé,
banī ɓōólaā gə̄gē ní, tṵ́ṵ̄ tɔȳ tɔ́gə́ḿ.
3Aa! Nə́ngētə́ m̄-ger̄ i loo ń kadə̄ m-ə́ngen tū tə́ ní anī,
m-ā m-āw̄ bátə́ yā kugə̄ ta kōr̄ kāgə̄ mbang yān tə́.
4M-ā m-ɔ́jən gír najə̄ yāḿ,
m-ā m-ɔ́jən yá̰a̰ gə̄ ngá̰ý kə́ ɔjən̄ kadə̄ najə̄ yāḿ i rɔ̄kum.
5Loo ń noō tə́ m-ā m̄-ger̄ najə̄ gə̄ ń ni a tūr̄ yā kədam̄ ní ō,
najə̄ gə̄ ń ni aw̄ń yā kədam̄ ní, m-ā m̄-ger̄ kum ō.
6Rāā kə dɔ́nɔ́ i loo kun najə̄ kɔ̄ɔ́ dɔ deē tə́ yān a?
I beé alé! I kadə̄ ni nēl̄ mbīn oōń najə̄ yāḿ ngóy.
7Loo ń noō tə́ a tɔ́tə̄n̄ naā kə de kə́ súmūú dɔ najə̄ tə́ ō,
m-ā m̄-teē jī nge gān̄g sarya dɔḿ tə́ tə́ ō, m-ā m̄-tetə rɔ̄ɔ̄ ō.
8Ba ré m-āw̄ dām̄ kə́ gír ɓē tə́ anī, ni gətóo noó ō,
m-āw̄ no ɓē tə́ anī, m-á̰a̰n alé ō.
9A rāā i kəla kógə̄ḿ dām̄ mbɔ́r ɓē kə́ ko̰ó̰ tə́ a, m-ásə ka̰a̰n noó aĺ ō,
ɓɔ̄ɔ̄ rɔ̄n i dām̄ mbɔ́r ɓē kə́ geleé tə́ a, m-á̰a̰n noó aĺ ō.
10Tá ni ger̄ róbə́ ń m-úń ní majə.
Ré ni nāām̄ anī, m-ā m̄-teē kum tə́ ō,
m-ā m-ūnjə̄ njáý njáý tītə̄ lɔ́r beé ō.
11M-ə̄ndā njaḿ gotə yān tə́ m-únəń tóon,
m-úń róbə yān kanjə̄ tɔ̄ɔ̄.
12Yá̰á̰ ń ni-əda na kə m̄-rāā ní, m̄-mbātə́ alé.
m̄-ndigə yá̰a̰ gə̄ ń ni ndang kadə̄ yā rāā ní
tɔȳ gír̄ yāḿ mə̄kɔ́ ń m̄-rā dɔ tə́ yā rāań yá̰á̰ ní.
13Banī ni i de kə́ gír̄ yān i kógə̄ḿ beē ngóy,
i náā n asə rāā kadə̄ ni əya̰ gír̄ yān kɔ̄ɔ́ ní?
Ni a rāā i yá̰á̰ ń kemən gḛy ní ngóy!
14Ni a rāā i yá̰á̰ ń əndān̄ dɔḿ tə́ á i kə́ ndang ní,
tītə̄ ń a rāań ngé kə́ rang gə̄ ń na̰yn̄ ngá̰ý ɓáý ní ō.
15I tām̄ najə̄ ń noō tə́ n ɓōĺ rāām̄ ngá̰ý ta kumən tə́ ní.
Dan ń m̄-gír̄ dɔ tə́ ngá̰ý anī, m-ə́ja m̄-ɓōlə́n kə́ al̄ naā.
16Nə́ɓā rāā adə̄ tɔ́gə́ḿ gətóo.
Nə́ɓā kə́ tɔ́gən i ngá̰ý rāā adə̄ ndílə́ḿ a̰ȳ.
17Tɔdɔ̄ nujən̄ seḿ kɔ̄ɔ́ kété no loo ń a rāā yā risə til tə́ ní alé,
banī ni ɔgə̄ kadə̄ loo kə́ risə til nding reē dɔḿ tə́ alé.
Currently Selected:
JOB 23: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.