JAKƏ 2
2
Ī-lōōī kɔr̄ kam̄ de gə̄ kə gō yá̰a̰ kənge yādə́ gə̄
1Ngákó̰ó̰ḿ gə̄, ī-taāī kem Jeju Kərist, Kɔ́ɔ̄ɓē yājí ń kɔsə gɔn i yān ní. Ī-lōōī tə́la taā kem yāsí ō, rāā yá̰a̰ tām̄ ger̄ ta kum de gə̄ tə́ ō, naā tə́. 2Kadə̄ ī-gerīneé majə ní, ré deē kógə̄ḿ kə́ kulūm̄ lɔ́r i jīn tə́ ō, kūbə̄ kə́ majə ngá̰ý i rɔ̄n tə́ ō, udə loo kán̄ naā yāsí tə́, ba nge ndoō kógə̄ḿ kə o̰ō̰ kūbə̄ kə́ ngísə udə seneé ō, 3anī ī-tūrī kumsí i kə̄ dɔ nge ń o̰ō̰ kūbə̄ kə́ majə ngá̰ý tə́ ní, ə́daniī na kə ndi loo kə́ majə ń toō tə́, ba ə́daī nge ndoō ní na: Ḭ̄, ī-ra dɔɔ́ noō, aláa, ī-ndi kə̄ nang tə́ kadə kōr̄ kāgə̄ ń m-ā m-ə̄ndā njāḿ dɔ tə́ ní tə́. 4Ré ī-rāāī tītə̄ ń noō anī, sḭḭ̄ i ngé kɔr̄ kam̄ de gə̄ aĺ a? Ī-téliī i de kə́ ngé gān̄g sarya gə̄ kə́ gír̄ kə́ kemdə́ tə́ i kə́ majaĺ aĺ a?
5Ngákó̰ó̰ḿ kə́ kó tár yāḿ gə̄, ōōī, Nə́ɓā gə̄rā ngé gə̄ ń i ngé ndoō gə̄ ta kum de kə́ dɔ nang tə́ gə̄ tə́ ní kadə̄ télən̄ de kə́ ngé kənge yá̰á̰ ngá̰ý gə̄ kə gō taā kem yādə́ ō, kadə̄ əngen̄ Ɓē ko̰o̰ ń Nə́ɓā ənī míndən yā kadə̄ ngé gə̄ ń tárnən̄ ní ō aĺ a? 6Ba sḭḭ̄ ídiī tasí gír nge ndoō tə́. I de kə́ ngé kənge yá̰á̰ ngá̰ý gə̄ n a rāān̄sí yá̰á̰ kə́ tōr̄ gə̄ ō, a ndɔ́rə̄n̄sí kə̄ loo sarya gə̄ tə́ ō ní aĺ a? 7I nin̄ n a ɔrə̄n̄ najə̄ kə́ to ngonjə̄ gə̄ dɔ rī kə́ majə ngá̰ý ń ɓār̄ dɔsí tə́ ní aĺ a?
8Rɔ̄kum, ré ī-ngɔ̄mī ndū najə̄ kə́ majə tɔȳ gotə ndū najə̄ gə̄ malang ń na kə ī-tár madí tītə̄ dā̰ rɔ̄í īkɔ́ ní anī, ī-rāāī i yá̰á̰ kə́ majə. 9Banī ré ī-rāāī yá̰a̰ kə gō ger̄ ta kum de gēé anī, ī-rāāī i majaĺ ō, ī-mānī i dɔ ndū najə̄ adə̄ ni-gān̄g sarya dɔsí tə́ ō. 10Tɔdɔ̄ ré deē kógə̄ḿ ngɔ̄m̄ gotə ndū najə̄ gə̄ malang ba əya̰ kógə̄ḿ kɔ̄ɔ́ anī, sarya yā ndū najə̄ gə̄ malang əhɔn. 11Tɔdɔ̄ nge ń əda na kə ī-rāȳ aĺ ní əda to̰ na kə ī-tɔ̄l̄ deē aĺ ō. Adə̄ ré ī-rāȳ aĺ ba ī-tɔ̄l̄ deē anī, ī-tél i nge mān̄ dɔ ndū najə̄ gə̄ tə́. 12Ɔ̄rī najə̄ ō, ī-rāāī yá̰a̰ ō, tītə̄ de gə̄ kə́ i ndū najə̄ kə́ dɔ téĺ kɔ́ɔ̄ rɔ̄ tə́ n a gān̄g sarya dɔdə́ tə́ beē. 13Tɔdɔ̄ deē ń a̰a̰ kum tō ndoō yā madə̄n gə̄ aĺ ní, Nə́ɓā a a̰a̰ kum tō ndoō yān loo sarya tə́ aĺ ō, banī ka̰a̰ kum tō ndoō i yá̰á̰ kə́ tetə sarya rɔ̄ɔ̄.
