Mat 27
27
Awïn kï Jeju nõ Pilat't
(Oo Mrk 15:1; Luk 22:66 teen 71; 23:1)
1Lon loti woi, kïsî ritït ngéjamosïkadkari kïbog, kï kïbog lo Juipg tube øjïn na ta dø Jejut kï'n tølïna. 2Døøna, kamla awïn sia lana ji Pilat't kï ngekõþe.
Koi Judas
(Oo Knk 1:16 teen 20)
3Kamla, lon Judas nge laa ji degt, oo ad gangïn ta dø Jejut woi ye, ndïngaron, na tel kï nar sile kïnda kïdømïta nõ gog ad ngéjamosïkadkari kïbog, kï kïbog lo Juipg, 4na el an: M'ða majal la m'la de kï ta loa goto jisït ye.
Na turïna anan: Usïj ðit. I ta loi î kïþe.
5Kamla Judas ü nar sile kïnda kïdømïta nõ kø kï kam lo kïjaþat't, na tee aw la kïla oin. 6Ngéjamosïkadkari kïbog ndegïn nar sile kïnda'n non kï nat na anan: I goðobat al kad j'ü kam sund nart lo Luwah kïta i nar mosï.
7Øjïn na ta døt kamla ndugon ne ndøø lo ngeþajo, kad kï i lo dub dedøþeg. 8I kïta 'nten la a kunïn ne ndøøn non ndøø mosï mbã þola ye. 9Kamla tølïn ta ta'n Jeremi ngekelta kï ta Luwaht el an: Na taan nar sile kïdømïta i gat de'n ndan gata, gat'n ngan Israelg ndan kïta badøa. 10Na adïn kïta ndugo lo lo ngeþajo, tit'n Bïraþe ndamïn mbera.
Jeju ða nõ Pilat't
(Oo Mrk 15:2 teen 5; Luk 23:3 teen 5; Jã 8:28—19:16)
11Jeju ða nõ ngekõþet. Ngekõþe ndïjea ta an: Î ngar lo juipg e? Jeju tura an: Î el woi.
12Na lon ngéjamosïkadkari kïbog, kï kïbog lo Juipg ða tetïn ta kï køat ye, tur nya mad al. 13Kamla Pilat ela an: Ða tetïn tag ngãibe kï døit ye, oo dø ale?
14Tura ta mad kïða al bat, ad ta ya ngekõþe kï dum. 15Ndø ðanaht kïðen, i nyabelþe lo ngekõþe kad nya de dangãi mad kïða ad koosïdeg, de'n hã ndigna. 16Kaglot'n non dedangãi mad kï tøa ko ngãi i nõ, tøa i Jeju Barrabas. 17Koosïdeg kawïna kï nat, na Pilat ndïjed tø an: Nõ i geen kad kï m'ørra m'adsï a? Jeju Barrabas a ke Jeju'n a kunïna Krist ye a?
18Pilat ger þet kad Juipg lan Jeju kam jint kïta jangïn sia. 19Lon Pilat ndï dø pong gangtat þaitø ye, nëa la ela an: Ot nda roi tat lo de kï dene'n non. Kïtø ndø la m'dai yom ngãibe kam niit kïtatøa.
20Ngéjamosïkadkari kïbog kï kïbog lo Juipg dumïn dø koosïdeg kad kø'n kørr Barrabas, na kï tølïn Jeju. 21Ngekõþe tel ndïje ta an: Dan degt kï joo'n ðan ye m'ørr kïða m'adsï?
Turïn anan: Barrabas.
22Pilat ndïjed an: M'a m'ða ði kï Jeju'n a kunïna Krist ye a?
Tube turïn anan: Kï gana kagdosït.
23Tel el an: Majal ði ða a?
Na koosïg kon kï tøgd kï døt anan: Kï gana kagdosït.
24Lon Pilat oo kad ta lon ða nya mad al, na þet ndoor a þai ye, un man na tugo jin nõ koosïgt, na an: Mî kïkanj ta dømt dø mosï det kïdenesew'n ðan. I ta losï.
25Deg tube turïn anan: J'un mosa kï døjt kï kï dø nganjgt.
26Kamla Pilat ørr Barrabas ad'd. Na ad ndan Jeju kï ndeh kamla laa jidt kad gana kagdosït.
Asïgarg tajïn Jeju
(Oo Mrk 15:16 teen 20; Jã 19:2 teen 3)
27Kamla ngéðøøg lo ngekõþe awïn kï Jeju natþet lo ngar, na þut ngéðøøg tube kawïn na gugïn døa. 28Ngîn kubg loa roat kø, na lana kubji kï kïrre pïrpïr; 29jon kon jøgt lan døat, lan kadnya jikõat; øsïn gojd ber nõat, ølïna anan: Lapia, ngar lo juipg.
30Tuwïn horr døat, na tan kadnya kï jiat, ndan ne døa. 31Lon ølïna woi ye, ørrïn kubji ka nõ roat na lana kubg loa. Kamla awïn sia kad gana kagdosït.
