2 MBAN̄G 25
25
1Kem ɓāl̄ ko̰o̰ ɓē yā Sedekias kə́ nge ko̰ ndōhó tə́, kə ndɔ̄ nāā kə́ nge ko̰ kutə yā nāā kə́ nge ko̰ kutə kógə̄ḿ tə́ anī, Nabukodonosor mban̄g kə́ Babilon reē kə ɓūtə̄ áskar yān gēé malang yā rɔ̄ɔń ɓē kə́ Jerusalem. Ni əndā gérger yān adə̄ sɔɔ̄ ta ɓē. De kə́ Babilon gə̄ ndērə̄n̄ bəlo adə̄ gīr̄ gidə ɓē. 2Nin̄ utə̄n̄ ɓē bátə́ ugə̄ ɓāl̄ ko̰o̰ ɓē yā Sedekias kə́ nge ko̰ kutə gidə i kógə̄ḿ tə́. 3Ɓō i ngá̰ý kem ɓēé. De gə̄ əngen̄ yá̰á̰ kə́ yā kəsa to̰ alé. Kə ndɔ̄ nāā kə́ nge ko̰ ndōhó yā nāā kə́ nge ko̰ sɔ́ anī, 4de kə́ Kalde gə̄ tetən̄ dām̄ ndogə̄ mbal̄ kógə̄ḿ kə́ gidə ɓē kə́ Jerusalem tə́ nang tə́. Nin̄ gīrə̄n̄ gidə ɓē əlan̄ ta naā tə́ ɓá tā banī ndɔ̄ɔ́ anī, ngé rɔ̄ɔ̄ kə́ Juda gə̄ a̰ȳn̄ naā malang kə ta róbə́ kə́ mbənā ndogə̄ mbal̄ kə́ jōó gə̄ tə́, kadə ndɔr̄ yā mban̄g tə́. Ngé ka̰ȳ naā gə̄ unən̄ i róbə́ kə́ ndágə̄ mbō tə́. 5Banī ɓūtə̄ ngé rɔ̄ɔ̄ kə́ Kalde gə̄ sōngə̄n̄ gō mban̄g, aw̄ əngenən̄ kum ndágə mbō kə́ Jeriko tə́. Ngé rɔ̄ɔ̄ yān gə̄ əya̰nən̄ malang ba a̰ȳn̄ naā kɔ̄ɔ́. 6De kə́ Kalde gə̄ əhɔn̄ mban̄g Sedekias aw̄n̄ seneé Ribəla rɔ̄ mban̄g kə́ Babilon tə́ ba ədanən̄ najə̄ ń mban̄g əda dɔn tə́ ní. 7Tə́jān̄ míndə ngán Sedekias gə̄ ta kumən tə́. Gō tə́ anī Nabukodonosor tɔ́sə̄ kumən tɔ̄ɔ̄ ō, do̰ō̰n kə súĺ kə́ rāā kə nə̄ngá kasaá adə̄ ngan̄g ō, ba əla seneé Babilon.
Taān̄ ɓē kə́ Jerusalem
Kaw̄ ɓəloó kə́ nge ko̰ jōó
(Á̰a̰ī Jer 39.8-10; 52.12-30; 2 Yá̰a̰ 36.17-21)
8Kem ɓāl̄ kə́ nge ko̰ kutə gidə i ndōhó ń Nabukodonosor ndiń mban̄g Babilon ní, kə ndɔ̄ kə́ nge ko̰ sīrí yā nāā kə́ nge ko̰ mí tə́ anī, Nebujaradan ngol ngé ngɔ̄m̄ mban̄g gə̄ ń ni i nge kəla yā mban̄g kə́ Babilon ní, udə kem ɓē kə́ Jerusalem tə́. 9Ni-əla hor dɔ kújə yā Kɔ́ɔ̄ɓē tə́ ō, kújə yā mban̄g tə́ ō, kújə gə̄ kə́ kem ɓēé tə́ ō, ba mandang ní ni tə́la hor i dɔ kújə yā de kə́ bo gə̄ tə́ malang. 10Ngol ngé ngɔ̄m̄ dɔ mban̄g adə̄ ɓūtə̄ áskar gə̄ malang kə́ Kalde tə́ gə̄ tɔ̄ɔ̄n̄ ndogə̄ mbal̄ kə́ gidə ɓē kə́ Jerusalem tə́ kɔ̄ɔ́. 11Gō tə́ anī Nebujaradan ɔy gotə de gə̄ ń na̰yn̄ kem ɓēé ní ō, ngé gə̄ ń a̰ȳn̄ ta rɔ̄ɔ̄ tə́ a reē namə̄n̄ mban̄g kə́ Babilon tə́ ní ō, gotə kɔdə̄ gə̄ ō, aw̄ sedə́ Babilon. 12Banī əya̰ núsə́ ngé ndoō gə̄ kə́ kem ɓēé gə̄ kadə̄ ndɔrə̄n̄ kem kāgə̄ nduú gə̄ ō, kadə̄ ndɔrə̄n̄ ndɔr̄ kə́ rang gə̄ ō.
