1 YÁ̰A̰ GƏ̄ 29
29
Kadə̄ karī gə̄ kə́ yā rāań kəla kújə yā Kɔ́ɔ̄ɓē
1Mban̄g Dabid əda ngé kán̄ naā gə̄ malang na: Ngōnə̄ḿ Salomo̰ ń Nə́ɓā gə̄rān ní i ngōn̄ ō, tɔ́gən asə yá̰a̰ aĺ ō, tá kəla ní i kəla kə́ bo ngá̰ý ō. Tɔdɔ̄ kújə mbang ní i tām̄ yā deē tə́ alé, banī i tām̄ yā Kɔ́ɔ̄ɓē Nə́ɓā tə́. 2M-ə́hɔ rɔ̄ḿ tɔgə m-ɔ́sə nja yá̰a̰ gə̄ malang naā tə́ tām̄ yā kújə yā Nə́ɓā tə́. m̄-kán̄ lɔ́r ō, gində̄ arjā̰a̰ ō, gində̄ nə̄ngá kasə ō, gində̄ kə́ karī ō, kāgə̄ ō, kə̄ dɔ naā tə́ yā rāań yá̰a̰ malang kə́ yā rāā kə yá̰a̰ gə̄ ń noō. m̄-kán̄ mbal̄ kornalin ō, mbal̄ kə́ rang gə̄ kə́ yā rāań ro̰ yá̰a̰ gə̄ ō, mbal̄ kə́ ndul gə̄ ō, kə́ ɓáĺdə́ i tayā tayā gə̄ ō, mbal̄ gə̄ kə́ gātə̄də́ i ngá̰ý gə̄ ō, mbal̄ albatər ō, ngá̰ý kə̄ dɔ naā tə́. 3Yá̰a̰ malang ń m-ɔ́sə dɔ naā tə́ yā rāań kújə́ kə́ táĺ ngeé ń toō ní, m-ādə̄ lɔ́r yāḿ mə̄kɔ́ ō, gində̄ arjā̰a̰ yāḿ mə̄kɔ́ ō, dɔ tə́ ɓáý to̰, tām̄ nel̄ kə́ nelə̄m̄ kə kújə yā Nə́ɓā yāḿ ngá̰ý. 4Lɔ́ŕ kə́ Opir ń m-ādə̄ ní, kɔȳn i kəlōo dūbú ɓú ō, gində̄ arjā̰a̰ kə́ unjə̄ njáý njáý kə́ yā kutə̄ń gidə bɔr kə́ tū kújə yā Kɔ́ɔ̄ɓē tə́ ń m-ādə̄ ní, kɔȳn i kəlōo dūbú ɓú jōó kə kutə sɔ́ ō. 5Ba ngɔlaā ní i náā kə́ rang kə́ dɔ dáńsí tə́ n ndigə kadə̄ Kɔ́ɔ̄ɓē lɔ́r, aláa gində̄ arjā̰a̰ kə gō kem ndigə yān nəkɔ́ kadə̄ kɔdə̄ gə̄ rāān̄neé yá̰a̰ malang kə́ yā rāā kə lɔ́rɔ́ aláa kə gində̄ arjā̰a̰á̰ ní?
6Loo ń noō tə́ ngār gə̄ kə́ dɔ gír kojə gə̄ tə́ ō, kə́ dɔ gír ɓē gə̄ yā Israel tə́ ō, ngol áskar kə́ dūbú gə̄ ō, kə́ ɓú gə̄ ō, jama dɔ ngé rāā kəla yā mban̄g gə̄ ō, adə̄n̄ yá̰a̰ kə gō kem ndigə yādə́ nin̄ kɔ́ gɔ̄ɔ́, 7tām̄ yā kəla kújə yā Nə́ɓā tə́. Lɔ́ŕ ń adə̄n̄ ní kɔȳn i kəlōo dūbú ɓú kə kutə sīrí ō, sə́lē lɔ́r gə̄ i dūbú kutə ō. Gində̄ arjā̰a̰ ń adə̄n̄ ní kɔȳn mān̄ kəlōo dūbú ɓú mətá ō. Gində̄ nə̄ngá kasə ń adə̄n̄ ní, kɔȳn asə kəlōo dūbú ɓú mehḛ́ ō, gində̄ kə́ karī ń adə̄n̄ ní, kɔȳn mān̄ kəlōo dūbú mətá ō. 8Ngé gə̄ ń əngen̄ mbal̄ gə̄ kə́ gātə̄də́ i ngá̰ý gə̄ ní, adə̄n̄ Yehiel kə́ gír kaa yā Gerson tə́ tām̄ yā rāań loo ngɔ̄m̄ yá̰a̰ yā Kɔ́ɔ̄ɓē kə́ gātə̄də́ i ngá̰ý. 9De gə̄ malang ń noō adə̄n̄ yá̰a̰ kənge yādə́ gə̄ tām̄ yā Kɔ́ɔ̄ɓē tə́ i kə kem kə́ majaá ō, rɔ̄də́ nel̄də́ tāmən tə́ ō. Rɔ̄ mban̄g Dabid nelə̄n ngá̰ý ō.