Gan Jeju kagdosït
(Oo Mrk 15:21 teen 41; Luk 23:26 teen 49; Jã 19:16 teen 30)
32Lon ndï teen sia kï tïga gid þet ye, ndødïn dekïdïngã mad kï Sirent, tøa i Simõ; høna kïlo ngetøgt kad to kagdosï lo Jeju. 33Lon ten lot mad'n a kunïna Golgota ad i Lo kadø de ye, 34adïn Jeju man kand nduu kï bur kï man nya kï at bang kad ãi. Jeju ød tant oo, na gee kãi al. 35Lon gana kagdosït woi ye, yan yuk dø kubgt loa kegïn ne na. 36Na ndïn ber nõbe ndï ngomïna. 37Ndangïn ta'n gangïn ne ta døat ye, ndan døat dõ, kam taa la ten: De'n ðan i Jeju ngar lo Juipg. 38Gan deg ngékumðobg joo kagdosït nat sia, kïkïða ko kõat, kïmad ko gelat. 39Ngé tøi ðobo tajïna, gan død kïðo, kïðo, 40na anan: Î kï nge tuj kuj kïjaþat lo Luwah, na i ða gog kam ndøt kïmïta kaala; ye aj roi kï roi, îla î Ngon Luwah, na i ðisi kagdosït. 41Ngéndang maktubg sed kïbog lo Juipg kï ngéjamosïkadkari kïbog ølïna titbe ho anan: 42Aj deg madg, na î kïþe asï kaj ron kï ron al. I ngar lo Israel ye, kï ðisï tajigla kagdosït, na j'a j'ada kamj. 43Nda kamïn dø Luwaht ye, ad Luwah aja tajigla, îla Luwah tara, kïta el an: Mî Ngon Luwah. 44Mbã ngékumðobg'n gand kagdosït nat sia kaa tajïna titbe ho.
Koi Jeju kagdosït
(Oo Mrk 15:33 teen 41; Luk 23:44 teen 49; Jã 19:28 teen 30)
45Kï kàd kï ða den þet, til dïw ut døning tube mbã kàd norr jin. 46Kï kàd kï norr jin Jeju ko kï ndin kïbobe an: Eli, Eli, Lama Sabaktani? Ad el an: Luwah lom, Luwah lom, kïtøði i nyamkø a?
47Deg madg'n ðan loat, oon dø ndia ye anan: Oon ða kun Eli.
48Tentenbe kïkïða kudt ãi ngød la ndøkørø kam man kand nduut kï masï unïn, la ta kadnyat ada kad ãi. 49Kïmadg anan: I ngoo ad joo ke Eli a ðe aja a?
50Na Jeju tel ko kï ndïn kïbobe kamla nya ndilïn ad tee. 51Na oon kub ganglo kï kam kuj ndub Luwaht til dene joo, dõ mbã ü ber; døning ye, mbalg riyan, 52døþadg teen tad, deg kïjaþatg ngãibe'n oin, þaïn lo koit: 53teen kø kam døþadgt, na go þai Jeju lo koit, andïn kam þebot kïjaþat, na teen høi kï ro degt ngãibe. 54Lon bïradø ngéðøøg kï îgïn ndï ngomïn Jeju nat sia oon yee døning kï nya'n ða nya ye, þool ðad ngãi ad anan: Rota în ðan i ngon Luwah.
55Dekïdëg ngãibe'n a ndulon go Jeju Galilet nu kï'n ðan kïlaþer n'adïna, ðan nõbe ða oon lo ko sãi. 56Mari kï Magdalat, Mari kõ Jã kï Jojep, kï kõ ngan Jebede în kudt nõ.
Duwïn Jeju bulo mbalt
(Oo Mrk 15:42 teen 47; Luk 23:50 teen 56; Jã 19:38 teen 42)
57Lon lo søl woi ye, de mad kï ngemaj kï Arimatet tøa i Jojep ðe, î kaa tel ngendoo lo Jeju ho. 58De'n non aw ro Pilat't køa dãro Jeju. Kamla Pilat un ndin kad adïna. 59Jojep un dãro Jeju, þïra kï kub lin kï kar nyang, 60na laa kam þe nint lon kï kij'n urrïn kam mbalt. Kamla ndubïr gaj mbal mad kïbobe utïn ta þe nin na aw. 61Na Mari kï Magdalat kï Maði kïmad în nõ, ndïn ber kumd sumba døþad.
Deg ða ngomïn døþad
62Loti ndø ðago nyagt, kïta ndø taakò lo Juipg, ngéjamosïkadkari kïbog kï Parisïg kawïn na kïnat ro Pilat't. 63Anan: Ngej, kamj ga dø ta lo ngégool deg'n non lon ndïn kï døn dõ þaitø nõ, el an: Go ndøt kïkõmïta a ne, n'an þai lo koit. 64Kïtø 'nten maj kad el kad ngomïn døþad maj mbã ndø kïkõmïta na þeta ngéndoog loa ðe þoogïna, na elïn deg anan: Þai lo koit. Gool kï døboit a majal tøi kïdasa.
65Pilat eld kï ndin dõ an: Awïn kï ngéngomlo nõ. Awïn ad ngomïn døþad tit'n i gerïn ne.
66Ta la awïn a kï tïnyan mbal kïtaþe nit kï nyatïnyanya kï ngang, na ndan ngéngomlog tat.
Currently Selected:
Mat 27: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.