Taā kem ō, kəla rāān ō
14Ngákó̰ó̰ḿ gə̄, ré deē kógə̄ḿ əda na ni na n-taā kem Nə́ɓā, ba kəla rāān gə̄ gətóo anī, taā kem yān ní a teēn i rí? A asə kajən a? 15Ré ngōkó̰ó̰sí kógə̄ḿ kə́ dəngam aláa kə́ dəyá̰ kūbə̄ yān gətóo ō, yá̰a̰ kəsa yān kə́ kum tan kə́ ndɔ̄ kógə̄ḿ kógə̄ḿ gətóo ō, 16ba deē kógə̄ḿ dansí tə́ ədan na: Āw̄ kə kem sɔl̄ lɔmɔɔ́, ī-ndíbə̄ hor ō, ə́sá yá̰a̰ ādə̄ kemií ndān̄ ō, kanjə̄ kadə̄ adə̄n yá̰á̰ kə́ majə tām̄ yā dā̰ rɔ̄n tə́ anī, najə̄ ń əda ní a teē i rí? 17Taā kem i tītə̄ ń noō ō, ré rāā yá̰a̰ aĺ anī, i taā kem kə́ oy kɔ̄ɔ́.
18Banī deē kógə̄ḿ a əda na:
Ḭ̄ ə́da na ī-taā kem ba mā m̄-rāā kəla gə̄ kə́ ɔjən̄ kadə̄ m̄-taā kem. Ní, ɔ́jəm̄ taā kem yāí kə́ kanjə̄ kəlan ní, ba mā m-ā m-ɔ́jiī taā kem yāḿ i kə ta kūl̄ kəlan gə̄ kə́ m̄-rāā. 19Ré ī-taā kem kadə̄ Nə́ɓā i kal kógə̄ḿ beē anī, ī-rāā i yá̰á̰ kə́ majə, ba ndíĺ kə́ majaĺ gə̄ taān̄ kem ō, ɓōĺ rāādə́ adə̄ ndewn̄ yakə yakə ō. 20Ḭ̄ de kə́ kur̄ dɔí gətóo, ī-ndigə ger̄ kadə̄ taā kem kə́ kanjə̄ kəla rāān gə̄ i yá̰á̰ kə́ ndāńg karī a? 21Kaají Abəraham ní, i tām̄ kəla rāān gə̄ tə́ n ni-téləń de kə́ gōtə́, tām̄ ndējə̄ ń ni-ndējə̄ ngōnən Isaak dɔ loo tun̄ yá̰á̰ tə́ ní aĺ a? 22Á̰a̰ kadə̄ taā kem yān rāā kəla naā tə́ kə kəla yān gēé ō, kadə̄ taā kem yān reē majə ɔtə̄ kə taá mámák i kə ta kūl̄ kəla yān gēé ō, 23kadə̄ najə̄ ń ndangən̄ na Abəraham taā kem Nə́ɓā, ba Nə́ɓā na ɓārə́n na i de kə́ gōtə́ kə gō taā kem yānneé, adə̄ na ɓārə́n na i madə̄ tan ní udə gírí majə ō. 24Á̰a̰ī kadə̄ deē tél de kə́ gōtə́ i kə ta kūl̄ kəla rāān gə̄, ba i kə ta kūl̄ taā kem yān ngóy alé.
25I tītə̄ ń noō n Rahab ń i dəyá̰ ájə́ba ní téləń de kə́ gōtə́ ní aĺ a? Tām̄ ni-əhɔ ngé kaw̄ kəla gə̄ kə̄ rɔ̄n tə́, ba rāā sedə́ adə̄ aw̄n̄ kə róbə́ kə́ rangaá. 26Tɔdɔ̄ tītə̄ ń dā̰ rɔ̄ kə́ kanjə̄ koō kajə kemeé i kə́ koy kɔ̄ɔ́ ní, tītə̄ ń toō taā kem kə́ kanjə̄ kəla rāān gə̄ i kə́ koy kɔ̄ɔ́ ō.
Currently Selected:
JAKƏ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.