Ndɔ̄ȳ yā Dabid
10Dabid tɔ̄ȳ Kɔ́ɔ̄ɓē ta kum ngé kán̄ naā gə̄ tə́ malang əda na: Kɔ́ɔ̄ɓē, Nə́ɓā yā kaaḿ Israel, ādə̄ de gə̄ ɓōkə́nī tɔ̄ȳ kə kum mbang gə̄ malang. 11Kɔ́ɔ̄ɓē, ḭ̄ i de kə́ bo ō, tɔ́gí i ngá̰ý ō, ī-ndə́lē pipir ō, ī-to ɓōĺ ō, ī-to kadə̄ ɔsən̄ gɔnií ō, tɔdɔ̄ yá̰a̰ malang kə́ dɔ rā̰ tə́ ō, kə́ dɔ nang tə́ ō i yāí. Ko̰o̰ ɓē i yāí ō, i ḭ̄ n i dɔ de gə̄ tə́ malang ō ní. 12Yá̰a̰ kənge ō, kɔsə gɔn ō, ḭḭn̄ i rɔ̄í tə́ ō, i ḭ̄ n ó̰o̰ ɓē dɔ yá̰a̰ gə̄ tə́ malang ní ō. Tɔ́gə ō, ngan̄g ō, i kem jīí tə́. Kɔsə yá̰a̰ kə̄ dɔɔ́ ō, kadə̄ yá̰á̰ tɔ́gə ō, i kəla rāāí. 13Nə́ɓā yājí, i tām̄ najə̄ ń noō tə́ n j-ɔsəń gɔnií ō, jə-tɔ̄yń rīí kə́ majə ngá̰ý ō ní. 14Mā ō, gír deē yāḿ gə̄ ō, jḭḭ i yá̰a̰ alé. I jḭḭ kə dɔjí n j-asə ndējī kadə karī gə̄ ń toō kə gō kem ndigə yājí ní alé. Yá̰a̰ malang ḭḭ i rɔ̄í tə́ ō, yá̰á̰ ń j-adī ní teē i jīí īkɔ́ tə́ ō. 15Tɔdɔ̄ ta kumií tə́ ní, jḭḭ i tə̄rā gə̄ ō, ngé nam̄ gə̄ ō, tītə̄ yā kaají gə̄ malang. Ndɔ̄jí gə̄ ń jə-ndiń kə kumjí dɔ nang tə́ ní mānə̄n̄ láẃ ngá̰ý tītə̄ ndíl beé ō, j-asə kənī ndɔ̄jí ta madə̄ tə́ aĺ ō. 16Kɔ́ɔ̄ɓē Nə́ɓā yājí, yá̰a̰ malang ń j-ɔsə dɔ naā tə́ yā rāań kújə yāí kə́ tām̄ yā rīí kə́ táĺ tə́ ní, ḭḭ i rɔ̄í tə́ ō, i yá̰a̰ yāí ō. 17Nə́ɓā yāḿ, m̄-ger̄ kadə̄ ḭ̄ i nge kəndā ma̰ȳ kem deē ō, nge ndigə háĺ kə́ súmūú ō. Adə̄ i kə kem kə́ súmūú n m̄-ndējīneé yá̰a̰ malang ń noō kə gō kem ndigə yāḿ ní. Ba ɓōólaā gír deē yāí gə̄ ń kánə̄n̄ naā á ran̄ laā ní, m-á̰á̰də́ loo rāā tə́ tītə̄ yāḿ kə rɔ̄nelēé ō. 18Kɔ́ɔ̄ɓē, Nə́ɓā yā kaají Abəraham ō, kaají Isaak ō, kaají Israel ō, ī-rāā ādə̄ ndíl deē yāí gə̄ ndigə yá̰á̰ kə́ beē ngándáńg ō, ī-tūr̄ kemdə́ kə ngangá kum kə̄ rɔ̄í tə́ ō. 19Ādə̄ ngōnə̄ḿ Salomo̰ kem kə́ ndigə ngɔ̄m̄ gō míndí gə̄ ō, yá̰á̰ ndóō yāí gə̄ ō, yá̰a̰ gə̄ ń ī-ndang kadə̄ yā rāā gə̄ ní ō, tá kadə̄ rāań yá̰a̰ gə̄ ń noō malang ō, rāań kújə mban̄g ń m-ɔ́sə nja yá̰a̰ gə̄ ń toō malang naā tə́ yā rāań ní ō.