13De kə́ Kalde gə̄ tɔ̄ɔ̄n̄ gində̄ nə̄ngá kasə kə́ ngāl̄ gə̄#25.13 Gində̄ nə̄ngá kasə kə́ ngāl̄ gə̄: Á̰a̰ī 1 Mba 7.15 kə́ ta kújə yā Kɔ́ɔ̄ɓē tə́ kɔ̄ɔ́ ō, tétən̄ púsə gə̄ ō, tɔ̄ɔ̄n̄ bay kə́ bo kə́ rāā kə gində̄ nə̄ngá kasaá ō, kə́ ndágə́ kújə yā Kɔ́ɔ̄ɓē tə́ kɔ̄ɔ́, ba ɔyn̄ gində̄ nə̄ngá kasə gə̄ ń rāānəń yá̰a̰ gə̄ ń noō ní aw̄n̄neé Babilon. 14Nin̄ ɔyn̄ səmbē kə́ rúu gə̄ ō, pél gə̄ ō, kəyā gə̄ ō, kɔ̄ý gə̄ ō, ngán gájə́ yá̰a̰ rāā kəla gə̄ kə́ rāān̄ kə gində̄ nə̄ngá kasaá yā rāań kəla kə́ kem kújə yā Kɔ́ɔ̄ɓē tə́ malang ō, aw̄n̄neé. 15Ngol ngé ngɔ̄m̄ mban̄g gə̄ ɔy ganán gə̄ ō, bay gə̄ kə́ yā tə́teń yá̰a̰ gə̄ ō, kə́ rāān̄ kə lɔ́r ō, kə gində̄ arjā̰a̰ ō aw̄ń. 16Banī gində̄ nə̄ngá kasə kə́ ngāl̄ ké jōó gə̄ ō, bay kə́ bo ō, púsə gə̄ ō ń mban̄g Salomo̰ rāā tām̄ yā kújə yā Kɔ́ɔ̄ɓē tə́ ní tá dum̄ kadə̄ deē ger̄ kɔȳ gində̄ 17nə̄ngá kasə ń rāań ní. Gində̄ nə̄ngá kasə kə́ ngāl̄ kə́ jōó gə̄ ní asən̄ kíl kutə gidə i sɔ́sɔ́ kə́ dɔdə́ gēé. Rāān̄ yá̰á̰ kə́ tītə̄ jóo bo gə̄ jōó kə nə̄ngá kasaá tə́ndān̄ tadə́ gə̄ tə́. Yá̰á̰ kə́ tītə̄ jóo bo gə̄ ní ngāl̄də́ kə́ kə̄ dɔɔ́ i kíl mətá. Selə́n̄ réng gində̄ nə̄ngá kasə dɔ yá̰á̰ kə́ tītə̄ jóo bo gə̄ ní tə́ súūnəńdə́ ō, súūn̄ gidədə́ kə kan̄ kāgə̄ gərenadə gə̄ kə́ rāān̄ kə gində̄ nə̄ngá kasaá gə̄ ō. Gində̄ nə̄ngá kasə kə́ ngāl̄ kə́ jōó gə̄ ní ton̄ tītə̄ naā ō, réng gə̄ ní ton̄ tītə̄ naā ō.
18Ngol ngé ngɔ̄m̄ mban̄g gə̄ əhɔ Seraya ngol ngé tun̄ yá̰a̰ gə̄ ō, Sepania nge tun̄ yá̰a̰ kə́ nge ko̰ jōó ō, ngé ngɔ̄m̄ ta róbə́ kújə gə̄ ń nin̄ i deē mətá ní ō. 19Ni-əhɔ ngā gəra dɔ áskar gə̄ kógə̄ḿ ō, de kə́ ndogó mbangāá gə̄ mí ō, ngol áskar gə̄ kə́ nge ndang makətūbə̄ ń i nge kɔy de gə̄ áskaraá ní ō, de kə́ gō nang kə́ Juda tə́ gə̄ kutə mehḛ́ ō. Dan ń noō tə́ ní de gə̄ ń noō malang nin̄ i kem ɓē kə́ Jerusalem tə́. 20Nebujaradan ngol ngé ngɔ̄m̄ mban̄g gə̄ əhɔdə́ dəngáy. Ni-aw̄ sedə́ Ribəla rɔ̄ mban̄g kə́ Babilon tə́. 21Mban̄g kə́ Babilon tɔ̄l̄də́ Ribəla, dɔ nang kə́ Hamat tə́.