20Gō tə́ anī Dabid əda ngé kán̄ naā gə̄ malang na: Ī-ndadī Kɔ́ɔ̄ɓē Nə́ɓā yāsí! Anī ngé kán̄ naā gə̄ malang ndadə̄n̄ Kɔ́ɔ̄ɓē Nə́ɓā yā kaadə́ gə̄. Nin̄ ɔsən̄ nodə́ nang tə́ no Kɔ́ɔ̄ɓē tə́ ō, no mban̄g tə́ ō rɔȳn̄neédə́.
Əndān̄ Salomo̰ mban̄g - Dabid oy
21Teē kə ndɔ̄ kə́ noō anī ndējə̄n̄ Kɔ́ɔ̄ɓē yá̰a̰ tun̄ gə̄ kə́ tām̄ yā kem kógə̄ḿ tə́ ō, yá̰a̰ tun̄ kə́ róō horoó gə̄ ō. Adə̄ i man̄g kə́ bəra gə̄ dūbú ō, bal batə̄ gə̄ dūbú ō, ngán batə̄ gə̄ dūbú ō, tə́ten̄ kasə nduú dɔ tə́ ō. Kutə̄ dā̰ gə̄ ń tɔ̄l tunə̄n̄ tām̄ yā kem kógə̄ḿ tə́ ní i ngá̰ý adə̄ asə kadə̄ Israel gə̄ malang ń kánə̄n̄ naā ní əsan̄. 22Ndɔ̄ ń noō tə́ əsan̄ yá̰a̰ ō, a̰ȳn̄ ō, kə rɔ̄nel̄ kə́ ngá̰ý ta kum Kɔ́ɔ̄ɓē tə́, ba əndān̄ Salomo̰ ngōn̄ Dabid mban̄g nja kə́ nge ko̰ jōó ō#29.22 K. 22 Á̰a̰ī 23.1, urən̄ yibə̄ mban̄g dɔn tə́ tām̄ yā Kɔ́ɔ̄ɓē tə́ ō, urən̄ yibə̄ dɔ Sadok tə́ kadə̄ ni i nge tun̄ yá̰a̰ ō. 23Salomo̰ ndi dɔ kōr̄ kāgə̄ mbang yā Kɔ́ɔ̄ɓē tə́ gotə bɔbə̄n Dabid tə́. Ni ɔjə hálən kə́ majə kə̄ ndágá adə̄ Israel gə̄ malang oōn̄ tan. 24Ngār gə̄ malang ō, go̰ rɔ̄ɔ̄ gə̄ ō, gotə ngán Dabid kə́ rang gə̄ malang ō, əlan̄ dɔdə́ gír tɔ́gə yā mban̄g Salomo̰ tə́. 25Kɔ́ɔ̄ɓē ɔsə Salomo̰ kə̄ dɔɔ́ ngá̰ý ta kum Israel gə̄ tə́ malang ō, adə̄ ko̰o̰ ɓē yān kɔsə gɔn kə́ tɔȳ yā mban̄g gə̄ ń ndin̄ dɔ kōr̄ kāgə̄ mbang kə́ Israel tə́ kété non tə́ ní ō.
26Dabid ngōn̄ Jese o̰o̰ ɓē dɔ Israel gə̄ tə́ malang. 27Ni-o̰o̰ ɓē dɔ Israel gə̄ tə́ ɓāl̄ kutə sɔ́. Adə̄ i ɓāl̄ sīrí Hebron ō, ɓāl̄ kutə mətá gidə i mətá Jerusalem ō. 28Ni-ndi i kə rɔ̄nelēé dɔ ɓə́gan tə́ n oyń ní. Ndɔ̄n gə̄ i ngá̰ý ō, ənge yá̰á̰ ngá̰ý ō, ɔsən̄ gɔnən ngá̰ý ō. I ngōnən Salomo̰ n o̰o̰ ɓē gotən tə́ ní.
29Kəla rāā mban̄g Dabid kə́ ta kəla gíŕ tə́ bátə́ ta tɔ̄l̄ ta tə́ ní, i kə́ ndang kem makətūbə̄ kəla rāā Samuel nge ka̰a̰ yá̰á̰ tə́ ō, makətūbə̄ kəla rāā Natan nge koō ta yā Nə́ɓā tə́ ō, makətūbə̄ kəla rāā Gad nge ka̰a̰ yá̰á̰ tə́ ō. 30Ɔjən̄ najə̄ ko̰o̰ ɓē yān kemeé ō, najə̄ ngangə̄n ō, yá̰á̰ kə́ ngan̄g gə̄ ń əngen ní ō, yá̰á̰ kə́ ngan̄g gə̄ ń rāā Israel gə̄ ō, ɓē ko̰o̰ gə̄ malang ní ō.
Currently Selected:
1 YÁ̰A̰ GƏ̄ 29: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.