I beé n ɔyn̄neé de kə́ Juda gə̄ dɔ nang yādə́ tə́ aw̄n̄neé sedə́ sa̰y kɔ̄ɔ́ ní.
Gedalia, nge ko̰o̰ ɓē kə́ dɔ nang kə́ Juda tə́
(Á̰a̰ī Jer 40.7—41.18)
22Nabukodonosor mban̄g kə́ Babilon əya̰ núsə de kə́rēý gə̄ kem ɓēé dɔ nang kə́ Juda tə́. Ni-əndā Gedalia ngōn̄ Ahikam kə́ ngōn̄ Sapan dɔdə́ tə́. 23Dan ń ngol áskar gə̄ malang kə deē yādə́ gēé oōn̄ kadə̄ mban̄g kə́ Babilon əndā Gedalia dɔ ɓē tə́ anī, reēn̄ kə de gə̄ yādə́ gēé əngen̄ Gedalia kem ɓē kə́ Misəpa tə́. Ngol áskar gə̄ ní i Ismael kə́ ngōn̄ Netania ō, Yohanan kə́ ngōn̄ Karea ō, Seraya kə́ ngōn̄ Tanəhumet kə́ Netopa ō, Yajania ń i de kə́ gír kojə yā Maaka tə́ ní ō. 24Nin̄ malang ní Gedalia ənī ndūn adə̄də́ əda na:
Ī-lōō ɓōĺ rāā kəla yā de kə́ Kalde tə́ gə̄! Ī-ndiī kem ɓēé, ī-rāāī kəla ādī mban̄g kə́ Babilon anī rɔ̄sí a nel̄sí.
25Banī kə nāā kə́ nge ko̰ sīrí anī, Ismael kə́ ngōn̄ Netania, kə́ ngōn̄ Elisama ń gírən i mban̄g ní, ɔy de gə̄ kutə reē tɔ̄ləń Gedalia ō, de kə́ Juda gə̄ kə de kə́ Kalde tə́ gə̄ ń nin̄ i seneé ní ō, kem ɓē kə́ Misəpa tə́. 26Loo ń noō tə́ de kə́ kem ɓē gə̄ malang ō, ngol áskar gə̄ ō, aw̄n̄ Ejiptə, tɔdɔ̄ nin̄ ɓōlə́n̄ de kə́ Kalde tə́ gə̄.
Mban̄g kə́ Babilon rajə Joakin
(Á̰a̰ī Jer 52.31-34)
27Əhɔn̄ Joakin mban̄g kə́ Juda aw̄n̄ seneé Babilon. Ni rāā ɓāl̄ kutə mətá gidə i sīrí Babilon. Kem ɓāl̄ kə́ nge ko̰ kutə mətá gidə i sīrí tə́, kə ndɔ̄ kə́ nge ko̰ kutə jōó gidə i sīrí yā nāā kə́ nge ko̰ kutə gidə i jōó anī, Ewil Merodak mban̄g kə́ Babilon rāā kem ndaa seneé. Ni ɔrən dəngáyá kem ɓāl̄ ń ndiń mban̄g tə́ ní. 28Ewil Merodak ɔr̄ najə̄ seneé kə kemən kə́ majaá ō, adə̄n kor kāgə̄ mbang kə́ bo tɔȳ yā mban̄g kə́ rang gə̄ ń ndin̄ Babilon tītə̄ yān ní ō. 29Ni-adə̄n ta róbə kɔr̄ kūbə̄ dəngáy rɔ̄n tə́ kɔ̄ɔ́ ō, əla gír ndɔ̄ ń noō tə́ ní Joakin a əsa yá̰a̰ i ta kum mban̄g kə́ Babilon tə́ ō. 30I beé n mban̄g adə̄ń Joakin yá̰a̰ kəsa kə dɔ ndɔ̄ gə̄ malang ń Joakin ndiń kə kumneé ní.
Currently Selected:
2 MBAN̄G 25: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.